ರಕ್ತದ ಸಮುದ್ರದಲ್ಲಿ ಆಯುಧ ತೊಳೆದ ಜೂನಿಯರ್​ ಎನ್​ಟಿಆರ್​; ಹೇಗಿದೆ ‘ದೇವರ’ ಗ್ಲಿಂಪ್ಸ್​?

ನಟ ಜೂನಿಯರ್ ಎನ್​ಟಿಆರ್​ (Jr NTR) ಅವರು ‘ಆರ್​ಆರ್​ಆರ್​’ ಸಿನಿಮಾದ ಯಶಸ್ಸಿನ ಬಳಿಕ ‘ದೇವರ’ (Devara) ಚಿತ್ರದ ಶೂಟಿಂಗ್​ನಲ್ಲಿ ತೊಡಗಿಕೊಂಡರು. ಇಂದು (ಜನವರಿ 8) ‘ದೇವರ’ ಸಿನಿಮಾದ ಗ್ಲಿಂಪ್ಸ್​ (Devara: Part 1 Glimpse) ಬಿಡುಗಡೆ ಆಗಿದೆ. ಈ ಸಿನಿಮಾದ ಕಥೆ ಏನಿರಬಹುದು ಎಂಬುದರ ಝಲಕ್​ ತೋರಿಸುವ ರೀತಿಯಲ್ಲಿ ಗ್ಲಿಂಪ್ಸ್​ ಮೂಡಿಬಂದಿದೆ. ‘ದೇವರ’ ಚಿತ್ರಕ್ಕೆ ಕೊರಟಾಲ ಶಿವ ನಿರ್ದೇಶನ ಮಾಡುತ್ತಿದ್ದಾರೆ. ಈ ಚಿತ್ರದಲ್ಲಿ ಭರ್ಜರಿ ಆ್ಯಕ್ಷನ್​ ದೃಶ್ಯಗಳು ಇರಲಿವೆ ಎಂಬುದಕ್ಕೆ ಫಸ್ಟ್​ ಗ್ಲಿಂಪ್ಸ್​ ಮೂಲಕ ಸಾಕ್ಷಿ ಸಿಕ್ಕಿದೆ. ಕಡಲುಗಳ್ಳರ ಕಥೆ ಈ ಸಿನಿಮಾದಲ್ಲಿ ಇರಲಿದೆ. ಅಭಿಮಾನಿಗಳಿಗೆ ಈ ಗ್ಲಿಂಪ್ಸ್​ ಇಷ್ಟ ಆಗಿದೆ.

‘ದೇವರ’ ಚಿತ್ರದ ಗಿಂಪ್ಸ್​ ಹೇಗಿದೆ?

ಸಮುದ್ರದಲ್ಲಿ ಬರುವ ಹಡಗಿನ ಮೇಲೆ ಕಳ್ಳರು ದಾಳಿ ಮಾಡುತ್ತಾರೆ. ನೂರಾರು ಮಂದಿಯನ್ನು ಜೂನಿಯರ್​ ಎನ್​ಟಿಆರ್​ ಸದೆ ಬಡಿಯುತ್ತಾರೆ. ಅದರ ಪರಿಣಾಮವಾಗಿ ರಕ್ತದ ಓಕುಳಿ ಹರಿಯುತ್ತದೆ. ಸಮುದ್ರದ ಅಲೆಗಳು ಕೆಂಪಾಗುತ್ತವೆ. ಶತ್ರುಗಳನ್ನು ಸಂಹಾರ ಮಾಡಿದ ಆಯುಧವನ್ನು ಅದೇ ಸಮುದ್ರದ ನೀರಿನಿಂದ ಜೂನಿಯರ್​ ಎನ್​ಟಿಆರ್​ ತೊಳೆಯುತ್ತಾರೆ. ಬಳಿಕ ಒಂದು ಮಾಸ್​ ಡೈಲಾಗ್​ ಹೊಡೆಯುತ್ತಾರೆ.

‘ಈ ಸಮುದ್ರವು ಮೀನುಗಳಿಗಿಂತಲೂ ರಕ್ತ ಮತ್ತು ಆಯುಧವನ್ನು ನೋಡಿದೆ. ಅದಕ್ಕೆ ಇದನ್ನು ಕೆಂಪು ಸಮುದ್ರ ಎನ್ನುತ್ತಾರೆ’ ಎಂಬ ಡೈಲಾಗ್​ ಈ ಟೀಸರ್​ನಲ್ಲಿದೆ. ಜೂನಿಯರ್ ಎನ್​ಟಿಆರ್​ ಅವರ ಮಾಸ್​ ಅವತಾರವನ್ನು ನೋಡಲು ಫ್ಯಾನ್ಸ್​ ಕಾದಿದ್ದಾರೆ. ‘ದೇವರ’ ಸಿನಿಮಾದಲ್ಲಿ ನಾಯಕಿಯಾಗಿ ಜಾನ್ವಿ ಕಪೂರ್​ ನಟಿಸುತ್ತಿದ್ದಾರೆ. ಆದರೆ ಚಿತ್ರದ ಗ್ಲಿಂಪ್ಸ್​ನಲ್ಲಿ ಅವರು ಕಾಣಿಸಿಲ್ಲ.

ಇದನ್ನೂ ಓದಿ: ‘ನಾನು ಸುರಕ್ಷಿತವಾಗಿ ಮರಳಿದ್ದೇನೆ’; ಜಪಾನ್​ನಿಂದ ಹಿಂದಿರುಗಿ ಟ್ವೀಟ್ ಮಾಡಿದ ಜೂ. ಎನ್​ಟಿಆರ್

ಗ್ಲಿಂಪ್ಸ್​ ಬಿಡುಗಡೆಯ ಸುದ್ದಿ ತಿಳಿಸಲು ಇತ್ತೀಚೆಗೆ ‘ದೇವರ’ ಚಿತ್ರತಂಡದಿಂದ ಒಂದು ಪೋಸ್ಟರ್​ ಬಿಡುಗಡೆ ಮಾಡಲಾಗಿತ್ತು. ಅದರ ಗುಣಮಟ್ಟ ಚೆನ್ನಾಗಿಲ್ಲ ಎಂದು ನೆಟ್ಟಿಗರು ಟ್ರೋಲ್ ಮಾಡಿದ್ದರು. ಆದರೆ ಈಗ ಗ್ಲಿಂಪ್ಸ್​ ನೋಡಿ ಅಭಿಮಾನಿಗಳು ಮೆಚ್ಚುಗೆ ಸೂಚಿಸಿದ್ದಾರೆ. ಏಪ್ರಿಲ್​ 5ರಂದು ಈ ಸಿನಿಮಾ ಬಿಡುಗಡೆ ಆಗಲಿದೆ. ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಸಿದ್ಧವಾಗುತ್ತಿರುವ ಈ ಸಿನಿಮಾ ಕನ್ನಡದಲ್ಲೂ ಬಿಡುಗಡೆ ಆಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