ಸಿಎಸ್​ಕೆ ಝಹೀರ್ ಖಾನ್ ಅವರನ್ನೇ ಕೋಚ್ ಆಗಿ ನೇಮಿಸಲು ಕಾರಣಗಳೇನು?

ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿಯು ಐಪಿಎಲ್ 2027ರ ಸೀಸನ್‌ಗಾಗಿ ಭಾರತದ ಮಾಜಿ ವೇಗದ ಬೌಲರ್ ಝಹೀರ್ ಖಾನ್ ಅವರನ್ನು ತನ್ನ ಹೊಸ ಮುಖ್ಯ ಕೋಚ್ ಆಗಿ ಅಧಿಕೃತವಾಗಿ ಘೋಷಿಸಿದೆ. ಸುಮಾರು 18 ವರ್ಷಗಳ ಕಾಲ ತಂಡದ ಯಶಸ್ಸಿನ ಭಾಗವಾಗಿದ್ದ ಲೆಜೆಂಡರಿ ಕೋಚ್ ಸ್ಟೀಫನ್ ಫ್ಲೆಮಿಂಗ್ ಅವರ ನಿರ್ಗಮನದ ಬಳಿಕ ತೆರವಾಗಿದ್ದ ಸ್ಥಾನಕ್ಕೆ ಝಹೀರ್ ಅವರನ್ನು ಆಯ್ಕೆ ಮಾಡಲಾಗಿದೆ. ವಿಶೇಷವೆಂದರೆ, ಸಿಎಸ್‌ಕೆ ಇತಿಹಾಸದಲ್ಲೇ ಮುಖ್ಯ ಕೋಚ್ ಹುದ್ದೆಗೇರುತ್ತಿರುವ ಮೊದಲ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆಗೆ ಝಹೀರ್ ಪಾತ್ರರಾಗಿದ್ದಾರೆ.

2009 ರಿಂದ 2026 ರವರೆಗೆ ಸಿಎಸ್‌ಕೆ ತಂಡವನ್ನು ಮುನ್ನಡೆಸಿದ್ದ ಸ್ಟೀಫನ್ ಫ್ಲೆಮಿಂಗ್, ತಂಡಕ್ಕೆ 5 ಐಪಿಎಲ್ ಟ್ರೋಫಿಗಳನ್ನು ತಂದುಕೊಟ್ಟ ಯಶಸ್ವಿ ಕೋಚ್. ಆದರೆ ಕಳೆದ ಕೆಲವು ಸೀಸನ್‌ಗಳಲ್ಲಿ ತಂಡವು ಪ್ಲೇ-ಆಫ್ ತಲುಪಲು ವಿಫಲವಾದ ಹಿನ್ನೆಲೆಯಲ್ಲಿ ಮ್ಯಾನೇಜ್‌ಮೆಂಟ್ ಹೊಸ ಬದಲಾವಣೆಗೆ ಮುಂದಾಗಿದೆ. ಝಹೀರ್ ಖಾನ್ ಸದ್ಯ ಒಂದು ವರ್ಷದ ಒಪ್ಪಂದಕ್ಕೆ ಸಹಿ ಹಾಕಿದ್ದು, ಮುಂಬರುವ ಮಿನಿ ಹರಾಜಿಗೂ ಮುನ್ನ ತಂಡವನ್ನು ಮರುಸಂಘಟಿಸುವ ಜವಾಬ್ದಾರಿ ಹೊತ್ತಿದ್ದಾರೆ.

ಝಹೀರ್ ಖಾನ್ ಅವರನ್ನೇ ಆಯ್ಕೆ ಮಾಡಲು ಪ್ರಮುಖ ಕಾರಣಗಳೇನು?

ಧೋನಿ ಅವರ ಬಲವಾದ ಶಿಫಾರಸು: ಈ ಮಹತ್ವದ ನಿರ್ಧಾರದ ಹಿಂದೆ ಟೀಮ್ ಇಂಡಿಯಾದ ಮಾಜಿ ನಾಯಕ ಎಂ.ಎಸ್. ಧೋನಿ ಅವರ ಪ್ರಮುಖ ಪಾತ್ರವಿದೆ. ತಂಡದಲ್ಲಿ ಪರಿಚಿತ ಹಾಗೂ ನಂಬಿಕಸ್ಥ ಮುಖವೊಂದನ್ನು ಹೊಂದಲು ಬಯಸಿದ ಧೋನಿ, ಝಹೀರ್ ಹೆಸರನ್ನು ಮ್ಯಾನೇಜ್‌ಮೆಂಟ್‌ಗೆ ಸೂಚಿಸಿದರು. ಧೋನಿ ಮತ್ತು ಝಹೀರ್ ಒಟ್ಟಾಗಿ 2011ರ ವಿಶ್ವಕಪ್ ಗೆದ್ದ ಅನುಭವ ಹೊಂದಿದ್ದು, ಇವರ ಆನ್-ಫೀಲ್ಡ್ ಕೆಮಿಸ್ಟ್ರಿ ಸಿಎಸ್‌ಕೆಗೆ ನೆರವಾಗಲಿದೆ ಎಂಬುದು ಫ್ರಾಂಚೈಸಿಯ ನಂಬಿಕೆ.

