ಒಟಿಟಿಯಲ್ಲಿ ಗಮನ ಸೆಳೆದ ಮಲಯಾಳಂ ಸಿನಿಮಾ ‘ಇಟ್ಸ್ ಎ ಮೆಡಿಕಲ್ ಮಿರಾಕಲ್’

ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿದ್ದ ಜನಪ್ರಿಯ ಕಾಮಿಕ್ ಥ್ರಿಲ್ಲರ್ ‘ಇಟ್ಸ್ ಎ ಮೆಡಿಕಲ್ ಮಿರಾಕಲ್’ ಈಗ ಡಿಜಿಟಲ್ ಜಗತ್ತಿನಲ್ಲೂ ಭರ್ಜರಿ ಯಶಸ್ಸು ಕಾಣುತ್ತಿದೆ. ‘ಮನೋರಮಾಮ್ಯಾಕ್ಸ್‌’ ಒಟಿಟಿಯಲ್ಲಿ ಬಿಡುಗಡೆಯಾದ ಮೊದಲ ವಾರದಲ್ಲೇ ಈ ಚಿತ್ರ ಬರೋಬ್ಬರಿ 1.50 ಕೋಟಿಗೂ ಹೆಚ್ಚು ನಿಮಿಷಗಳ ವೀಕ್ಷಣಾ ಸಮಯವನ್ನು ದಾಖಲಿಸುವ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸಿರುವುದಾಗಿ ಎಂದು ಚಿತ್ರತಂಡ ಹೇಳಿದೆ. ದಕ್ಷಿಣ ಭಾರತದ ಪ್ರೇಕ್ಷಕರನ್ನು ಸೆಳೆಯಲು ಈ ಚಿತ್ರವನ್ನು ಮಲಯಾಳಂ ಮಾತ್ರವಲ್ಲದೆ ಕನ್ನಡ, ತಮಿಳು ಹಾಗೂ ತೆಲುಗು ಭಾಷೆಗಳಲ್ಲೂ ಏಕಕಾಲಕ್ಕೆ ಲಭ್ಯವಾಗುವಂತೆ ಮಾಡಲಾಗಿದೆ.

ಹೊಸ ನಿರ್ದೇಶಕ ಸ್ಯಾಮಿನ್ ಗಿರೀಶ್ ಆ್ಯಕ್ಷನ್ ಕಟ್ ಹೇಳಿರುವ ಈ ಚಿತ್ರವು ವಿಭಿನ್ನ ಕಥಾಹಂದರ ಹಾಗೂ ಹಾಸ್ಯದ ಮೇಲೆಯೇ ಸಾಗುವ ರೋಮಾಂಚಕ ತಿರುವುಗಳನ್ನು ಹೊಂದಿದೆ. ‘ಪ್ರೇಮಲು’ ಖ್ಯಾತಿಯ ಸಂಗೀತ್ ಪ್ರತಾಪ್ ಮೊದಲ ಬಾರಿಗೆ ನಾಯಕನಾಗಿ ನಟಿಸಿದ್ದು, ನಟ ಶರಾಫುದ್ದೀನ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ವಿಶೇಷವಾದ ಕಥೆ ಇದೆ.

