ಸ್ಟ್ರೆಚ್ ಮಾರ್ಕ್ಸ್‌ ಕಡಿಮೆ ಮಾಡಲು ವಿಟಮಿನ್ ಇ ಆಯಿಲ್ ಬಳಸುವ ಮುನ್ನ ಈ ವಿಷಯಗಳನ್ನು ತಿಳಿಯಿರಿ

ಗರ್ಭಾವಸ್ಥೆಯಲ್ಲಿ ಮಹಿಳೆಯರ ದೇಹದಲ್ಲಿ ಹಲವು ಬದಲಾವಣೆಗಳು ಸಂಭವಿಸುತ್ತವೆ. ಇವುಗಳಲ್ಲಿ ಚರ್ಮದ ಮೇಲೆ ಕಾಣಿಸಿಕೊಳ್ಳುವ ಸ್ಟ್ರೆಚ್ ಮಾರ್ಕ್ಸ್ ಅಥವಾ ಹಿಗ್ಗಿದ ಗುರುತುಗಳು ಸಾಮಾನ್ಯವಾಗಿವೆ. ಹೊಟ್ಟೆ, ಸೊಂಟ, ಸ್ತನಗಳು ಮತ್ತು ತೊಡೆಗಳ ಭಾಗದಲ್ಲಿ ಉದ್ದನೆಯ ಗೆರೆಗಳಂತೆ ಕಾಣಿಸುವ ಈ ಗುರುತುಗಳು ಕೆಲವರಲ್ಲಿ ಕಾಲ ಕಳೆದಂತೆ ಮಸುಕಾಗಬಹುದು. ಆದರೆ ಎಲ್ಲರಲ್ಲೂ ಸಂಪೂರ್ಣವಾಗಿ ಮಾಯವಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಆದರೆ ಸ್ಟ್ರೆಚ್ ಮಾರ್ಕ್ಸ್ ಕಡಿಮೆ ಮಾಡಲು ಅನೇಕರು ವಿಟಮಿನ್ ಇ ಆಯಿಲ್ ಬಳಸುತ್ತಾರೆ. ಮಾರುಕಟ್ಟೆಯಲ್ಲಿ ದೊರೆಯುವ ಕೆಲವು ಚರ್ಮದ ಆರೈಕೆ ಉತ್ಪನ್ನಗಳಲ್ಲಿಯೂ ವಿಟಮಿನ್ ಇ ಇರುತ್ತದೆ. ಆದರೆ ಈ ಎಣ್ಣೆ ನಿಜವಾಗಿಯೂ ಸ್ಟ್ರೆಚ್ ಮಾರ್ಕ್ಸ್ ನಿವಾರಿಸಲು ಪರಿಣಾಮಕಾರಿಯೇ ಎಂಬ ಪ್ರಶ್ನೆಗೆ ತಜ್ಞರು ನೀಡುವ ಉತ್ತರವನ್ನು ತಿಳಿದುಕೊಳ್ಳುವುದು ಮುಖ್ಯ.

ವಿಟಮಿನ್ ಇ ಆಯಿಲ್ ಬಗ್ಗೆ ತಜ್ಞರು ಹೇಳುವುದೇನು?

ದೆಹಲಿಯ ಅಪೋಲೊ ಸ್ಪೆಕ್ಟ್ರಾ ಆಸ್ಪತ್ರೆಯ ಚರ್ಮರೋಗ ವಿಭಾಗದ ಹಿರಿಯ ಸಲಹೆಗಾರ ಡಾ. ಸಂದೀಪ್ ಅರೋರಾ ಅವರ ಪ್ರಕಾರ, ಸ್ಟ್ರೆಚ್ ಮಾರ್ಕ್ಸ್‌ಗಾಗಿ ವಿಟಮಿನ್ ಇ ಆಯಿಲ್ ಬಳಸುವುದು ಸಾಮಾನ್ಯವಾದರೂ, ಇದನ್ನು ಖಚಿತ ಚಿಕಿತ್ಸೆಯೆಂದು ಪರಿಗಣಿಸಲು ಸಾಧ್ಯವಿಲ್ಲ. ವಿಟಮಿನ್ ಇ ಅನ್ನು ಪ್ರತ್ಯೇಕವಾಗಿ ಚರ್ಮಕ್ಕೆ ಹಚ್ಚುವುದರಿಂದ ಸ್ಟ್ರೆಚ್ ಮಾರ್ಕ್ಸ್ ಕಡಿಮೆಯಾಗುತ್ತವೆ ಎಂಬುದಕ್ಕೆ ಬಲವಾದ ವೈಜ್ಞಾನಿಕ ಪುರಾವೆಗಳು ಲಭ್ಯವಿಲ್ಲ. ಕೆಲವರಿಗೆ ಇದು ಉಪಯೋಗಕಾರಿಯಾಗಬಹುದು.

ಸ್ಟ್ರೆಚ್ ಮಾರ್ಕ್ಸ್ ಏಕೆ ಕಾಣಿಸಿಕೊಳ್ಳುತ್ತವೆ?

