ಪ್ರತಿದಿನ ನಾಭಿಗೆ 2 ಹನಿ ಎಣ್ಣೆ ಹಚ್ಚಿದರೆ ಏನಾಗುತ್ತೆ? ನೀವು ತಿಳಿಯಬೇಕಾದ ಸಂಗತಿಗಳಿವು!

ನಾಭಿಗೆ ಎಣ್ಣೆ ಹಚ್ಚುವುದರಿಂದ ಆರೋಗ್ಯ ಮತ್ತು ಸೌಂದರ್ಯಕ್ಕೆ ಹಲವು ಪ್ರಯೋಜನಗಳಿವೆ ಎಂಬ ನಂಬಿಕೆ ಆಯುರ್ವೇದ ಪದ್ಧತಿಯಲ್ಲಿ ಬಹಳ ಹಿಂದಿನಿಂದಲೂ ಇದೆ. ವಿಶೇಷವಾಗಿ ತೆಂಗಿನೆಣ್ಣೆ, ಹರಳೆಣ್ಣೆ, ಎಳ್ಳೆಣ್ಣೆ, ತುಪ್ಪ ಸೇರಿದಂತೆ ವಿವಿಧ ಎಣ್ಣೆಗಳನ್ನು ನಾಭಿಗೆ ಹಚ್ಚುವ ಅಭ್ಯಾಸ ಕೆಲವರಲ್ಲಿದೆ. ಇದರಿಂದ ಚರ್ಮದ ಕಾಂತಿ ಹೆಚ್ಚುತ್ತದೆ, ಜೀರ್ಣಕ್ರಿಯೆ ಸುಧಾರಿಸುತ್ತದೆ ಮತ್ತು ಮಾನಸಿಕ ಒತ್ತಡ ಕಡಿಮೆಯಾಗುತ್ತದೆ ಎಂಬ ಮಾತುಗಳೂ ಕೇಳಿಬರುತ್ತವೆ. ಆದರೆ ಈ ಪ್ರಯೋಜನಗಳಿಗೆ ವೈಜ್ಞಾನಿಕ ಆಧಾರ ಎಷ್ಟಿದೆ ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.

ನಾಭಿಗೆ ಹಚ್ಚಬಹುದಾದ 6 ಬಗೆಯ ಎಣ್ಣೆಗಳು

ಹರಳೆಣ್ಣೆ: ಹರಳೆಣ್ಣೆಯಲ್ಲಿ ರಿಸಿನೋಲಿಕ್ ಆಮ್ಲವಿದ್ದು, ಕೆಲವು ಉರಿಯೂತ ನಿರೋಧಕ ಗುಣಗಳನ್ನು ಹೊಂದಿದೆ. ಆದರೆ ನಾಭಿಗೆ ಹಚ್ಚುವುದರಿಂದ ಮಲಬದ್ಧತೆ, ಕೀಲುನೋವು ಅಥವಾ ಸ್ನಾಯುಗಳ ಬಿಗಿತ ಕಡಿಮೆಯಾಗುತ್ತದೆ ಎಂಬುದಕ್ಕೆ ವೈಜ್ಞಾನಿಕ ಪುರಾವೆಗಳಿಲ್ಲ.

ಶುದ್ಧ ತುಪ್ಪ: ತುಪ್ಪವನ್ನು ಚರ್ಮಕ್ಕೆ ಹಚ್ಚುವುದರಿಂದ ಸ್ವಲ್ಪ ತೇವಾಂಶ ದೊರೆಯಬಹುದು. ಒಣ ಚರ್ಮವನ್ನು ಮೃದುವಾಗಿಡಲು ಇದು ಸಹಾಯ ಮಾಡಬಹುದು. ಆದರೆ ನಾಭಿಗೆ ಹಚ್ಚುವುದರಿಂದ ಎಲ್ಲರಿಗೂ ಹಾರ್ಮೋನ್ ಸಮತೋಲನ ಅಥವಾ ಜೀರ್ಣಕ್ರಿಯೆ ಸುಧಾರಿಸುತ್ತದೆ ಎನ್ನಲು ಸಾಧ್ಯವಿಲ್ಲ.

