ಸ್ವದೇಶದಲ್ಲಿ ಸಿಂಹ, ವಿದೇಶದಲ್ಲಿ ಬೆಕ್ಕು: ಮಾಜಿ ಕ್ರಿಕೆಟಿಗನ ಎಚ್ಚರಿಕೆ!

ಪ್ರಸ್ತುತ ಟಿ20 ಕ್ರಿಕೆಟ್‌ನ ಸ್ಫೋಟಕ ಬ್ಯಾಟರ್‌ಗಳಾದ ಅಭಿಷೇಕ್ ಶರ್ಮಾ ಹಾಗೂ ವೈಭವ್ ಸೂರ್ಯವಂಶಿ ಸ್ವದೇಶದಲ್ಲಿ ಸಿಂಹದಂತೆ ಅಬ್ಬರಿಸಿದರೂ ವಿದೇಶಿ ಪಿಚ್‌ಗಳಲ್ಲಿ ಬೆಕ್ಕಿನಂತಾಗುತ್ತಾರೆ ಎಂದು ಟೀಮ್ ಇಂಡಿಯಾದ ಮಾಜಿ ಕ್ರಿಕೆಟಿಗ ಸಂದೀಪ್ ಪಾಟೀಲ್ ಕಟುವಾಗಿ ವ್ಯಂಗ್ಯವಾಡಿದ್ದಾರೆ. ತವರಿನ ಮೈದಾನಗಳಲ್ಲಿ ಅಬ್ಬರಿಸುವ ಈ ಯುವ ಆಟಗಾರರು, ವಿದೇಶಿ ಪಿಚ್‌ಗಳ ಸ್ವಿಂಗ್ ಮತ್ತು ಸವಾಲುಗಳನ್ನು ಎದುರಿಸಲು ತಮ್ಮ ಬ್ಯಾಟಿಂಗ್ ತಂತ್ರವನ್ನು ಬದಲಾಯಿಸಿಕೊಳ್ಳದಿದ್ದರೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸುದೀರ್ಘ ಕಾಲ ಉಳಿಯುವುದು ಕಷ್ಟ ಎಂದು ಅವರು ನೇರವಾಗಿಯೇ ಎಚ್ಚರಿಸಿದ್ದಾರೆ.

ಭಾರತದ ಪಿಚ್‌ಗಳಲ್ಲಿ ರನ್ ಮಳೆ ಹರಿಸುವ ಯುವ ಆಟಗಾರರು, ವಿದೇಶದ ಬೌನ್ಸಿ ಹಾಗೂ ಸ್ವಿಂಗ್ ಪಿಚ್‌ಗಳಿಗೆ ಹೋದಾಗ ರನ್ ಗಳಿಸಲು ಪರದಾಡುತ್ತಿರುವುದು ಇತ್ತೀಚಿನ ದಿನಗಳಲ್ಲಿ ಎದ್ದು ಕಾಣುತ್ತಿದೆ. ಇದನ್ನೇ ಉಲ್ಲೇಖಿಸಿರುವ ಸಂದೀಪ್ ಪಾಟೀಲ್, “ಸ್ವದೇಶದಲ್ಲಿ ಸಿಂಹದಂತೆ ಗರ್ಜಿಸುವ ಆಟಗಾರರು ವಿದೇಶಿ ಪ್ರವಾಸ ಕೈಗೊಂಡಾಗ ಬೆಕ್ಕಿನಂತಾಗಬಾರದು. ಭಾರತದ ಹೊರಗಿನ ಪರಿಸ್ಥಿತಿಗಳಿಗೆ ತಕ್ಕಂತೆ ಬ್ಯಾಟಿಂಗ್ ಶೈಲಿಯನ್ನು ಸುಧಾರಿಸಿಕೊಳ್ಳುವುದು ಅತ್ಯಗತ್ಯ” ಎಂದು ತಿಳಿಸಿದ್ದಾರೆ.

