‘ಹಿಂಗೆ ಸಿನಿಮಾ ಮಾಡಿದ್ರೆ ನಿರ್ಮಾಪಕರು ನೇಣು ಹಾಕಿಕೊಳ್ತಾರೆ’: ಸುದೀಪ್​ ಹೇಳಿದ್ದು ಯಾರ ಬಗ್ಗೆ?

ಚಿತ್ರರಂಗದಲ್ಲಿ ಕಿಚ್ಚ ಸುದೀಪ್​ (Kichcha Sudeep) ಅವರ ಅನುಭವ ಅಪಾರ. ನಟನಾಗಿ ಮಾತ್ರವಲ್ಲದೇ ನಿರ್ಮಾಪಕನಾಗಿ ಹಾಗೂ ನಿರ್ದೇಶಕನಾಗಿಯೂ ಅವರು ಕೆಲಸ ಮಾಡಿದ್ದಾರೆ. ಎಲ್ಲ ನಿಭಾಗಗಳ ಬಗ್ಗೆಯೂ ಅವರಿಗೆ ಚೆನ್ನಾಗಿ ತಿಳಿದಿದೆ. ಹಲವು ಸೂಪರ್​ ಹಿಟ್​ ಸಿನಿಮಾಗಳನ್ನು ಕಿಚ್ಚ ಸುದೀಪ್​ ನೀಡಿದ್ದಾರೆ. ಪರಭಾಷೆಯ ಚಿತ್ರರಂಗದಲ್ಲೂ ಸಿನಿಮಾ ಮಾಡಿ ಸೈ ಎನಿಸಿಕೊಂಡಿದ್ದಾರೆ. ಇನ್ನು, ಕಿರುತೆರೆ ಲೋಕದ ಜೊತೆಗೂ ಅವರ ನಂಟು ಚೆನ್ನಾಗಿದೆ. ‘ಬಿಗ್​ ಬಾಸ್’ (Bigg Boss) ಕಾರ್ಯಕ್ರಮವನ್ನು 8 ಸೀಸನ್​ಗಳಿಂದ ಅವರು ಯಶಸ್ವಿಯಾಗಿ ನಡೆಸಿಕೊಂಡು ಬಂದಿದ್ದಾರೆ. ‘ಬಿಗ್​ ಬಾಸ್​ ಕನ್ನಡ ಒಟಿಟಿ’ (Bigg Boss Kannada OTT) ಮೊದಲ ಸೀಸನ್​ ಕೂಡ ಅವರ ನಿರೂಪಣೆಯಲ್ಲಿ ಮೂಡಿಬಂದಿದೆ. ಶುಕ್ರವಾರ (ಸೆ.16) ಇದರ ಫಿನಾಲೆ ನಡೆದಿದೆ. ಈ ವೇಳೆ ಅವರು, ‘ಈ ಥರ ಸಿನಿಮಾ ಮಾಡಿದ್ರೆ ನಿರ್ಮಾಪಕರು ನೇಣು ಹಾಕಿಕೊಳ್ತಾರೆ’ ಎಂದು ಹೇಳಿದ್ದಾರೆ. ಕಿಚ್ಚ ಸುದೀಪ್​ ಹೀಗೆ ಹೇಳಿದ್ದು ಯಾಕೆ? ಇಲ್ಲಿದೆ ಉತ್ತರ..

ಆರ್ಯವರ್ಧನ್​ ಗುರೂಜಿ, ರಾಕೇಶ್​ ಅಡಿಗ, ಸೋನು ಶ್ರೀನಿವಾಸ್​ ಗೌಡ, ಸಾನ್ಯಾ ಐಯ್ಯರ್​, ರೂಪೇಶ್​ ಶೆಟ್ಟಿ, ಜಯಶ್ರೀ ಆರಾಧ್ಯ, ಸೋಮಣ್ಣ ಮಾಚಿಮಾಡ, ಜಶ್ವಂತ್​ ಬೋಪಣ್ಣ ಅವರು ಫಿನಾಲೆ ವಾರದವರೆಗೂ ಬಂದಿರು. ಇವರೆಲ್ಲರ ಪೈಕಿ ಹೆಚ್ಚು ಕಾಮಿಡಿ ಕಚಗುಳಿ ಇಟ್ಟವರು ಆರ್ಯವರ್ಧನ್​ ಗುರೂಜಿ. ಅವರನ್ನು ಕಲಾವಿದ ಎಂದು ಸೋಮಣ್ಣ ಬಣ್ಣಿಸಿದರು. ಆ ಮಾತಿಗೆ ಸುದೀಪ್​ ಕೂಡ ಧ್ವನಿಗೂಡಿಸಿದರು.

