Ronaldo Retirement: ಅಂತಾರಾಷ್ಟ್ರೀಯ ಫುಟ್‌ಬಾಲ್‌ಗೆ ನಿವೃತ್ತಿ ಘೋಷಿಸಿದ ರೊನಾಲ್ಡೊ
ಪೋರ್ಚುಗಲ್ ಫುಟ್‌ಬಾಲ್ ದಿಗ್ಗಜ ಕ್ರಿಸ್ಟಿಯಾನೊ ರೊನಾಲ್ಡೊ 23 ವರ್ಷಗಳ ಅಂತಾರಾಷ್ಟ್ರೀಯ ಫುಟ್‌ಬಾಲ್‌ಗೆ ವಿದಾಯ ಘೋಷಿಸಿದ್ದಾರೆ. 146 ಅಂತಾರಾಷ್ಟ್ರೀಯ ಗೋಲುಗಳ ದಾಖಲೆಯೊಂದಿಗೆ ನಿರ್ಗಮಿಸಿದ್ದಾರೆ. ಚಿಕ್ಕ ಮಕ್ಕಳಿಂದ ಹಿಡಿದು ಹಿರಿಯವರೆಗೂ ರೊನಾಲ್ಡೊ ಅಂದ್ರೆ ತುಂಬಾ ಇಷ್ಟ. ಇಂದು ಅವರ ಫುಟ್‌ಬಾಲ್ ಜೀವನಕ್ಕೆ ವಿದಾಯ ಹೇಳಿರುವುದು ಫುಟ್‌ಬಾಲ್ ಹಾಗೂ ರೊನಾಲ್ಡೊ ಅಭಿಮಾನಿಗಳಲ್ಲಿ ಬೇಸರ ಮೂಡಿಸಿದೆ.
Updated on: Nov 05, 2026 | 4:55 PM
ವಿಶ್ವ ಫುಟ್‌ಬಾಲ್‌ನ ದಂತಕಥೆ, ಪೋರ್ಚುಗಲ್ ತಂಡದ ನಾಯಕ ಕ್ರಿಸ್ಟಿಯಾನೊ ರೊನಾಲ್ಡೊ ಅವರು ಅಂತಾರಾಷ್ಟ್ರೀಯ ಫುಟ್‌ಬಾಲ್‌ಗೆ ಅಧಿಕೃತವಾಗಿ ವಿದಾಯ ಘೋಷಿಸಿದ್ದಾರೆ. ಇದರೊಂದಿಗೆ 23 ವರ್ಷಗಳ ಸುದೀರ್ಘ ಐತಿಹಾಸಿಕ ಅಂತಾರಾಷ್ಟ್ರೀಯ ವೃತ್ತಿಜೀವನಕ್ಕೆ ತೆರೆ ಬಿದ್ದಂತಾಗಿದೆ. 41 ವರ್ಷದ ಸ್ಟ್ರೈಕರ್ ರೊನಾಲ್ಡೊ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ವಿಡಿಯೋ ಸಂದೇಶವೊಂದನ್ನು ಹಂಚಿಕೊಳ್ಳುವ ಮೂಲಕ ಈ ಮುಂಬರುವ ಪಂದ್ಯಗಳ ಬ್ರೇಕ್ ನಂತರ ಪೋರ್ಚುಗಲ್ ರಾಷ್ಟ್ರೀಯ ತಂಡದ ಜರ್ಸಿಯನ್ನು ಕಳಚಿಡುತ್ತಿರುವುದಾಗಿ ಖಚಿತಪಡಿಸಿದ್ದಾರೆ.
