ವಿಜಯ್ ದೇವರಕೊಂಡ ಅವರನ್ನು ಪವನ್ ಕಲ್ಯಾಣ್​​ಗೆ ಹೋಲಿಸಿದ ನಿರ್ದೇಶಕ

ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಒಟ್ಟಿಗೆ ನಟನೆ ಮಾಡಿರುವ ‘ರಣಬಾಲಿ’ ಸಿನಿಮಾ ಇನ್ನೆರಡು ದಿನಗಳಲ್ಲಿ ರಿಲೀಸ್ ಆಗಲಿದೆ. ಸಿನಿಮಾದ ಅದ್ಧೂರಿ ಪ್ರೀ ರಿಲೀಸ್ ಕಾರ್ಯಕ್ರಮವನ್ನು ನಿನ್ನೆ (ಅಕ್ಟೋಬರ್ 13) ಆಯೋಜನೆ ಮಾಡಲಾಗಿತ್ತು. ಕಾರ್ಯಕ್ರಮದಲ್ಲಿ ಸಿನಿಮಾದ ಮುಖ್ಯ ನಟ-ನಟಿಯರು, ತಂತ್ರಜ್ಞರ ಜೊತೆಗೆ ತೆಲುಗು ಚಿತ್ರರಂಗದ ಹಲವು ಯುವ ನಿರ್ದೇಶಕರುಗಳು ಅತಿಥಿಗಳಾಗಿ ಭಾಗವಹಿಸಿದ್ದರು. ಅವರಲ್ಲಿ ‘ಉಪ್ಪೆನ’, ‘ಪೆದ್ದಿ’ ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ಬುಚ್ಚಿಬಾಬು ಸನಾ ಸಹ ಅತಿಥಿಯಾಗಿ ಭಾಗಿ ಆಗಿದ್ದರು. ಪ್ರೇಕ್ಷಕರನ್ನುದ್ದೇಶಿಸಿ ಮಾತನಾಡಿದ ಬುಚ್ಚಿಬಾಬು, ವಿಜಯ್ ದೇವರಕೊಂಡ ಅವರನ್ನು ಪವನ್ ಕಲ್ಯಾಣ್​ಗೆ ಹೋಲಿಕೆ ಮಾಡಿದ್ದಾರೆ.

ಕಾರ್ಯಕ್ರಮದಲ್ಲಿ ಮಾತನಾಡಿದ ಬುಚ್ಚಿಬಾಬು ಸನಾ, ವಿಜಯ್ ಮತ್ತು ರಶ್ಮಿಕಾ ಒಟ್ಟಿಗೆ ನಟನೆ ಮಾಡಿದ್ದು, ‘ಗೀತಾ ಗೋವಿಂದಂ’ ಸಿನಿಮಾದ ದಿನಗಳನ್ನು ನೆನಪು ಮಾಡಿಕೊಂಡರು. ‘ಗೀತಾ ಗೋವಿಂದಂ’ ಸಿನಿಮಾಕ್ಕಾಗಿ ನಾವು ಕಾಲೇಜೊಂದರಲ್ಲಿ ಚಿತ್ರೀಕರಣ ಮಾಡುತ್ತಿದ್ದೆವು. ಅಲ್ಲಿ ವಿಜಯ್ ಅವರನ್ನು ನೋಡಲು ಕಾಲೇಜಿನ ಹೆಣ್ಣು ಮಕ್ಕಳು ಮುಗಿಬೀಳುತ್ತಿದ್ದರು. ಪರಿಸ್ಥಿತಿ ಯಾವ ಮಟ್ಟಕ್ಕೆ ಹೋಯ್ತೆಂದರೆ ಕಾಲೇಜಿನ ಆಡಳಿತ ಮಂಡಳಿಯವರು ವಿದ್ಯಾರ್ಥಿಗಳನ್ನು ಕೊಠಡಿಗಳಲ್ಲಿ ಲಾಕ ಮಾಡಬೇಕಾದ ಪರಿಸ್ಥಿತಿ ಉಂಟಾಯ್ತು’ ಎಂದರು ಬುಚ್ಚಿಬಾಬು.