‘ಒಂದು ವೇಳೆ ನಾವು ಮಾಡಿದ ಸಿನಿಮಾಗಳನ್ನು ಆರ್ಯವರ್ಧನ್​ ಮಾಡಿದ್ದರೆ ಅವರು ಎಲ್ಲೋ ಹೋಗಿರುತ್ತಿದ್ದರು. ಅವರೇನಾದರೂ ಸಿನಿಮಾದಲ್ಲಿ ನಟಿಸಿದರೆ ಸಂಖ್ಯಾಶಾಸ್ತ್ರದ ಪ್ರಕಾರವೇ ಎಲ್ಲವನ್ನೂ ಆಯ್ಕೆ ಮಾಡುತ್ತಾರೆ. ಸಿನಿಮಾ ಹೆಸರಿನ ಅಕ್ಷರ ಎಷ್ಟು ಇರಬೇಕು? ಕಲಾವಿದರ ಡ್ರೆಸ್​ ಬಣ್ಣ ಯಾವುದು ಇರಬೇಕು? ಯಾವ ಬಣ್ಣದಲ್ಲಿ ಸೆಟ್​ ಹಾಕಬೇಕು? ಯಾವ ದಿನಾಂಕದಲ್ಲಿ ಶೂಟಿಂಗ್​ ಶುರು ಮಾಡಬೇಕು ಅಂತ ಹೇಳಬಹುದು. ಹಿಂಗೆಲ್ಲ ಸಿನಿಮಾ ಮಾಡಿದರೆ ನಿರ್ಮಾಪಕರು ಅರ್ಧಕ್ಕೆ ನೇಣು ಹಾಕಿಕೊಳ್ಳಬೇಕಾಗತ್ತೆ’ ಎಂದು ಸುದೀಪ್​ ಹೇಳಿದರು.

ಬಿಗ್​ ಬಾಸ್​ಗೆ ಹೋಗುವುದಕ್ಕೂ ಮುನ್ನ ಆರ್ಯವರ್ಧನ್​ ಅವರು ಸಂಖ್ಯಾಶಾಸ್ತ್ರ ಹೇಳುವ ಮೂಲಕ ಫೇಮಸ್​ ಆಗಿದ್ದರು. ಅವರು ಹೇಳಿದ ಅನೇಕ ಸಂಗತಿಗಳು ನಿಜ ಆಗಿಲ್ಲ ಎಂಬ ಕಾರಣಕ್ಕೆ ಅವರನ್ನು ಸೋಶಿಯಲ್​ ಮೀಡಿಯಾದಲ್ಲಿ ಟ್ರೋಲ್​ ಕೂಡ ಮಾಡಲಾಗಿತ್ತು. ‘ಬಿಗ್ ಬಾಸ್​ ಕನ್ನಡ ಒಟಿಟಿ’ ಕಾರ್ಯಕ್ರಮಕ್ಕೆ ಕಾಲಿಟ್ಟ ಬಳಿಕ ಆರ್ಯವರ್ಧನ್​ ಅವರ ಜನಪ್ರಿಯತೆ ಹೆಚ್ಚಿತು. ಅವರ ವ್ಯಕ್ತಿತ್ವ ಏನು ಎಂಬುದನ್ನು ವೀಕ್ಷಕರು ಈಗ ಹತ್ತಿರದಿಂದ ಕಂಡಿದ್ದಾರೆ. ತಮ್ಮ ಬದುಕಿನ ಅನೇಕ ಸಂಗತಿಗಳ ಬಗ್ಗೆ ಅವರು ಬಿಗ್​ ಬಾಸ್​ ಮನೆಯಲ್ಲಿ ಹಂಚಿಕೊಂಡಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

Published On - 6:33 pm, Sat, 17 September 22