ಒಂದು ಕಾಲದಲ್ಲಿ ಭಾರತವನ್ನು ಆಳಿದ್ದ ಮೈಕ್ರೋಮ್ಯಾಕ್ಸ್‌ ಏಕಾಏಕಿ ಕಣ್ಮರೆಯಾಗಿದ್ದು ಹೇಗೆ?: ಇಲ್ಲಿದೆ ರೋಚಕ ಕಥೆ

ಒಂದು ಕಾಲದಲ್ಲಿ ಹೊಸ ಮೊಬೈಲ್ ಖರೀದಿಸುವಾಗ ಭಾರತೀಯರ ಮುಂದೆ ಆಪಲ್ ಅಥವಾ ಸ್ಯಾಮ್‌ಸಂಗ್ ಮಾತ್ರ ಆಯ್ಕೆಯಾಗಿರಲಿಲ್ಲ. ಕಡಿಮೆ ಬೆಲೆಗೆ ಉತ್ತಮ ವೈಶಿಷ್ಟ್ಯಗಳನ್ನು ನೀಡುತ್ತಿದ್ದ ಮೈಕ್ರೋಮ್ಯಾಕ್ಸ್ (Micromax) ಕೂಡ ಜನರ ನೆಚ್ಚಿನ ಬ್ರ್ಯಾಂಡ್ ಆಗಿತ್ತು. ಸಣ್ಣ ಪಟ್ಟಣಗಳಿಂದ ಹಿಡಿದು ದೊಡ್ಡ ನಗರಗಳವರೆಗೆ ಮೈಕ್ರೋಮ್ಯಾಕ್ಸ್ ಫೋನ್‌ಗಳು ಕಾಣಿಸುತ್ತಿದ್ದವು. ಒಂದು ಹಂತದಲ್ಲಿ ಮೈಕ್ರೋಮ್ಯಾಕ್ಸ್ ಸ್ಯಾಮ್‌ಸಂಗ್‌ ಅನ್ನು ಹಿಂದಿಕ್ಕಿ ಭಾರತದ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಮೊದಲ ಸ್ಥಾನಕ್ಕೂ ಏರಿತ್ತು.

ಹಾಲಿವುಡ್ ನಟ ಹಗ್ ಜ್ಯಾಕ್‌ಮನ್ ಅವರನ್ನು ಬ್ರ್ಯಾಂಡ್ ರಾಯಭಾರಿಯನ್ನಾಗಿ ಮಾಡಿಕೊಂಡು ದೊಡ್ಡ ಮಟ್ಟದಲ್ಲಿ ಪ್ರಚಾರವನ್ನೂ ನಡೆಸಿದ ಮೈಕ್ರೋಮ್ಯಾಕ್ಸ್‌ನ ಉಪಸ್ಥಿತಿ ಇಂದು ಭಾರತೀಯ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಬಹಳ ಕಡಿಮೆಯಾಗಿದೆ. ಹಾಗಾದರೆ ಒಂದು ಕಾಲದಲ್ಲಿ ಜನಪ್ರಿಯವಾಗಿದ್ದ ಈ ಭಾರತೀಯ ಕಂಪನಿ ವಿಫಲವಾಗಲು ಕಾರಣವೇನು?.

ಮೈಕ್ರೋಮ್ಯಾಕ್ಸ್ ಯಾವಾಗ ಆರಂಭವಾಯಿತು?

