‘ಸಲ್ಮಾನ್​ ಖಾನ್​ಗೆ ತಂಗಿ ಆಗಲು ಯಾರಿಗೂ ಇಷ್ಟವಿಲ್ಲ’; ತೆರೆ ಹಿಂದಿನ ಸತ್ಯ ತೆರೆದಿಟ್ಟ ನಟಿ ಸ್ವರಾ ಭಾಸ್ಕರ್​

ನಟ ಸಲ್ಮಾನ್​ ಖಾನ್​ (Salman Khan) ಅವರು ಬಾಲಿವುಡ್​ನಲ್ಲಿ ಬಹುಬೇಡಿಕೆಯ ಹೀರೋ ಆಗಿ ಮಿಂಚುತ್ತಿದ್ದಾರೆ. ನೂರಾರು ಕೋಟಿ ವೆಚ್ಚದಲ್ಲಿ ಅವರ ಸಿನಿಮಾಗಳು ತಯಾರಾಗುತ್ತವೆ. ಅವರ ಜೊತೆ ಒಮ್ಮೆಯಾದರೂ ನಟಿಸಬೇಕು ಎಂದು ಅನೇಕ ಕಲಾವಿದರು ಆಸೆಪಡುತ್ತಾರೆ. ಸಲ್ಲು ಜೊತೆ ತೆರೆ ಹಂಚಿಕೊಂಡ ನಟಿಯರಿಗೆ ಅಪಾರ ಜನಪ್ರಿಯತೆ ಸಿಗುತ್ತದೆ ಎಂಬುದನ್ನು ಹೊಸದಾಗಿ ಹೇಳಬೇಕಾದ್ದಿಲ್ಲ. ಆದರೆ ಸಲ್ಮಾನ್​ ಖಾನ್​ಗೆ ತಂಗಿಯಾಗಿ ಅಭಿನಯಿಸಲು ಬಾಲಿವುಡ್​ನ (Bollywood) ಬಹುತೇಕ ಎಲ್ಲ ನಟಿಯರು ಹಿಂದೇಟು ಹಾಕುತ್ತಾರೆ ಎಂಬ ವಿಷಯ ಈಗ ಬಯಲಾಗಿದೆ. ಇದು ಗಾಸಿಪ್​ ಅಲ್ಲವೇ ಅಲ್ಲ. ಬಾಲಿವುಡ್​ನ ಖ್ಯಾತ ನಟಿ ಸ್ವರಾ ಭಾಸ್ಕರ್ (Swara Bhasker)​ ಅವರು ಈ ವಿಚಾರ ಬಾಯಿ ಬಿಟ್ಟಿದ್ದಾರೆ. ಸಲ್ಮಾನ್​ ಖಾನ್​ ಅಭಿನಯದ ‘ಪ್ರೇಮ್​ ರತನ್​ ಧನ್​ ಪಾಯೋ’ ಸಿನಿಮಾದಲ್ಲಿ ಸ್ವರ ಭಾಸ್ಕರ್​ ಅವರು ಸಲ್ಮಾನ್​ ಖಾನ್​ ಜೊತೆ ಸಹೋದರಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆ ಸಂದರ್ಭದಲ್ಲಿ ಪರಿಸ್ಥಿತಿ ಹೇಗಿತ್ತು ಎಂಬುದನ್ನು ಅವರು ವಿವರಿಸಿದ್ದಾರೆ. ‘ಮಿಡ್-ಡೇ’ ನಡೆಸಿದ ಸಂದರ್ಶನದಲ್ಲಿ ಹಲವು ವಿಚಾರಗಳನ್ನು ಸ್ವರಾ ಭಾಸ್ಕರ್​ ಅವರು ಬಾಯಿ ಬಿಟ್ಟಿದ್ದಾರೆ. ಆ ಬಗ್ಗೆ ಇಲ್ಲಿದೆ ವಿವರ..

2009ರಲ್ಲಿ ಬಣ್ಣದ ಲೋಕಕ್ಕೆ ಕಾಲಿಟ್ಟ ಸ್ವರಾ ಭಾಸ್ಕರ್​ ಅವರು ಈವರೆಗೆ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ನಟನೆ ಮಾತ್ರವಲ್ಲದೇ ಹಲವು ಬಗೆಯ ಕಾಂಟ್ರವರ್ಸಿಗಳಿಂದಲೂ ಅವರು ಗಮನ ಸೆಳೆದಿದ್ದುಂಟು. ಸಿನಿಮಾಗಳ ಆಯ್ಕೆಯಲ್ಲಿ ಸ್ವರಾ ಭಾಸ್ಕರ್​ ಅವರಿಗೆ ಒಂದು ವಿಶೇಷ ಅನುಭವ ಆಗಿದೆ. ಬೇರೆ ನಟಿಯರು ರಿಜೆಕ್ಟ್​ ಮಾಡಿದ ಪಾತ್ರಗಳೇ ಸ್ವರಾ ಭಾಸ್ಕರ್​ ಅವರಿಗೆ ಹೆಚ್ಚಾಗಿ ಸಿಕ್ಕಿವೆ. ‘ಪ್ರೇಮ್​ ರತನ್​ ಧನ್​ ಪಾಯೋ’ ಚಿತ್ರದ ಪಾತ್ರ ಸಿಕ್ಕಿದ್ದು ಕೂಡ ಅದೇ ರೀತಿಯಲ್ಲಿ.

