Box Office: ‘ಕೆಜಿಎಫ್ 2’, ‘ಆರ್​ಆರ್​ಆರ್’​, ‘ಪಠಾಣ್’​ಗಿಂತಲೂ ಹೆಚ್ಚು ಲಾಭ ಮಾಡಿದೆ ಈ 3 ಕೋಟಿ ಬಜೆಟ್​ನ ಸಿನಿಮಾ!

ಇತ್ತೀಚೆಗಿನ ಸೂಪರ್ ಹಿಟ್ ಸಿನಿಮಾ ಯಾವುದೆಂದರೆ ‘ಕೆಜಿಎಫ್ 2‘ (KGF 2), ‘ಆರ್​ಆರ್​ಆರ್‘ (RRR), ‘ಪಠಾಣ್’ (Pathaan) ಸಿನಿಮಾಗಳನ್ನು ಹೆಸರಿಸುತ್ತಾರೆ. ಇದು ನಿಜವೂ ಹೌದು, ಆದರೆ ಈ ಎಲ್ಲ ಸಿನಿಮಾಗಳಿಗಿಂತಲೂ ಹೆಚ್ಚಿನ ‘ಲಾಭ’ ಗಳಿಸಿರುವುದು ಮಲಯಾಳಂ ಚಿತ್ರರಂಗದ ಒಂದು ಸಣ್ಣ ಬಜೆಟ್​ನ ಸಿನಿಮಾ ಎಂದರೆ ನಂಬಲೇ ಬೇಕು. ಕೇವಲ ಮೂರು ಕೋಟಿ ಬಜೆಟ್​ನಲ್ಲಿ ಮಾಡಲಾದ ಸಿನಿಮಾ ಒಂದು ಸೂಪರ್ ಡೂಪರ್ ಹಿಟ್ ಸಿನಿಮಾಗಳಿಗಿಂತಲೂ ಹೆಚ್ಚು ಲಾಭ ಮಾಡಿದೆ! ಹೇಗೆ? ವಿಶ್ಲೇಷಣೆ ಇಲ್ಲಿದೆ.

ಸಿನಿಮಾಗಳ ಒಟ್ಟು ಕಲೆಕ್ಷನ್​ಗೂ ಲಾಭಕ್ಕೂ ಅಜಗಜಾಂತರ ವ್ಯತ್ಯಾಸವಿರುತ್ತದೆ. ಸಿನಿಮಾಕ್ಕೆ ಹೂಡಲಾದ ಬಂಡವಾಳವನ್ನು ಗಣೆನೆಗೆ ತೆಗೆದುಕೊಂಡು ಲಾಭವನ್ನು ಪರಿಶೀಲಿಸಬೇಕಾಗುತ್ತದೆ. ಹೂಡಿದ್ದ ಬಂಡವಾಳಕ್ಕೆ ಎಷ್ಟು ಪಟ್ಟು ಹಣ ವಾಪಸ್ಸಾಯಿತು ಎಂಬುದು ವ್ಯವಹಾರದಲ್ಲಿ ಬಹಳ ಮುಖ್ಯ. 200 ಕೋಟಿ ಬಜೆಟ್​ನ ಸಿನಿಮಾ ಒಂದು 400 ಕೋಟಿ ಕಲೆಕ್ಷನ್ ಮಾಡಿದರೆ 200 ಕೋಟಿ ಲಾಭ ಎಂದುಕೊಳ್ಳಬಹುದು. ಅದರಲ್ಲಿ ನಿರ್ಮಾಪಕ ಕಿಸೆ ಸೇರುವುದು 100 ಕೋಟಿಗೂ ಕಡಿಮೆ ಹಣ.

