ಮನೆಯ ಕ್ಯಾಪ್ಟನ್ ಆಗಿದ್ಯಾರು? ಉತ್ತಮ-ಕಳಪೆ ಯಾರಿಗೆ?
Bigg Boss Kannada: ಬಿಗ್ಬಾಸ್ ಕನ್ನಡ ಸೀಸನ್ 10 ಫಿನಾಲೆಗೆ ಹತ್ತಿರವಾಗಿದೆ. ಈ ಹಂತದಲ್ಲಿ ಈ ವಾರ ಮನೆಯ ಕ್ಯಾಪ್ಟನ್ ಯಾರಾದರು? ಉತ್ತಮ ಯಾರಿಗೆ ಸಿಕ್ಕಿತು? ಕಳಪೆ ಯಾರಾದರು?
Updated on: Jan 05, 2024 | 10:48 PM
ಫಿನಾಲೆಗೆ ಹತ್ತಿರ ಬರುತ್ತಿದ್ದಂತೆ ಕ್ಯಾಪ್ಟನ್ ಆಗಲು ಮನೆಯ ಸದಸ್ಯರಲ್ಲಿ ತೀವ್ರ ಸ್ಪರ್ಧೆ ಏರ್ಪಟ್ಟಿದೆ. ಮುಂದಿನ ವಾರಕ್ಕೆ ಬಿಗ್ಬಾಸ್ (BiggBoss) ಮನೆಯ ಕ್ಯಾಪ್ಟನ್ ಆಗಲು ಟಾಸ್ಕ್ ಗುರುವಾರದ ಎಪಿಸೋಡ್ನಲ್ಲಿಯೇ ಆರಂಭವಾಗಿತ್ತು. ಮತದಾನದ ಮೂಲಕ ಟಾಸ್ಕ್ ಆರಂಭವಾಗಿ ವಿನಯ್, ಕಾರ್ತಿಕ್, ಸಂಗೀತಾ, ತುಕಾಲಿ ಸಂತೋಷ್ ಅವರಗಳು ಕ್ಯಾಪ್ಟೆನ್ಸಿ ರೇಸ್ನಲ್ಲಿ ಉಳಿದಿದ್ದರು. ಬಳಿಕ ಬಿಗ್ಬಾಸ್ ನೀಡಿದ ವಿಶೇಷ ಅಧಿಕಾರದಿಂದ ಕಾರ್ತಿಕ್ ಹಾಗೂ ವಿನಯ್ ಅವರನ್ನು ಸಂಗೀತಾ ಕ್ಯಾಪ್ಟೆನ್ಸಿ ರೇಸ್ನಿಂದ ಹೊರಗೆ ಇಟ್ಟರು. ಅಂತಿಮವಾಗಿ ತುಕಾಲಿ ಸಂತು ಹಾಗೂ ಸಂಗೀತಾ ಅಷ್ಟೆ ಉಳಿದರು.
ಶುಕ್ರವಾರದ ಎಪಿಸೋಡ್ನಲ್ಲಿ ಕ್ಯಾಪ್ಟೆನ್ಸಿಗಾಗಿ ಸಂಗೀತಾ ಹಾಗೂ ತುಕಾಲಿ ಸ್ಪರ್ಧೆ ಮಾಡಿದರು. ಮೊದಲಿಗೆ, ತಾವು ಕ್ಯಾಪ್ಟನ್ ಆದರೆ ಹಿಂದಿನ ಕ್ಯಾಪ್ಟನ್ಗಳ ಯಾವ ಗುಣವನ್ನು ಅಳವಡಿಸಿಕೊಳ್ಳುತ್ತೇವೆ, ಯಾವ ಗುಣವನ್ನು ಅಳವಡಿಸಿಕೊಳ್ಳುವುದಿಲ್ಲ ಎಂದು ವಿವರಿಸಬೇಕಿತ್ತು, ಅಂತೆಯೇ ಇಬ್ಬರೂ ಸಹ ವಿವರ ನೀಡಿದರು. ಚೆಂಡನ್ನು ಹಲಗೆಯ ಮೇಲಿಟ್ಟು ಬ್ಯಾಲೆನ್ಸ್ ಮಾಡುವುದು ಆ ಬಳಿಕ ಅದೇ ಚೆಂಡನ್ನು ಗುರಿ ನೋಡಿ ರಂಧ್ರವೊಂದಕ್ಕೆ ಹಾಕುವ ಟಾಸ್ಕ್ ಅನ್ನು ಬಿಗ್ಬಾಸ್ ನೀಡಿದರು. ವಿನಯ್ ಹಾಗೂ ಕಾರ್ತಿಕ್ ಅವರನ್ನು ಆಟಕ್ಕೆ ಉಸ್ತುವಾರಿಯನ್ನಾಗಿ ನೇಮಕ ಮಾಡಲಾಗಿತ್ತು.
