ಭಾರತದಿಂದ ಐದು ಆಹಾರ ಪದಾರ್ಥಗಳ ವಾರ್ಷಿಕ ಸರಬರಾಜು ಕೇಳಿದ ಬಾಂಗ್ಲಾದೇಶ

ದೆಹಲಿ ಮಾರ್ಚ್ 27: ಮಾರುಕಟ್ಟೆ ಬೆಲೆ ಮತ್ತು ಕೊರತೆಗಳಲ್ಲಿನ ಏರಿಳಿತಗಳನ್ನು ನಿಭಾಯಿಸಲು ಬಾಂಗ್ಲಾದೇಶವು (Bangladesh) ಭಾರತದಿಂದ ಅಕ್ಕಿ ಮತ್ತು ಗೋಧಿ ಸೇರಿದಂತೆ ಐದು ಆಹಾರ ಪದಾರ್ಥಗಳ ವಾರ್ಷಿಕ ಸರಬರಾಜು (Annual supplies) ಕೇಳಿದೆ ಎಂದು ಈ ವಿಷಯದ ಬಗ್ಗೆ  ಗೊತ್ತಿರುವವರು ಹೇಳಿದ್ದಾರೆ. ಉಭಯ ದೇಶಗಳು ಈ ವಿಷಯದ ಬಗ್ಗೆ ಚರ್ಚೆ ನಡೆಸಿವೆ. ಈರುಳ್ಳಿ, ಶುಂಠಿ ಮತ್ತು ಬೆಳ್ಳುಳ್ಳಿ ಸೇರಿದಂತೆ ಈ ಸರಕುಗಳಿಗೆ ನಿಗದಿತ ಕೋಟಾಗಳ ಕುರಿತು ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕುವಂತೆ ಢಾಕಾ (Dhaka) ಭಾರತವನ್ನು ಕೇಳಿದೆ ಎಂದು ಹೆಸರು ಹೇಳಲು ಬಯಸದ ಅಧಿಕಾರಿ ಹೇಳಿರುವುದಾಗಿ ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿದೆ.

ಆದಾಗ್ಯೂ, ಅಂತಹ ಸರಕುಗಳ ರಫ್ತಿಗೆ ಸಂಬಂಧಿಸಿದ ಸೂಕ್ಷ್ಮತೆಯ ದೃಷ್ಟಿಯಿಂದ ಉಭಯ ಕಡೆಯವರು ಇನ್ನೂ ಒಪ್ಪಂದಕ್ಕೆ ತಲುಪಲು ಸಾಧ್ಯವಾಗಿಲ್ಲ ಎಂದು ಇದುವರೆಗೆ ನಡೆದ ಚರ್ಚೆಗಳ ಬಗ್ಗೆ ತಿಳಿದ ಜನರು ಹೇಳಿದರು.

ದೇಶೀಯ ಅವಶ್ಯಕತೆಗಳನ್ನು ಪೂರೈಸಲು ಭಾರತವು ಮೇ 2022 ರಲ್ಲಿ ಗೋಧಿ ರಫ್ತು ಮತ್ತು ಜುಲೈ 2023 ರಲ್ಲಿ ಬಾಸ್ಮತಿ ಅಲ್ಲದ ಅಕ್ಕಿಯ ರಫ್ತುಗಳನ್ನು ನಿಷೇಧಿಸಿತು. ಕಳೆದ ಡಿಸೆಂಬರ್‌ನಲ್ಲಿ ಸುಮಾರು ನಾಲ್ಕು ತಿಂಗಳ ಕಾಲ ಈರುಳ್ಳಿ ರಫ್ತಿಗೆ ಸರ್ಕಾರ ನಿಷೇಧ ಹೇರಿತ್ತು. ಆದಾಗ್ಯೂ, ಭಾರತವು ನೆರೆಹೊರೆಯ ದೇಶಗಳಾದ ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ಭೂತಾನ್, ನೇಪಾಳ ಮತ್ತು ಶ್ರೀಲಂಕಾ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ), ಇಂಡೋನೇಷ್ಯಾ ಮತ್ತು ವಿಯೆಟ್ನಾಂನಂತಹ ಪ್ರಮುಖ ಪಾಲುದಾರರಿಗೆ ಅಕ್ಕಿ, ಗೋಧಿ ಮತ್ತು ಈರುಳ್ಳಿಯನ್ನು ಪೂರೈಸಿದೆ.

