New Rules In June 2023: ಇ-ವಾಹನ ಬೆಲೆ ಹೆಚ್ಚಳ; ಎಲ್ಪಿಜಿ ಬೆಲೆ ಇಳಿಕೆಯಾಗುತ್ತಾ? ಜೂನ್ 1ರಿಂದ ಏನೇನು ಹಣಕಾಸು ಬದಲಾವಣೆ? ಇಲ್ಲಿದೆ ಡೀಟೇಲ್ಸ್
Financial Rule Changes In June Month: ಆರ್ಬಿಐನ 100 ದಿನ 100 ಪಾವತಿ, ಎಲ್ಪಿಜಿ ಬೆಲೆ ಪರಿಷ್ಕರಣೆ ಸೇರಿದಂತೆ ಜೂನ್ ತಿಂಗಳಲ್ಲಿ ಬದಲಾವಣೆ ಆಗುವ ಹಣಕಾಸು ಸಂಬಂಧಿತ ಬೆಳವಣಿಗೆಗಳೇನು ಎಂಬ ವಿವರ ಇಲ್ಲಿದೆ...
Updated on:May 31, 2023 | 11:36 AM
ಇವತ್ತಿನ ಅನಿಶ್ಚಿತ ಆರ್ಥಿಕ ಪರಿಸ್ಥಿತಿಯಲ್ಲಿ (Economic Uncertainty) ಯಾವಾಗ ಯಾವ ಕಡೆಯಿಂದ ಏನೇನು ಅನಾಹುತಗಳಾಗುತ್ತವೋ, ಆಗಿದ್ದುದು ಈಗಿಲ್ಲ ಎನ್ನುವಂತಾಗುತ್ತದೋ ಎಂಬ ಭಯ ಎಲ್ಲರಿಗೂ ಇದ್ದದ್ದೇ. ಈ ತಿಂಗಳು ಕಳೆಯಿತು, ಮುಂದಿನ ತಿಂಗಳು ಏನು ಗ್ರಹಚಾರ ಕಾದಿದೆಯೋ ಎನಿಸದು. ಭವಿಷ್ಯದಲ್ಲಿ ನಡೆಯಬಹುದಾದ ಘಟನೆಗಳನ್ನು ಯಾರೂ ಅಂದಾಜಿಸಲಾಗುವುದಿಲ್ಲ. ಆದರೆ, ಸರ್ಕಾರ ಕೈಗೊಂಡ ನಿರ್ಧಾರಗಳ ಫಲ ಯಾವಾಗ ಸಿಗಬಹುದು ಎಂದು ತಿಳಿಯಬಹುದು. ಎಲ್ಪಿಜಿ ಸಿಲಿಂಡರ್, ಎಲೆಕ್ಟ್ರಿಕ್ ವಾಹನಗಳ ಬೆಲೆ ಸೇರಿದಂತೆ ಜೂನ್ ತಿಂಗಳಲ್ಲಿ ಕೆಲವೊಂದಿಷ್ಟು ಮಹತ್ವದ ಬೆಲೆ ವ್ಯತ್ಯಯಗಳಾಗುತ್ತವೆ. ಈ ಬಗ್ಗೆ ಒಂದಿಷ್ಟು ವಿವರ.
ಎಲ್ಪಿಜಿ ಸಿಲಿಂಡರ್ ದರಗಳ ಪರಿಷ್ಕರಣೆ
ಪೆಟ್ರೋಲಿಯಂ ಕಂಪನಿಗಳು ಸಾಮಾನ್ಯವಾಗಿ ಪ್ರತೀ ತಿಂಗಳ ಮೊದಲ ದಿನದಂದು ಎಲ್ಪಿಜಿ ಸಿಲಿಂಡರ್ಗಳ ಬೆಲೆ ಪರಿಷ್ಕರಣೆ ಮಾಡುತ್ತವೆ. ಅಂತೆಯೇ ಜೂನ್ 1ರಂದು ಬೆಲೆ ಪರಿಷ್ಕರಣೆ ನಿರೀಕ್ಷಿಸಬಹುದು. ಕಳೆದ ತಿಂಗಳು, ಮೇ ನಲ್ಲಿ ಎಲ್ಪಿಜಿ ಬೆಲೆಯನ್ನು 171.50 ರೂ ಕಡಿತಗೊಳಿಸಲಾಗಿತ್ತು. ಈಗ ಜೂನ್ ತಿಂಗಳಲ್ಲಿ ಐಒಎಲ್, ಬಿಪಿಸಿಎಲ್, ಹೆಚ್ಪಿಸಿಎಲ್ ಕಂಪನಿಗಳು ಸಿಲಿಂಡರ್ ಬೆಲೆಗಳನ್ನು ಪರಿಷ್ಕರಿಸುತ್ತವಾ ಎಂದು ಕಾದುನೋಡಬೇಕಷ್ಟೇ.
