ಜೀವನಶೈಲಿಗೆ ಫಿದಾ: ದುಬೈನಲ್ಲಿ ಐಷಾರಾಮಿ ಮನೆ ಖರೀದಿಸಿದ ಸೂರ್ಯಕುಮಾರ್ ಯಾದವ್
ವಿಶ್ವದ ಅತ್ಯಂತ ಐಷಾರಾಮಿ ಸೌಲಭ್ಯಗಳು ಹಾಗೂ ಅತ್ಯುನ್ನತ ಭದ್ರತೆಗೆ ಹೆಸರಾಗಿರುವ ದುಬೈ ನಗರಕ್ಕೆ ಈಗ ಭಾರತದ ಕ್ರಿಕೆಟ್ ತಾರೆ ಸೂರ್ಯಕುಮಾರ್ ಯಾದವ್ ಹೊಸ ಅತಿಥಿಯಾಗಿ ಸೇರ್ಪಡೆಯಾಗಿದ್ದಾರೆ. ಬಾಲಿವುಡ್ ಬಾದ್‌ಷಾ ಶಾರುಖ್ ಖಾನ್ ಅವರ ಹೆಸರಿನ ಐಷಾರಾಮಿ 'ಶಾರುಖ್ಸ್ ರೆಸಿಡೆನ್ಸಸ್' ಟವರ್‌ನಲ್ಲಿ ಸೂರ್ಯಕುಮಾರ್ ವಾಟರ್ಫ್ರಂಟ್ ಅಪಾರ್ಟ್‌ಮೆಂಟ್ ಒಂದನ್ನು ಖರೀದಿಸಿದ್ದಾರೆ. ಆರೋಗ್ಯ ಮತ್ತು ದೀರ್ಘಾಯುಷ್ಯಕ್ಕೆ ಪೂರಕವಾದ ಅತ್ಯಾಧುನಿಕ 'ಲಾಂಗಿವಿಟಿ ಲೌಂಜ್' ಸೇರಿದಂತೆ 40ಕ್ಕೂ ಹೆಚ್ಚು ಪ್ರೀಮಿಯಂ ಸೌಲಭ್ಯಗಳಿರುವ ಈ ಪ್ರಾಜೆಕ್ಟ್‌ಗೆ 'ಸ್ಕೈ' ದಂಪತಿ ಸಂಪೂರ್ಣ ಫಿದಾ ಆಗಿದ್ದಾರೆ.
Updated on: Oct 17, 2026 | 2:27 PM
ಭಾರತ ಟಿ20 ಕ್ರಿಕೆಟ್ ತಂಡದ ಮಾಜಿ ನಾಯಕ ಮತ್ತು ಸ್ಫೋಟಕ ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಈಗ ಅಂತರರಾಷ್ಟ್ರೀಯ ರಿಯಲ್ ಎಸ್ಟೇಟ್ ಮಾರುಕಟ್ಟೆಗೆ ಹೆಜ್ಜೆ ಇಟ್ಟಿದ್ದಾರೆ. ವಿಶ್ವದ ಅತ್ಯಂತ ಐಷಾರಾಮಿ ನಗರಗಳಲ್ಲಿ ಒಂದಾದ ದುಬೈನಲ್ಲಿ ಸೂರ್ಯಕುಮಾರ್ ಅವರು ಹೊಸ ಅಪಾರ್ಟ್‌ಮೆಂಟ್ ಖರೀದಿಸಿದ್ದು, ಈ ಕುರಿತು ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ವಿಶೇಷ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದಾರೆ.
ತಮ್ಮ ಪತ್ನಿ ದೇವಿಶಾ ಶೆಟ್ಟಿ ಅವರೊಂದಿಗೆ ದುಬೈನ ಪ್ರಾಪರ್ಟಿ ದಾಖಲೆಗಳಿಗೆ ಸಹಿ ಹಾಕುತ್ತಿರುವ ವಿಡಿಯೋವನ್ನು ಹಂಚಿಕೊಂಡಿರುವ ಅವರು, ಅಲ್ಲಿನ ಜೀವನಶೈಲಿಯ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ.
