ಹಾರ್ಮುಜ್ ಜಲಸಂಧಿಯಲ್ಲಿ ಇರಾನ್​ನಿಂದ ಹೈಟೆಕ್ ಟೋಲ್​ಬೂತ್; ಯುಆನ್, ಕ್ರಿಪ್ಟೋದಲ್ಲಿ ಟೋಲ್ ಕಟ್ಟಿರಿ, ಸೀಕ್ರೆಟ್ ಕೋಡ್ ಪಡೆಯಿರಿ

ನವದೆಹಲಿ, ಏಪ್ರಿಲ್ 3: ಗಲ್ಫ್ ರಾಷ್ಟ್ರಗಳಿಂದ ತೈಲ ಪೂರೈಕೆಯ ಸಮುದ್ರ ಮಾರ್ಗದಲ್ಲಿರುವ ಹಾರ್ಮುಜ್ ಜಲಸಂಧಿಗೆ (Hormuz Strait) ಇರಾನ್​ನಿಂದ ತಡೆ ಬಿದ್ದಿದೆ. ಯುಎಇ, ಸೌದಿ, ಬಹರೇನ್ ಸೇರಿದಂತೆ ಹೆಚ್ಚಿನ ಕೊಲ್ಲಿ ದೇಶಗಳು ಅಮೆರಿಕದ ಪರ ಇರುವುದರಿಂದ ಇರಾನ್ ಬಹುತೇಕ ಏಕಾಂಗಿಯಾಗಿ ಹೋರಾಡುತ್ತಿದೆ. ಹಾರ್ಮುಜ್ ಜಲಸಂಧಿಯ ನಿಯಂತ್ರಣ ಹೊಂದಿರುವ ಇರಾನ್, ಅದನ್ನೇ ತನ್ನ ಆಯುಧ ಮತ್ತು ಆದಾಯ ಮೂಲವಾಗಿ ಮಾಡಿಕೊಳ್ಳಲು ಹೊರಟಿದೆ. ಈ ಹಿಂದೆ ಬಂದ ವರದಿಯಲ್ಲಿ ತಿಳಿಸಲಾಗಿದ್ದಂತೆ ಹಾರ್ಮುಜ್ ಜಲಸಂಧಿ ಮೂಲಕ ಹಾದು ಹೋಗುವ ಹಡಗುಗಳಿಂದ ಟೋಲ್ ಸಂಗ್ರಹಿಸುವ ವ್ಯವಸ್ಥೆಯನ್ನು ಇರಾನ್ ಮಾಡುತ್ತಿದೆ. ಇರಾನ್​ನ ಸಂಸದರು ಈ ಸಂಬಂಧ ಒಂದು ಮಸೂದೆಗೆ ಅಂಗೀಕಾರ ನೀಡಿದ್ದು, ಅದು ಜಾರಿ ಕೂಡ ಆಗಿದೆ ಎನ್ನಲಾಗುತ್ತಿದೆ.

ಸೀಕ್ರೆಟ್ ಕೋಡ್ ಮತ್ತು ಚೀನೀ ಕರೆನ್ಸಿಯಲ್ಲಿ ಪಾವತಿ

ಇರಾನ್​ನ ಇಸ್ಲಾಮಿಕ್ ರೆವಲ್ಯೂಶನರಿ ಮಿಲಿಟರಿಗೆ ಸೇರಿದ ಕಂಪನಿಯೊಂದು ಈ ಟೋಲ್ ಅನ್ನು ನಿರ್ವಹಿಸುತ್ತದೆ. ಹಾರ್ಮುಜ್ ಜಲಸಂಧಿ ಮೂಲಕ ಹಾದು ಹೋಗಬೇಕಾದ ಹಡಗುಗಳಿಗೆ ಪೂರ್ವಾನುಮತಿ ಪಡೆಯಬೇಕಾಗುತ್ತದೆ. ಅಮೆರಿಕ ಮತ್ತು ಇಸ್ರೇಲ್​ಗೆ ಸಂಬಂಧಪಡದ ಹಡಗುಗಳಿಗೆ ಮಾತ್ರ ಅನುಮತಿ ಸಿಗುತ್ತದೆ.

ಇದನ್ನೂ ಓದಿ: ಭಾರತಕ್ಕೆ ತೈಲ ಮತ್ತು ಅನಿಲ ಪೂರೈಕೆ ಹೆಚ್ಚಿಸಲು ಸಿದ್ಧ: ರಷ್ಯಾ ಅಭಯ

ಹಡಗಿನ ಡಾಕ್ಯುಮೆಂಟೇಶನ್ ವಿವರ ಪೂರ್ಣವಾಗಿ ನೀಡಬೇಕು. ಹಡಗಿನ ಮಾಲಿಕತ್ವ, ಯಾವ ದೇಶದ ದ್ವಜ, ಎಲ್ಲಿ ಹೋಗುವುದು, ಸಿಬ್ಬಂದಿ ಯಾರು, ಆಟೊಮೇಟೆಡ್ ಐಡೆಂಟಿಫಿಕೇಶನ್ ಸಿಸ್ಟಂನ (ಎಐಎಸ್) ದತ್ತಾಂಶ ಇತ್ಯಾದಿ ಮಾಹಿತಿಯನ್ನು ಮೊದಲೇ ಸಲ್ಲಿಸಬೇಕು. ಇದನ್ನು ಪರಿಶೀಲಿಸಿ, ಶತ್ರು ದೇಶಗಳಿಗೆ ಸಂಬಂಧಪಡದ ಹಡಗು ಎಂಬುದು ಖಾತ್ರಿಯಾದ ಬಳಿಕವಷ್ಟೇ ಜಲಸಂಧಿಯತ್ತ ಬರಲು ಅನುಮತಿಸಲಾಗುತ್ತದೆ.