ಮೈಕ್ರೋಮ್ಯಾಕ್ಸ್ ಅನ್ನು ರಾಹುಲ್ ಶರ್ಮಾ, ರಾಜೇಶ್ ಅಗರ್ವಾಲ್, ವಿಕಾಸ್ ಜೈನ್ ಮತ್ತು ಸುಮೀತ್ ಕುಮಾರ್ ಅವರು 2000ರ ದಶಕದ ಆರಂಭದಲ್ಲಿ ಸ್ಥಾಪಿಸಿದರು. ಆರಂಭದಲ್ಲಿ ಕಂಪನಿ ಮೊಬೈಲ್ ಫೋನ್‌ಗಳನ್ನು ತಯಾರಿಸುತ್ತಿರಲಿಲ್ಲ. ನೋಕಿಯಾ ಮತ್ತು ಏರ್‌ಟೆಲ್‌ ಸೇರಿದಂತೆ ಕಂಪನಿಗಳಿಗೆ ಹಾರ್ಡ್‌ವೇರ್ ಸಂಬಂಧಿತ ಕೆಲಸಗಳನ್ನು ಮಾಡುತ್ತಿತ್ತು.

ಸುಮಾರು 2008ರ ವೇಳೆಗೆ ಮೈಕ್ರೋಮ್ಯಾಕ್ಸ್ ಮೊಬೈಲ್ ಫೋನ್ ಮಾರುಕಟ್ಟೆಗೆ ಪ್ರವೇಶಿಸಿತು. ಕಂಪನಿಯ ಸಹ-ಸಂಸ್ಥಾಪಕ ರಾಹುಲ್ ಶರ್ಮಾ ಅವರಿಗೆ ಬಿಹಾರದ ಒಂದು ಗ್ರಾಮದಲ್ಲಿ ನಡೆದ ಘಟನೆ ಮೊಬೈಲ್ ವ್ಯವಹಾರದ ಬಗ್ಗೆ ಹೊಸ ಆಲೋಚನೆ ನೀಡಿತು. ಅಲ್ಲಿ ವ್ಯಕ್ತಿಯೊಬ್ಬರು ದೊಡ್ಡ ಟ್ರಕ್‌ನ ಬ್ಯಾಟರಿಯನ್ನು ಬಳಸಿ ಜನರ ಮೊಬೈಲ್‌ಗಳನ್ನು ಚಾರ್ಜ್ ಮಾಡಿಕೊಟ್ಟು ಹಣ ಪಡೆಯುತ್ತಿದ್ದರು.

ಇದರಿಂದ ವಿದ್ಯುತ್‌ ಸೌಲಭ್ಯ ಕಡಿಮೆ ಇರುವ ಪ್ರದೇಶಗಳಲ್ಲಿಯೂ ದೀರ್ಘಕಾಲ ಬ್ಯಾಟರಿ ಬಾಳಿಕೆ ನೀಡುವ ಮೊಬೈಲ್‌ಗಳಿಗೆ ಬೇಡಿಕೆ ಇದೆ ಎಂಬುದನ್ನು ಮೈಕ್ರೋಮ್ಯಾಕ್ಸ್ ಅರ್ಥಮಾಡಿಕೊಂಡಿತು. ನಂತರ ಕಡಿಮೆ ಬೆಲೆಯಲ್ಲಿ ದೀರ್ಘ ಬ್ಯಾಟರಿ ಬಾಳಿಕೆ ಮತ್ತು ಎರಡು ಸಿಮ್ ಬಳಸುವ ಸೌಲಭ್ಯ ಹೊಂದಿರುವ ಮೊಬೈಲ್‌ಗಳನ್ನು ಪರಿಚಯಿಸಿತು. ಬಳಿಕ ಬಂದ ಕ್ಯಾನ್ವಾಸ್ ಸರಣಿಯ ಸ್ಮಾರ್ಟ್‌ಫೋನ್‌ಗಳು ಕಂಪನಿಯ ಜನಪ್ರಿಯತೆಯನ್ನು ಮತ್ತಷ್ಟು ಹೆಚ್ಚಿಸಿದವು.

