Russia- Ukraine Crisis: ರಷ್ಯಾದಿಂದ ಕೈಕೊಡವಿ ಎದ್ದು ಬರೋದು ಈ ಬ್ರ್ಯಾಂಡ್​ಗಳಿಗೆ ಸಲೀಸಿಲ್ಲ ಏಕೆ ಗೊತ್ತಾ?

ರಷ್ಯಾದಿಂದ ಒಂದೊಂದೇ ಮಲ್ಟಿನ್ಯಾಷನಲ್ ಬ್ರ್ಯಾಂಡ್​ಗಳು ಹೊರಬರುತ್ತಿವೆ. ಉಕ್ರೇನ್​ ಮೇಲೆ ರಷ್ಯಾ ಸಾರಿರುವ ಯುದ್ಧಕ್ಕೆ (Russia War Against Ukraine) ಪ್ರತೀಕಾರದ ಕ್ರಮ ಇದು ಎಂಬುದು ಎಲ್ಲ ಕಡೆ ಕೇಳಿಬರುತ್ತಿರುವ ಮಾತು. ಆದರೆ ಮಾರ್ಕ್ಸ್ ಅಂಡ್ ಸ್ಪೆನ್ಸರ್, ಬರ್ಗರ್ ಕಿಂಗ್, ಹೋಟೆಲ್ ಸಮೂಹಗಳಾದ ಮೇರಿಯಟ್ ಮತ್ತು ಅಕ್ಕೊರ್ ಇವುಗಳಿಗೆ ವಿಥ್​ಡ್ರಾ ಮಾಡಿಕೊಳ್ಳುವುದು ಸಲೀಸಾಗಿಲ್ಲ. ಅದಕ್ಕೆ ಕಾರಣ ಏನೆಂದರೆ, ತುಂಬ ಸಂಕೀರ್ಣವಾದ ಫ್ರಾಂಚೈಸ್ ಒಪ್ಪಂದ. ಈ ಸಂಸ್ಥೆಗಳು ತಮ್ಮ ರಷ್ಯನ್ ವ್ಯವಹಾರವನ್ನು ಮೂರನೇ ವ್ಯಕ್ತಿಗಳಿಗೆ ಹೊರಗುತ್ತಿಗೆ ನೀಡಿದ್ದು, ಕಾರ್ಯಾಚರಣೆಗಳನ್ನು ತಮ್ಮದೇ ಹೆಸರಿನಲ್ಲೇನೂ ನಡೆಸುತ್ತಿಲ್ಲ. ಇವೆಲ್ಲವೂ ಸೇರಿ ರಷ್ಯಾದಲ್ಲಿ ಈಗಲೂ ಹತ್ತಿರಹತ್ತಿರ ಸಾವಿರ ಔಟ್​ಲೆಟ್​ಗಳನ್ನು ತೆರೆದಿವೆ. ಮಾರ್ಕ್ಸ್ ಅಂಡ್ ಸ್ಪೆನ್ಸರ್ 48 ಮಳಿಗೆ, ಬರ್ಗರ್ ಕಿಂಗ್ 800 ರೆಸ್ಟೋರೆಂಟ್ಸ್, ಹೋಟೆಲ್ ಸಮೂಹಗಳಾದ ಮೇರಿಯಟ್ 28 ಮತ್ತು ಅಕ್ಕೊರ್ 57 ಹೋಟೆಲ್​ಗಳನ್ನು ತೆರೆದಿವೆ.

