ಡೆಲ್ಲಿ ಕ್ಯಾಪಿಟಲ್ಸ್ನಲ್ಲಿ ‘ದಾದಾ’ಗಿರಿ: ಪಂತ್ ಪಾತ್ರ, ಮಾಸ್ಟರ್ ಪ್ಲ್ಯಾನ್ ರೆಡಿ!
"ಐಪಿಎಲ್ ಅಖಾಡದಲ್ಲಿ ಇನ್ಮುಂದೆ ಶುರುವಾಗಲಿದೆ ಅಸಲಿ 'ದಾದಾಗಿರಿ'! ಕಳೆದ ಕೆಲವು ಸೀಸನ್‌ಗಳಿಂದ ಸತತ ಹಿನ್ನಡೆ ಅನುಭವಿಸುತ್ತಿರುವ ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿಯನ್ನು ಸರಿಹಾದಿಗೆ ತರಲು, ಭಾರತೀಯ ಕ್ರಿಕೆಟ್‌ನ ಅತ್ಯಂತ ಯಶಸ್ವಿ ನಾಯಕರಲ್ಲಿ ಒಬ್ಬರಾದ ಸೌರವ್ ಗಂಗೂಲಿ ಈಗ ಪೂರ್ಣ ಪ್ರಮಾಣದ ಹೆಡ್ ಕೋಚ್ ಆಗಿ ಕಂಬ್ಯಾಕ್ ಮಾಡಿದ್ದಾರೆ.
Updated on: Oct 08, 2026 | 12:14 PM
ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ನೂತನ ಮುಖ್ಯ ಕೋಚ್ ನೇಮಕಗೊಂಡಿದ್ದಾರೆ. 2026ರ ಐಪಿಎಲ್ ಟೂರ್ನಿಯಲ್ಲಿ ಡೆಲ್ಲಿ ತಂಡವು ಆರನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡ ಬೆನ್ನಲ್ಲೇ, ಫ್ರಾಂಚೈಸಿಯು ತನ್ನ ತರಬೇತುದಾರರ ಬಳಗವನ್ನು ಸಂಪೂರ್ಣವಾಗಿ ಬದಲಾಯಿಸಲು ನಿರ್ಧರಿಸಿದೆ. ಅದರಂತೆ ಇದೀಗ ಇದೀಗ ಹೊಸ ಜವಾಬ್ದಾರಿಯನ್ನು ಹೊತ್ತಿರುವ ಗಂಗೂಲಿ, ಮುಂಬರುವ 2027ರ ಐಪಿಎಲ್ ಸೀಸನ್‌ನಲ್ಲಿ ತಂಡವನ್ನು ಮತ್ತೆ ಪ್ಲೇಆಫ್ ಹಂತಕ್ಕೆ ಮುನ್ನಡೆಸುವ ಸ್ಪಷ್ಟ ಗುರಿಯನ್ನು ಹೊಂದಿದ್ದಾರೆ.
ಬದಾನಿ ಸ್ಥಾನಕ್ಕೆ ದಾದಾ ನೇಮಕ:
ಕಳೆದ ಎರಡು ಸೀಸನ್‌ಗಳಲ್ಲಿ (2025 ಮತ್ತು 2026) ಡೆಲ್ಲಿ ತಂಡದ ಮುಖ್ಯ ತರಬೇತುದಾರರಾಗಿದ್ದ ಹೇಮಂಗ್ ಬದಾನಿ ಅವರ ಸ್ಥಾನವನ್ನು ಇದೀಗ ಸೌರವ್ ಗಂಗೂಲಿ ಅಲಂಕರಿಸಲಿದ್ದಾರೆ. ಕಳೆದ ಎರಡು ವರ್ಷಗಳಲ್ಲೂ ಪ್ಲೇಆಫ್ ತಲುಪಲು ವಿಫಲವಾಗಿರುವ ಡೆಲ್ಲಿ ಕ್ಯಾಪಿಟಲ್ಸ್, ಮುಂಬರುವ ಸೀಸನ್‌ಗಾಗಿ ಭರ್ಜರಿ ಯೋಜನೆ ರೂಪಿಸುತ್ತಿದೆ. ಸದ್ಯ ಗಂಗೂಲಿ ಅವರೊಂದಿಗೆ ಟೀಮ್ ಇಂಡಿಯಾ ಮಾಜಿ ಆಟಗಾರ ಯುವರಾಜ್ ಸಿಂಗ್ ಕೂಡ ಬ್ಯಾಟಿಂಗ್ ತರಬೇತುದಾರರಾಗಿ ತಂಡವನ್ನು ಸೇರಿಕೊಳ್ಳುವ ಸಾಧ್ಯತೆಯಿದೆ. ಈ ಇಬ್ಬರು ದಿಗ್ಗಜರ ಜುಗಲ್‌ಬಂದಿ ಫ್ರಾಂಚೈಸಿಗೆ ಹೊಸ ಬಲ ತುಂಬಲಿದೆ.
