ಭಾನುವಾರ ‘ಟಾಕ್ಸಿಕ್’ ಸಿನಿಮಾ ಗಳಿಕೆ ಮಾಡಿದ್ದೆಷ್ಟು? ಇಲ್ಲಿದೆ ಸಂಪೂರ್ಣ ವಿವರ

ಯಶ್ ನಟನೆಯ ‘ಟಾಕ್ಸಿಕ್’ ಸಿನಿಮಾ (Toxic Movie) ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಮುಂದುವರಿಸಿದ್ದು, 5ನೇ ದಿನದ ಗಳಿಕೆಯ ವಿವರಗಳು ಹೊರಬಿದ್ದಿವೆ. ಐದನೇ ದಿನವಾದ ಭಾನುವಾರ 16,241 ಶೋಗಳಿಂದ ಸಿನಿಮಾ ದೇಶಾದ್ಯಂತ 23.00 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ. ದಿನಗಳು ಕಳೆದಂತೆ ಕಲೆಕ್ಷನ್​​ನಲ್ಲಿ ಇಳಿಕೆ ಕಂಡುಬಂದಿದೆ. ಅನೇಕರು ಕೊಟ್ಟ ನೆಗೆಟಿವ್ ವಿಮರ್ಶೆಯೇ ಇದಕ್ಕೆ ಕಾರಣ ಎಂದು ಬಾಕ್ಸ್ ಆಫೀಸ್ ಪಂಡಿತರು ಅಭಿಪ್ರಾಯಪಟ್ಟಿದ್ದಾರೆ.

ಭಾರತದಲ್ಲಿ ‘ಟಾಕ್ಸಿಕ್’ ಸಿನಿಮಾದ ಗ್ರಾಸ್ ಕಲೆಕ್ಷನ್ 255.95 ಕೋಟಿಗೆ ತಲುಪಿದ್ದು, ನೆಟ್ ಕಲೆಕ್ಷನ್ 214.10 ಕೋಟಿ ರೂಪಾಯಿಯಷ್ಟಾಗಿದೆ. ವಿದೇಶದಲ್ಲೂ ಸಿನಿಮಾ ಸಾಧಾರಣ ಗಳಿಕೆ ಕಾಣುತ್ತಿದ್ದು, 5ನೇ ದಿನ 2.00 ಕೋಟಿ ರೂಪಾಯಿ ಬಾಚಿಕೊಂಡಿದ್ದು, ಈ ಮೂಲಕ ಒಟ್ಟು ವಿದೇಶಿ ಗಳಿಕೆ 29.25 ಕೋಟಿ ರೂಪಾಯಿಗೆ ಏರಿಸಿಕೊಂಡಿದೆ. ಹೀಗಾಗಿ ‘ಟಾಕ್ಸಿಕ್’ ಜಾಗತಿಕವಾಗಿ ಬರೋಬ್ಬರಿ 285.20 ಕೋಟಿ ಕಲೆಕ್ಷನ್ ಮಾಡಿದೆ.

ದಿನ ಕಳೆದಂತೆ ಕಲೆಕ್ಷನ್ ಹಾಗೂ ಥಿಯೇಟರ್‌ಗಳಲ್ಲಿ ಆಕ್ಯುಪೆನ್ಸಿ ಕ್ರಮೇಣ ಕುಗ್ಗುತ್ತಿರೋದು ಚಿತ್ರತಂಡ ಹಾಗೂ ಅಭಿಮಾನಿಗಳಲ್ಲಿ ತೀವ್ರ ಆತಂಕ ಮೂಡಿಸಿದೆ. ಮೊದಲ ದಿನ ಬುಧವಾರ 101.10 ಕೋಟಿ ರೂಪಾಯಿ ಗಳಿಸಿ ಬೃಹತ್ ಆರಂಭ ಪಡೆದಿದ್ದ ಚಿತ್ರ, 2ನೇ ದಿನ 37.65 ಕೋಟಿ ರೂಪಾಯಿ(26.6% ಆಕ್ಯುಪೆನ್ಸಿ), 3ನೇ ದಿನ 27.20 ಕೋಟಿ ರೂಪಾಯಿ (25.5%), 4ನೇ ದಿನ 25.15 ಕೋಟಿ ರೂಪಾಯಿ (24.3%) ಹಾಗೂ 5ನೇ ದಿನ 23.00 ಕೋಟಿ ರೂಪಾಯಿ (25.3%) ಗಳಿಸಿದೆ. ಆರಂಭಿಕ ದಿನಕ್ಕೆ ಹೋಲಿಸಿದರೆ ಗಳಿಕೆಯಲ್ಲಿ ಭಾರೀ ಇಳಿಕೆ ಕಂಡುಬಂದಿದೆ.

ಇದನ್ನೂ ಓದಿ: ‘ಅವರಿಗೆಲ್ಲ ಮೆಂಟಲ್ ಪ್ರಾಬ್ಲಂ’: ಟಾಕ್ಸಿಕ್ ಟ್ರೋಲ್ ಮಾಡಿದವರ ಮೇಲೆ ಯಶ್ ತಾಯಿ ಗರಂ

ಐದನೇ ದಿನದ ಭಾಷಾವಾರು ಗಳಿಕೆಯನ್ನು ಗಮನಿಸಿದರೆ, ಹಿಂದಿ ಆವೃತ್ತಿಯು 11,734 ಶೋಗಳಿಂದ ₹14.50 ಕೋಟಿ ರೂಪಾಯಿ ಗಳಿಸಿ ಅಗ್ರಸ್ಥಾನದಲ್ಲಿದೆ. ಮೂಲ ಭಾಷೆಯಾದ ಕನ್ನಡದಲ್ಲಿ 1,297 ಶೋಗಳಿದ್ದರೂ ಶೇ. 50.0 ರಷ್ಟು ಉತ್ತಮ ಆಕ್ಯುಪೆನ್ಸಿಯೊಂದಿಗೆ 6.40 ಕೋಟಿ ರೂಪಾಯಿ ಹರಿದುಬಂದಿದೆ. ಉಳಿದಂತೆ ತೆಲುಗಿನಲ್ಲಿ 1.40 ಕೋಟಿ ರೂಪಾಯಿ, ತಮಿಳಿನಲ್ಲಿ 60 ಲಕ್ಷ ರೂಪಾಯಿ ಮತ್ತು ಮಲಯಾಳಂ ಆವೃತ್ತಿಯಲ್ಲಿ 10 ಲಕ್ಷ ರೂಪಾಯಿ ಗಳಿಕೆ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.