ಈ ಬಹುರಾಷ್ಟ್ರೀಯ ಬ್ರ್ಯಾಂಡ್​ಗಳು ಅಷ್ಟು ಸಲೀಸಾಗಿ ಕಾರ್ಯಾಚರಣೆ ನಿಲ್ಲಿಸಲು ಯಾಕೆ ಸಾಧ್ಯವಿಲ್ಲ ಎಂದು ಬಿಬಿಸಿ ಸುದ್ದಿ ಸಂಸ್ಥೆ ತನ್ನ ವರದಿಯಲ್ಲಿ ಕಾರಣಗಳನ್ನು ತೆರೆದಿಟ್ಟಿದೆ. ಫ್ರಾಂಚೈಸ್ ವ್ಯವಹಾರವಾದ್ದರಿಂದ ಕಾನೂನುಬದ್ಧವಾದ ಒಪ್ಪಂದವೊಂದಕ್ಕೆ ಈ ಸಂಸ್ಥೆಗಳು ಬಂದಿದ್ದು, ರಷ್ಯಾದ ಪ್ರಮುಖ ಬಡಾವಣೆಗಳು ಮತ್ತು ಶಾಪ್​ಗಳಿಂದ ತಮ್ಮ ಹೆಸರನ್ನು ತೆಗೆಯುವುದಕ್ಕೆ ಕಷ್ಟವಾಗುತ್ತಿದೆ. ಪಾಶ್ಚಾತ್ಯ ದೇಶಗಳು ಹಲವು ಬ್ರ್ಯಾಂಡ್​ಗಳು ದಶಕಗಳಿಂದ ಇಂಥದ್ದೊಂದು ಒಪ್ಪಂದ ಮಾಡಿಕೊಂಡಿವೆ. ಉದಾಹರಣೆಗೆ, ಮಾರ್ಕ್ಸ್ ಅಂಡ್ ಸ್ಪೆನ್ಸರ್. ಅದನ್ನು ಟರ್ಕಿಶ್ ಕಂಪೆನಿ FiBA ನಡೆಸುತ್ತಿದೆ. 1999ರಿಂದಲೇ ಪೂರ್ವ ಯುರೋಪ್​ನಾದ್ಯಂತ ಈ ರೀಟೇಲರ್​ನ ಉತ್ಪನ್ನಗಳ ಮಾರಾಟ ಹಕ್ಕುಗಳನ್ನು ಹೊಂದಿದೆ. ಉಕ್ರೇನ್​ ಮೇಲೆ ರಷ್ಯಾ ಯುದ್ಧ ಸಾರಿದ ಮೇಲೆ FiBA ಕಂಪೆನಿಗೆ ಪೂರೈಕೆ ಅಮಾನತು ಮಾಡಿರುವುದಾಗಿ ಮಾರ್ಕ್ಸ್ ಅಂಡ್ ಸ್ಪೆನ್ಸರ್ ಹೇಳಿದೆ.

ಬರ್ಗರ್​ ಕಿಂಗ್ ಕೂಡ ಬಿಬಿಸಿ ಸುದ್ದಿ ಸಂಸ್ಥೆ ಜತೆ ಮಾತನಾಡಿ, ರಷ್ಯಾದಲ್ಲಿನ ರೆಸ್ಟೋರೆಂಟ್​ಗಳನ್ನು ನಡೆಸುತ್ತಿರುವುದು ಫ್ರಾಂಚೈಸ್ ಮೂಲಕ ಎಂದು ಹೇಳಿಕೊಂಡಿದೆ. ತಕ್ಷಣದ ಭವಿಷ್ಯದಲ್ಲಿ ಈ ದೀರ್ಘಾವಧಿ ಒಪ್ಪಂದಗಳನ್ನು ಬದಲಾಯಿಸುವುದು ಸುಲಭವಲ್ಲ ಎಂದು ಅದು ಹೇಳಿಕೊಂಡಿದೆ. ಹೋಟೆಲ್ ಸಮೂಹವಾದ ಮೇರಿಯಟ್, ಐಎಚ್​ಜಿ, ಫ್ರೆಂಚ್ ಮೂಲ ಅಕೊರ್- ಇದು ಐಬಿಸ್ ಮತ್ತು ನೊವೊಟೆಲ್ ಹೆಸರಿನ ಬ್ರ್ಯಾಂಡ್​ಗಳಲ್ಲಿ ರಷ್ಯಾದಲ್ಲಿ ಹೋಟೆಲ್​ ನಡೆಸುತ್ತಿದ್ದು, ಅವುಗಳದೂ ಇದೇ ರೀತಿಯಾದ ಫ್ರಾಂಚೈಸ್ ವ್ಯವಹಾರ ಆಗಿದೆ.

ಫ್ರಾಂಚೈಸ್ ಅನ್ನೋದು ಒಂದು ವ್ಯವಹಾರ ಪದ್ಧತಿ. ಉತ್ಪನ್ನಗಳ ಸೇವೆ ಮತ್ತು ವಿತರಣೆ ಇದರಲ್ಲಿ ಒಳಗೊಂಡಿರುತ್ತದೆ. ಅದಾಗಲೇ ಒಂದು ಬ್ರ್ಯಾಂಡ್​ನ ಹೆಸರನ್ನು ಖ್ಯಾತಗೊಳಿಸಿ, ಬೇಡಿಕೆ ತಂದಿರುವ ಕಂಪೆನಿಗೆ ಫ್ರಾಂಚೈಸರ್ ಎನ್ನಲಾಗುತ್ತದೆ. ಆ ಕಂಪೆನಿಯ ಹೆಸರನ್ನು ಬಳಕೆ ಮಾಡಿಕೊಂಡು, ಉತ್ಪನ್ನಗಳನ್ನು- ಸೇವೆಗಳನ್ನು ಮಾರಾಟ ಮಾಡುವುದಕ್ಕೆ ಒಂದಿಷ್ಟು ಹಣವನ್ನು ಶುಲ್ಕವಾಗಿ ಪಾವತಿಸುವ ಕಂಪೆನಿಗೆ ಫ್ರಾಂಚೈಸಿ ಎನ್ನಲಾಗುತ್ತದೆ. ಪಾಶ್ಚಾತ್ಯ ಬ್ರ್ಯಾಂಡ್​ಗಳಾಗಿದ್ದು, ವಿವಿಧ ದೇಶಗಳ ಮಾರುಕಟ್ಟೆ ಪ್ರವೇಶಿಸುವುದಕ್ಕೆ ಅವು ಬಯಸುತ್ತಿದ್ದು, ಸ್ಥಳೀಯ ಜ್ಞಾನ, ಹಣ ಅಥವಾ ಸಾಮರ್ಥ್ಯ ಇಲ್ಲದಿದ್ದಾಗ ಈ ರೀತಿ ಫ್ರಾಂಚೈಸ್ ಮಾರ್ಗವನ್ನು ಬಳಸಬಹುದು.