ಸ್ಯಾಮ್‌ಸಂಗ್‌ ಅನ್ನು ಹಿಂದಿಕ್ಕಿ ಮೊದಲ ಸ್ಥಾನಕ್ಕೆ

ಮೈಕ್ರೋಮ್ಯಾಕ್ಸ್‌ನ ಜನಪ್ರಿಯತೆ ವೇಗವಾಗಿ ಹೆಚ್ಚಾಯಿತು. 2014ರಲ್ಲಿ ಕಂಪನಿಯು ಭಾರತದ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಸ್ಯಾಮ್‌ಸಂಗ್‌ ಅನ್ನು ಹಿಂದಿಕ್ಕಿ ಮೊದಲ ಸ್ಥಾನಕ್ಕೇರಿತ್ತು. ಕಂಪನಿಯ ಮೌಲ್ಯವೂ ಸುಮಾರು ₹21,000 ಕೋಟಿಯ ಮಟ್ಟಕ್ಕೆ ತಲುಪಿತ್ತು.

ಹಾಲಿವುಡ್ ನಟ ಹಗ್ ಜ್ಯಾಕ್‌ಮನ್ ಅವರನ್ನು ಬ್ರ್ಯಾಂಡ್ ರಾಯಭಾರಿಯನ್ನಾಗಿ ನೇಮಿಸಿಕೊಂಡಿದ್ದು ಕೂಡ ಮೈಕ್ರೋಮ್ಯಾಕ್ಸ್‌ನ ದೊಡ್ಡ ಮಟ್ಟದ ಬೆಳವಣಿಗೆಗೆ ಸಾಕ್ಷಿಯಾಗಿತ್ತು. ಆದರೆ ಇದೇ ಸಮಯದಲ್ಲಿ ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲೂ ದೊಡ್ಡ ಬದಲಾವಣೆಗಳು ಆರಂಭವಾದವು.

Realme P4s 5G: ಬರೋಬ್ಬರಿ 8000mAh ಬ್ಯಾಟರಿಯೊಂದಿಗೆ ರಿಯಲ್ ಮಿ P4s 5G ಬಿಡುಗಡೆ

ಮೈಕ್ರೋಮ್ಯಾಕ್ಸ್ ಹಿಂದೆ ಬೀಳಲು ಕಾರಣವೇನು?

ಶಿಯೋಮಿ, ವಿವೋ, ಒಪ್ಪೋ ಮತ್ತು ಒನ್‌ಪ್ಲಸ್‌ನಂತಹ ಚೀನೀ ಬ್ರ್ಯಾಂಡ್‌ಗಳು ಭಾರತೀಯ ಮಾರುಕಟ್ಟೆಗೆ ವೇಗವಾಗಿ ಪ್ರವೇಶಿಸಿದವು. ಕಡಿಮೆ ಬೆಲೆಗೆ ಉತ್ತಮ ಕ್ಯಾಮೆರಾ, ವೇಗದ ಪ್ರೊಸೆಸರ್, ದೊಡ್ಡ ಡಿಸ್​ಪ್ಲೇ ಮತ್ತು ಹೆಚ್ಚಿನ ವೈಶಿಷ್ಟ್ಯಗಳನ್ನು ನೀಡುವ ಮೂಲಕ ಅವು ಗ್ರಾಹಕರ ಗಮನ ಸೆಳೆದವು.