ಕೋಮಾದಿಂದ ಪವಾಡಸದೃಶವಾಗಿ ಎಚ್ಚರಗೊಳ್ಳುವ ಯುವಕ ರೂಬಿನ್ (ಸಂಗೀತ್ ಪ್ರತಾಪ್), ತನಗೆ ದೂರದ ಸದ್ದು ಹಾಗೂ ಮಾತುಗಳನ್ನು ಸ್ಪಷ್ಟವಾಗಿ ಕೇಳಿಸಿಕೊಳ್ಳುವ ಅಸಾಮಾನ್ಯ ಸಾಮರ್ಥ್ಯ ಬಂದಿರುವುದನ್ನು ಕಂಡುಕೊಳ್ಳುತ್ತಾನೆ. ಈ ಸಂದರ್ಭದಲ್ಲಿ ಆತನಿಗೆ ಎದುರಾಗುವ ಸ್ನೇಹಪರ ಪೊಲೀಸ್ ಅಧಿಕಾರಿ ಸೂರಜ್ (ಶರಾಫುದ್ದೀನ್) ಪಾತ್ರವು ಕಥೆಗೆ ಹೊಸ ಆಯಾಮ ನೀಡುತ್ತದೆ. ಇಬ್ಬರ ನಡುವಿನ ಒಡನಾಟ ಹಾಗೂ ಅನಿರೀಕ್ಷಿತ ಘಟನೆಗಳ ಸುತ್ತ ಹೆಣೆದಿರುವ ಸಸ್ಪೆನ್ಸ್ ಸನ್ನಿವೇಶಗಳು ಪ್ರೇಕ್ಷಕರನ್ನು ಹೊಟ್ಟೆ ಹುಣ್ಣಾಗಿಸುವಂತೆ ನಗಿಸುತ್ತವೆ.

ಈ ಸಿನಿಮಾದಲ್ಲಿ ಸಂಗೀತ್ ಪ್ರತಾಪ್ ಹಾಗೂ ಶರಾಫುದ್ದೀನ್ ಅವರಲ್ಲದೆ ಅಖಿಲಾ ಭಾರ್ಗವನ್, ಪಾರ್ವತಿ ಆರ್. ಕೃಷ್ಣ, ಕೊಟ್ಟಾಯಂ ನಸೀರ್, ಆನಂದ್ ಮನ್ಮದನ್ ಮತ್ತು ಕಿರಣ್ ಪೀತಾಂಬರನ್ ಮುಖ್ಯ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ‘ಕರಿಕ್ಕು’ ಖ್ಯಾತಿಯ ಪ್ರತಿಭಾನ್ವಿತ ಲೇಖಕ ನಿಲೀನ್ ಸಾಂಡ್ರಾ ಈ ಸಿನಿಮಾಗೆ ಚಿತ್ರಕಥೆ ಮತ್ತು ಸಂಭಾಷಣೆ ಬರೆದಿದ್ದಾರೆ.

ಇದನ್ನೂ ಓದಿ: ಒಟಿಟಿಯಲ್ಲಿ ಕನ್ನಡದಲ್ಲೂ ಇರುವ ವಿಜಯ್ ಸೇತುಪತಿಯ ಹೊಸ ಚಿತ್ರವನ್ನು ಮಿಸ್ ಮಾಡಿಕೊಳ್ಳಲೇಬೇಡಿ

‘ಡಾ. ಪಾಲ್ಸ್ ಎಂಟರ್‌ಟೈನ್‌ಮೆಂಟ್’ ಹಾಗೂ ‘ಡ್ರೀಮ್ ಬಿಗ್ ಫಿಲ್ಮ್ಸ್’ ಬ್ಯಾನರ್‌ಗಳ ಅಡಿಯಲ್ಲಿ ಡಾ. ಪಾಲ್ ವರ್ಗೀಸ್ ಮತ್ತು ಸುಜಿತ್ ಜೆ. ನಾಯರ್ ಅವರು ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಅಖಿಲ್ ಝೇವಿಯರ್ ಅವರ ಛಾಯಾಗ್ರಹಣ, ರಾಕೇಶ್ ಚೆರುಮದಂ ಅವರ ಸಂಕಲನ, ಮುಜೀಬ್ ಮಜೀದ್ ಸಂಗೀತ ಈ ಸಿನಿಮಾಗಿದೆ. ಒಟಿಟಿಯಲ್ಲಿ ಜನಮೆಚ್ಚುಗೆ ಪಡೆದಿರುವುದು ಚಿತ್ರತಂಡಕ್ಕೆ ಖುಷಿ ತಂದಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.