ರಾಹುಲ್ ಗಾಂಧಿ ರ‍್ಯಾಲಿಯಿಂದ ದೆಹಲಿ ಮಾರುಕಟ್ಟೆಗಳು ಸ್ತಬ್ಧ, 11 ಸಾವಿರ ಕೋಟಿ ರೂ. ನಷ್ಟದ ಲೆಕ್ಕ ನೀಡಿದ ವ್ಯಾಪಾರಿಗಳು
ದೆಹಲಿಯಲ್ಲಿ ನಡೆದ ರಾಹುಲ್ ಗಾಂಧಿ ರ‍್ಯಾಲಿಯಿಂದ ರಾಜಧಾನಿಯ ವ್ಯಾಪಾರ ವಹಿವಾಟಿಗೆ 11,000 ಕೋಟಿ ರೂ. ನಷ್ಟವಾಗಿದೆ ಎಂದು ವ್ಯಾಪಾರಿ ಸಂಘಟನೆ ಸಿಟಿಐ ಅಂದಾಜಿಸಿದೆ. ದೀಪಾವಳಿ ಹಬ್ಬದ ಸಮಯದಲ್ಲಿ ಮಾರುಕಟ್ಟೆಗಳು ಬಂದ್ ಆಗಿದ್ದರಿಂದ ಚಿಲ್ಲರೆ, ಸಗಟು ವ್ಯಾಪಾರ, ಸಾರಿಗೆ, ಹೋಟೆಲ್ ಮತ್ತು ದಿನಗೂಲಿ ಕಾರ್ಮಿಕರು ಭಾರಿ ನಷ್ಟ ಅನುಭವಿಸಿದ್ದಾರೆ. 2.5 ಲಕ್ಷಕ್ಕೂ ಹೆಚ್ಚು ಅಂಗಡಿಗಳು ಮುಚ್ಚಿದ್ದವು. ಈ ನಷ್ಟಕ್ಕೆ ಯಾರು ಹೊಣೆ ಎಂಬ ಪ್ರಶ್ನೆ ಎದ್ದಿದೆ.
Updated on:Nov 02, 2026 | 12:30 PM
ನವದೆಹಲಿ, ನವೆಂಬರ್ 02: ದೆಹಲಿಯ ರಾಮಲೀಲಾ ಮೈದಾನದಲ್ಲಿ ನವೆಂಬರ್ 1ರಂದು ನಡೆದ ಇಂಡಿಯಾ ಬ್ಲಾಕ್‌ನ ಬೃಹತ್ ರ‍್ಯಾಲಿ ಇದೀಗ ಹೊಸ ವಿವಾದಕ್ಕೆ ಕಾರಣವಾಗಿದೆ. ರ್ಯಾಲಿಯಿಂದಾಗಿ ರಾಜಧಾನಿಯ ವ್ಯಾಪಾರ ವಹಿವಾಟಿಗೆ ಸುಮಾರು 11,000 ಕೋಟಿ ರೂ. ನಷ್ಟವಾಗಿದೆ ಎಂದು ದೆಹಲಿಯ ವ್ಯಾಪಾರಿಗಳ ಸಂಘಟನೆ ವ್ಯಾಪಾರ ಮತ್ತು ಕೈಗಾರಿಕಾ ಮಂಡಳಿ (CTI) ಹೇಳಿಕೊಂಡಿದೆ. ಹಬ್ಬದ ಹಾಗೂ ದೀಪಾವಳಿ ಶಾಪಿಂಗ್ ಸಮಯದಲ್ಲಿ ಮಾರುಕಟ್ಟೆಗಳು ಬಂದ್ ಆಗಿದ್ದರಿಂದ ವ್ಯಾಪಾರಿಗಳು ಸಂಕಷ್ಟ ಅನುಭವಿಸಿದ್ದಾರೆ ಎಂದು ಸಂಘಟನೆ ಆರೋಪಿಸಿದೆ. ಸಿಟಿಐ ಅಧ್ಯಕ್ಷ ಬ್ರಿಜೇಶ್ ಗೋಯಲ್ ಅವರ ಪ್ರಕಾರ, ರ್ಯಾಲಿಯಿಂದಾಗಿ ನವೆಂಬರ್ 1ರಂದು ದೆಹಲಿಯಲ್ಲಿ ಸುಮಾರು 11,000 ಕೋಟಿ ರೂ. ಮೌಲ್ಯದ ವ್ಯಾಪಾರ ವಹಿವಾಟು ಸ್ಥಗಿತಗೊಂಡಿದೆ. ಈ ನಷ್ಟಕ್ಕೆ ಯಾರು ಪರಿಹಾರ ನೀಡುತ್ತಾರೆ ಎಂಬ ಪ್ರಶ್ನೆಯನ್ನೂ ವ್ಯಾಪಾರಿಗಳು ಎತ್ತಿದ್ದಾರೆ.