ವಿಶ್ವ ದಾಖಲೆಯ 146 ಗೋಲುಗಳು ಮತ್ತು 234 ಪಂದ್ಯಗಳು:
ಅಂತಾರಾಷ್ಟ್ರೀಯ ಪುರುಷರ ಫುಟ್‌ಬಾಲ್ ಇತಿಹಾಸದಲ್ಲೇ ಅತ್ಯಂತ ಹೆಚ್ಚು ಗೋಲು ಬಾರಿಸಿದ ಸಾರ್ವಕಾಲಿಕ ದಾಖಲೆ ರೊನಾಲ್ಡೊ ಹೆಸರಲ್ಲಿದೆ. 2003 ರಲ್ಲಿ 18ನೇ ವಯಸ್ಸಿನಲ್ಲಿ ಪೋರ್ಚುಗಲ್ ಹಿರಿಯರ ತಂಡಕ್ಕೆ ಪಾದಾರ್ಪಣೆ ಮಾಡಿದ್ದ ರೊನಾಲ್ಡೊ, ಒಟ್ಟು 234 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. ಪೋರ್ಚುಗಲ್ ಪರ ಬರೋಬ್ಬರಿ 146 ಗೋಲುಗಳನ್ನು ಗಳಿಸಿ ಅಂತಾರಾಷ್ಟ್ರೀಯ ಫುಟ್‌ಬಾಲ್‌ನ ಗರಿಷ್ಠ ಗೋಲ್‌ಸ್ಕೋರರ್ ಎನಿಸಿಕೊಂಡಿದ್ದಾರೆ. ತಮ್ಮ ವೃತ್ತಿಜೀವನದಲ್ಲಿ 5 ಫೀಫಾ ವಿಶ್ವಕಪ್ ಹಾಗೂ 6 ಯುರೋಪಿಯನ್ ಚಾಂಪಿಯನ್‌ಷಿಪ್ ಕೂಟಗಳಲ್ಲಿ ದೇಶವನ್ನು ಪ್ರತಿನಿಧಿಸಿದ್ದಾರೆ.
2016ರ ಯುರೋ ಕಪ್ ಹಾಗೂ 2019ರ ನೇಷನ್ಸ್ ಲೀಗ್ ಮುಕುಟ:
ಪೋರ್ಚುಗಲ್ ಫುಟ್‌ಬಾಲ್ ಇತಿಹಾಸದಲ್ಲಿ ರೊನಾಲ್ಡೊ ನಾಯಕತ್ವದ ಅವಧಿ ಸುವರ್ಣಯುಗವಾಗಿತ್ತು. ಫ್ರಾನ್ಸ್‌ನಲ್ಲಿ ನಡೆದ 2016ರ ಯುಇಎಫ್‌ಎ ಯುರೋಪಿಯನ್ ಚಾಂಪಿಯನ್‌ಷಿಪ್‌ನಲ್ಲಿ ಪೋರ್ಚುಗಲ್ ತಂಡಕ್ಕೆ ನಾಯಕನಾಗಿ ದೇಶದ ಮೊದಲ ಪ್ರಮುಖ ಅಂತಾರಾಷ್ಟ್ರೀಯ ಪ್ರಶಸ್ತಿಯನ್ನು ತಂದುಕೊಟ್ಟರು. 2019 ರಲ್ಲಿ ಚೊಚ್ಚಲ ಯುಇಎಫ್‌ಎ ನೇಷನ್ಸ್ ಲೀಗ್ ಚಾಂಪಿಯನ್ ಪಟ್ಟವನ್ನು ಪೋರ್ಚುಗಲ್ ಮುಡಿಗೇರಿಸಿಕೊಳ್ಳಲು ಪ್ರಮುಖ ಪಾತ್ರ ವಹಿಸಿದ್ದರು.