ಇಸ್ಲಾಮಿಕ್ ತಿಂಗಳ ರಂಜಾನ್‌ಗೆ ಮುಂಚಿತವಾಗಿ, ರಾಜತಾಂತ್ರಿಕ ಮಾರ್ಗಗಳ ಮೂಲಕ ವಿನಂತಿಗಳಿಗೆ ಪ್ರತಿಕ್ರಿಯೆಯಾಗಿ ಮಾರ್ಚ್ ಆರಂಭದಲ್ಲಿ ಬಾಂಗ್ಲಾದೇಶಕ್ಕೆ 50,000 ಟನ್ ಈರುಳ್ಳಿ ಮತ್ತು ಯುಎಇಗೆ ಮತ್ತೊಂದು 14,400 ಟನ್ ಈರುಳ್ಳಿ ರಫ್ತು ಮಾಡಲು ಸರ್ಕಾರ ಅನುಮತಿ ನೀಡಿತು. ನಿಷೇಧದ ನಂತರ ಇದು ಮೊದಲ ರಫ್ತು ಆಗಿತ್ತು.

“ನ್ಯಾಷನಲ್ ಕೋಆಪರೇಟಿವ್ ಎಕ್ಸ್‌ಪೋರ್ಟ್ಸ್ ಲಿಮಿಟೆಡ್ ಮೂಲಕ ಎಲ್ಲಾ ಸರಬರಾಜುಗಳು ಇನ್ನೂ ಬಾಂಗ್ಲಾದೇಶವನ್ನು ತಲುಪಿಲ್ಲವಾದರೂ, ಭಾರತ ಸರ್ಕಾರದ ನಿರ್ಧಾರವು ಬಾಂಗ್ಲಾದೇಶದ ಮಾರುಕಟ್ಟೆಗಳಲ್ಲಿ ಬೆಲೆಗಳನ್ನು ತಕ್ಷಣವೇ ಇಳಿಸುವ ಪರಿಣಾಮವನ್ನು ಬೀರಿದೆ. ಕಳೆದ ವರ್ಷದಿಂದ ತೀವ್ರವಾಗಿ ಬೆಲೆ ಹೆಚ್ಚಾಗಿದೆ” ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ. “ಈ ಐದು ಸರಕುಗಳಿಗೆ ನಿಗದಿತ ಕೋಟಾಗಳನ್ನು ಹೊಂದುವ ಕ್ರಮವು ರಫ್ತು ನಿಷೇಧಗಳಿಂದ ಸ್ವಲ್ಪ ರಕ್ಷಣೆಯನ್ನು ಹೊಂದುವ ಗುರಿಯನ್ನು ಹೊಂದಿದ. ಪ್ರತಿ ವರ್ಷ ತಡೆರಹಿತ ಮತ್ತು ಖಚಿತವಾದ ಸರಬರಾಜುಗಳನ್ನು ಖಚಿತಪಡಿಸುತ್ತದೆ” ಎಂದು ಅವರು ಹೇಳಿದ್ದಾರೆ.

ಬಾಂಗ್ಲಾದೇಶದ ಮನವಿಯ ಕುರಿತು ಭಾರತದ ಕಡೆಯಿಂದ ಯಾವುದೇ ಅಧಿಕೃತ ಹೇಳಿಕೆ ಬಂದಿಲ್ಲ,. ಜನವರಿಯಲ್ಲಿ ನವದೆಹಲಿಯಲ್ಲಿ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಅವರನ್ನು ಭೇಟಿ ಮಾಡಿದ ಬಾಂಗ್ಲಾದೇಶದ ವಿದೇಶಾಂಗ ಸಚಿವ ಹಸನ್ ಮಹಮೂದ್ ಅವರ ಭೇಟಿಯಲ್ಲಿ ಈ ವಿಷಯ ಬಗ್ಗೆ ಚರ್ಚೆ ಆಗಿತ್ತು. ಅಗತ್ಯ ವಸ್ತುಗಳ ಬೆಲೆಗಳನ್ನು ಕಡಿಮೆ ಮಾಡುವ ಶೇಖ್ ಹಸೀನಾ ಸರ್ಕಾರದ ಗಮನಕ್ಕೆ ಅನುಗುಣವಾಗಿ ಸಕ್ಕರೆ ಮತ್ತು ಈರುಳ್ಳಿಯ ಹೆಚ್ಚುವರಿ ಪೂರೈಕೆಯನ್ನು ಕೋರಿದ್ದಾಗಿ ಮಹಮೂದ್ ಸುದ್ದಿಗಾರರಿಗೆ ತಿಳಿಸಿದರು.

