ಸಾರಿಗೆ ಬಸ್​​ಗಳ ಟಿಕೆಟ್​ ದರ ಹೆಚ್ಚಳ ಅನಿವಾರ್ಯವಾಗಿದ್ದೇಕೆ? ಇಲ್ಲಿದೆ ಅಸಲಿ ಕಾರಣ

ಬೆಂಗಳೂರು, ನವೆಂಬರ್​​ 04: ರಾಜ್ಯ ಸರ್ಕಾರ ಸಾರಿಗೆ ಬಸ್​​ಗಳ ಟಿಕೆಟ್​​ ದರ ಏರಿಕೆ ಮಾಡಿರುವುದಕ್ಕೆ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ. ವಿಪಕ್ಷಗಳು ಪ್ರತಿಭಟನೆಗೆ ಕರೆ ನೀಡಿದ್ದರೆ, ಸಿಎಂ ಮತ್ತು ಸಚಿವರು ಮಾತ್ರ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ. ಡೀಸೆಲ್​ ಹಾಕಲೂ ಹಣ ಇರಲಿಲ್ಲ, ತುಂಬಾ ನಷ್ಟ ಆಗುತ್ತಿದೆ ಎಂದು ಮಾಹಿತಿ ನೀಡಿದ್ದಾರೆ. ಸಾಮಾನ್ಯ ಸಾರಿಗೆ ಬಸ್​​ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಕಲ್ಪಿಸುವ ಶಕ್ತಿ ಯೋಜನೆಯಿಂದಾಗಿಯೇ ಸಾರಿಗೆ ನಿಗಮಗಳು ದಿವಾಳಿಯಾಗಿವೆ ಎಂಬ ಆರೋಪಗಳಿಗೂ ಸಾರಿಗೆ ಸಚಿವ ಭೈರತಿ ಸುರೇಶ್​​ ಸ್ಪಷ್ಟನೆ ನೀಡಿದ್ದಾರೆ. ಯಾವೆಲ್ಲ ಕಾರಣಗಳಿಂದ ನಿಗಮಗಳು ಸಂಕಷ್ಟಕ್ಕೆ ಸಿಲುಕಿವೆ ಎಂಬುದನ್ನವರು ವಿವರಿಸಿದ್ದಾರೆ.

ಸಾರಿಗೆ ನಿಗಮಗಳ ನಷ್ಟದ ಹಿಂದಿವೆ ಹಲವು ಕಾರಣ!

ದಕ್ಷಿಣ ಭಾರತದಲ್ಲಿಯೇ ಅತಿ ಹೆಚ್ಚು ಸರ್ಕಾರಿ ಸಾರಿಗೆ ಬಸ್​​ಗಳು ಕರ್ನಾಟಕದಲ್ಲಿದ್ದು, ನಾಲ್ಕೂ ನಿಗಮಗಳಲ್ಲಿ ಒಟ್ಟು 26,125 ಬಸ್​​ಗಳಿವೆ. 1,03,646 ನೌಕರರು ಕೆಲಸ ಮಾಡುತ್ತಿದ್ದಾರೆ. ವಿಪಕ್ಷಗಳು ಫ್ರೀ ಬಸ್ ಕೊಟ್ಟಿರೋದಕ್ಕೆ ನಿಗಮಗಳಿಗೆ ನಷ್ಟ ಆಗುತ್ತಿದೆ ಎನ್ನುತ್ತಿದ್ದಾರೆ. ಆದರೆ ಉಚಿತವಾಗಿ ಮಹಿಳೆಯರು ಓಡಾಡ್ತಿರೋದಕ್ಕೆ ಸರ್ಕಾರ ನಿಗಮಕ್ಕೆ ಹಣ ಕೊಡ್ತಿದೆ. ಡಿಸೇಲ್ ಬೆಲೆ, ನಿರ್ವಹಣೆ ದರ ಹೆಚ್ಚಾದಾಗ ಟಿಕೆಟ್​​ ದರ ಏರಿಕೆಯೂ ಅನಿವಾರ್ಯ ಎಂದು ಭೈರತಿ ಸುರೇಶ್​​ ತಿಳಿಸಿದ್ದಾರೆ. ಕಳೆದ 10 ವರ್ಷಗಳಲ್ಲಿ ಒಮ್ಮೆ ಮಾತ್ರ ಬಸ್​​ ಟಿಕೆಟ್​​ ದರ ಹೆಚ್ಚಿಸಲಾಗಿದೆ. 2025ರಲ್ಲಿ ಮಾತ್ರ ಟಿಕೆಟ್​​ ದರ ಏರಿಕೆ ಮಾಡಲಾಗಿತ್ತು. ಆದರೆ ಈಗ ಲೀಟರ್​​ ಡೀಸೆಲ್ ಬೆಲೆ ಒಟ್ಟಾರೆಯಾಗಿ 10.47 ರೂ. ಜಾಸ್ತಿಯಾಗಿದೆ ಎಂದವರು ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ರಾಜ್ಯದ ಜನತೆಗೆ ಬಸ್​​ ದರ ಏರಿಕೆ ಶಾಕ್​: ಬೆಂಗಳೂರಿನಿಂದ ಪ್ರಮುಖ ನಗರಗಳಿಗೆ ಟಿಕೆಟ್​​ ದರದಲ್ಲಿ ಎಷ್ಟು ಹೆಚ್ಚಳ? ಇಲ್ಲಿದೆ ಮಾಹಿತಿ