3 ಲಕ್ಷ ಅಂಗಡಿಗಳ ಪೈಕಿ 2.5 ಲಕ್ಷ ಅಂಗಡಿಗಳು ಬಂದ್?
ಸಿಟಿಐ ನೀಡಿರುವ ಅಂದಾಜಿನ ಪ್ರಕಾರ, ರಾಮಲೀಲಾ ಮೈದಾನದ ಐದು ಕಿಲೋಮೀಟರ್ ವ್ಯಾಪ್ತಿಯಲ್ಲಿರುವ ಪ್ರಮುಖ ಮಾರುಕಟ್ಟೆಗಳಲ್ಲಿ ವ್ಯಾಪಾರ ಚಟುವಟಿಕೆ ಬಹುತೇಕ ಸ್ಥಗಿತಗೊಂಡಿತ್ತು. ಸುಮಾರು 3 ಲಕ್ಷ ಅಂಗಡಿಗಳ ಪೈಕಿ 2.5 ಲಕ್ಷ ಅಂಗಡಿಗಳು ಮುಚ್ಚಿದ್ದವು. ಇದರಿಂದ ಶೇ. 80ರಷ್ಟು ವ್ಯಾಪಾರ ಚಟುವಟಿಕೆಗೆ ಹೊಡೆತ ಬಿದ್ದಿದೆ ಎಂದು ಸಂಘಟನೆ ತಿಳಿಸಿದೆ. ಚಾಂದಿನಿ ಚೌಕ್, ಚಾವ್ರಿ ಬಜಾರ್, ಖಾರಿ ಬಾವೊಲಿ, ಸದರ್ ಬಜಾರ್, ಕಾಶ್ಮೀರಿ ಗೇಟ್, ಕನ್ನಾಟ್ ಪ್ಲೇಸ್, ಕರೋಲ್ ಬಾಗ್, ಪಹರ್‌ಗಂಜ್, ದರಿಯಾಗಂಜ್, ಪಾಲಿಕಾ ಬಜಾರ್ ಸೇರಿದಂತೆ ಹಲವು ಪ್ರಮುಖ ಮಾರುಕಟ್ಟೆಗಳಲ್ಲಿ ಅಂಗಡಿಗಳು ಮುಚ್ಚಿದ್ದವು ಎಂದು ಸಿಟಿಐ ಹೇಳಿದೆ.
ಯಾವ ಕ್ಷೇತ್ರಕ್ಕೆ ಎಷ್ಟು ನಷ್ಟ?
ವ್ಯಾಪಾರಿಗಳ ಸಂಘಟನೆ ನೀಡಿರುವ ಅಂದಾಜಿನ ಪ್ರಕಾರ, ವಿವಿಧ ಕ್ಷೇತ್ರಗಳಲ್ಲಿ ನಷ್ಟದ ಪ್ರಮಾಣ ಹೀಗಿದೆ: – ಚಿಲ್ಲರೆ ಮತ್ತು ಸಗಟು ವ್ಯಾಪಾರ: 8,800 ಕೋಟಿ ರೂ. – ಸಾರಿಗೆ ಮತ್ತು ಸರಕು ಸಾಗಣೆ: 1,500 ಕೋಟಿ ರೂ. – ಹೋಟೆಲ್, ರೆಸ್ಟೋರೆಂಟ್ ಮತ್ತು ಪ್ರವಾಸೋದ್ಯಮ: 500 ಕೋಟಿ ರೂ. – ದಿನಗೂಲಿ ಕಾರ್ಮಿಕರ ಆದಾಯ: 200 ಕೋಟಿ ರೂ. ಒಟ್ಟು ನಷ್ಟ ಸುಮಾರು 11,000 ಕೋಟಿ ರೂ. ಎಂದು ಸಿಟಿಐ ಅಂದಾಜಿಸಿದೆ. ರ‍್ಯಾಲಿಯ ಕಾರಣದಿಂದ ಸುಮಾರು 10 ಕಿ.ಮೀ ವ್ಯಾಪ್ತಿಯಲ್ಲಿ ಸರಕುಗಳ ಸಾಗಣೆಗೂ ತೊಂದರೆಯಾಯಿತು ಎಂದು ಸಂಘಟನೆ ಆರೋಪಿಸಿದೆ.