ಸಾಮಾನ್ಯವಾಗಿ ಇಂಥ ಒಪ್ಪಂದವನ್ನು 10 ವರ್ಷ ಹಾಗೂ ಅದಕ್ಕಿಂತ ದೀರ್ಘಾವಧಿಗೆ ಮಾಡಿಕೊಂಡಿರಲಾಗುತ್ತದೆ. ಒಂದು ವೇಳೆ ಸೂಕ್ತವಾದ ಹಾಗೂ ಮಾನ್ಯವಾಗುವಂಥ ಕಾರಣಗಳಿಲ್ಲದೆ ಏಕಾಏಕಿ ಒಪ್ಪಂದವನ್ನು ರದ್ದು ಮಾಡಿದರೆ ಫ್ರಾಂಚೈಸಿ ಕಡೆಯಿಂದ ಫ್ರಾಂಚೈಸರ್​ಗಳ ಮೇಲೆ ಕಾನೂನು ಮೊಕದ್ದಮೆ ಹೂಡಬಹುದು. ಉದಾಹರಣೆಗೆ ಹೇಳುವುದಾದರೆ, ಯುನೈಟೆಡ್ ಕಿಂಗ್​ಡಮ್​ನ ನ್ಯಾಯಾಲಯವು ಅಲ್ಲಿನ ಸರ್ಕಾರದ ಆದೇಶದಂತೆ ರಷ್ಯಾದಲ್ಲಿನ ಒಂದು ಕಂಪೆನಿಯ ಫ್ರಾಂಚೈಸಿಗಳನ್ನು ರದ್ದು ಮಾಡಬಹುದು. ಆದರೆ ರಷ್ಯಾ ನ್ಯಾಯಾಲಯವು ಅದನ್ನು ಲಾಗೂ ಮಾಡುವುದಿಲ್ಲ. ಈ ಮಧ್ಯೆಯೂ ಆಯಾ ಬ್ರ್ಯಾಂಡ್​ಗಳು ಉಕ್ರೇನ್​ ವಿರುದ್ಧದ ರಷ್ಯಾ ದಾಳಿಗೆ ತಮ್ಮ ವ್ಯಾಪ್ತಿಯೊಳಗೆ ಪ್ರತಿಭಟನೆಯನ್ನು ದಾಖಲಿಸುತ್ತಲೇ ಇವೆ.

ಇನ್ನು ಕೆಎಫ್​ಸಿ ಹಾಗೂ ಪಿಜ್ಜಾ ಹಟ್​ನಂಥವು ತಮ್ಮ ಫ್ರಾಂಚೈಸ್​ಗಳ ಜತೆಗೆ ಮಾತುಕತೆ ನಡೆಸುತ್ತಿದ್ದು, ತಾತ್ಕಾಲಿಕವಾಗಿ ಕಾರ್ಯಾಚರಣೆ ನಿಲ್ಲಿಸುವ ಸಂಬಂಧ ಅಂತಿಮ ಹಂತದ ಒಪ್ಪಂದ ಆಗಬೇಕಿದೆ ಎಂದು ತಿಳಿಸಲಾಗಿದೆ. ಒಂದು ವೇಳೆ ರಷ್ಯಾದಲ್ಲಿ ತಮ್ಮ ಕಾರ್ಯಾಚರಣೆಯನ್ನು ಮುಂದುವರಿಸಿದಲ್ಲಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಗಬಹುದಾದ ವರ್ಚಸ್ಸಿನ ಹಾನಿ ಬಗ್ಗೆ ಈ ಬ್ರ್ಯಾಂಡ್​ಗಳಿಗೆ ಆತಂಕ ಇದ್ದೇ ಇದೆ.

ಇದನ್ನೂ ಓದಿ: Ukraine Crisis: 20 ದಿನದಲ್ಲಿ 7,000 ರಷ್ಯನ್ ಸೈನಿಕರ ಸಾವು; ರಷ್ಯಾ- ಉಕ್ರೇನ್ ಬಿಕ್ಕಟ್ಟಿನ 10 ಮುಖ್ಯಾಂಶಗಳು ಇಲ್ಲಿವೆ