20 ವರ್ಷಗಳ ದಾಖಲೆ ಮುರಿಯಲಿದೆ ಭಾರತದ ಜಿಡಿಪಿ ದರ; ಕೊರಿಯನ್ ಅರ್ಥಶಾಸ್ತ್ರಜ್ಞರ ವಿಶ್ಲೇಷಣೆ ಇಲ್ಲಿದೆ

ನವದೆಹಲಿ, ಅಕ್ಟೋಬರ್ 17: ಭಾರತೀಯ ಅರ್ಥವ್ಯವಸ್ಥೆಯು ದಶಕಗಳಲ್ಲೇ ಕಾಣದಂತಹ ಸತತ ಬೆಳವಣಿಗೆಯ ಹಾದಿಯಲ್ಲಿದ್ದು, ಶೇ. 7ಕ್ಕಿಂತ ಹೆಚ್ಚಿನ ಜಿಡಿಪಿ ಪ್ರಗತಿಯ ದೀರ್ಘಾವಧಿ ದಾಖಲೆಯನ್ನು ಮುರಿಯಲು ಸಜ್ಜಾಗಿದೆ ಎಂದು ಕೊರಿಯಾ ಇನ್‌ಸ್ಟಿಟ್ಯೂಟ್ ಫಾರ್ ಇಂಟರ್​ನ್ಯಾಷನಲ್ ಎಕನಾಮಿಕ್ ಪಾಲಿಸಿಯ ದಕ್ಷಿಣ ಏಷ್ಯಾ ಮುಖ್ಯಸ್ಥ ಕ್ಯುಂಗ್‌ಹೂನ್ ಕಿಮ್ ಅಭಿಪ್ರಾಯಪಟ್ಟಿದ್ದಾರೆ. ಈ ಬಗ್ಗೆ ಸಾಮಾಜಿಕ ಜಾಲತಾಣ ಎಕ್ಸ್​ನಲ್ಲಿ ಈ ಕುರಿತು ಸರಣಿ ಪೋಸ್ಟ್‌ಗಳನ್ನು ಹಂಚಿಕೊಂಡಿರುವ ಅವರು, ಕೊವಿಡ್-19 ಸಾಂಕ್ರಾಮಿಕದ ನಂತರವೂ ಭಾರತದ ಅರ್ಥವ್ಯವಸ್ಥೆ ಅತ್ಯಂತ ಪ್ರಬಲವಾದ ಬೆಳವಣಿಗೆಯನ್ನು ಕಾಯ್ದುಕೊಂಡಿದೆ ಎಂದು ಉಲ್ಲೇಖಿಸಿದ್ದಾರೆ.

ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್​), ವಿಶ್ವ ಬ್ಯಾಂಕ್ ಮತ್ತು ಏಷ್ಯನ್ ಡೆವಲಪ್‌ಮೆಂಟ್ ಬ್ಯಾಂಕ್ (ಎಡಿಬಿ) ಸಂಸ್ಥೆಗಳು ಭಾರತದ ಆರ್ಥಿಕ ಬೆಳವಣಿಗೆಯ ದರವು ಶೇ. 7 ಅಥವಾ ಅದಕ್ಕಿಂತ ಹೆಚ್ಚಿರಲಿದೆ ಎಂದು ಅಂದಾಜಿಸಿವೆ.

ಇದನ್ನೂ ಓದಿ: 2027ರಲ್ಲಿ ಭಾರತದ್ದು 4.52 ಟ್ರಿಲಿಯನ್ ಡಾಲರ್ ಜಿಡಿಪಿ; ಜಪಾನ್ ಹಿಂದಿಕ್ಕಿ 4ನೇ ಸ್ಥಾನಕ್ಕೇರಲಿದೆ: ಐಎಂಎಫ್ ವರದಿ

2003-2007ರ ದಾಖಲೆ ಸರಿಗಟ್ಟಿದ ಭಾರತ:

ಕೊರಿಯನ್ ಅರ್ಥಶಾಸ್ತ್ರಜ್ಞ ಕ್ಯುಂಗ್‌ಹೂನ್ ಕಿಮ್ ಪ್ರಕಾರ, ಭಾರತವು ಈಗಾಗಲೇ ಸತತ 5 ಕ್ಯಾಲೆಂಡರ್ ವರ್ಷಗಳಲ್ಲಿ ಶೇ. 7ಕ್ಕಿಂತ ಹೆಚ್ಚಿನ ಜಿಡಿಪಿ ಬೆಳವಣಿಗೆಯನ್ನು ದಾಖಲಿಸಿದೆ. ಈ ಮೊದಲು 2003ರಿಂದ 2007ರ ಅವಧಿಯಲ್ಲಿ ಭಾರತ ಇಂತಹದ್ದೇ ಸಾಧನೆ ಮಾಡಿತ್ತು. ಅಂತಾರಾಷ್ಟ್ರೀಯ ಸಂಸ್ಥೆಗಳು ನೀಡಿರುವ ಪ್ರಸ್ತುತ ಆರ್ಥಿಕ ಮುನ್ನೋಟಗಳು ನಿಜವಾದರೆ, ಭಾರತವು ತನ್ನ 20 ವರ್ಷಗಳ ಹಳೆಯ ದಾಖಲೆಯನ್ನು ಮುರಿದು, ಸಾರ್ವಕಾಲಿಕ ದೀರ್ಘಾವಧಿಯ ಆರ್ಥಿಕ ಪ್ರಗತಿಯ ಹೊಸ ಇತಿಹಾಸ ಬರೆಯಲಿದೆ.