ಬಾಲಿವುಡ್ ಬಾದ್‌ಷಾ ಹೆಸರಿನ ಐಷಾರಾಮಿ ಟವರ್!
ಸೂರ್ಯಕುಮಾರ್ ಯಾದವ್ ಖರೀದಿಸಿರುವ ಈ ಅತ್ಯಾಧುನಿಕ ಫ್ಲಾಟ್ ದುಬೈ ಮ್ಯಾರಿಟೈಮ್ ಸಿಟಿಯಲ್ಲಿರುವ ‘ಶಾರುಖ್ಸ್ ರೆಸಿಡೆನ್ಸಸ್ ಬೈ ಡ್ಯಾನ್ಯೂಬ್’ ಪ್ರಾಜೆಕ್ಟ್‌ನಲ್ಲಿದೆ. ಬಾಲಿವುಡ್ ಸೂಪರ್‌ಸ್ಟಾರ್ ಶಾರುಖ್ ಖಾನ್ ಅವರ ಹೆಸರಿನೊಂದಿಗೆ ನಂಟು ಹೊಂದಿರುವ ಈ ಐಷಾರಾಮಿ ವಸತಿ ಸಮುಚ್ಚಯವು ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದೆ.
- ಐಷಾರಾಮಿ ಸೌಲಭ್ಯಗಳು: ಈ ಟವರ್‌ನಲ್ಲಿ 40ಕ್ಕೂ ಹೆಚ್ಚು ಪ್ರೀಮಿಯಂ ಲೈಫ್‌ಸ್ಟೈಲ್ ಮತ್ತು ವೆಲ್‌ನೆಸ್ ಸೌಲಭ್ಯಗಳಿವೆ.
- ಲಾಂಗಿವಿಟಿ ಲೌಂಜ್: ಈ ಪ್ರಾಜೆಕ್ಟ್‌ನಲ್ಲಿರುವ ಅತ್ಯಾಧುನಿಕ ‘ಲಾಂಗಿವಿಟಿ ಲೌಂಜ್’ ಸೌಲಭ್ಯವು ತಮಗೆ ತುಂಬಾ ಇಷ್ಟವಾಯಿತು ಎಂದು ಸೂರ್ಯಕುಮಾರ್ ವಿಶೇಷವಾಗಿ ಉಲ್ಲೇಖಿಸಿದ್ದಾರೆ.
- ರಹಸ್ಯವಾಗಿಟ್ಟ ಬೆಲೆ: ಸೂರ್ಯಕುಮಾರ್ ಖರೀದಿಸಿರುವ ಈ ಫ್ಲಾಟ್‌ನ ಒಟ್ಟು ಮೌಲ್ಯ ಅಥವಾ ಇದು ಎಷ್ಟು ಬೆಡ್‌ರೂಮ್‌ಗಳ ಮನೆ ಎಂಬ ವಿವರಗಳನ್ನು ಸದ್ಯಕ್ಕೆ ಗೌಪ್ಯವಾಗಿಡಲಾಗಿದೆ.
ದುಬೈ ಜೀವನಶೈಲಿ ಬಗ್ಗೆ ‘ಸ್ಕೈ’ ಹೇಳಿದ್ದೇನು?
ದುಬೈನಲ್ಲಿ ಮನೆ ಖರೀದಿಸಲು ಕಾರಣವೇನು ಎಂಬುದನ್ನು ವಿವರಿಸಿದ ಸೂರ್ಯಕುಮಾರ್ ಯಾದವ್, ಅಲ್ಲಿನ ಜೀವನದ ಗುಣಮಟ್ಟ ವಿಭಿನ್ನವಾಗಿದೆ ಎಂದಿದ್ದಾರೆ.
