3 ದಿನಗಳಲ್ಲಿ ಬರೋಬ್ಬರಿ 1011 ರನ್: ಟೆಸ್ಟ್ನಲ್ಲಿ ಹಿಸ್ಟರಿ ಸೃಷ್ಟಿ
Zimbabwe Vs Afghanistan 1st Test: ಅಫ್ಘಾನಿಸ್ತಾನ್ ಮತ್ತು ಝಿಂಬಾಬ್ವೆ ನಡುವಣ ಟೆಸ್ಟ್ ಪಂದ್ಯದಲ್ಲಿ ರನ್ ಮಳೆ ಹರಿದಿದೆ. ಡಿಸೆಂಬರ್ 26 ರಿಂದ ಶುರುವಾದ ಈ ಪಂದ್ಯದ ಮೂರು ದಿನದಾಟಗಳ ಮುಕ್ತಾಯದ ವೇಳೆಗೆ ಒಟ್ಟು 4 ಶತಕಗಳು ಹಾಗೂ 1 ದ್ವಿಶತಕ ಮೂಡಿಬಂದಿವೆ. ಇದಾಗ್ಯೂ ಅಫ್ಘಾನಿಸ್ತಾನ್ ತಂಡದ ಮೊದಲ ಇನಿಂಗ್ಸ್ ಮುಕ್ತಾಯಗೊಂಡಿಲ್ಲ ಎಂಬುದು ವಿಶೇಷ.
ಮೂರು ದಿನದಾಟಗಳಲ್ಲಿ 4 ಶತಕಗಳು... ಒಂದು ದ್ವಿಶತಕ. ಬರೋಬ್ಬರಿ 1011 ರನ್ಗಳು. ಇಂತಹದೊಂದು ಸ್ಕೋರ್ ಕಾರ್ಡ್ಗೆ ಸಾಕ್ಷಿಯಾಗಿದ್ದು ಝಿಂಬಾಬ್ವೆ ಮತ್ತು ಅಫ್ಘಾನಿಸ್ತಾನ್ ನಡುವಣ ಮೊದಲ ಟೆಸ್ಟ್ ಪಂದ್ಯ. ಬುಲವಾಯೊದ ಕ್ವೀನ್ಸ್ ಸ್ಪೋರ್ಟ್ಸ್ ಕ್ಲಬ್ ಮೈದಾನದಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಝಿಂಬಾಬ್ವೆ ತಂಡದ ನಾಯಕ ಕ್ರೇಗ್ ಎರ್ವಿನ್ ಬ್ಯಾಟಿಂಗ್ ಆಯ್ದುಕೊಂಡಿದ್ದರು.
1 / 6
ನಾಯಕನ ನಿರ್ಧಾರವನ್ನು ಸಮರ್ಥಿಸುವಂತೆ ಬ್ಯಾಟ್ ಬೀಸಿದ ಸೀನ್ ವಿಲಿಯಮ್ಸ್ 174 ಎಸೆತಗಳಲ್ಲಿ 10 ಫೋರ್ ಹಾಗೂ 3 ಸಿಕ್ಸ್ಗಳೊಂದಿಗೆ 154 ರನ್ ಕಲೆಹಾಕಿದರು. ಇನ್ನು ಕ್ರೇಗ್ ಎರ್ವಿನ್ 104 ರನ್ ಬಾರಿಸಿದರೆ, ಬ್ರಿಯಾನ್ ಬೆನೆಟ್ 124 ಎಸೆತಗಳಲ್ಲಿ 4 ಸಿಕ್ಸ್ ಹಾಗೂ 5 ಫೋರ್ಗಳೊಂದಿಗೆ ಅಜೇಯ 110 ರನ್ ಚಚ್ಚಿದರು. ಈ ಮೂಲಕ ಝಿಂಬಾಬ್ವೆ ತಂಡವು ಮೊದಲ ಇನಿಂಗ್ಸ್ನಲ್ಲಿ 586 ರನ್ ಕಲೆಹಾಕಿತು. ಇದು ಟೆಸ್ಟ್ ಇತಿಹಾಸದಲ್ಲಿ ಝಿಂಬಾಬ್ವೆ ತಂಡದ ಗರಿಷ್ಠ ಸ್ಕೋರ್ ಎಂಬುದು ವಿಶೇಷ.