ಆರಂಭದಲ್ಲಿ ಇಬ್ಬರೂ ಸಹ ಚೆಂಡನ್ನು ಬ್ಯಾಲೆನ್ಸ್ ಮಾಡಲು ಪರದಾಡಿದರು, ಬಳಿಕ ಸಂಗೀತಾ ತುಸು ವೇಗ ಪಡೆದುಕೊಂಡರು. ತುಕಾಲಿ ಸಂತು, ಸಂಗೀತಾ ಟಾಸ್ಕ್ ಮುಗಿಸಿಬಿಟ್ಟರೆ ಎಂದು ಆತಂಕಕ್ಕೆ ಒಳಗಾಗುತ್ತಲೇ ಆಡಿದ ಪರಿಣಾಮ ತುಸು ನಿಧಾನವಾಗಿ ಟಾಸ್ಕ್ ಮುಗಿಸಿದರು. ಚೆನ್ನಾಗಿ ಆಡಿದ ಸಂಗೀತಾ ಟಾಸ್ಕ್ ಗೆದ್ದು ಮನೆಯ ಕ್ಯಾಪ್ಟನ್ ಆದರು. ಹದಿಮೂರು ವಾರಗಳಲ್ಲಿ ಇದೇ ಮೊದಲ ಬಾರಿಗೆ ಸಂಗೀತಾ ಮನೆಯ ಕ್ಯಾಪ್ಟನ್ ಆದಂತಾಯಿತು. ಆ ಮೂಲಕ ಮೂರನೇ ಬಾರಿಗೆ ಮಹಿಳಾ ಸ್ಪರ್ಧಿಯೇ ಕ್ಯಾಪ್ಟನ್ ಆದಂತಾಯ್ತು.
ಇದನ್ನೂ ಓದಿ:ಬಿಗ್ಬಾಸ್ ಮನೆಯಲ್ಲಿ ಮಹಿಳೆಯರಿಗೆ ಅವಕಾಶವಿಲ್ಲವೇ? ಚರ್ಚೆ ಹುಟ್ಟುಹಾಕಿದ ಸಂಗೀತಾ
ಸಂಗೀತಾ ಕ್ಯಾಪ್ಟನ್ ಆದ ಬಳಿಕ ‘ಉತ್ತಮ-ಕಳಪೆ’ ನೀಡುವ ಪ್ರಕ್ರಿಯೆ ಆರಂಭವಾಯ್ತು. ಈ ವಾರ ಉತ್ತಮವಾಗಿ ಪ್ರದರ್ಶನ ನೀಡಿ, ಕಳೆದುಕೊಂಡಿದ್ದ ಬಹುಮಾನದ ಮೊತ್ತವನ್ನು ಒಟ್ಟು ಸೇರಿಸಲು ಸಹಾಯ ಮಾಡಿದ ಕಾರ್ತಿಕ್ಗೆ ಬಹುತೇಕರು ಉತ್ತಮ ಬಿರುದು ನೀಡಿದರು. ಸಂಗೀತಾ ಸಹ ಕಾರ್ತಿಕ್ಗೆ ಉತ್ತಮ ನೀಡಿದರು. ಈ ವಾರ ಕಳಪೆ ಪ್ರದರ್ಶನ ನೀಡಿದ್ದಲ್ಲದೆ, ನಿಯಮಗಳನ್ನು ಸರಿಯಾಗಿ ಪಾಲಿಸದ ಮೈಖಲ್ಗೆ ಕಳಪೆ ನೀಡಲಾಯ್ತು. ಕಾರ್ತಿಕ್ ಇಂದ ಅಂತರ ಕಾಯ್ದುಕೊಂಡಿರುವ ಸಂಗೀತಾ, ಕಾರ್ತಿಕ್ ಕೊರಳಿಗೆ ಮೆಡಲ್ ಹಾಕಿದರು.
ಕ್ಯಾಪ್ಟೆನ್ಸಿ ಭಾಷಣ ಮಾಡಿದ ಸಂಗೀತಾ, ಎಲ್ಲರೂ ಶಾಂತವಾಗಿ ಈ ವಾರ ಇರೋಣ, ನಾನು ಶಿಕ್ಷೆ ನೀಡುವುದಿಲ್ಲ, ಆದರೆ ಯಾರೂ ಗಂಭೀರವಾದ ನಿಯಮ ಉಲ್ಲಂಘನೆ ಮಾಡಬೇಡಿ ಎಂದು ಮನವಿ ಮಾಡಿದರು. ಈ ವಾರ ಸಂಗೀತಾ ಹೇಗೆ ಮನೆಯನ್ನು ನಿಭಾಯಿಸುತ್ತಾರೆಯೋ ನೋಡಬೇಕಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