ಟಿಕೆಟ್​​ ದರ ಹೆಚ್ಚಳಕ್ಕೆ ಕಾರಣವಾಗಿರುವ ಪ್ರಮುಖ ಅಂಶಗಳು

• ಈಗಿರುವ ಪರಿಸ್ಥಿತಿ ಪ್ರಕಾರ 80% ದುಡ್ಡು ಡೀಸೆಲ್‌ ಹಾಗೂ ಸಿಬ್ಬಂದಿಗೇ ವೆಚ್ಚ ಆಗ್ತಿದೆ
• ವರ್ಷಕ್ಕೆ 5,694 ಕೋಟಿ ಡಿಸೇಲ್ ಬೇಕಿದ್ದು, 1,111.88 ಕೋಟಿ ರೂ. ಬಾಕಿ ಕೊಡಬೇಕಿದೆ
• ಡಿಸೇಲ್ ಬೆಲೆ ಏರಿಕೆಯಿಂದ ಪ್ರತಿ ವರ್ಷ ನಿಗಮಗಳಿಗೆ 500 ಕೋಟಿ ಹೊರೆ
• 2024ರಲ್ಲಿ ನೌಕರರ ಸಂಬಳ ಜಾಸ್ತಿ ಮಾಡಿದ ಪರಿಣಾಮ 7,719 ಕೋಟಿ ಹೊಣೆಗಾರಿಕೆ ವೆಚ್ಚದ ಜೊತೆಗೆ 2,192 ಕೋಟಿ ರೂ. ಸಾಲ
• ಶಕ್ತಿ ಯೋಜನೆಯ 5 ಸಾವಿರ ಕೋಟಿ ಹಣ ಕೂಡ ಸರ್ಕಾರದಿಂದ ಬಾಕಿ
• ನಾಲ್ಕೂ ನಿಗಮಗಳಿಗೆ ಪ್ರತಿವರ್ಷ ಆಗುವ ಖರ್ಚು 16 ಸಾವಿರ ಕೋಟಿ, ಆದರೆ ಸಂಗ್ರಹ ಆಗ್ತಿರೋದು 14 ಸಾವಿರ ಕೋಟಿ ಮಾತ್ರ. ಇದರಿಂದ ಪ್ರತಿ ವರ್ಷ 2 ಸಾವಿರ ಕೋಟಿ ಹೊರೆ

ಇನ್ನು ಬಿಎಂಟಿಸಿ ಶೆ.180ರಷ್ಟು ಟಿಕೆಟ್​​ ದರ ಹೆಚ್ಚಳಕ್ಕೆ ಸರ್ಕಾರಕ್ಕೆ ಮನವಿ ಮಾಡಿತ್ತಾದರೆ, ಉಳಿದ ಮೂರು ನಿಗಮಗಳು ಶೇ.90ರಷ್ಟು ದರ ಹೆಚ್ಚಳಕ್ಕೆ ಪ್ರಸ್ತಾಪ ಮಾಡಿದ್ದವು. ಅತುಲ್​​ ತಿವಾರಿ ಕಮಿಟಿ ಕೂಡ ಬಿಎಂಟಿಸಿಗೆ ಶೇ.45ರಷ್ಟು ಮತ್ತು ಉಳಿದ ನಿಗಮಗಳಿಗೆ ಶೇ. 35ರಷ್ಟು ದರ ಏರಿಕೆ ಮಾಡಬಹುದು ಎಂದು ವರದಿ ನೀಡಿತ್ತು. ಆದರೆ ನಾವು ಅಷ್ಟೊಂದು ದರ ಏರಿಕೆ ಮಾಡಲಿಲ್ಲ ಎಂದು ಸಚಿವ ಭೈರತಿ ಸುರೇಶ್​​ ತಿಳಿಸಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 5:27 pm, Wed, 4 November 26