ಪ್ಲೇಆಫ್ಗೇರುವುದೇ ಗುರಿ:
2021ರ ಬಳಿಕ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಐಪಿಎಲ್‌ನಲ್ಲಿ ಟಾಪ್-4 ಹಂತವನ್ನು ತಲುಪಿಲ್ಲ. ಈ ಬಗ್ಗೆ ಮಾತನಾಡಿರುವ ಗಂಗೂಲಿ, “ತಂಡವನ್ನು ಮತ್ತೆ ಅಗ್ರಸ್ಥಾನಕ್ಕೆ ಕೊಂಡೊಯ್ಯುವುದೇ ನನ್ನ ಮುಖ್ಯ ಗುರಿ. 2019 ಮತ್ತು 2020ರಲ್ಲಿ ಡೆಲ್ಲಿ ಅತ್ಯಂತ ಬಲಿಷ್ಠ ತಂಡವಾಗಿತ್ತು. ಅದೇ ಯಶಸ್ಸನ್ನು ಮತ್ತೆ ಪುನರಾವರ್ತಿಸುವ ಎಲ್ಲ ಸಾಮರ್ಥ್ಯ ನಮ್ಮ ತಂಡಕ್ಕಿದೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಬಲಿಷ್ಠ ಆಟಗಾರರ ದಂಡು!
ಡೆಲ್ಲಿ ಡ್ರೆಸ್ಸಿಂಗ್ ರೂಮ್‌ನಲ್ಲಿರುವ ಪ್ರತಿಭೆಗಳ ಬಗ್ಗೆ ಅಪಾರ ನಂಬಿಕೆ ವ್ಯಕ್ತಪಡಿಸಿರುವ ಗಂಗೂಲಿ, ನಮ್ಮ ತಂಡವು ಲೀಗ್‌ನ ಯಾವುದೇ ಬಲಿಷ್ಠ ತಂಡಕ್ಕೂ ಕಮ್ಮಿಯಿಲ್ಲ ಎಂದು ಹೇಳಿದ್ದಾರೆ. ಪ್ರಸ್ತುತ ತಂಡದಲ್ಲಿ ಕೆ.ಎಲ್ ರಾಹುಲ್, ಅಕ್ಷರ್ ಪಟೇಲ್, ಮಿಚೆಲ್ ಸ್ಟಾರ್ಕ್, ಡೇವಿಡ್ ಮಿಲ್ಲರ್ ಮತ್ತು ಟ್ರಿಸ್ಟನ್ ಸ್ಟಬ್ಸ್ ಅವರಂತಹ ವಿಶ್ವದರ್ಜೆಯ ಮ್ಯಾಚ್ ವಿನ್ನರ್‌ಗಳಿರುವುದು ತಂಡದ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ ಎಂದು ಅವರು ತಿಳಿಸಿದ್ದಾರೆ
ಮರಳಿದ ರಿಷಭ್ ಪಂತ್:
ಲಕ್ನೋ ಸೂಪರ್ ಜೈಂಟ್ಸ್ ತಂಡದಿಂದ ಮತ್ತೆ ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಟ್ರೇಡ್ ಆಗಿರುವ ರಿಷಭ್ ಪಂತ್ ಅವರ ಪಾತ್ರದ ಬಗ್ಗೆ ಗಂಗೂಲಿ ಮಹತ್ವದ ಸುಳಿವು ನೀಡಿದ್ದಾರೆ. ಮುಂಬರುವ ಸೀಸನ್‌ನಲ್ಲಿ ಪಂತ್ ತಂಡದ ಮಧ್ಯಮ ಕ್ರಮಾಂಕದ ಪ್ರಮುಖ ಆಧಾರಸ್ತಂಭವಾಗಲಿದ್ದಾರೆ ಎಂದು ಅವರು ಹೇಳಿದ್ದಾರೆ. ಅದರಲ್ಲೂ ಡೆಲ್ಲಿಯ ತವರು ಮೈದಾನವಾದ ಅರುಣ್ ಜೇಟ್ಲಿ ಸ್ಟೇಡಿಯಂನಲ್ಲಿ ಪಂತ್ ಹೊಂದಿರುವ ಅತ್ಯುತ್ತಮ ದಾಖಲೆ ತಂಡಕ್ಕೆ ದೊಡ್ಡ ಬಲ ತರಲಿದೆ ಎಂಬುದು ಗಂಗೂಲಿ ಅವರ ಲೆಕ್ಕಾಚಾರವಾಗಿದೆ.
ಇದನ್ನೂ ಓದಿ: ಆ ಸೋಲು ನನ್ನನ್ನು ಇನ್ನೂ ಕಾಡುತ್ತಿದೆ… ಪಾಕ್ ಬ್ಯಾಟರ್ನ ಹತಾಶೆ!
ಒಟ್ಟಾರೆಯಾಗಿ, ಕಳೆದ ಹಲವು ವರ್ಷಗಳಿಂದ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಏರಿಳಿತಗಳನ್ನು ಹತ್ತಿರದಿಂದ ಕಂಡಿರುವ ಸೌರವ್ ಗಂಗೂಲಿ ಅವರಿಗೆ ಡೆಲ್ಲಿ ಪಡೆಯ ಶಕ್ತಿ ಮತ್ತು ದೌರ್ಬಲ್ಯಗಳ ಸ್ಪಷ್ಟ ಅರಿವಿದೆ. ಹೀಗಾಗಿ, ಕೇವಲ ಸಲಹೆಗಾರರಾಗಿ ಉಳಿಯದೆ ನೇರವಾಗಿ ಮೈದಾನಕ್ಕಿಳಿದು ತಂತ್ರ ರೂಪಿಸಲಿರುವ ‘ದಾದಾ’, 2027ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಚಾಂಪಿಯನ್ ಪಟ್ಟದತ್ತ ಮುನ್ನಡೆಸುತ್ತಾರಾ ಎಂಬುದನ್ನು ಕಾದು ನೋಡಬೇಕಿದೆ.