‘ಅಂದು ಅವರಿಗಿದ್ದ ಕ್ರೇಜ್ ನೋಡಿ ನನಗೆ ಶಾಕ್ ಆಗಿತ್ತು. ಪವನ್ ಕಲ್ಯಾಣ್ ಅವರಿಗೆ ಇರುವ ಕ್ರೇಜ್​​ಗೆ ಸಮನಾದ ಕ್ರೇಜ್ ವಿಜಯ್ ದೇವರಕೊಂಡಗೆ ಇದೆ’ ಎಂದು ಬುಚ್ಚಿಬಾಬು ಸನಾ ಹೇಳಿದ್ದಾರೆ. ಬುಚ್ಚಿಬಾಬು ಅವರ ಈ ಹೋಲಿಕೆ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಪವನ್ ಅಭಿಮಾನಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಪವನ್ ಅವರಿಗೆ ವಿಜಯ್ ದೇವಕರೊಂಡ ಅವರನ್ನು ಹೋಲಿಕೆ ಮಾಡಿರುವ ಬಗ್ಗೆ ಕೆಲವರು ಸಿಟ್ಟು ಹೊರಹಾಕಿದ್ದಾರೆ. ಬುಚ್ಚಿಬಾಬು ಹೇಳಿಕೆ ಬಗ್ಗೆ ಹಲವು ಮೀಮ್​​ಗಳು ಸಹ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.

ಇದನ್ನೂ ಓದಿ:Rashmika Mandanna: ತಿರುಪತಿ ಸನ್ನಿಧಿಗೆ ‘ರಣಬಾಲಿ’ ಲುಕ್​​ನಲ್ಲೇ ಬಂದ ವಿಜಯ್ ದೇವರಕೊಂಡ-ರಶ್ಮಿಕಾ

ಭಾರತೀಯ ಚಿತ್ರರಂಗದಲ್ಲಿ ಅತಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ನಟರಲ್ಲಿ ಪವನ್ ಕಲ್ಯಾಣ್ ಸಹ ಒಬ್ಬರು. ಅವರ ಕೆಟ್ಟ ಸಿನಿಮಾಗಳಿಗೂ ಸಹ ಮೊದಲ ಕೆಲ ದಿನ ಆಂಧ್ರ-ತೆಲಂಗಾಣಗಳಲ್ಲಿ ಹೌಸ್​​ಫುಲ್ ಖಾತ್ರಿ. ವಿಜಯ್ ದೇವರಕೊಂಡ ಅವರು ಒಂದೇ ಒಂದು ಹಿಟ್ ಸಿನಿಮಾ ನೀಡಲು ಕಳೆದ ಎಂಟು ವರ್ಷಗಳಿಂದಲೂ ಪ್ರಯತ್ನಿಸುತ್ತಿದ್ದಾರೆ ಆದರೆ ಸಾಧ್ಯವಾಗುತ್ತಿಲ್ಲ.

ಇದೀಗ ವಿಜಯ್ ದೇವಕರೊಂಡ ಹಾಗೂ ರಶ್ಮಿಕಾ ಒಟ್ಟಿಗೆ ನಟನೆ ಮಾಡಿರುವ ‘ರಣಬಾಲಿ‘ ಸಿನಿಮಾ ಅಕ್ಟೋಬರ್ 16ಕ್ಕೆ ರಿಲೀಸ್ ಆಗುತ್ತಿದೆ. ಸಿನಿಮಾ ಅನ್ನು ರಾಹುಲ್ ಸಾಂಕೃತ್ಯಾಯನ ನಿರ್ದೇಶನ ಮಾಡಿದ್ದಾರೆ. ಸಿನಿಮಾನಲ್ಲಿ ಹಾಲಿವುಡ್ ನಟ ಅರ್ನಾಲ್ಡ್ ವೋಸ್ಲೊ ವಿಲನ್ ಆಗಿ ನಟನೆ ಮಾಡಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