ಇದನ್ನೂ ಓದಿ: ರಾಮಲೀಲಾ ಮೈದಾನದಲ್ಲಿ ಜನಸಾಗರ ತೋರಿಸಲು ಎಐ ಮೊರೆ ಹೋಯ್ತಾ ಕಾಂಗ್ರೆಸ್? ಕಿರಣ್ ರಿಜಿಜು ಆರೋಪ
2 ಸಾವಿರಕ್ಕೂ ಹೆಚ್ಚು ಹೋಟೆಲ್‌ಗಳ ಬುಕ್ಕಿಂಗ್ ರದ್ದು?
ರ‍್ಯಾಲಿಯ ಪರಿಣಾಮವಾಗಿ ಮಧ್ಯ ದೆಹಲಿಯ ಕನ್ನಾಟ್ ಪ್ಲೇಸ್, ಕರೋಲ್ ಬಾಗ್, ಪಹರ್‌ಗಂಜ್, ಚಾಂದಿನಿ ಚೌಕ್ ಮತ್ತು ದರಿಯಾಗಂಜ್ ಪ್ರದೇಶಗಳಲ್ಲಿನ 2,000ಕ್ಕೂ ಹೆಚ್ಚು ಹೋಟೆಲ್‌ಗಳು, ರೆಸ್ಟೋರೆಂಟ್‌ಗಳು, ಅತಿಥಿಗೃಹಗಳು ಮತ್ತು ಧಾಬಾಗಳ ಬುಕ್ಕಿಂಗ್‌ಗಳು ರದ್ದಾಗಿವೆ ಎಂದು ಸಿಟಿಐ ತಿಳಿಸಿದೆ. ಇದರ ಜೊತೆಗೆ ಕಾರ್ಮಿಕರು, ಲೋಡರ್‌ಗಳು, ಆಟೋ ಮತ್ತು ಇ-ರಿಕ್ಷಾ ಚಾಲಕರು, ಬೀದಿ ವ್ಯಾಪಾರಿಗಳು ಸೇರಿದಂತೆ ಸುಮಾರು 20 ಲಕ್ಷ ಜನರು ಒಂದು ದಿನದ ಆದಾಯ ಕಳೆದುಕೊಂಡಿದ್ದಾರೆ. ಇದರಿಂದ ದಿನಗೂಲಿ ಕಾರ್ಮಿಕರಿಗೂ ಆರ್ಥಿಕ ಹೊಡೆತ ಬಿದ್ದಿದೆ ಎಂದು ಸಂಘಟನೆ ಹೇಳಿದೆ.
ರ‍್ಯಾಲಿಗೂ ಮುನ್ನವೇ ವಿರೋಧ ವ್ಯಕ್ತಪಡಿಸಿದ್ದ ವ್ಯಾಪಾರಿಗಳು
ದೀಪಾವಳಿ ಹಬ್ಬದ ವ್ಯಾಪಾರ ನಡೆಯುತ್ತಿದ್ದ ಹಿನ್ನೆಲೆಯಲ್ಲಿ ರ‍್ಯಾಲಿಯನ್ನು ಮುಂದೂಡುವಂತೆ ವ್ಯಾಪಾರಿಗಳ ಸಂಘಟನೆ ಈ ಮೊದಲೇ ಮನವಿ ಮಾಡಿತ್ತು ಎನ್ನಲಾಗಿದೆ. ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸೇರಿದಂತೆ ಪ್ರತಿಪಕ್ಷದ ನಾಯಕರಿಗೆ ಪತ್ರ ಬರೆದು, ದೀಪಾವಳಿ ಬಳಿಕ ರ‍್ಯಾಲಿ ನಡೆಸುವಂತೆ ಕೋರಿದ್ದಾಗಿ ಸಿಟಿಐ ತಿಳಿಸಿದೆ.
