ಇರಾನ್ ಯುದ್ಧದಿಂದ ಹಿಂದೆ ಸರಿಯುವಂತೆ ಟ್ರಂಪ್ಗೆ ಸೌದಿ ಅರೇಬಿಯಾ ಒತ್ತಾಯ: ಕಾರಣಗಳೇನು?
ಸೌದಿ ಅರೇಬಿಯಾ ಇರಾನ್ ಯುದ್ಧದಿಂದ ಹಿಂದೆ ಸರಿಯುವಂತೆ ಅಮೆರಿಕ ಅಧ್ಯಕ್ಷ ಟ್ರಂಪ್ಗೆ ಒತ್ತಾಯಿಸಿದೆ. 'ವಿಷನ್ 2030' ಯಶಸ್ಸು, ವಿದೇಶಿ ಹೂಡಿಕೆ ಆಕರ್ಷಣೆ, ತೈಲ ಬೆಲೆ ಸ್ಥಿರತೆ ಹಾಗೂ ಪ್ರಾದೇಶಿಕ ಶಾಂತಿಗಾಗಿ ಈ ಮನವಿ ಮಾಡಿದೆ. ಇರಾನ್ನ ಕ್ಷಿಪಣಿ ದಾಳಿ, ಹೌತಿ ಬಂಡುಕೋರರ ಬೆದರಿಕೆ ಹಾಗೂ ಹಾರ್ಮುಜ್ ಜಲಸಂಧಿ ಅಡಚಣೆ ಸೌದಿಯ ಆರ್ಥಿಕ ಹಿತಾಸಕ್ತಿಗೆ ಧಕ್ಕೆ ತರುತ್ತಿದ್ದು, ಸಂಘರ್ಷ ನಿಲ್ಲಿಸುವುದು ತುರ್ತು ಅಗತ್ಯವಾಗಿದೆ.
Updated on: Aug 03, 2026 | 3:31 PM
ರಿಯಾದ್, ಆಗಸ್ಟ್ 03: ಪಶ್ಚಿಮ ಏಷ್ಯಾದಲ್ಲಿ ಭುಗಿಲೆದ್ದಿರುವ ಅಮೆರಿಕ-ಇಸ್ರೇಲ್ ಮತ್ತು ಇರಾನ್(Iran) ನಡುವಿನ ಮಿಲಿಟರಿ ಸಂಘರ್ಷವನ್ನು ತಕ್ಷಣವೇ ಶಮನಗೊಳಿಸುವಂತೆ ಹಾಗೂ ಇರಾನ್ ಮೇಲಿನ ಹೆಚ್ಚಿನ ದಾಳಿಗಳನ್ನು ತಡೆಹಿಡಿಯುವಂತೆ ಸೌದಿ ಅರೇಬಿಯಾದ ಕ್ರೌನ್ ಪ್ರಿನ್ಸ್ ಮೊಹಮ್ಮದ್ ಬಿನ್ ಸಲ್ಮಾನ್ (MBS) ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಮನವಿ ಮಾಡಿದ್ದಾರೆ.
ಅಮೆರಿಕದ ಮಿತ್ರರಾಷ್ಟ್ರವಾಗಿದ್ದರೂ ಸೌದಿ ಅರೇಬಿಯಾ ಈ ಯುದ್ಧವನ್ನು ತಡೆಯಲು ಮುಂದಾಗಿರುವುದರ ಹಿಂದಿರುವ ಪ್ರಮುಖ ರಾಜಕೀಯ ಮತ್ತು ಆರ್ಥಿಕ ಕಾರಣಗಳ ವಿಶ್ಲೇಷಣೆ ಇಲ್ಲಿದೆ. ಸೌದಿ ಅರೇಬಿಯಾವು ತೈಲದ ಮೇಲಿನ ತನ್ನ ಅವಲಂಬನೆಯನ್ನು ಕಡಿಮೆ ಮಾಡಿ, ದೇಶವನ್ನು ಜಾಗತಿಕ ಪ್ರವಾಸೋದ್ಯಮ, ತಂತ್ರಜ್ಞಾನ ಮತ್ತು ಹೂಡಿಕೆಯ ಕೇಂದ್ರವಾಗಿಸಲು ‘ವಿಷನ್ 2030’ ಎಂಬ ಶತಕೋಟಿ ಡಾಲರ್ ವೆಚ್ಚದ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಜಾರಿಗೆ ತಂದಿದೆ.
ಯುದ್ಧದ ವಾತಾವರಣವಿದ್ದರೆ ವಿದೇಶಿ ಹೂಡಿಕೆದಾರರು ಸೌದಿಗೆ ಬರಲು ಹಿಂಜರಿಯುತ್ತಾರೆ. ಇರಾನ್ ಮೇಲಿನ ದಾಳಿ ಉಲ್ಬಣಗೊಂಡರೆ ಸೌದಿಯ ಮೆಗಾ ಪ್ರಾಜೆಕ್ಟ್ಗಳಿಗೆ ಧಕ್ಕೆಯಾಗಲಿದೆ ಎಂಬ ಭೀತಿ ರಿಯಾದ್ ಆಡಳಿತಕ್ಕಿದೆ. ಅಮೆರಿಕ ಅಥವಾ ಇಸ್ರೇಲ್ಗೆ ಗಲ್ಫ್ ದೇಶಗಳು ಜಾಗ ಅಥವಾ ಬೆಂಬಲ ನೀಡಿದರೆ, ಪ್ರತಿಯಾಗಿ ಸೌದಿ ಅರೇಬಿಯಾ ಮತ್ತು ಯುಎಇಯಲ್ಲಿರುವ ತೈಲ ಸಂಸ್ಕರಣಾಗಾರಗಳು ಹಾಗೂ ಮೂಲಸೌಕರ್ಯಗಳ ಮೇಲೆ ಕ್ಷಿಪಣಿ ದಾಳಿ ನಡೆಸುವುದಾಗಿ ಇರಾನ್ ಎಚ್ಚರಿಸಿದೆ.