2026ರ ಫೀಫಾ ವಿಶ್ವಕಪ್ ಟೂರ್ನಿಯಿಂದ ಪೋರ್ಚುಗಲ್ ಹೊರಬಿದ್ದ ಬೆನ್ನಲ್ಲೇ ರೊನಾಲ್ಡೊ ಈ ನಿರ್ಧಾರಕ್ಕೆ ಬಂದಿದ್ದಾರೆ. ವಿಶ್ವಕಪ್ ಪಂದ್ಯಾವಳಿಯೇ ತಮ್ಮ ಕೊನೆಯ ಕೂಟ ಎಂದು ಅವರು ಈ ಹಿಂದೆಯೇ ಸುಳಿವು ನೀಡಿದ್ದರು. ಇತ್ತೀಚಿನ ತಿಂಗಳುಗಳಲ್ಲಿ ರಾಷ್ಟ್ರೀಯ ತಂಡದಲ್ಲಿ ರೊನಾಲ್ಡೊ ಅವರ ಸ್ಥಾನದ ಬಗ್ಗೆ ಚರ್ಚೆಗಳು ಆರಂಭವಾಗಿದ್ದವು. ನಾರ್ವೆ ವಿರುದ್ಧದ ನೇಷನ್ಸ್ ಲೀಗ್ ಪಂದ್ಯದಲ್ಲಿ ರೊನಾಲ್ಡೊ ಅವರನ್ನು ಆರಂಭಿಕ 11ರ ಬಳಗದಿಂದ ಹೊರಗಿಟ್ಟಾಗ, ಮುಖ್ಯ ಕೋಚ್ ಜಾರ್ಜ್ ಜೀಸಸ್ ಜೊತೆಗೆ ತಾಂತ್ರಿಕ ವಿಚಾರದಲ್ಲಿ ಭಿನ್ನಾಭಿಪ್ರಾಯ ಉಂಟಾಗಿತ್ತು ಎಂಬ ವರದಿಗಳಿದ್ದವು.
ಇದನ್ನೂ ಓದಿ: ‘ಮ್ಯಾಡ್ ಮ್ಯಾಕ್ಸ್’ ಯುಗಾಂತ್ಯ: ದಿಢೀರ್ ನಿವೃತ್ತಿ ಘೋಷಿಸಿದ ಗ್ಲೆನ್ ಮ್ಯಾಕ್ಸ್ವೆಲ್
ತಮ್ಮ ಭಾವುಕ ವಿದಾಯದ ಸಂದೇಶದಲ್ಲಿ ರೊನಾಲ್ಡೊ ಅವರು ಇನ್ಸ್ಟಾಗ್ರಾಮ್ನಲ್ಲಿ ಹೀಗೆ ಹಂಚಿಕೊಂಡಿದ್ದಾರೆ. “ನನ್ನ ದೇಶದ ಜರ್ಸಿಗಾಗಿ ನಾನು ನನ್ನ ಸಂಪೂರ್ಣ ಶ್ರಮ ಮತ್ತು ಶಕ್ತಿಯನ್ನು ಧಾರೆಯೆರೆದಿದ್ದೇನೆ ಎಂಬ ಸ್ಪಷ್ಟ ಹಾಗೂ ನೆಮ್ಮದಿಯ ಮನಸ್ಸಿನಿಂದ ನಾನು ಅಂತಾರಾಷ್ಟ್ರೀಯ ಫುಟ್‌ಬಾಲ್‌ನಿಂದ ನಿರ್ಗಮಿಸುತ್ತಿದ್ದೇನೆ.” ಎಂದು ಹೇಳಿದ್ದಾರೆ. ಸುದೀರ್ಘ ಕಾಲ ದೇಶದ ನಾಯಕ ಹಾಗೂ ಅಗ್ರ ಗೋಲ್‌ಸ್ಕೋರರ್ ಆಗಿದ್ದ ರೊನಾಲ್ಡೊ ನಿರ್ಗಮನದೊಂದಿಗೆ ಪೋರ್ಚುಗಲ್ ಫುಟ್‌ಬಾಲ್‌ನಲ್ಲಿ ಈಗ ಹೊಸ ಅಧ್ಯಾಯವೊಂದು ಆರಂಭವಾಗಲಿದೆ.
ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