ಉದಾಹರಣೆಗೆ ಇತ್ತೀಚೆಗಿನ ಬ್ಲಾಕ್ ಬಸ್ಟರ್ ಆರ್​ಆರ್​ಆರ್ ಸಿನಿಮಾದ ಒಟ್ಟು ಬಂಡವಾಳ 550 ಕೋಟಿ ಆ ಸಿನಿಮಾ ಮಾಡಿರುವ ಲಾಭ ಸುಮಾರು 1300 ಕೋಟಿ. ಬಂಡವಾಳದ ಆಧಾರದಲ್ಲಿ 250% ಲಾಭವನ್ನು ಈ ಸಿನಿಮಾ ಮಾಡಿದೆ. ಇದೇ ಸೂತ್ರವನ್ನು ಕೆಜಿಎಫ್​ 2 ಸಿನಿಮಾಕ್ಕೆ ಅಳವಡಿಸಿದರೆ. ಕೆಜಿಎಫ್ 2 ಸಿನಿಮಾದ ಬಜೆಟ್ 100 ಕೋಟಿ (ವಿಕಿಪೀಡಿಯಾ ಮಾಹಿತಿ) ಸಿನಿಮಾದ ಬಾಕ್ಸ್ ಆಫೀಸ್ ಕಲೆಕ್ಷನ್ ಆಸು-ಪಾಸು 1300 ಕೋಟಿ. ಕೆಜಿಎಫ್ 2 ಸಿನಿಮಾ ತಂದುಕೊಟ್ಟಿರುವ ಲಾಭ 1300%. ಅಂದರೆ ಆರ್​ಆರ್​ಆರ್​ ನಿರ್ಮಾಪಕರು ಗಳಿಸಿದ ಲಾಭಕ್ಕಿಂತಲೂ ಸುಮಾರು ಐದು ಪಟ್ಟು ಹೆಚ್ಚು ಲಾಭವನ್ನು ‘ಕೆಜಿಎಫ್ 2’ ನಿರ್ಮಾಪಕರು ಮಾಡಿದ್ದಾರೆ.

ಆದರೆ ಇತ್ತೀಚೆಗೆ ಬಿಡುಗಡೆ ಆದ ತೀರ ಸಣ್ಣ ಬಜೆಟ್​ನ ಸಿನಿಮಾ ಒಂದು ಕೆಜಿಎಫ್ 2, ಆರ್​ಆರ್​ಆರ್, ಪಠಾಣ್ ಸಿನಿಮಾಗಳಿಗಿಂತಲೂ ಹೆಚ್ಚು ಲಾಭ ಮಾಡಿದೆ. ‘ರೋಮಾಂಚಮ್’ ಹೆಸರಿನ ಈ ಮಲಯಾಳಂ ಸಿನಿಮಾಕ್ಕೆ ಹೂಡಿದ್ದ ಬಂಡವಾಳ ಕೇವಲ ಮೂರು ಕೋಟಿ ಆದರೆ ಸಿನಿಮಾ ಗಳಿಸಿರುವುದು ಬರೋಬ್ಬರಿ 54 ಕೋಟಿ. ಹಾಕಿದ್ದ ಬಂಡವಾಳಕ್ಕೆ 1800% ಗೂ ಹೆಚ್ಚಿನ ಲಾಭವನ್ನು ಈ ಸಿನಿಮಾ ಮಾಡಿದೆ. ಜನಪ್ರಿಯ ಮಲಯಾಳಂ ನಟ ಸುಬಿನ್, ಚೆಂಬನ್ ವಿನೋದ್ ಹೊರತಾಗಿ ಬಹುತೇಕ ಹೊಸಬರೇ ತುಂಬಿರುವ ಈ ಸಿನಿಮಾ ಕೇರಳದಲ್ಲಿ ಸೂಪರ್ ಹಿಟ್ ಆಗಿ ಹೊರಹೊಮ್ಮಿದೆ.

ಅಂದಹಾಗೆ ಭಾರತದಲ್ಲಿ ಇತ್ತೀಚೆಗಿನ ದಿನದಲ್ಲಿ ಅತಿ ಹೆಚ್ಚು ಪ್ರತಿಶತ ಲಾಭ ಮಾಡಿದ ಸಿನಿಮಾ ಎಂಬ ಹೆಗ್ಗಳಿಕೆ ಕನ್ನಡ ಸಿನಿಮಾ ‘ಕಾಂತಾರ’ದ್ದು. 16 ಕೋಟಿ ಬಜೆಟ್​ನಲ್ಲಿ ನಿರ್ಮಾಣವಾದ ಈ ಸಿನಿಮಾ 450 ಕೋಟಿ ಕಲೆಕ್ಷನ್ ಮಾಡಿದೆ. ಹಾಕಿದ ಬಂಡವಾಳಕ್ಕೆ ಶೇ 3000 ಪಟ್ಟು ಲಾಭವನ್ನು ಈ ಸಿನಿಮಾ ಮಾಡಿಕೊಟ್ಟಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