ಮೈಕ್ರೋಮ್ಯಾಕ್ಸ್ ಈ ಬದಲಾವಣೆಗೆ ತಕ್ಕಷ್ಟು ವೇಗವಾಗಿ ಸ್ಪಂದಿಸಲು ಸಾಧ್ಯವಾಗಲಿಲ್ಲ. ಸಂಶೋಧನೆ ಮತ್ತು ಅಭಿವೃದ್ಧಿಗೆ ಸಾಕಷ್ಟು ಹೂಡಿಕೆ ಮಾಡಲು ಕಂಪನಿಗೆ ಸಾಧ್ಯವಾಗಲಿಲ್ಲ. ದೊಡ್ಡ ಪ್ರಮಾಣದಲ್ಲಿ ಉತ್ಪಾದನೆ ಮಾಡುವ ಬಲವಾದ ವ್ಯವಸ್ಥೆಯನ್ನು ನಿರ್ಮಿಸುವಲ್ಲಿಯೂ ಅದು ಹಿಂದೆ ಬಿದ್ದಿತು. ಇದರ ಜತೆಗೆ ಸಾಫ್ಟ್‌ವೇರ್ ಅನುಭವ, ಫೋನ್‌ಗಳ ಕಾರ್ಯಕ್ಷಮತೆ ಮತ್ತು ಮಾರಾಟದ ನಂತರದ ಸೇವೆಯಲ್ಲಿಯೂ ಮೈಕ್ರೋಮ್ಯಾಕ್ಸ್‌ ಬಗ್ಗೆ ಗ್ರಾಹಕರಲ್ಲಿ ಅಸಮಾಧಾನ ಹೆಚ್ಚಾಯಿತು. ಹೊಸ ಬ್ರ್ಯಾಂಡ್‌ಗಳು ಒಂದರ ನಂತರ ಒಂದರಂತೆ ಉತ್ತಮ ಉತ್ಪನ್ನಗಳನ್ನು ಪರಿಚಯಿಸುತ್ತಿದ್ದಂತೆ ಮೈಕ್ರೋಮ್ಯಾಕ್ಸ್‌ನ ಮಾರುಕಟ್ಟೆ ಪಾಲು ಕುಸಿಯತೊಡಗಿತು.

4G ಬದಲಾವಣೆಯನ್ನೂ ಹಿಡಿಯಲು ಸಾಧ್ಯವಾಗಲಿಲ್ಲ

ಮೈಕ್ರೋಮ್ಯಾಕ್ಸ್‌ಗೆ ಮತ್ತೊಂದು ದೊಡ್ಡ ಸವಾಲಾಗಿದ್ದು 4G ತಂತ್ರಜ್ಞಾನದ ವೇಗದ ಬೆಳವಣಿಗೆ. ರಿಲಯನ್ಸ್ ಜಿಯೋ ಭಾರತದಲ್ಲಿ 4G ಸೇವೆಯನ್ನು ಜನಪ್ರಿಯಗೊಳಿಸಿದ ನಂತರ, 4G ಸ್ಮಾರ್ಟ್‌ಫೋನ್‌ಗಳಿಗೆ ಬೇಡಿಕೆ ವೇಗವಾಗಿ ಹೆಚ್ಚಾಯಿತು. ಆದರೆ ಆ ಸಮಯದಲ್ಲಿ ಮೈಕ್ರೋಮ್ಯಾಕ್ಸ್‌ನ ಹಲವು ಫೋನ್‌ಗಳು 2G ಮತ್ತು 3G ತಂತ್ರಜ್ಞಾನವನ್ನು ಆಧರಿಸಿದ್ದವು. ಕಂಪನಿ 4G ಮಾರುಕಟ್ಟೆಗೆ ಹೊಂದಿಕೊಳ್ಳುವಷ್ಟರಲ್ಲಿ ಶಿಯೋಮಿ, ವಿವೋ ಮತ್ತು ಒಪ್ಪೋನಂತಹ ಬ್ರ್ಯಾಂಡ್‌ಗಳು ಈಗಾಗಲೇ ತಮ್ಮ ಸ್ಥಾನವನ್ನು ಗಟ್ಟಿಗೊಳಿಸಿದ್ದವು.

ಹೀಗಾಗಿ ಮಾರುಕಟ್ಟೆಯ ಬದಲಾವಣೆಗೆ ಸಮಯಕ್ಕೆ ಸರಿಯಾಗಿ ಹೊಂದಿಕೊಳ್ಳಲು ಸಾಧ್ಯವಾಗದಿರುವುದು ಮೈಕ್ರೋಮ್ಯಾಕ್ಸ್‌ನ ಕುಸಿತಕ್ಕೆ ಪ್ರಮುಖ ಕಾರಣಗಳಲ್ಲಿ ಒಂದಾಯಿತು. 2019ರ ವೇಳೆಗೆ ಕಂಪನಿಯ ಮಾರುಕಟ್ಟೆ ಪಾಲು ಮತ್ತು ಮೌಲ್ಯ ಗಣನೀಯವಾಗಿ ಕುಸಿದಿತ್ತು.