2 / 6
ಇದಕ್ಕುತ್ತರವಾಗಿ ಮೊದಲ ಇನಿಂಗ್ಸ್ ಶುರು ಮಾಡಿದ ಅಫ್ಘಾನಿಸ್ತಾನ್ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ ಸೆದಿಖುಲ್ಲಾ ಅಟಲ್ 3 ರನ್ಗಳಿಸಿ ಔಟಾದರೆ, ಅಬ್ದುಲ್ ಮಲಿಕ್ 23 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು. ಈ ಹಂತದಲ್ಲಿ ಜೊತೆಗೂಡಿ ರಹಮತ್ ಶಾ ಹಾಗೂ ಹಶ್ಮತುಲ್ಲಾ ಶಾಹಿದಿಯನ್ನು ಔಟ್ ಮಾಡಲು ಝಿಂಬಾಬ್ವೆ ಬೌಲರ್ಗಳು ವಿಫಲರಾದರು.
3 / 6
ಪರಿಣಾಮ 3ನೇ ದಿನದಾಟದಲ್ಲಿ ವಿಕೆಟ್ ನಷ್ಟವಿಲ್ಲದೆ ಈ ಜೋಡಿಯು ರನ್ ಪೇರಿಸುತ್ತಾ ಸಾಗಿದರು. ಇದರ ನಡುವೆ ರಹಮತ್ ಶಾ 416 ಎಸೆತಗಳಲ್ಲಿ 3 ಸಿಕ್ಸ್ ಹಾಗೂ 23 ಫೋರ್ಗಳೊಂದಿಗೆ ಅಜೇಯ 231 ರನ್ ಬಾರಿಸಿದರು. ಮತ್ತೊಂದೆಡೆ ಶಾಹಿದಿ 276 ಎಸೆತಗಳಲ್ಲಿ 16 ಫೋರ್ಗಳೊಂದಿಗೆ ಅಜೇಯ 141 ರನ್ ಕಲೆಹಾಕಿದ್ದಾರೆ. ಈ ಮೂಲಕ ಮೂರನೇ ದಿನದಾಟದ ಅಂತ್ಯಕ್ಕೆ ಅಫ್ಘಾನಿಸ್ತಾನ್ 2 ವಿಕೆಟ್ ಕಳೆದುಕೊಂಡು 425 ರನ್ ಪೇರಿಸಿದೆ.
4 / 6
ಮೂರನೇ ವಿಕೆಟ್ಗೆ 361 ರನ್ಗಳ ಜೊತೆಯಾಟವಾಡುವ ಮೂಲಕ ರಹಮತ್ ಶಾ ಹಾಗೂ ಶಾಹಿದಿ ಅಫ್ಘಾನ್ ಪರ ಟೆಸ್ಟ್ನಲ್ಲಿ ಅತ್ಯಧಿಕ ರನ್ಗಳ ಜೊತೆಗಾರಿಕೆಯ ದಾಖಲೆ ಬರೆದಿದ್ದಾರೆ. ಅಲ್ಲದೆ 2019ರ ಬಳಿಕ ಟೆಸ್ಟ್ನಲ್ಲಿ ವಿಕೆಟ್ ನಷ್ಟವಿಲ್ಲದೆ ಪೂರ್ಣ ದಿನದಾಟವಾಡಿದ ಜೋಡಿ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.
5 / 6
ಇದೀಗ 425 ರನ್ ಕಲೆಹಾಕಿರುವ ಅಫ್ಘಾನಿಸ್ತಾನ್ ತಂಡವು 4ನೇ ದಿನದಾಟದಲ್ಲಿ 121 ರನ್ಗಳಿಸಿದರೆ ಟೆಸ್ಟ್ನಲ್ಲಿ ತನ್ನ ಗರಿಷ್ಠ ಸ್ಕೋರ್ ದಾಖಲೆಯನ್ನು ಮುಟ್ಟಲಿದೆ. ಹೀಗಾಗಿ ಒಂದೇ ಪಂದ್ಯದ ಮೂಲಕ ಝಿಂಬಾಬ್ವೆ ಹಾಗೂ ಅಫ್ಘಾನಿಸ್ತಾನ್ ತಮ್ಮ ಗರಿಷ್ಠ ಸ್ಕೋರ್ಗಳ ದಾಖಲೆಯನ್ನು ಬರೆಯಲಿದೆಯಾ ಕಾದು ನೋಡಬೇಕಿದೆ.