ಭಾರತದ ಕಡೆಯಿಂದ ಅಧಿಕೃತ ಅಂಕಿಅಂಶಗಳ ಪ್ರಕಾರ, ಭಾರತದಿಂದ ಬಾಂಗ್ಲಾದೇಶದ ಅಕ್ಕಿ ಆಮದು 2021-22 ರಲ್ಲಿ $ 9.7 ಶತಕೋಟಿಯಿಂದ 2022-23 ರಲ್ಲಿ $ 11.1 ಶತಕೋಟಿಗೆ ಏರಿದೆ. ಆದರೆ ಗೋಧಿ ಆಮದು 2021-22 ರಲ್ಲಿ $ 2.1 ಶತಕೋಟಿ ಮತ್ತು 2022-23 ರಲ್ಲಿ $ 1.5 ಶತಕೋಟಿ ಮೌಲ್ಯದ್ದಾಗಿದೆ.

ಭಾರತದಿಂದ ಈರುಳ್ಳಿ ಆಮದು 2021-22 ರಲ್ಲಿ $ 460.5 ಮಿಲಿಯನ್‌ನಿಂದ 2022-23 ರಲ್ಲಿ $ 561.8 ಮಿಲಿಯನ್‌ಗೆ ಏರಿತು, ಆದರೆ ಶುಂಠಿಯ ಆಮದು 2021-22 ರಲ್ಲಿ $ 93 ಮಿಲಿಯನ್‌ನಿಂದ 2022-23 ರಲ್ಲಿ $ 35.9 ಮಿಲಿಯನ್‌ಗೆ ಇಳಿದಿದೆ. ಬೆಳ್ಳುಳ್ಳಿಯ ಆಮದು 2021-22 ರಲ್ಲಿ $ 2.9 ಮಿಲಿಯನ್‌ನಿಂದ 2022-23 ರಲ್ಲಿ $ 11.3 ಮಿಲಿಯನ್‌ಗೆ ಏರಿತು.

ಇದನ್ನೂ ಓದಿ: ಫ್ಲೋರಿಡಾದಲ್ಲಿ 14 ವರ್ಷದೊಳಗಿನ ಅಪ್ರಾಪ್ತರಿಗೆ ಸೋಶಿಯಲ್​​ ಮೀಡಿಯಾ ಬಳಕೆ ನಿಷೇಧ

2019 ರಲ್ಲಿ, ಗಗನಕ್ಕೇರುತ್ತಿರುವ ದೇಶೀಯ ಬೆಲೆಗಳಿಂದಾಗಿ ಈರುಳ್ಳಿ ರಫ್ತಿನ ಮೇಲೆ ಭಾರತದ ನಿಷೇಧವು ಬಾಂಗ್ಲಾದೇಶದ ಮೇಲೆ ಪ್ರಮುಖ ಪರಿಣಾಮ ಬೀರಿತು. ಆ ಸಮಯದಲ್ಲಿ ಭಾರತಕ್ಕೆ ಭೇಟಿ ನೀಡಿದಾಗ, ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಅವರು ಗೋಯಲ್ ಅವರ ಸಮ್ಮುಖದಲ್ಲಿ ನವದೆಹಲಿಯಲ್ಲಿ ವ್ಯಾಪಾರ ವೇದಿಕೆಯೊಂದರಲ್ಲಿ ತಮಾಷೆಯಾಗಿ ತಮ್ಮ ಅಡುಗೆಯವರಿಗೆ ಈರುಳ್ಳಿ ಬಳಸುವುದನ್ನು ನಿಲ್ಲಿಸುವಂತೆ ಕೇಳಿಕೊಂಡಿದ್ದರು ಎಂದು ಹೇಳಿದ್ದು,ಅಂತಹ ನಿಷೇಧಗಳ ಬಗ್ಗೆ ಭಾರತವು ಬಾಂಗ್ಲಾದೇಶವನ್ನು ಮುಂಚಿತವಾಗಿ ಎಚ್ಚರಿಸಬೇಕು ಎಂದು ಹೇಳಿದ್ದರು.

ಬಾಂಗ್ಲಾದೇಶವು ನೆರೆಹೊರೆಯಲ್ಲಿ ಭಾರತದ ಅತ್ಯಂತ ವಿಶ್ವಾಸಾರ್ಹ ಪಾಲುದಾರರಲ್ಲಿ ಒಂದಾಗಿದೆ.  ವ್ಯಾಪಾರ, ಇಂಧನ ಪೂರೈಕೆ ಮತ್ತು ಪ್ರವಾಸೋದ್ಯಮಕ್ಕಾಗಿ ಸಂಪರ್ಕವನ್ನು ಹೆಚ್ಚಿಸುವ ಬಗ್ಗೆ ಉಭಯ ಕಡೆಯವರು ಗಮನಹರಿಸಿದ್ದಾರೆ. ಜನವರಿಯಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಹಸೀನಾ ಅವರ ಗೆಲುವು ಕೂಡ ಬೆಳೆಯುತ್ತಿರುವ ಸಂಬಂಧಗಳಿಗೆ ಉತ್ತೇಜನ ನೀಡಿದೆ.

ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