ಅಂಗಡಿಗಳನ್ನು ಬಿಜೆಪಿ ಬಲವಂತವಾಗಿ ಮುಚ್ಚಿಸಿತೇ? ರಾಹುಲ್ ಗಾಂಧಿ ಆರೋಪ
ಇತ್ತ, ದೆಹಲಿಯ ಅಂಗಡಿಗಳು ಬಂದ್ ಆಗಿರುವುದಕ್ಕೆ ಬಿಜೆಪಿ ಕಾರಣ ಎಂದು ರಾಹುಲ್ ಗಾಂಧಿ ಆರೋಪಿಸಿದ್ದಾರೆ. ರ‍್ಯಾಲಿಗೆ ಬಂದವರು ಸ್ಥಳೀಯ ವ್ಯಾಪಾರಿಗಳಿಗೆ ಬೆಂಬಲ ನೀಡುವ ಉದ್ದೇಶದಿಂದ ಶಾಪಿಂಗ್ ಮಾಡುವಂತೆ ಮನವಿ ಮಾಡಿದ್ದೆವು. ಆದರೆ ಕನ್ನಾಟ್ ಪ್ಲೇಸ್‌ಗೆ ಹೋದಾಗ ಬಿಜೆಪಿ ಪ್ರತಿಯೊಂದು ಅಂಗಡಿಯನ್ನು ಬಲವಂತವಾಗಿ ಮುಚ್ಚಿಸಿದೆ ಎಂದು ರಾಹುಲ್ ಗಾಂಧಿ ವಿಡಿಯೋವೊಂದರಲ್ಲಿ ಹೇಳಿದ್ದಾರೆ.
ಹೀಗಾಗಿ, ಒಂದೆಡೆ ರ‍್ಯಾಲಿಯಿಂದ ವ್ಯಾಪಾರಕ್ಕೆ ನಷ್ಟವಾಗಿದೆ ಎಂದು ಸಿಟಿಐ ಆರೋಪಿಸುತ್ತಿದ್ದರೆ, ಮತ್ತೊಂದೆಡೆ ಅಂಗಡಿಗಳನ್ನು ಮುಚ್ಚಿಸಿದ ಹೊಣೆಯನ್ನು ಬಿಜೆಪಿ ಮೇಲೆ ರಾಹುಲ್ ಗಾಂಧಿ ಹೊರಿಸಿದ್ದಾರೆ. ಈ ಆರೋಪಗಳಿಗೆ ಸಂಬಂಧಿಸಿದಂತೆ ಸ್ವತಂತ್ರ ದೃಢೀಕರಣ ಲಭ್ಯವಿಲ್ಲ. ಮತದಾರರ ಪಟ್ಟಿ ಪರಿಷ್ಕರಣೆ ಮತ್ತು ಚುನಾವಣಾ ಆಯೋಗದ ವಿರುದ್ಧ ನಡೆದ ರಾಜಕೀಯ ರ‍್ಯಾಲಿ ಇದೀಗ ದೆಹಲಿಯ ವ್ಯಾಪಾರ ನಷ್ಟದ ವಿಚಾರವಾಗಿ ಮತ್ತೊಂದು ಚರ್ಚೆಗೆ ನಾಂದಿ ಹಾಡಿದೆ. ಆದರೆ 11,000 ಕೋಟಿ ರೂ. ನಷ್ಟದ ಅಂಕಿ ಅಂಶವು ವ್ಯಾಪಾರಿಗಳ ಸಂಘಟನೆಯ ಅಂದಾಜಾಗಿದ್ದು, ಅಧಿಕೃತವಾಗಿ ಪರಿಶೀಲಿಸಲಾದ ಅಂತಿಮ ನಷ್ಟದ ಲೆಕ್ಕವಲ್ಲ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 12:29 pm, Mon, 2 November 26
