ಪೆಟ್ರೋಲ್ ಬಂಕ್​ನಲ್ಲಿ ಈ ನಂಬರ್ ಗಮನಿಸಿದ್ದೀರಾ? ಇದಕ್ಕೂ ಮೈಲೇಜ್​ಗೂ ಏನು ಸಂಬಂಧ?

ಪೆಟ್ರೋಲ್ (Petrol) ಹಾಕಿಸಿಕೊಳ್ಳಲು ಬಂಕ್‌ಗೆ ಹೋದಾಗ ನಾವು ಸಾಮಾನ್ಯವಾಗಿ ಗಮನಿಸುವುದು ಮೀಟರ್‌ನಲ್ಲಿ ತೋರಿಸುವ ಮೊತ್ತ ಮತ್ತು ಲೀಟರ್‌ಗಳ ಪ್ರಮಾಣವನ್ನು ಮಾತ್ರ. ಆದರೆ ಪೆಟ್ರೋಲ್ ಬಂಕ್‌ನ ಯಂತ್ರದಲ್ಲಿ ಇವುಗಳ ಜೊತೆಗೆ ಇನ್ನೊಂದು ಸಂಖ್ಯೆ ಕೂಡ ಕಾಣಿಸುತ್ತದೆ. ಅದೇ ಪೆಟ್ರೋಲ್‌ನ ಸಾಂದ್ರತೆ. ಈ ಸಂಖ್ಯೆಯನ್ನು ಬಹುತೇಕರು ಗಮನಿಸುವುದಿಲ್ಲ. ಆದರೆ ಇಂಧನದ ಗುಣಮಟ್ಟದ ಬಗ್ಗೆ ತಿಳಿದುಕೊಳ್ಳಲು ಇದು ಉಪಯುಕ್ತ ಮಾಹಿತಿಯಾಗಿದೆ.

ಪೆಟ್ರೋಲ್‌ನ ಸಾಂದ್ರತೆ ಎಂದರೇನು?

ಸರಳವಾಗಿ ಹೇಳುವುದಾದರೆ, ನಿರ್ದಿಷ್ಟ ಪ್ರಮಾಣದ ಜಾಗದಲ್ಲಿ ಎಷ್ಟು ಇಂಧನದ ದ್ರವ್ಯರಾಶಿ ಇದೆ ಎಂಬುದನ್ನು ಸಾಂದ್ರತೆ ಸೂಚಿಸುತ್ತದೆ. ಪೆಟ್ರೋಲ್‌ನ ಸಾಂದ್ರತೆಯನ್ನು ಸಾಮಾನ್ಯವಾಗಿ ಕೆಜಿಗೆ ಘನ ಮೀಟರ್ (kg/m³) ಎಂಬ ಅಳತೆಯಲ್ಲಿ ತೋರಿಸಲಾಗುತ್ತದೆ. ಪೆಟ್ರೋಲ್ ಬಂಕ್‌ನ ಯಂತ್ರದಲ್ಲಿ ಬೆಲೆ ಮತ್ತು ಲೀಟರ್‌ಗಳ ಪ್ರಮಾಣದ ಜೊತೆಗೆ ಈ ಸಂಖ್ಯೆಯೂ ಕಾಣಿಸುತ್ತದೆ. ಪೆಟ್ರೋಲ್‌ನ ಸಾಂದ್ರತೆ ಸಾಮಾನ್ಯವಾಗಿ 730ರಿಂದ 770 ಕೆಜಿ/ಘನ ಮೀಟರ್ ವ್ಯಾಪ್ತಿಯಲ್ಲಿರಬೇಕು. ಡೀಸೆಲ್‌ಗೆ ಇದು 820ರಿಂದ 860 ಕೆಜಿ/ಘನ ಮೀಟರ್ ವ್ಯಾಪ್ತಿಯಲ್ಲಿರುತ್ತದೆ.

ಸಾಂದ್ರತೆಗೂ ಮೈಲೇಜ್‌ಗೂ ಏನು ಸಂಬಂಧ?