ಎಷ್ಟು ಟೋಲ್ ಕಟ್ಟಬೇಕು?

ಹಾರ್ಮುಜ್ ಜಲಸಂಧಿ ದಾಟಿ ಹೋಗಲು ನಿರ್ದಿಷ್ಟ ಹಣವನ್ನು ಶಿಪ್ಪಿಂಗ್ ಕಂಪನಿಗಳು ಇರಾನ್​ಗೆ ಪಾವತಿಸಬೇಕಾಗುತ್ತದೆ. ಒಂದು ಬ್ಯಾರಲ್ ಕಚ್ಛಾ ತೈಲಕ್ಕೆ 1 ಡಾಲರ್​ನಂತೆ ಈ ಟೋಲ್ ಕಟ್ಟಬೇಕು. 500 ಬ್ಯಾರಲ್ ಹೊತ್ತ ಹಡಗು ಇದ್ದರೆ 500 ಡಾಲರ್ ಮೌಲ್ಯದಷ್ಟು ಹಣವನ್ನು ಕಟ್ಟಬೇಕು. ಆದರೆ ಹಣ ಪಾವತಿ ಡಾಲರ್​ನಲ್ಲಿ ಇರಕೂಡದು. ಚೀನಾದ ಯುಆನ್ ಕರೆನ್ಸಿಯಲ್ಲಿ ಪಾವತಿಸಬೇಕು, ಅಥವಾ ಕ್ರಿಪ್ಟೋಕರೆನ್ಸಿಗಳಲ್ಲಾದರೂ ಪಾವತಿಸಬೇಕು ಎಂದು ಇರಾನ್ ತಿಳಿಸಿದೆ. ಹಣ ಪಾವತಿಸಿದ ಬಳಿಕ ಆ ಹಡಗಿಗೆ ರಹಸ್ಯ ಐಡಿ ಕೋಡ್ ನೀಡಲಾಗುತ್ತದೆ. ಅದು ಸಿಕ್ಕಾಗ ಹಡಗಿನಿಂದ ಹೈಫ್ರೀಕ್ವೆನ್ಸಿ ಸಿಗ್ನಲ್ ಹೊರಹೊಮ್ಮುತ್ತದೆ. ಇರಾನ್​ನ ನೌಕಾಪಡೆಯು ಈ ಸಿಗ್ನಲ್ ಹೊಂದಿರುವ ಹಡಗಿನ ಬಳಿ ಹೋಗಿ ಸುರಕ್ಷಿತವಾಗಿ ಹಾರ್ಮುಜ್ ಜಲಸಂಧಿ ದಾಟುವವರೆಗೂ ರಕ್ಷಣೆ ಒದಗಿಸುತ್ತದೆ.

ಇದನ್ನೂ ಓದಿ: ಏಪ್ರಿಲ್​ನಲ್ಲಿ ಚಿನ್ನ ಸಖತ್ ದುಬಾರಿ? ಕಳೆದ 45 ವರ್ಷದಲ್ಲೆ ಬಂಗಾರಕ್ಕೆ ಗರಿಷ್ಠ ಡಿಮ್ಯಾಂಡ್; 20,000 ರೂಗೆ ಏರುತ್ತಾ ಬೆಲೆ?

ಅಮೆರಿಕದ ಡಾಲರ್ ಪ್ರಾಬಲ್ಯಕ್ಕೆ ವಿರಾಮ

ಇರಾನ್​ನ ಈ ಟೋಲ್ ಬೂತ್ ಯೋಜನೆ ಯಶಸ್ವಿಯಾದರೆ ಅಮೆರಿಕಕ್ಕೆ ಇರಿಸುಮುರುಸಾಗಬಹುದು. ತೈಲ ಮಾರಾಟ ಹಾಗು ಇತರ ಅಂತಾರಾಷ್ಟ್ರೀಯ ವಹಿವಾಟುಗಳು ಡಾಲರ್​ನಲ್ಲೇ ನಡೆಯುವುದರಿಂದ ಅಮೆರಿಕಕ್ಕೆ ಸಿಕ್ಕಾಪಟ್ಟೆ ಅನುಕೂಲ ಸ್ಥಿತಿ ಇದೆ. ಆದರೆ, ಈಗ ಗಲ್ಫ್​ನಿಂದ ತೈಲ ಪಡೆಯುವ ದೇಶಗಳು ಇರಾನ್​ಗೆ ಟೋಲ್ ಕಟ್ಟಲು ಚೀನೀ ಕರೆನ್ಸಿ ಬಳಸಬೇಕಾಗುತ್ತದೆ. ಇದರಿಂದ ಯುಆನ್ ಕರೆನ್ಸಿಯು ಡಾಲರ್​ಗೆ ಪರ್ಯಾಯವಾಗಿ ಬೆಳೆಯಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