ಎಲೆಕ್ಟ್ರಿಕ್ ವಾಹನಗಳ ಬೆಲೆ ಏರಿಕೆ
ಕೇಂದ ಸರ್ಕಾರ ಎಲೆಕ್ಟ್ರಿಕ್ ವಾಹನಗಳ ಖರೀದಿಗೆ ನೀಡುವ ಸಬ್ಸಿಡಿಯ ಮೊತ್ತವನ್ನು ಕಡಿಮೆಗೊಳಿಸಿದೆ. ಇದು ಜೂನ್ 1ರಿಂದ ಜಾರಿಗೆ ಬರುತ್ತದೆ. ಅಂದರೆ 2023ರ ಜೂನ್ 1ರ ಬಳಿಕ ನೊಂದಣಿಯಾಗುವ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳಿಗೆ ಕಡಿಮೆ ಸಬ್ಸಿಡಿ ಸಿಗುತ್ತದೆ. ಇದರ ಪರಿಣಾಮವಾಗಿ ಈಗಿರುವ ಬೆಲೆಗಿಂತ ಈ ವಾಹನಗಳು ಜೂನ್ 1ರಿಂದ ತುಸು ದುಬಾರಿಯಾಗಲಿವೆ.
ಕೆಮ್ಮಿನ ಸಿರಪ್ ಪರೀಕ್ಷೆ ಕಡ್ಡಾಯ
ಭಾರತದಿಂದ ರಫ್ತಾದ ಕೆಮ್ಮಿನ ಸಿರಪ್ಗಳಿಂದ ಕೆಲ ವಿದೇಶಗಳಲ್ಲಿ ಅನಾಹುತವಾದ ಹಿನ್ನೆಲೆಯಲ್ಲಿ ಎಚ್ಚೆತ್ತುಕೊಂಡಿರುವ ಸರ್ಕಾರ ಈಗ ಕೆಮ್ಮಿನ ಸಿರಪ್ಗಳ ಪರೀಕ್ಷೆಯನ್ನು ಕಡ್ಡಾಯಗೊಳಿಸಿದೆ. ಕೆಮ್ಮಿನ ಸಿರಪ್ ರಫ್ತಾಗುವ ಮುನ್ನ ಅದರ ತಯಾರಕರು ಕಳುಹಿಸುವ ಸ್ಯಾಂಪಲ್ ಅನ್ನು ನಿಗದಿತ ಸರ್ಕಾರಿ ಲ್ಯಾಬ್ಗಳಿಗೆ ಕಳುಹಿಸಬೇಕು. ಈ ಲ್ಯಾಬ್ಗಳು ಆದ್ಯತೆ ಮೇರೆಗೆ ಅದನ್ನು ಪರೀಕ್ಷಿಸಿ ರಿಪೋರ್ಟ್ ಕೊಡಬೇಕು ಎಂದು ಭಾರತದ ಔಷಧ ನಿಯಂತ್ರಣ ಪ್ರಾಧಿಕಾರ ಡಿಸಿಜಿಐ ಆದೇಶಿಸಿದೆ. ಜೂನ್ 1ರಿಂದ ಈ ಹೊಸ ವ್ಯವಸ್ಥೆ ಜಾರಿಗೆ ಬರುತ್ತದೆ.
ಆರ್ಬಿಐ 100 ದಿನ 100 ಪಾವತಿ
ವಿವಿಧ ಬ್ಯಾಂಕುಗಳಲ್ಲಿ ವರ್ಷಗಳಿಂದ ಹಿಂಪಡೆಯದೇ ಉಳಿದುಹೋಗಿರುವ ಹಣವನ್ನು ಅದರ ಖಾತೆದಾರರು ಅಥವಾ ಅವರ ವಾರಸುದಾರರಿಗೆ ಮರಳಿಸಲು ಆರ್ಬಿಐ ನಿರ್ಧರಿಸಿದೆ. ಆ ನಿಟ್ಟಿನಲ್ಲಿ ಆರಂಭಿಕ ಹೆಜ್ಜೆಯಾಗಿ 100 ದಿನ 100 ಪಾವತಿ ಅಭಿಯಾನವನ್ನು ಆರಂಭಿಸಿದೆ. ಅದರಂತೆ ದೇಶದ ಪ್ರತಿಯೊಂದು ಬ್ಯಾಂಕ್ ಪ್ರತಿಯೊಂದು ಜಿಲ್ಲೆಯಲ್ಲೂ 100 ದಿನದೊಳಗೆ ಇಂಥ 100 ಅಗ್ರ ಪ್ರಕರಣಗಳನ್ನು ಗುರುತಿಸಿ ಇತ್ಯರ್ಥಗೊಳಿಸಬೇಕು ಎಂಬುದು ಆರ್ಬಿಐ ನೀಡಿರುವ ಗುರಿ. ಮೊದಲಿಗೆ ದೊಡ್ಡ ಮೊತ್ತದ ಅನ್ಕ್ಲೈಮ್ಡ್ ಡೆಪಾಸಿಟ್ಗಳ ಪಟ್ಟಿ ಮಾಡಿಕೊಂಡು ಅದರ ಖಾತೆದಾರರು ಅಥವಾ ವಾರಸುದಾರರನ್ನು ಪತ್ತೆ ಹಚ್ಚುವ ಕೆಲಸ ಮಾಡಲಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 11:33 am, Wed, 31 May 23
