ಅಸಮರ್ಪಕ ವೇಳಾಪಟ್ಟಿ: ಟೀಮ್ ಇಂಡಿಯಾದ ಸ್ಟಾರ್ ಆಟಗಾರರು ಅಲಭ್ಯ!
ಮುಂಬರುವ ನ್ಯೂಝಿಲೆಂಡ್ ಪ್ರವಾಸಕ್ಕೆ ದಿನಗಣನೆ ಆರಂಭವಾಗಿರುವ ಬೆನ್ನಲ್ಲೇ ಟೀಮ್ ಇಂಡಿಯಾ ಮ್ಯಾನೇಜ್ಮೆಂಟ್ಗೆ ವೇಳಾಪಟ್ಟಿಯ ತಲೆನೋವು ಶುರುವಾಗಿದೆ. ಸರಣಿಯಿಂದ ಸರಣಿಗೆ ಸೂಕ್ತ ಸಮಯಾವಕಾಶ ಇಲ್ಲದ ಕಾರಣ, ಕೇವಲ 4 ದಿನಗಳ ನಂತರ ಆರಂಭವಾಗಲಿರುವ ನಿರ್ಣಾಯಕ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಸರಣಿಯ ಸಿದ್ಧತೆಗಾಗಿ ಭಾರತದ ಸ್ಟಾರ್ ಆಟಗಾರರು ಕೊನೆಯ ಎರಡು ಏಕದಿನ ಪಂದ್ಯಗಳಿಂದ ಹೊರಗುಳಿಯಲಿದ್ದಾರೆ.
Updated on: Sep 21, 2026 | 7:32 AM
ಭಾರತ ಮತ್ತು ನ್ಯೂಝಿಲೆಂಡ್ ನಡುವಣ ಸರಣಿ ಅಕ್ಟೋಬರ್ 22 ರಿಂದ ಶುರುವಾಗಲಿದೆ. ಈ ಸರಣಿಯ ಕೊನೆಯ ಎರಡು ಏಕದಿನ ಪಂದ್ಯಗಳಿಂದ ಟೀಮ್ ಇಂಡಿಯಾದ ಪ್ರಮುಖ ಆಟಗಾರರು ಹೊರಗುಳಿಯುವುದು ಬಹುತೇಕ ಖಚಿತವಾಗಿದೆ. ಇದಕ್ಕೆ ಮುಖ್ಯ ಕಾರಣ ಅಸಮರ್ಪಕ ವೇಳಾಪಟ್ಟಿ.
ನ್ಯೂಝಿಲೆಂಡ್ ಪ್ರವಾಸದಲ್ಲಿ ಟೀಮ್ ಇಂಡಿಯಾ 5 ಪಂದ್ಯಗಳ ಟಿ20, 5 ಪಂದ್ಯಗಳ ಏಕದಿನ ಹಾಗೂ 2 ಪಂದ್ಯಗಳ ಟೆಸ್ಟ್ ಸರಣಿಯನ್ನು ಆಡಲಿದೆ. ಅಕ್ಟೋಬರ್ 22 ರಿಂದ ಆರಂಭವಾಗಲಿರುವ ಈ ಸುದೀರ್ಘ ಪ್ರವಾಸದಲ್ಲಿ ಸರಣಿಯಿಂದ ಸರಣಿಗೆ ಆಟಗಾರರ ವಿಶ್ರಾಂತಿ ಮತ್ತು ಸಿದ್ಧತೆಗಾಗಿ ಬಿಸಿಸಿಐ ಸೂಕ್ತ ಸಮಯಾವಕಾಶ ನೀಡದಿರುವುದೇ ಈಗಿನ ಗೊಂದಲಕ್ಕೆ ಮುಖ್ಯ ಕಾರಣ ಎನ್ನಲಾಗಿದೆ.
ವೇಳಾಪಟ್ಟಿಯ ಎಡವಟ್ಟು ಏನು?
ಭಾರತ ಮತ್ತು ನ್ಯೂಝಿಲೆಂಡ್ ನಡುವಿನ 5 ಪಂದ್ಯಗಳ ಏಕದಿನ ಸರಣಿಯ ಕೊನೆಯ ಪಂದ್ಯ ನವೆಂಬರ್ 15 ರಂದು ಮುಕ್ತಾಯಗೊಳ್ಳಲಿದೆ. ಆದರೆ, ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ (WTC) ದೃಷ್ಟಿಯಿಂದ ಅತ್ಯಂತ ನಿರ್ಣಾಯಕವಾಗಿರುವ 2 ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲ ಪಂದ್ಯ ನವೆಂಬರ್ 19 ರಂದು ವೆಲ್ಲಿಂಗ್ಟನ್ನಲ್ಲಿ ಆರಂಭವಾಗಲಿದೆ.
ಅಂದರೆ ಏಕದಿನ ಸರಣಿ ಮುಗಿದ ಕೇವಲ 4 ದಿನಗಳಲ್ಲೇ ಟೆಸ್ಟ್ ಸರಣಿ ಆರಂಭವಾಗುತ್ತಿರುವುದರಿಂದ, ಉಭಯ ಫಾರ್ಮ್ಯಾಟ್ಗಳಲ್ಲಿ ಆಡುವ ಆಟಗಾರರಿಗೆ ರೆಡ್ ಬಾಲ್ ಕ್ರಿಕೆಟ್ಗೆ ಹೊಂದಿಕೊಳ್ಳಲು ಮತ್ತು ಅಭ್ಯಾಸ ನಡೆಸಲು ಕನಿಷ್ಠ ಸಮಯವೂ ಸಿಗದಂತಾಗಿದೆ.
2 ಪಂದ್ಯಗಳ ವೇಳೆ ವಿಶ್ರಾಂತಿ!