ಇಂಧನದ ಗುಣಮಟ್ಟ ವಾಹನದ ಕಾರ್ಯಕ್ಷಮತೆ ಮತ್ತು ಮೈಲೇಜ್ ಮೇಲೆ ಪರಿಣಾಮ ಬೀರಬಹುದು. ಗುಣಮಟ್ಟದಲ್ಲಿ ಸಮಸ್ಯೆಯಿರುವ ಅಥವಾ ಕಲಬೆರಕೆಯಾದ ಇಂಧನವನ್ನು ನಿರಂತರವಾಗಿ ಬಳಸಿದರೆ ವಾಹನದ ಮೈಲೇಜ್ ಕಡಿಮೆಯಾಗುವ ಸಾಧ್ಯತೆ ಇದೆ. ದೀರ್ಘಕಾಲ ಇಂತಹ ಇಂಧನ ಬಳಕೆಯಿಂದ ಎಂಜಿನ್, ಇಂಧನ ಇಂಜೆಕ್ಟರ್ ಮತ್ತು ಸ್ಪಾರ್ಕ್ ಪ್ಲಗ್‌ನಂತಹ ಭಾಗಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಆದರೆ ಒಂದು ವಿಷಯವನ್ನು ಗಮನದಲ್ಲಿಟ್ಟುಕೊಳ್ಳಬೇಕು. ಸಾಂದ್ರತೆಯ ಸಂಖ್ಯೆ ನಿಗದಿತ ವ್ಯಾಪ್ತಿಯಿಂದ ಹೊರಗಿದೆ ಎಂದರೆ ಅದನ್ನು ಮಾತ್ರ ಆಧರಿಸಿ ಇಂಧನ ಕಲಬೆರಕೆಯಾಗಿದೆ ಎಂದು ತಕ್ಷಣ ತೀರ್ಮಾನಿಸಬಾರದು. ಇಂಧನದ ಸಾಂದ್ರತೆಯ ಮೇಲೆ ತಾಪಮಾನವೂ ಪರಿಣಾಮ ಬೀರುತ್ತದೆ. ಆದ್ದರಿಂದ ಅನುಮಾನವಿದ್ದರೆ ಬಂಕ್‌ನಲ್ಲಿ ಲಭ್ಯವಿರುವ ಅಧಿಕೃತ ಪರೀಕ್ಷಾ ವಿಧಾನಗಳ ಮೂಲಕ ಪರಿಶೀಲಿಸುವುದು ಸೂಕ್ತ.

Tata Sierra Legend: ಟಾಟಾ ಸಿಯೆರಾ ಲೆಜೆಂಡ್ ಸರಣಿ ಬಿಡುಗಡೆ; ಬೆಲೆ 11.99 ಲಕ್ಷ, ಏನೆಲ್ಲ ಬದಲಾವಣೆ?

ಪೆಟ್ರೋಲ್ ಹಾಕಿಸುವಾಗ ಏನು ಗಮನಿಸಬೇಕು?

ಪೆಟ್ರೋಲ್ ಹಾಕಿಸುವ ಮೊದಲು ಯಂತ್ರದಲ್ಲಿ 0.00 ತೋರಿಸುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಲೀಟರ್‌ಗಳ ಪ್ರಮಾಣ ಮತ್ತು ಪ್ರತಿ ಲೀಟರ್‌ಗೆ ಇರುವ ಬೆಲೆಯೂ ಸರಿಯಾಗಿದೆಯೇ ಗಮನಿಸಿ. ಅನುಮಾನವಿದ್ದರೆ ರೂಪಾಯಿ ಮೊತ್ತದ ಬದಲು ನೇರವಾಗಿ 1, 2 ಅಥವಾ 5 ಲೀಟರ್‌ಗಳಂತೆ ಪೆಟ್ರೋಲ್ ಹಾಕಿಸಿಕೊಳ್ಳಬಹುದು.

ಇದಲ್ಲದೆ, ಬಂಕ್‌ನ ಯಂತ್ರದಲ್ಲಿ ಕಾಣಿಸುವ ಸಾಂದ್ರತೆಯ ಸಂಖ್ಯೆಯನ್ನೂ ಗಮನಿಸಬೇಕು. ಇಂಧನದ ಗುಣಮಟ್ಟದ ಬಗ್ಗೆ ಅನುಮಾನವಿದ್ದರೆ ಬಂಕ್ ಸಿಬ್ಬಂದಿಯಿಂದ ಫಿಲ್ಟರ್ ಪೇಪರ್ ಪರೀಕ್ಷೆ ಮಾಡಿಸಿಕೊಳ್ಳುವಂತೆ ಕೇಳಬಹುದು. ಪ್ರಮಾಣದ ಬಗ್ಗೆ ಅನುಮಾನವಿದ್ದರೆ ಬಂಕ್‌ನಲ್ಲಿ ಲಭ್ಯವಿರುವ ಪ್ರಮಾಣೀಕೃತ 5 ಲೀಟರ್ ಅಳತೆಯ ಪಾತ್ರೆಯ ಮೂಲಕ ಇಂಧನದ ಪ್ರಮಾಣ ಪರಿಶೀಲಿಸುವ ಅವಕಾಶವೂ ಗ್ರಾಹಕರಿಗೆ.

ಹೀಗಾಗಿ ಮುಂದಿನ ಬಾರಿ ಪೆಟ್ರೋಲ್ ಬಂಕ್‌ಗೆ ಹೋದಾಗ ಬೆಲೆ ಮತ್ತು ಲೀಟರ್‌ಗಳ ಪ್ರಮಾಣದ ಜೊತೆಗೆ ಯಂತ್ರದಲ್ಲಿ ಕಾಣಿಸುವ ಸಾಂದ್ರತೆಯ ಸಂಖ್ಯೆಯನ್ನೂ ಒಮ್ಮೆ ಗಮನಿಸಿ. ಇಂಧನದ ಗುಣಮಟ್ಟದ ಬಗ್ಗೆ ಅನುಮಾನ ಬಂದರೆ ಸೂಕ್ತ ಪರೀಕ್ಷೆ ಮಾಡಿಸಿಕೊಳ್ಳುವುದು ಹೆಚ್ಚು ಸುರಕ್ಷಿತ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