AUS Vs ENG: ಕಾಂಗರೂಗಳ ವಿರುದ್ಧ ಮಲಾನ್ ಅಬ್ಬರ; 11 ವರ್ಷಗಳ ನಂತರ ಅಡಿಲೇಡ್ನಲ್ಲಿ ದಾಖಲೆ ಸೃಷ್ಟಿ
AUS Vs ENG: ಡೇವಿಡ್ ಮಲಾನ್ ಅವರ ಈ ಶತಕ ತುಂಬಾ ವಿಶೇಷ ಏಕೆಂದರೆ 11 ವರ್ಷಗಳ ನಂತರ ಆಂಗ್ಲ ಆಟಗಾರನೊಬ್ಬ ಅಡಿಲೇಡ್ನಲ್ಲಿ ಶತಕ ಬಾರಿಸಿದ ಸಾಧನೆ ಮಾಡಿದ್ದಾರೆ.
Updated on:Nov 17, 2022 | 12:59 PM
2022 ರ ಟಿ20 ವಿಶ್ವಕಪ್ನಲ್ಲಿ (T20 World Cup 2022) ಅತ್ಯಂತ ಕಳಪೆ ಫಾರ್ಮ್ನೊಂದಿಗೆ ಹೋರಾಡುತ್ತಿದ್ದ ಡೇವಿಡ್ ಮಲಾನ್ (dawid malan), ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಅದ್ಭುತ ಆಟ ಪ್ರದರ್ಶಿಸಿದ್ದಾರೆ. ಈ ಎಡಗೈ ಬ್ಯಾಟ್ಸ್ಮನ್ ಅಡಿಲೇಡ್ ಓವಲ್ನಲ್ಲಿ (Adelaide Oval) ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಅದ್ಭುತ ಶತಕ ಬಾರಿಸಿದ್ದಾರೆ. ಜೇಸನ್ ರಾಯ್, ಜೋಸ್ ಬಟ್ಲರ್, ಸ್ಯಾಮ್ ಬಿಲ್ಲಿಂಗ್ಸ್ರಂತಹ ಬ್ಯಾಟ್ಸ್ಮನ್ಗಳ ವೈಫಲ್ಯದ ನಡುವೆಯೂ ಮಲಾನ್ ಶತಕ ಬಾರಿಸಿ ಮಿಂಚಿದ್ದಾರೆ. ಮಲಾನ್ ತಮ್ಮ ಅಬ್ಬರದ ಶತಕದ ಆಧಾರದ ಮೇಲೆ ಆಂಗ್ಲ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದಲ್ಲದೆ ತಮ್ಮ ಅತ್ಯುತ್ತಮ ಇನ್ನಿಂಗ್ಸ್ ಮೂಲಕ ಅದ್ಭುತ ದಾಖಲೆಯೊಂದನ್ನು ಬರೆದಿದ್ದಾರೆ.
ಈ ಪಂದ್ಯದಲ್ಲಿ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗಿಳಿದ ಡೇವಿಡ್ ಮಲಾನ್ 107 ಎಸೆತಗಳಲ್ಲಿ ಶತಕ ಪೂರೈಸಿದರು. ಇದು ಏಕದಿನ ಕ್ರಿಕೆಟ್ನಲ್ಲಿ ಅವರ ಎರಡನೇ ಶತಕವಾಗಿದೆ. ಒಂದು ಸಮಯದಲ್ಲಿ ಇಂಗ್ಲೆಂಡ್ ಕೇವಲ 61 ರನ್ಗಳಿಗೆ 4 ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಆದರೆ ಕ್ರೀಸ್ನಲ್ಲಿ ಭದ್ರವಾಗಿ ನೆಲೆಯೂರಿದ ಮಲಾನ್ ಸಂಯಮದಿಂದ ಬ್ಯಾಟಿಂಗ್ ಮಾಡಿ 64 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಆ ಬಳಿಕ ಮಲಾನ್ ಮುಂದಿನ 33 ಎಸೆತಗಳಲ್ಲಿ ಶತಕ ಪೂರೈಸಿದರು. ಏಕದಿನ ಮಾದರಿಯ 10 ಇನ್ನಿಂಗ್ಸ್ಗಳಲ್ಲಿ ಇದು ಮಲಾನ್ ಅವರ ಎರಡನೇ ಏಕದಿನ ಶತಕವಾಗಿದೆ.
ಮಲಾನ್ ಶತಕ ಏಕೆ ವಿಶೇಷ?