‘ಸಲ್ಮಾನ್​ ಖಾನ್​ಗೆ ತಂಗಿಯಾಗಿ ನಟಿಸಲು ಯಾವ ನಟಿ ಕೂಡ ಮುಂದೆ ಬಂದಿರಲಿಲ್ಲ. ಹಾಗಾಗಿ ಚಿತ್ರತಂಡದವರು ನನ್ನನ್ನು ಸಂಪರ್ಕಿಸಿದರು. ನಾನು ಒಪ್ಪಿಕೊಂಡೆ. ಬೇರೆ ನಟಿಯರು ರಿಜೆಕ್ಟ್​ ಮಾಡಿದ ಪಾತ್ರಗಳಿಂದಲೇ ನನಗೆ ಸಿನಿಮಾ ಅವಕಾಶಗಳು ಸಿಕ್ಕವು ಅಂತ ನಾನು ಯಾವಾಗಲೂ ತಮಾಷೆ ಮಾಡುತ್ತ ಇರುತ್ತೇನೆ. ‘ರಾಂಜಾಣಾ’ ಸಿನಿಮಾದಲ್ಲಿ ಅಭಿನಯಿಸಬೇಕಾಗಿದ್ದ ನಟಿ ಕೊನೇ ಕ್ಷಣದಲ್ಲಿ ಬಿಟ್ಟು ಹೋಗಿದ್ದರಿಂದ ಆ ಚಿತ್ರದಲ್ಲಿ ನಟಿಸುವ ಅವಕಾಶ ನನಗೆ ಸಿಕ್ಕಿತು’ ಎಂದು ಸ್ವರಾ ಭಾಸ್ಕರ್​ ಹೇಳಿದ್ದಾರೆ.

ಹೀರೋಯಿನ್​ ಆಗಿ ನಟಿಸುವ ಅವಕಾಶ ಸ್ವರಾ ಭಾಸ್ಕರ್​ ಅವರಿಗೆ ಸಿಕ್ಕಿದ್ದು ಕಡಿಮೆ. ಆದರೆ ತಮ್ಮ ಪಾಲಿಗೆ ಬಂದ ಎಲ್ಲ ಪಾತ್ರಗಳನ್ನು ಅವರು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ. ತನು ವೆಡ್ಸ್​ ಮನು, ಚಿಲ್ಲರ್​ ಪಾರ್ಟಿ, ತನು ವೆಡ್ಸ್​ ಮನು ರಿಟರ್ನ್ಸ್​, ವೀರೇ ದಿ ವೆಡ್ಡಿಂಗ್​, ಅನಾರ್ಕಲಿ ಆಫ್​ ಆರಾಹ್​ ಮುಂತಾದ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಸ್ವರಾ ಭಾಸ್ಕರ್​ ಗಮನ ಸೆಳೆದಿದ್ದಾರೆ. ಕಿರುತೆರೆ ಮತ್ತು ವೆಬ್​ ಸಿರೀಸ್​ಗಳಲ್ಲೂ ಅವರು ನಟಿಸಿದ್ದಾರೆ. ನಿರೂಪಕಿ ಆಗಿಯೂ ಜನರನ್ನು ರಂಜಿಸಿದ್ದಾರೆ.

ಸ್ವರಾ ಭಾಸ್ಕರ್ ಕೈಯಲ್ಲಿ ಈಗ ಕೆಲವು ಆಫರ್​ಗಳಿವೆ. ಲಾಕ್​ಡೌನ್​ ಶುರುವಾದ ಬಳಿಕ ಅವರ ಸಿನಿಮಾಗಳ ಸಂಖ್ಯೆ ತಗ್ಗಿದೆ. ಮೂಲತಃ ದೆಹಲಿಯವರಾದ ಅವರು ಹಿಂದಿ ಚಿತ್ರರಂಗದಲ್ಲಿ ತಮ್ಮ ಛಾಪು ಮೂಡಿಸಿದ್ದಾರೆ. ಸಮಾಜದಲ್ಲಿ ಯಾವುದೇ ಘಟನೆಗಳು ನಡೆದಾಗ ಸ್ವರಾ ಭಾಸ್ಕರ್​ ಅವರು ತಮ್ಮ ಅನಿಸಿಕೆಯನ್ನು ನೇರವಾಗಿ ಹಂಚಿಕೊಳ್ಳುತ್ತಾರೆ. ಆ ಕಾರಣದಿಂದ ಅನೇಕ ಬಾರಿ ಅವರು ವಿವಾದಗಳನ್ನು ಮೈಮೇಲೆ ಎಳೆದುಕೊಂಡಿದ್ದು ಕೂಡ ಇದೆ.

ಇದನ್ನೂ ಓದಿ:

ಗಂಡ-ಹೆಂಡತಿ ವೇಷದಲ್ಲಿ ಸೋನಾಕ್ಷಿ-ಸಲ್ಮಾನ್​ ಖಾನ್​; ನಕಲಿ ಫೋಟೋ ನೋಡಿ ಯಾಮಾರಿದ ನೆಟ್ಟಿಗರು​

‘ನನ್ನ ಹೆಸರು ಸಲ್ಮಾನ್​ ಖಾನ್​’: ವಿದೇಶದಲ್ಲಿ ವಿನಯದಿಂದ​ ಪರಿಚಯ ಹೇಳಿಕೊಂಡ ಸಲ್ಲು; ವಿಡಿಯೋ ವೈರಲ್