“ನಾನು ಮೊದಲ ಬಾರಿಗೆ 2014 ರ ಐಪಿಎಲ್ ವೇಳೆ ದುಬೈಗೆ ಬಂದಿದ್ದೆ, ಆಮೇಲೆ 2020 ರಲ್ಲೂ ಬಂದಿದ್ದೆ. ಭಾರತದಿಂದ ಹಲವರು ದುಬೈ ಕಡೆಗೆ ಮುಖ ಮಾಡುತ್ತಿದ್ದಾರೆ. ಇಲ್ಲಿನ ಐಷಾರಾಮಿ ಮತ್ತು ಜೀವನಮಟ್ಟ ತೀರಾ ವಿಭಿನ್ನವಾಗಿದೆ. ನಾನು ಮುಂಬೈನಲ್ಲಿ ವಾಸಿಸುವ ಜಾಗದಲ್ಲೂ ಸುರಕ್ಷತೆ ಇದೆ, ಆದರೆ ದುಬೈ ಸುರಕ್ಷತೆಯ ದೃಷ್ಟಿಯಿಂದ ಅತ್ಯುತ್ತಮವಾಗಿದೆ. ಇಲ್ಲಿಗೆ ಬಂದರೆ ನನಗೆ ತುಂಬಾ ನೆಮ್ಮದಿ ಮತ್ತು ಸಂತೋಷ ಸಿಗುತ್ತದೆ.”
ಇದನ್ನೂ ಓದಿ: 19 ಫೋರ್, 8 ಸಿಕ್ಸರ್: ‘ಮರಿ ಸೆಹ್ವಾಗ್’ ಸಿಡಿಲಬ್ಬರ, ಬೌಲರ್ಗಳು ತತ್ತರ
ಬೆಳೆಯುತ್ತಿದೆ ಸೂರ್ಯನ ಆಸ್ತಿ ಮೌಲ್ಯ:
ಯುಎಇಯಲ್ಲಿ ಸೂರ್ಯಕುಮಾರ್ ಯಾದವ್ ಅವರಿಗೆ ಇದು ಮೊದಲ ಆಸ್ತಿ ಖರೀದಿಯಾಗಿದೆ. ಕ್ರಿಕೆಟ್ ಮೈದಾನದಲ್ಲಿ ಮೈದಾನದ ಮೂಲೆ ಮೂಲೆಗೂ ಬೌಂಡರಿ ಸಿಡಿಸುವ ‘360 ಡಿಗ್ರಿ’ ಬ್ಯಾಟರ್, ರಿಯಲ್ ಎಸ್ಟೇಟ್‌ನಲ್ಲೂ ಹೂಡಿಕೆ ಹೆಚ್ಚಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಅವರು ಮುಂಬೈನ ಚೆಂಬೂರ್‌ನಲ್ಲಿ ₹7.18 ಕೋಟಿ ಮೌಲ್ಯದ ಐಷಾರಾಮಿ ಅಪಾರ್ಟ್‌ಮೆಂಟ್ ಖರೀದಿಸಿದ್ದರು. ಈಗ ದುಬೈ ಮನೆಯೂ ಅವರ ಆಸ್ತಿಗೆ ಸೇರ್ಪಡೆಯಾಗಿದೆ. ಈ ಖರೀದಿಯ ಅಧಿಕೃತ ವಿಡಿಯೋ ಝಲಕ್ ಮತ್ತು ಹೆಚ್ಚಿನ ಅಪ್‌ಡೇಟ್‌ಗಳನ್ನು ಸೂರ್ಯಕುಮಾರ್ ಯಾದವ್ ಅವರ ಅಧಿಕೃತ ಇನ್‌ಸ್ಟಾಗ್ರಾಮ್ ಪ್ರೊಫೈಲ್ ನಲ್ಲಿ ವೀಕ್ಷಿಸಬಹುದಾಗಿದೆ.