ಡೇವಿಡ್ ಮಲಾನ್ ಅವರ ಈ ಶತಕ ತುಂಬಾ ವಿಶೇಷ ಏಕೆಂದರೆ 11 ವರ್ಷಗಳ ನಂತರ ಆಂಗ್ಲ ಆಟಗಾರನೊಬ್ಬ ಅಡಿಲೇಡ್ನಲ್ಲಿ ಶತಕ ಬಾರಿಸಿದ ಸಾಧನೆ ಮಾಡಿದ್ದಾರೆ. ಡೇವಿಡ್ ಮಲಾನ್ ಅಡಿಲೇಡ್ನಲ್ಲಿ ಏಕದಿನ ಶತಕ ಗಳಿಸಿದ ನಾಲ್ಕನೇ ಇಂಗ್ಲಿಷ್ ಬ್ಯಾಟ್ಸ್ಮನ್. ಅವರಿಗಿಂತ ಮೊದಲು 1983ರಲ್ಲಿ ಡೇವಿಡ್ ಗೋವರ್ ಈ ಸಾಧನೆ ಮಾಡಿದ್ದರು. ಇದರ ನಂತರ, 1999 ರಲ್ಲಿ ಶ್ರೀಲಂಕಾ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಅಡಿಲೇಡ್ನಲ್ಲಿ ಗ್ರೇಮ್ ಹಿಕ್ ಶತಕ ಬಾರಿಸಿ ಮಿಂಚಿದ್ದರು. 2011ರಲ್ಲಿ ಜೊನಾಥನ್ ಟ್ರಾಟ್ ಅಡಿಲೇಡ್ನಲ್ಲಿ ಶತಕ ಬಾರಿಸಿದ್ದು, ಇದೀಗ ಮಲಾನ್ ಈ ಸಾಧನೆ ಮಾಡಿದ್ದಾರೆ.
ಇದನ್ನೂ ಓದಿ: IND vs NZ: ಡಿಡಿ ಸ್ಪೋರ್ಟ್ಸ್ನಲ್ಲಿ ಭಾರತ- ಕಿವೀಸ್ ಟಿ20, ಏಕದಿನ ಸರಣಿಯ ನೇರ ಪ್ರಸಾರ
ಇಂಗ್ಲೆಂಡ್ನ ಅಗ್ರ ಕ್ರಮಾಂಕ ವಿಫಲ
ಆಸ್ಟ್ರೇಲಿಯಾ ಅಡಿಲೇಡ್ನಲ್ಲಿ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು ಮತ್ತು ತಂಡದ ಈ ನಿರ್ಧಾರ ಸರಿಯಾಗಿದೆ ಎಂದು ಸಾಬೀತಾಯಿತು. ಇಂಗ್ಲೆಂಡಿನ ಅಗ್ರ ಕ್ರಮಾಂಕದ ಬ್ಯಾಟ್ಸ್ಮನ್ಗಳು ಸ್ಟಾರ್ಕ್ ಮತ್ತು ಕಮ್ಮಿನ್ಸ್ರ ಮುಂದೆ ತೊಂದರೆಗೀಡಾದರು. ಫಿಲ್ ಸಾಲ್ಟ್ 14, ರಾಯ್ 6 ರನ್ ಗಳಿಸಿ ಔಟಾದರು. ವಿನ್ಸ್ ಕೂಡ 5 ರನ್ ಗಳಿಸಲಷ್ಟೇ ಶಕ್ತರಾದರು. ಅದೇ ವೇಳೆಗೆ ಸ್ಯಾಮ್ ಬಿಲ್ಲಿಂಗ್ಸ್ 17 ರನ್ಗಳಿಗೆ ತಮ್ಮ ವಿಕೆಟ್ ಒಪ್ಪಿಸಿದರು. ಆದರೆ ಅಂತಿಮವಾಗಿ ನಿಗಧಿತ 50 ಓವರ್ಗಳ ಆಟ ಮುಗಿಯುವ ವೇಳೆಗೆ ಇಂಗ್ಲೆಂಡ್ ತಂಡ ಮಲಾನ್ ಅವರ ಶತಕದ ನೆರವಿನಿಂದ 9 ವಿಕೆಟ್ ನಷ್ಟಕ್ಕೆ 288 ರನ್ ಕಲೆ ಹಾಕಿದೆ.
ಇನ್ನಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 12:57 pm, Thu, 17 November 22