ತಂಡಗಳೊಂದಿಗಿನ ಮ್ಯಾನೇಜ್‌ಮೆಂಟ್ ಅನುಭವ: ಝಹೀರ್ ಖಾನ್ ಅವರಿಗೆ ಮುಖ್ಯ ಕೋಚ್ ಆಗಿ ಇದು ಮೊದಲ ಅನುಭವವಾದರೂ, ಐಪಿಎಲ್ ನಿರ್ವಹಣೆಯಲ್ಲಿ ಅವರು ಅಪಾರ ಜ್ಞಾನ ಹೊಂದಿದ್ದಾರೆ. ಈ ಹಿಂದೆ ಮುಂಬೈ ಇಂಡಿಯನ್ಸ್ ತಂಡದ ಡೈರೆಕ್ಟರ್ ಆಫ್ ಕ್ರಿಕೆಟ್ ಆಪರೇಷನ್ಸ್ ಹಾಗೂ ಗ್ಲೋಬಲ್ ಹೆಡ್ ಆಗಿ (2018-2022) ಕೆಲಸ ಮಾಡಿರುವ ಅವರು, ಇತ್ತೀಚೆಗೆ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಮೆಂಟರ್ ಆಗಿಯೂ ಸೇವೆ ಸಲ್ಲಿಸಿದ್ದರು.

ಯುವ ಪ್ರತಿಭೆಗಳನ್ನು ಗುರುತಿಸುವ ಕಲೆ: ಸಿಎಸ್‌ಕೆ ಮಾಲೀಕರಾದ ರೂಪಾ ಗುರುನಾಥ್ ಅವರು ಝಹೀರ್ ಅವರ ನೇಮಕವನ್ನು ಸ್ವಾಗತಿಸುತ್ತಾ, “ಯುವ ಆಟಗಾರರನ್ನು ಬೆಳೆಸುವ ಮತ್ತು ಅವರಲ್ಲಿನ ಪ್ರತಿಭೆಯನ್ನು ಹೊರತರುವ ಝಹೀರ್ ಅವರ ಸಾಮರ್ಥ್ಯವು ತಂಡದ ಕೋರ್ ಬಲಪಡಿಸಲು ಸಹಕಾರಿಯಾಗಲಿದೆ” ಎಂದು ತಿಳಿಸಿದ್ದಾರೆ.

ಬೌಲಿಂಗ್ ವಿಭಾಗಕ್ಕೆ ಆನೆ ಬಲ: ಸಿಎಸ್‌ಕೆ ಮ್ಯಾನೇಜಿಂಗ್ ಡೈರೆಕ್ಟರ್ ಕೆ.ಎಸ್. ವಿಶ್ವನಾಥನ್ ಅವರ ಪ್ರಕಾರ, ವಿಶ್ವದ ಶ್ರೇಷ್ಠ ಕ್ರಿಕೆಟ್ ತಂತ್ರಗಾರರಲ್ಲಿ ಝಹೀರ್ ಖಾನ್ ಕೂಡ ಒಬ್ಬರು. ಅವರ ಆಗಮನದಿಂದಾಗಿ ಸಿಎಸ್‌ಕೆ ತಂಡದ ಯುವ ವೇಗದ ಬೌಲರ್‌ಗಳ ಅಭಿವೃದ್ಧಿಗೆ ಭಾರಿ ನೆರವು ಸಿಗಲಿದೆ ಎಂದು ತಿಳಿಸಿದ್ದಾರೆ.

ಒಟ್ಟಾರೆಯಾಗಿ ಹೇಳುವುದಾದರೆ, ಕೇವಲ ಒಬ್ಬ ಮಾಜಿ ಆಟಗಾರನಾಗಿ ಮಾತ್ರವಲ್ಲದೆ, ಕ್ರಿಕೆಟ್‌ನ ಚಾಣಕ್ಯ ಬುದ್ಧಿ, ಅಪಾರ ಐಪಿಎಲ್ ಮ್ಯಾನೇಜ್‌ಮೆಂಟ್ ಅನುಭವ ಮತ್ತು ಎಂ.ಎಸ್. ಧೋನಿ ಅವರೊಂದಿಗಿನ ದಶಕಗಳ ನಂಬಿಕಸ್ಥ ಬಾಂಧವ್ಯದಿಂದಾಗಿ ಝಹೀರ್ ಖಾನ್ ಈ ಮಹತ್ವದ ಹುದ್ದೆಗೆ ಅತ್ಯಂತ ಸೂಕ್ತ ವ್ಯಕ್ತಿಯಾಗಿ ಮೂಡಿಬಂದಿದ್ದಾರೆ. ಫ್ಲೆಮಿಂಗ್ ಯುಗದ ಅದ್ಭುತ ಯಶಸ್ಸಿನ ನಂತರ, ಸಿಎಸ್‌ಕೆ ತಂಡವನ್ನು ಹೊಸ ಪೀಳಿಗೆಯ ತಂತ್ರಗಾರಿಕೆಯೊಂದಿಗೆ ಮುನ್ನಡೆಸಲು ಮತ್ತು ಮುಂಬರುವ ಮಿನಿ ಹರಾಜಿನಲ್ಲಿ ಬಲಿಷ್ಠ ತಂಡವನ್ನು ಕಟ್ಟುಲು ಮ್ಯಾನೇಜ್‌ಮೆಂಟ್ ಝಹೀರ್ ಅವರ ಈ ‘ಮಾಸ್ಟರ್ ಮೈಂಡ್’ ಮೇಲೆ ಸಂಪೂರ್ಣ ಭರವಸೆ ಇಟ್ಟಿದೆ. ಈ ಭರವಸೆಯ ಮೂಲಕ ಚೆನ್ನೈ ಸೂಪರ್ ಕಿಂಗ್ಸ್​ ತನ್ನ ಗತವೈಭವಕ್ಕೆ ಮರಳಿದೆಯಾ ಕಾದು ನೋಡಬೇಕಿದೆ.