ವರದಿಗಳ ಪ್ರಕಾರ, ಟೆಸ್ಟ್ ಸರಣಿಯ ಸಿದ್ಧತೆಗಾಗಿ ಏಕದಿನ ನಾಯಕ ಶುಭ್ಮನ್ ಗಿಲ್ ಸೇರಿದಂತೆ ಪ್ರಮುಖ ಮಲ್ಟಿ-ಫಾರ್ಮ್ಯಾಟ್ ಆಟಗಾರರನ್ನು ಕೊನೆಯ ಎರಡು ಏಕದಿನ ಪಂದ್ಯಗಳಿಂದ ಬಿಡುಗಡೆ ಮಾಡಿ, ಮೊದಲೇ ಟೆಸ್ಟ್ ಸರಣಿ ನಡೆಯುವ ವೆಲ್ಲಿಂಗ್ಟನ್ಗೆ ಕಳುಹಿಸಲು ಮ್ಯಾನೇಜ್ಮೆಂಟ್ ನಿರ್ಧರಿಸಿದೆ. ಅದರಂತೆ ಐದರಿಂದ ಏಳು ಆಟಗಾರರು ಕೊನೆಯ ಎರಡು ಏಕದಿನ ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ. ಆ ಆಟಗಾರರು ಯಾರೆಂದು ನೋಡುವುದಾದರೆ…
- ಶುಭ್ಮನ್ ಗಿಲ್
- ಜಸ್ಪ್ರಿತ್ ಬುಮ್ರಾ
- ಕೆ.ಎಲ್. ರಾಹುಲ್
- ಮೊಹಮ್ಮದ್ ಸಿರಾಜ್
- ಕುಲದೀಪ್ ಯಾದವ್
- ನಿತೀಶ್ ಕುಮಾರ್ ರೆಡ್ಡಿ
- ಪ್ರಸಿದ್ಧ್ ಕೃಷ್ಣ
ಶ್ರೇಯಸ್ ಅಯ್ಯರ್ಗೆ ನಾಯಕತ್ವ?
ಶುಭ್ಮನ್ ಗಿಲ್ ಅಲಭ್ಯತೆಯಲ್ಲಿ ತಂಡದ ಉಪನಾಯಕ ಶ್ರೇಯಸ್ ಅಯ್ಯರ್ ಕೊನೆಯ ಎರಡು ಏಕದಿನ ಪಂದ್ಯಗಳಲ್ಲಿ ಭಾರತ ತಂಡವನ್ನು ಮುನ್ನಡೆಸುವ ಸಾಧ್ಯತೆಯಿದೆ. ಇದು ಮಧ್ಯಮ ಕ್ರಮಾಂಕದ ಬ್ಯಾಟರ್ ಅಯ್ಯರ್ ಅವರಿಗೆ ತಮ್ಮ ನಾಯಕತ್ವದ ಸಾಮರ್ಥ್ಯ ಪ್ರದರ್ಶಿಸಲು ಮತ್ತೊಂದು ಉತ್ತಮ ಅವಕಾಶವಾಗಲಿದೆ.
ಇದನ್ನೂ ಓದಿ: ಏಷ್ಯನ್ ಗೇಮ್ಸ್ನಲ್ಲಿ ಫೈನಲ್ಗೇರಿದ ಟೀಮ್ ಇಂಡಿಯಾ
ಆಟಗಾರರು ಮಾತ್ರವಲ್ಲದೆ ಭಾರತ ತಂಡದ ತರಬೇತುದಾರರ ಬಳಗವೂ ಈ ಸರಣಿಯಲ್ಲಿ ಇಬ್ಬಾಗವಾಗಲಿದೆ. ಮುಖ್ಯ ಕೋಚ್ ಗೌತಮ್ ಗಂಭೀರ್, ಮೋರ್ನೆ ಮೋರ್ಕೆಲ್, ಸಿತಾಂಶು ಕೋಟಕ್ ಮತ್ತು ಸುಭದೀಪ್ ಘೋಷ್ ಅವರನ್ನೊಳಗೊಂಡ ಕೋಚಿಂಗ್ ಸಿಬ್ಬಂದಿಯಲ್ಲಿ ಇಬ್ಬರು ಕೋಚ್ಗಳು ಏಕದಿನ ತಂಡದೊಂದಿಗೆ ಉಳಿಯಲಿದ್ದಾರೆ. ಉಳಿದಿಬ್ಬರು ಕೋಚ್ಗಳು ಗಿಲ್ ಮತ್ತು ಬುಮ್ರಾ ಅವರನ್ನೊಳಗೊಂಡ ಟೆಸ್ಟ್ ತಂಡದೊಂದಿಗೆ ಮೊದಲೇ ವೆಲ್ಲಿಂಗ್ಟನ್ಗೆ ಪ್ರಯಾಣ ಬೆಳೆಸಿ ರೆಡ್ ಬಾಲ್ ತರಬೇತಿ ಶಿಬಿರವನ್ನು ಆರಂಭಿಸಲಿದ್ದಾರೆ.
ಒಟ್ಟಿನಲ್ಲಿ ಬಿಸಿಸಿಐನ ಈ ಅಸಮರ್ಪಕ ವೇಳಾಪಟ್ಟಿಯು ಆಟಗಾರರ ಮೇಲಿನ ಒತ್ತಡವನ್ನು ಹೆಚ್ಚಿಸಿದ್ದು, ಪ್ರಮುಖ ಸರಣಿಯ ಮಧ್ಯದಲ್ಲೇ ಭಾರತ ತಂಡ ಎರಡು ಬೇರೆ ಬೇರೆ ಗುಂಪುಗಳಾಗಿ ಕಾರ್ಯನಿರ್ವಹಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.