ಅಭಿಷೇಕ್ ಮತ್ತು ವೈಭವ್‌ಗೆ ಕಿವಿಮಾತು:

ಅಭಿಷೇಕ್ ಶರ್ಮಾ ಅವರ ಆಕ್ರಮಣಕಾರಿ ಆಟ ಆಕರ್ಷಕವಾಗಿದ್ದರೂ, ವಿದೇಶಿ ಪರಿಸ್ಥಿತಿಯಲ್ಲಿ ಕ್ರೀಸ್‌ನಲ್ಲಿ ಗಟ್ಟಿಯಾಗಿ ನಿಲ್ಲುವ ತಾಳ್ಮೆ ಪ್ರದರ್ಶಿಸಬೇಕಿದೆ. ಇನ್ನು ಕಿರಿಯ ವಯಸ್ಸಿನಲ್ಲೇ ಗಮನ ಸೆಳೆದಿರುವ ವೈಭವ್ ಸೂರ್ಯವಂಶಿ ಕೂಡ ಕೇವಲ ಫ್ಲಾಟ್ ಟ್ರ್ಯಾಕ್‌ ನಂಬಿ ಕೂರದೆ, ಚಲಿಸುವ ಚೆಂಡನ್ನು ಎದುರಿಸುವ ಕೌಶಲವನ್ನು ಮೈಗೂಡಿಸಿಕೊಳ್ಳಬೇಕಿದೆ ಎಂದು ಪಾಟೀಲ್ ಎಚ್ಚರಿಸಿದ್ದಾರೆ.

ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ದೀರ್ಘಕಾಲ ಮುಂದುವರಿಯಬೇಕಾದರೆ ಎಲ್ಲಾ ರೀತಿಯ ಪಿಚ್‌ಗಳಲ್ಲೂ ರನ್ ಗಳಿಸುವ ಸಾಮರ್ಥ್ಯ ಹೊಂದಿರಬೇಕು ಎಂಬುದನ್ನು ಈ ಯುವ ಆಟಗಾರರು ನೆನಪಿನಲ್ಲಿಡಬೇಕಾಗಿದೆ ಎಂದು ಸಂದೀಪ್ ಪಾಟೀಲ್ ಹೇಳಿದ್ದಾರೆ.

ಅಂಕಿ ಅಂಶಗಳು ಹೇಳುವುದೇನು?

ಅಭಿಷೇಕ್ ಶರ್ಮಾ ಮತ್ತು ವೈಭವ್ ಸೂರ್ಯವಂಶಿ ಅವರ ಒಟ್ಟಾರೆ ಟಿ20 ಕ್ರಿಕೆಟ್‌ನ ಸ್ವದೇಶಿ  ಮತ್ತು ವಿದೇಶಿ ಪ್ರದರ್ಶನದ ಅಂಕಿ-ಅಂಶಗಳ ಪಟ್ಟಿ ಇಲ್ಲಿದೆ.

ವೈಭವ್ ಸೂರ್ಯವಂಶಿ ಸ್ವದೇಶಿ ಪಿಚ್​ನಲ್ಲಿ 44.70 ರ ಸರಾಸರಿಯಲ್ಲಿ ರನ್​ ಕಲೆಹಾಕಿದ್ದಾರೆ. ಇನ್ನು ವಿದೇಶದಲ್ಲಿ ಕೇವಲ 6 ಪಂದ್ಯಗಳನ್ನಾಡಿರುವ ಅವರು 32.17ರ ಸರಾಸರಿಯಲ್ಲಿ ರನ್ ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ಅಂಕಿ-ಅಂಶಗಳನ್ನು ಗಮನಿಸಿದರೆ ವಿದೇಶಿ ಪಿಚ್‌ಗಳಲ್ಲಿ ಇಬ್ಬರ ಪ್ರದರ್ಶನ ಕೊಂಚ ಕುಂಠಿತವಾಗಿರುವುದು ಮೇಲ್ನೋಟಕ್ಕೆ ಸ್ಪಷ್ಟವಾಗುತ್ತದೆ. ಇದೇ ಕಾರಣದಿಂದಾಗಿ ಮಾಜಿ ಆಟಗಾರ ಸಂದೀಪ್ ಪಾಟೀಲ್ ಅವರು, ಈ ಯುವ ದಾಂಡಿಗರು ಕೇವಲ ಸ್ವದೇಶದಲ್ಲಿ ಮಾತ್ರ ಸಿಂಹದಂತೆ ಅಬ್ಬರಿಸದೆ ವಿದೇಶದಲ್ಲೂ ಗರ್ಜಿಸಬೇಕೆಂದು ಕಟು ವಾಸ್ತವವನ್ನು ನೆನಪಿಸಿದ್ದಾರೆ.