ಇದನ್ನೂ ಓದಿ: ಫೈಬರ್ ಅಂಶದ ಕೊರತೆ ಮಲಬದ್ಧತೆ ಮತ್ತು ಜೀರ್ಣಕ್ರಿಯೆ ಸಮಸ್ಯೆಗೆ ಕಾರಣವೇ? ಈ ತಪ್ಪುಗಳನ್ನು ಸರಿಪಡಿಸಿಕೊಳ್ಳಿ

ಎಳ್ಳೆಣ್ಣೆ: ಎಳ್ಳೆಣ್ಣೆಯನ್ನು ಸಾಂಪ್ರದಾಯಿಕವಾಗಿ ಮಸಾಜ್‌ಗೆ ಬಳಸಲಾಗುತ್ತದೆ. ಇದು ಚರ್ಮಕ್ಕೆ ತೇವಾಂಶ ನೀಡಬಹುದು. ಮಸಾಜ್ ಮಾಡುವುದರಿಂದ ವಿಶ್ರಾಂತಿಯ ಅನುಭವವೂ ಸಿಗಬಹುದು.

ಸಾಸಿವೆ ಎಣ್ಣೆ: ಇದರಲ್ಲಿ ಕೆಲವು ಬ್ಯಾಕ್ಟೀರಿಯಾ ನಿರೋಧಕ ಗುಣಗಳಿದ್ದರೂ, ನೇರವಾಗಿ ಚರ್ಮಕ್ಕೆ ಹಚ್ಚಿದಾಗ ಕೆಲವರಿಗೆ ಉರಿ, ತುರಿಕೆ ಅಥವಾ ಅಲರ್ಜಿ ಉಂಟಾಗಬಹುದು.

ತೆಂಗಿನೆಣ್ಣೆ: ಒಣ ಚರ್ಮಕ್ಕೆ ತೇವಾಂಶ ನೀಡಲು ತೆಂಗಿನೆಣ್ಣೆ ಸಹಕಾರಿ. ಆದರೆ ನಾಭಿಗೆ ಹಚ್ಚುವುದರಿಂದ ದೃಷ್ಟಿ ಸುಧಾರಿಸುತ್ತದೆ ಎಂಬುದಕ್ಕೆ ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ.

ಬೇವಿನೆಣ್ಣೆ: ಚರ್ಮದ ಆರೈಕೆಯಲ್ಲಿ ಬೇವಿನೆಣ್ಣೆಯನ್ನು ಬಳಸಲಾಗುತ್ತದೆ. ಆದರೆ ನೇರವಾಗಿ ಹಚ್ಚುವುದರಿಂದ ಕೆಲವರಿಗೆ ಚರ್ಮದ ಕಿರಿಕಿರಿ ಉಂಟಾಗಬಹುದು.

ನಾಭಿಗೆ ಎಣ್ಣೆ ಹಚ್ಚುವುದು ಯಾವಾಗ?

ಸ್ನಾನದ ನಂತರ ಅಥವಾ ರಾತ್ರಿ ಮಲಗುವ ಮೊದಲು ನಾಭಿಯ ಸುತ್ತಲಿನ ಚರ್ಮಕ್ಕೆ ಸ್ವಲ್ಪ ಪ್ರಮಾಣದ ಎಣ್ಣೆಯನ್ನು ಹಚ್ಚಬಹುದು. ಮೃದುವಾಗಿ ಮಸಾಜ್ ಮಾಡಬೇಕು. ನಾಭಿಯನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಬಹಳ ಮುಖ್ಯ.

ಈ ವಿಷಯಗಳನ್ನು ನೆನಪಿಡಿ

ನಾಭಿಗೆ ಎಣ್ಣೆ ಹಚ್ಚುವುದರಿಂದ ದೇಹದಲ್ಲಿರುವ ವಿಷಕಾರಿ ಅಂಶಗಳು ಹೊರಹೋಗುತ್ತವೆ, ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ, ಜೀರ್ಣಕ್ರಿಯೆ ಸುಧಾರಿಸುತ್ತದೆ ಅಥವಾ ಕೀಲುನೋವು ಕಡಿಮೆಯಾಗುತ್ತದೆ ಎಂಬ ಹೇಳಿಕೆಗಳಿಗೆ ಸಾಕಷ್ಟು ವೈಜ್ಞಾನಿಕ ಪುರಾವೆಗಳಿಲ್ಲ. ನಾಭಿಗೆ ಎಣ್ಣೆ ಹಚ್ಚುವುದನ್ನು ಚರ್ಮದ ಆರೈಕೆಯ ಒಂದು ವಿಧಾನವಾಗಿ ಮಾತ್ರ ಪರಿಗಣಿಸಬೇಕು. ಯಾವುದೇ ರೀತಿಯ ಅಲರ್ಜಿ, ಗಾಯ ಅಥವಾ ಸೋಂಕು ಕಂಡುಬಂದರೆ ಎಣ್ಣೆ ಹಚ್ಚುವುದನ್ನು ನಿಲ್ಲಿಸಿ ವೈದ್ಯರ ಸಲಹೆ ಪಡೆಯುವುದು ಉತ್ತಮ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