‘ಕೆಜಿಎಫ್​’ ಗೆದ್ದಾಗಲೂ ಸೌತ್ ಸಿನಿಮಾ ಬಗ್ಗೆ ಹಗುರವಾಗಿ ಮಾತನಾಡಿದ್ದ ಅರ್ಷದ್​ ವಾರ್ಸಿ

ಬಾಲಿವುಡ್​ ನಟ ಅರ್ಷದ್​ ವಾರ್ಸಿ ಅವರು ಅನಗತ್ಯವಾಗಿ ವಿವಾದ ಮೈಮೇಲೆ ಎಳೆದುಕೊಂಡಿದ್ದಾರೆ. ‘ಪ್ರಭಾಸ್​ ಅವರು ಕಲ್ಕಿ 2898 ಎಡಿ ಸಿನಿಮಾದಲ್ಲಿ ಜೋಕರ್​ ರೀತಿ ಕಾಣ್ತಾರೆ’ ಎಂದು ಹೇಳಿಕೆ ನೀಡಿದ ಅರ್ಷದ್​ ವಾರ್ಸಿ ವಿರುದ್ಧ ಸೌತ್​ ಸಿನಿಮ ಮಂದಿ ಗರಂ ಆಗಿದ್ದಾರೆ. ಇಷ್ಟು ವರಟಾಗಿ ಅರ್ಷದ್ ವಾರ್ಸಿ ಮಾತನಾಡಬಾರದಿತ್ತು ಎಂಬುದು ಎಲ್ಲರ ಅಭಿಪ್ರಾಯ. ಈಗ ಅರ್ಷದ್​ ವಾರ್ಸಿ ಅವರ ಬಗ್ಗೆ ಸೋಶಿಯಲ್​ ಮೀಡಿಯಾದಲ್ಲಿ ಚರ್ಚೆ ಹೆಚ್ಚಾಗಿದೆ. ಅವರ ಹಳೇ ವಿಡಿಯೋಗಳನ್ನು ಕೂಡ ಹುಡುಕಿ ತಂದು ವೈರಲ್​ ಮಾಡಲಾಗುತ್ತಿದೆ. ‘ಕೆಜಿಎಫ್’ ಸಿನಿಮಾ ಗೆದ್ದಾಗಲೂ ಅರ್ಷದ್​ ವಾರ್ಸಿ ಅವರು ದಕ್ಷಿಣ ಭಾರತದ ಸಿನಿಮಾ ಕುರಿತು ಹಗುರಾಗಿ ಮಾತನಾಡಿದ್ದರು.

ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅರ್ಷದ್​ ವಾರ್ಸಿ ಅವರಿಗೆ ‘ಕೆಜಿಎಫ್​’ ಸಿನಿಮಾದ ಕ್ರೇಜ್​ ಬಗ್ಗೆ ಪ್ರಶ್ನೆ ಕೇಳಲಾಗಿತ್ತು. ಆಗ ಅವರು ಇಡೀ ದಕ್ಷಿಣ ಭಾರತದ ಸಿನಿಮಾಗಳನ್ನು ಒಂದೇ ತಕ್ಕಡಿಯಲ್ಲಿ ಇಟ್ಟು, ಇಂಥ ಸಿನಿಮಾಗಳಲ್ಲಿ ಬುದ್ಧಿವಂತಿಕೆ ಏನೂ ಇರುವುದಿಲ್ಲ ಎಂದು ಹೇಳಿಕೆ ನೀಡಿದ್ದರು. ಆ ವಿಡಿಯೋ ಈಗ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗಿದೆ.

All my servants watch Hindi dubbed south movies. You don’t need much brain to watch them. – Arshad Warsi byu/raaz9658 inBollyBlindsNGossip

‘ನಮ್ಮ ಮನೆಯಲ್ಲಿ ಕೆಲಸ ಮಾಡುವ ಎಲ್ಲರೂ ಕೂಡ ಹಿಂದಿಗೆ ಡಬ್​ ಆಗಿರುವ ದಕ್ಷಿಣ ಭಾರತದ ಸಿನಿಮಾಗಳನ್ನು ನೋಡುತ್ತಾರೆ. ಅವು ಸಖತ್​ ಮನರಂಜನೆ ನೀಡುತ್ತವೆ. ರಜನಿಕಾಂತ್​ ಅವರು ಅಷ್ಟು ದೊಡ್ಡ ಸ್ಟಾರ್​ ಆಗಿದ್ದಾರೆ ಎಂದರೆ ಏನೋ ಕಾರಣ ಇರಲೇಬೇಕು. ಹೆಚ್ಚು ಯೋಚಿಸುವ ಅಗತ್ಯ ಇಲ್ಲ. ಬುದ್ಧಿ ಉಪಯೋಗಿಸಬೇಕಿಲ್ಲ. ವಾಹನಗಳು ಹಾರುತ್ತವೆ, ಜನಗಳು ಹಾರುತ್ತಾರೆ. ನೀವು ನೋಡುತ್ತಾ ಇರಿ. ಪಾಪ್​ ಕಾರ್ನ್​ ತಿಂದು, ಸಿನಿಮಾ ನೋಡಿ ಮನೆಗೆ ಹೋಗಿ’ ಎಂದಿದ್ದರು ಅರ್ಷದ್​ ವಾರ್ಸಿ.

ಇದನ್ನೂ ಓದಿ: ದುಡಿದ ಹಣ ಕಳೆದುಕೊಂಡೆವು, ನೀವು ಜಾಗೃತೆ: ಬಾಲಿವುಡ್ ನಟ ಅರ್ಷದ್ ವಾರ್ಸಿ

ಅರ್ಷದ್​ ವಾರ್ಸಿ ಅವರ ಈ ಹೇಳಿಕೆ ಕೂಡ ವಿವಾದಕ್ಕೆ ಕಾರಣ ಆಗಿದೆ. ‘ಓಹ್.. ಬಾಲಿವುಡ್​ ನಿರ್ದೇಶಕ ರೋಹಿತ್​ ಶೆಟ್ಟಿಯ ಸಿನಿಮಾಗಳ ಬಗ್ಗೆ ಅರ್ಷದ್ ಹೇಳುತ್ತಿರುಬಹುದು’ ಎಂದು ಕೆಲವರು ವ್ಯಂಗ್ಯವಾಡಿದ್ದಾರೆ. ‘ಇಂಥ ಹೇಳಿಕೆಗಳಿಂದ ನಿಮ್ಮ ಮೇಲಿರುವ ಗೌರವ ಕಡಿಮೆ ಆಗುತ್ತಿದೆ’ ಎಂದು ಕೂಡ ಜನರು ಕಮೆಂಟ್​ ಮಾಡಿದ್ದಾರೆ. ಒಟ್ಟಾರೆಯಾಗಿ ಅರ್ಷದ್​ ವಾರ್ಸಿ ಅವರ ಮಾತುಗಳಿಂದ ಸೌತ್​ ವರ್ಸಸ್​ ಬಾಲಿವುಡ್ ಎಂಬ ಚರ್ಚೆ ಮತ್ತೆ ಜೀವ ಪಡೆದುಕೊಂಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 3:06 pm, Sun, 25 August 24