Nearly all major forecasters, including the IMF, ADB and World Bank, have recently raised their growth forecasts for India to above 7% for this year AND next. Remarkable in itself – even more so when viewed against India’s recent performance. (1/n) https://t.co/3xfQdPvEsY

— Kyunghoon Kim (@Kyunghoon_Kim_) October 16, 2026

20 ವರ್ಷಗಳ ಹಳೆಯ ದಾಖಲೆ ಹೇಗೆ ಮುರಿಯಲು ಸಾಧ್ಯ?:

ಕಿಮ್ ಹಂಚಿಕೊಂಡ ಮಾಹಿತಿಯ ಪ್ರಕಾರ, ಸಾಂಕ್ರಾಮಿಕ ರೋಗದ ಸಮಯದಲ್ಲಿ ಭಾರತದ ಆರ್ಥಿಕತೆಯು 2020ರಲ್ಲಿ ಶೇ. 5.8ರಷ್ಟು ಕುಗ್ಗಿತು. ಆದರೆ 2021ರಲ್ಲಿ ಶೇ. 9.7ರಷ್ಟು ಚೇತರಿಸಿಕೊಂಡಿತು. ನಂತರದ 4 ವರ್ಷಗಳಲ್ಲಿ, ಆರ್ಥಿಕತೆಯು ಪ್ರತಿ ವರ್ಷ ಶೇ. 7ಕ್ಕಿಂತ ಹೆಚ್ಚು ಬೆಳೆಯಿತು. “ಇದು 2003-2007ರ ಅವಧಿಗೆ ಹೋಲಿಸಿದರೆ ಶೇ. 7ಕ್ಕಿಂತ ಹೆಚ್ಚಿನ ಸತತ 5 ವರ್ಷಗಳ ಬೆಳವಣಿಗೆಯನ್ನು ಪ್ರತಿನಿಧಿಸುತ್ತದೆ” ಎಂದು ಕಿಮ್ ಹೇಳಿದ್ದಾರೆ.

ಇದನ್ನೂ ಓದಿ: ಭಾರತದ ಹೊಸ ಜಿಡಿಪಿ ದರ ಲೆಕ್ಕಾಚಾರ ಸರಿಯಾಗಿದೆ: ಐಎಂಎಫ್ ಸ್ಪಷ್ಟನೆ 

2003ರಿಂದ 2007ರವರೆಗಿನ ಅವಧಿಯು ಭಾರತದ ನಿರಂತರ ಆರ್ಥಿಕ ವಿಸ್ತರಣೆಯ ಅತ್ಯಂತ ಬಲವಾದ ಅವಧಿಗಳಲ್ಲಿ ಒಂದಾಗಿತ್ತು, ಆ ಸಮಯದಲ್ಲಿ ದೇಶವು ಅಂತಾರಾಷ್ಟ್ರೀಯ ಹೂಡಿಕೆದಾರರಿಂದ ಭಾರೀ ಗಮನವನ್ನು ಸೆಳೆಯಿತು. ಇತ್ತೀಚೆಗೆ, ಐಎಂಎಫ್ 2026-27ನೇ ಸಾಲಿಗೆ ಭಾರತದ ಬೆಳವಣಿಗೆಯ ಮುನ್ಸೂಚನೆಯನ್ನು ಶೇ. 6.4ರಿಂದ ಶೇ. 7ಕ್ಕೆ ಹೆಚ್ಚಿಸಿದೆ. ಅಕ್ಟೋಬರ್‌ನಲ್ಲಿ ಬಿಡುಗಡೆಯಾದ ವಿಶ್ವ ಆರ್ಥಿಕ ಔಟ್‌ಲುಕ್ ವರದಿಯ ಪ್ರಕಾರ, 2027-28ರಲ್ಲಿ ಶೇ. 7ರಷ್ಟು ಬೆಳವಣಿಗೆಯನ್ನು ನಿರೀಕ್ಷಿಸಲಾಗಿದೆ. ಹೆಚ್ಚಿನ ಜಾಗತಿಕ ಇಂಧನ ಬೆಲೆಗಳು, ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳು ಮತ್ತು ಹಲವಾರು ಪ್ರಮುಖ ಆರ್ಥಿಕತೆಗಳಲ್ಲಿ ಆರ್ಥಿಕ ಬೆಳವಣಿಗೆಯನ್ನು ನಿಧಾನಗೊಳಿಸುವ ಬಗ್ಗೆ  ಹೆಚ್ಚುತ್ತಿರುವ ಕಳವಳಗಳ ನಡುವೆ, ಈ ಪರಿಷ್ಕರಣೆಗಳು ಗಮನಾರ್ಹವಾಗಿವೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 9:37 pm, Sat, 17 October 26