2020ರಲ್ಲಿ ಪುನರಾಗಮನಕ್ಕೆ ಪ್ರಯತ್ನ

ಮೈಕ್ರೋಮ್ಯಾಕ್ಸ್ 2020ರಲ್ಲಿ IN ಸರಣಿಯ ಸ್ಮಾರ್ಟ್‌ಫೋನ್‌ಗಳ ಮೂಲಕ ಮತ್ತೆ ಮಾರುಕಟ್ಟೆಗೆ ಬರಲು ಪ್ರಯತ್ನಿಸಿತು. ಆ ಸಮಯದಲ್ಲಿ ಭಾರತದಲ್ಲಿ ‘ವೋಕಲ್ ಫಾರ್ ಲೋಕಲ್’ ಮತ್ತು ‘ಆತ್ಮನಿರ್ಭರ ಭಾರತ್’ ಅಭಿಯಾನಗಳು ಜನಪ್ರಿಯವಾಗಿದ್ದವು. ಮೈಕ್ರೋಮ್ಯಾಕ್ಸ್ ಕೂಡ ತನ್ನ ಭಾರತೀಯ ಬ್ರ್ಯಾಂಡ್ ಎಂಬ ಗುರುತನ್ನು ಮುಂದಿಟ್ಟುಕೊಂಡು ಗ್ರಾಹಕರ ಗಮನ ಸೆಳೆಯಲು ಪ್ರಯತ್ನಿಸಿತು.

ಆದರೆ ಅಷ್ಟರಲ್ಲಾಗಲೇ ಸ್ಮಾರ್ಟ್‌ಫೋನ್ ಮಾರುಕಟ್ಟೆ ಸಾಕಷ್ಟು ಬದಲಾಗಿತ್ತು. ಶಿಯೋಮಿ, ವಿವೋ, ಒಪ್ಪೋ, ಸ್ಯಾಮ್‌ಸಂಗ್ ಸೇರಿದಂತೆ ಹಲವು ಬ್ರ್ಯಾಂಡ್‌ಗಳು ಬಲವಾದ ಸಾಫ್ಟ್‌ವೇರ್, ಉತ್ತಮ ಹಾರ್ಡ್‌ವೇರ್ ಮತ್ತು ವ್ಯಾಪಕವಾದ ಸೇವಾ ಜಾಲವನ್ನು ನಿರ್ಮಿಸಿಕೊಂಡಿದ್ದವು.

ಹೀಗಾಗಿ ಮೈಕ್ರೋಮ್ಯಾಕ್ಸ್ ಪುನರಾಗಮನದ ಪ್ರಯತ್ನ ನಡೆಸಿದರೂ, ಹಿಂದಿನಂತೆ ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಸಾಧಿಸಲು ಸಾಧ್ಯವಾಗಲಿಲ್ಲ. ಒಂದು ಕಾಲದಲ್ಲಿ ಭಾರತದ ಮೊಬೈಲ್ ಮಾರುಕಟ್ಟೆಯನ್ನು ಆಳಿದ್ದ ಮೈಕ್ರೋಮ್ಯಾಕ್ಸ್‌ನ ಕಥೆ, ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಾರುಕಟ್ಟೆಯ ಬದಲಾವಣೆಗೆ ಸಮಯಕ್ಕೆ ಸರಿಯಾಗಿ ಹೊಂದಿಕೊಳ್ಳುವುದು ಎಷ್ಟು ಮುಖ್ಯ ಎಂಬುದಕ್ಕೆ ಉತ್ತಮ ಉದಾಹರಣೆಯಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