ಚರ್ಮದ ಒಳಪದರವು ವೇಗವಾಗಿ ಹಿಗ್ಗಿದಾಗ ಅದರಲ್ಲಿರುವ ಅಂಗಾಂಶಗಳಲ್ಲಿ ಬದಲಾವಣೆ ಉಂಟಾಗಿ ಸ್ಟ್ರೆಚ್ ಮಾರ್ಕ್ಸ್ ಕಾಣಿಸಿಕೊಳ್ಳಬಹುದು. ಗರ್ಭಾವಸ್ಥೆ, ತೂಕದಲ್ಲಿ ತ್ವರಿತ ಹೆಚ್ಚಳ ಅಥವಾ ಇಳಿಕೆ, ಹದಿಹರೆಯದ ಬೆಳವಣಿಗೆ ಮತ್ತು ಸ್ನಾಯುಗಳ ಗಾತ್ರ ಹೆಚ್ಚಾಗುವ ಸಂದರ್ಭಗಳಲ್ಲಿ ಇವು ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ.

ಇದನ್ನೂ ಓದಿ: ತೂಕ ಇಳಿಸುವ ಪ್ರಯತ್ನಕ್ಕೆ ಅಡ್ಡಿಯಾಗುವ ಅಭ್ಯಾಸಗಳು: ಆಹಾರ, ನಿದ್ರೆ ಮತ್ತು ವ್ಯಾಯಾಮದ ಕಡೆ ಇರಲಿ ಗಮನ

ವಿಟಮಿನ್ ಇ ಆಯಿಲ್‌ನಿಂದ ಸಿಗುವ ಪ್ರಯೋಜನಗಳು:

ಸಾಮಾನ್ಯವಾಗಿ ವಿಟಮಿನ್ ಇ ಆಯಿಲ್ ಚರ್ಮವನ್ನು ತೇವಾಂಶದಿಂದ ಇರಿಸಲು ಸಹಾಯ ಮಾಡಬಹುದು. ಇದರಿಂದ ಚರ್ಮದ ಒಣತನ ಮತ್ತು ಬಿಗಿತದ ಅನುಭವ ಕಡಿಮೆಯಾಗಬಹುದು. ಆದರೆ ಹಳೆಯ ಸ್ಟ್ರೆಚ್ ಮಾರ್ಕ್ಸ್ ಸಂಪೂರ್ಣವಾಗಿ ಮಾಯವಾಗುತ್ತವೆ ಎಂದು ನಿರೀಕ್ಷಿಸಬಾರದು. ಹೊಸದಾಗಿ ಕಾಣಿಸಿಕೊಂಡ ಕೆಂಪು ಅಥವಾ ಗುಲಾಬಿ ಬಣ್ಣದ ಗುರುತುಗಳಿಗೆ ಕೆಲವು ವೈದ್ಯಕೀಯ ಚಿಕಿತ್ಸೆಗಳು ನೆರವಾಗಬಹುದು. ಟ್ರೆಟಿನೊಯಿನ್, ಗ್ಲೈಕೋಲಿಕ್ ಆಮ್ಲ ಮತ್ತು ಲೇಸರ್ ಚಿಕಿತ್ಸೆಗಳ ಮೂಲಕ ಕೆಲವು ಸಂದರ್ಭಗಳಲ್ಲಿ ಸುಧಾರಣೆ ಕಂಡುಬಂದಿದೆ. ಇವುಗಳನ್ನು ತಜ್ಞರ ಸಲಹೆಯಂತೆ ಮಾತ್ರ ಬಳಸಬೇಕು. ವಿಶೇಷವಾಗಿ ಗರ್ಭಾವಸ್ಥೆಯಲ್ಲಿ ಟ್ರೆಟಿನೊಯಿನ್ ಬಳಸಬಾರದು.

ಎಣ್ಣೆ ಬಳಸುವಾಗ ಎಚ್ಚರಿಕೆ ಅಗತ್ಯ

ವಿಟಮಿನ್ ಇ ಆಯಿಲ್ ಕೆಲವರಲ್ಲಿ ತುರಿಕೆ, ಉರಿ ಅಥವಾ ಅಲರ್ಜಿಯ ಪ್ರತಿಕ್ರಿಯೆ ಉಂಟುಮಾಡಬಹುದು. ಮೊದಲ ಬಾರಿ ಬಳಸುವ ಮುನ್ನ ಚರ್ಮದ ಸಣ್ಣ ಭಾಗದಲ್ಲಿ ಪರೀಕ್ಷಿಸುವುದು ಉತ್ತಮ. ಒಟ್ಟಿನಲ್ಲಿ, ಸ್ಟ್ರೆಚ್ ಮಾರ್ಕ್ಸ್ ಕಡಿಮೆ ಮಾಡಲು ಕೇವಲ ಎಣ್ಣೆಗಳನ್ನೇ ಅವಲಂಬಿಸಬಾರದು. ಗುರುತುಗಳ ಸ್ವರೂಪ ಮತ್ತು ಚರ್ಮದ ಸ್ಥಿತಿಗೆ ಅನುಗುಣವಾಗಿ ಚರ್ಮರೋಗ ತಜ್ಞರಿಂದ ಸೂಕ್ತ ಸಲಹೆ ಪಡೆಯುವುದು ಉತ್ತಮ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