ಮತ್ತಷ್ಟು ಓದಿ: ಬಹಿರಂಗವಾಗಿ ಯುದ್ಧದ ಬೆದರಿಕೆ ಹಾಕುತ್ತಿರುವ ಅಮೆರಿಕ ರಹಸ್ಯವಾಗಿ ಸಂಧಾನ ಬಯಸುತ್ತಿದೆ; ಇರಾನ್ ಆರೋಪ
ವಿಶ್ವದ ಶೇ. 20ರಷ್ಟು ತೈಲ ರವಾನೆಯಾಗುವ ‘ಹಾರ್ಮುಜ್ ಜಲಸಂಧಿ’ಯಲ್ಲಿ ಇರಾನ್ ಹಡಗು ಸಂಚಾರ ತಡೆದಿರುವುದರಿಂದ ಸೌದಿಯ ತೈಲ ರಫ್ತಿಗೂ ಅಡಚಣೆಯಾಗಿದೆ. ಯೆಮೆನ್ನ ಹೌತಿ ಬಂಡುಕೋರರಿಗೆ ಇರಾನ್ನ ನೇರ ಬೆಂಬಲವಿದೆ. ಬಲಪ್ರಯೋಗ ಅಥವಾ ಮಿಲಿಟರಿ ಕಾರ್ಯಾಚರಣೆಗಳಿಂದಷ್ಟೇ ಹೌತಿಗಳನ್ನು ಮಟ್ಟಹಾಕಲು ಸಾಧ್ಯವಿಲ್ಲ ಎಂಬುದನ್ನು ಸೌದಿ ಅರೇಬಿಯಾ ತನ್ನ ಗಡಿ ಯುದ್ಧದ ಅನುಭವದಿಂದ ಅರಿತಿದೆ.
ಅಮೆರಿಕ-ಇರಾನ್ ಯುದ್ಧ ತೀವ್ರಗೊಂಡರೆ, ಯೆಮೆನ್ನಿಂದ ಹೌತಿಗಳು ಮತ್ತೆ ಸೌದಿಯ ವಿಮಾನ ನಿಲ್ದಾಣಗಳು ಹಾಗೂ ತೈಲ ಸಂಸ್ಥೆಗಳ (Aramco) ಮೇಲೆ ಡ್ರೋನ್ ದಾಳಿ ಆರಂಭಿಸುವ ಅಪಾಯವಿದೆ. ಪ್ರಸ್ತುತ ಬಿಕ್ಕಟ್ಟನ್ನು ಬಗೆಹರಿಸಲು ಗಲ್ಫ್ ರಾಷ್ಟ್ರಗಳಾದ ಕತಾರ್ ಮತ್ತು ಒಮಾನ್ ಮುಂಚೂಣಿಯಲ್ಲಿ ನಿಂತು ಇರಾನ್, ಅಮೆರಿಕ ಹಾಗೂ ಸೌದಿ ಪ್ರತಿನಿಧಿಗಳ ನಡುವೆ ಮಧ್ಯವರ್ತಿಯಾಗಿ ಚರ್ಚೆ ನಡೆಸುತ್ತಿವೆ.
ಚೀನಾದ ಮಧ್ಯಸ್ಥಿಕೆಯಲ್ಲಿ 2023 ರಲ್ಲಿ ಇರಾನ್ ಮತ್ತು ಸೌದಿ ಅರೇಬಿಯಾ ತಮ್ಮ ಏಳು ವರ್ಷಗಳ ರಾಜತಾಂತ್ರಿಕ ಹಗೆತನವನ್ನು ಕೊನೆಗೊಳಿಸಿ ದೂತಾವಾಸಗಳನ್ನು ಮತ್ತೆ ತೆರೆದಿದ್ದವು. ಈ ಹೊಸ ರಾಜತಾಂತ್ರಿಕ ಬಾಂಧವ್ಯವನ್ನು ಹಾಳುಮಾಡಿಕೊಳ್ಳಲು ಸೌದಿ ಅರೇಬಿಯಾ ಬಯಸುತ್ತಿಲ್ಲ. ಈ ಸಂಘರ್ಷದಿಂದಾಗಿ ಜಾಗತಿಕ ತೈಲ ಬೆಲೆಯಲ್ಲಿ ಭಾರಿ ಏರಿಳಿತ ಕಂಡುಬಂದಿದ್ದು, ಯುದ್ಧ ಮುಂದುವರಿದರೆ ತೈಲ ಬೆಲೆ ಪ್ರತಿ ಬ್ಯಾರೆಲ್ಗೆ 100 ಡಾಲರ್ ಗಡಿ ದಾಟುವ ಆತಂಕ ಎದುರಾಗಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
