ಟಾಸ್ಕ್ನಲ್ಲಿ ತಪ್ಪು ಮಾಡಿದ್ದಕ್ಕೆ ಧನರಾಜ್ ಎಲಿಮಿನೇಟ್ ಆದ್ರಾ? ಸುದೀಪ್ ಹೇಳಿದ ಕಾರಣ ಬೇರೆ
ಬಿಗ್ ಬಾಸ್ ಟ್ರೋಫಿ ಗೆಲ್ಲುವ ಆಸೆ ಹೊಂದಿದ್ದ ಧನರಾಜ್ ಅವರು ಕೊನೇ ಹಂತದಲ್ಲಿ ಎಲಿಮಿನೇಟ್ ಆದರು. ಬಿಗ್ ಬಾಸ್ ಮನೆಯಿಂದ ಹೊರಬಂದ ಬಳಿಕ ಅವರು ಟಿವಿ9 ಜೊತೆ ಮಾತನಾಡಿ ಸಾಕಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ತಮ್ಮ ಎಲಿಮಿನೇಷನ್ಗೆ ಪ್ರಮುಖ ಕಾರಣ ಏನಾಗಿರಬಹುದು ಎಂಬ ಕುರಿತು ಅವರು ವಿಶ್ಲೇಷಣೆ ಮಾಡಿದ್ದಾರೆ.
Updated on: Jan 20, 2025 | 9:12 PM
ಸೋಶಿಯಲ್ ಮೀಡಿಯಾದಲ್ಲಿ ಕಾಮಿಡಿ ವಿಡಿಯೋಗಳ ಮೂಲಕ ಫೇಮಸ್ ಆದವರು ಧನರಾಜ್ ಆಚಾರ್. ‘ಬಿಗ್ ಬಾಸ್ ಕನ್ನಡ ಸೀಸನ್ 11’ ಶೋನಲ್ಲಿ ಅವರು ಗಮನಾರ್ಹವಾಗಿ ಪೈಪೋಟಿ ನೀಡಿದರು. ನೂರಾರು ದಿನಗಳ ಕಾಲ ಎಲ್ಲರಿಗೂ ಪೈಪೋಟಿ ನೀಡಿ ಫಿನಾಲೆಯ ಸಮೀಪಕ್ಕೆ ಬಂದಿದ್ದರು. ಆದರೆ ಫಿನಾಲೆ ಪ್ರವೇಶಿಸಲು ಅವರಿಗೆ ಸಾಧ್ಯವಾಗಲಿಲ್ಲ. ಅದಕ್ಕೆ ಕಾರಣ ಏನು ಇರಬಹುದು? ಈ ಬಗ್ಗೆ ಸಾಕಷ್ಟು ಚರ್ಚೆ ಆಗಿದೆ. ಅದಕ್ಕೆ ಈಗ ಸ್ವತಃ ಧನರಾಜ್ ಅವರು ಪ್ರತಿಕ್ರಿಯೆ ನೀಡಿದ್ದಾರೆ.
ಧನರಾಜ್ ಅವರು ಕಳೆದ ವಾರ ಟಾಸ್ಕ್ ಆಡುವಾಗ ಗ್ರೇ ಏರಿಯಾ ಹುಡುಕಿಕೊಂಡಿದ್ದರು. ಆ ಮೂಲಕ ಅವರು ಎಲ್ಲರಿಗಿಂತ ಹೆಚ್ಚು ಅಂಕ ಗಳಿಸಿದ್ದರು. ಆದರೆ ಅದನ್ನು ಬಿಗ್ ಬಾಸ್ ಖಂಡಿಸಿದರು. ಹಾಗಾಗಿ ಅವರ ಅಂಕಗಳನ್ನು ರದ್ದು ಮಾಡಲಾಯಿತು. ಇಮ್ಯುನಿಟಿ ಹಿಂಪಡೆಯಲಾಯಿತು. ಈ ಕಾರಣದಿಂದಲೇ ತಮ್ಮನ್ನು ಎಲಿಮಿನೇಟ್ ಮಾಡಿರಬಹುದು ಎಂಬ ಅನುಮಾನ ಸ್ವತಃ ಧನರಾಜ್ ಅವರಿಗೂ ಇತ್ತು.
ಆದರೆ ಗ್ರೇ ಏರಿಯಾದ ಕಾರಣವನ್ನು ನೀಡಿ ಧನರಾಜ್ ಅವರನ್ನು ಎಲಿಮಿನೇಟ್ ಮಾಡಿಲ್ಲ. ಎಲಿಮಿನೇಷನ್ಗೆ ನಿಜವಾದ ಕಾರಣ ಏನು ಎಂಬುದನ್ನು ತಮಗೆ ಸುದೀಪ್ ವಿವರಿಸಿದರು ಎಂದು ಧನರಾಜ್ ಹೇಳಿದ್ದಾರೆ. ‘ಇಡೀ ಸೀಸನ್ನ ಇಷ್ಟು ವಾರಗಳ ಆಟವನ್ನು ಪರಿಗಣಿಸಿ, ವೋಟಿಂಗ್ನಲ್ಲಿ ಈ ರೀತಿ ಆಗಿದೆ ಅಂತ ಸುದೀಪ್ ಸರ್ ನನಗೆ ಹೇಳಿದರು’ ಎಂದಿದ್ದಾರೆ ಧನರಾಜ್.
ಇದನ್ನೂ ಓದಿ: ಬಿಗ್ ಬಾಸ್ನಿಂದ ಧನರಾಜ್ಗೆ ಎಷ್ಟು ಹಣ ಸಿಕ್ತು? ಸುತ್ತಿ ಬಳಸಿ ಉತ್ತರಿಸಿದ ದೋಸ್ತ
ಬಿಗ್ ಬಾಸ್ ಮನೆಗೆ ಧನರಾಜ್ ಅವರ ಇಡೀ ಕುಟುಂಬ ಬಂದಿತ್ತು. 33 ಮಂದಿ ಬಂದು ಧನರಾಜ್ಗೆ ಹುಮ್ಮಸ್ಸು ತುಂಬಿದ್ದರು. ಆ ಕ್ಷಣವನ್ನು ಕೊನೆ ತನಕ ನೆನಪು ಇಟ್ಟುಕೊಳ್ಳುವುದಾಗಿ ಧನರಾಜ್ ಹೇಳಿದ್ದಾರೆ. ಈಗ ಫಿನಾಲೆ ವಾರದಲ್ಲಿ ರಜತ್, ತ್ರಿವಿಕಮ್, ಮೋಕ್ಷಿತಾ ಪೈ, ಉಗ್ರಂ ಮಂಜು, ಹನುಮಂತ ಹಾಗೂ ಭವ್ಯಾ ಗೌಡ ಅವರು ಸ್ಪರ್ಧಿಗಳಾಗಿದ್ದಾರೆ. ಅಂತಿಮವಾಗಿ ಯಾರು ಗೆಲ್ಲುತ್ತಾರೆ ಎಂಬ ಪ್ರಶ್ನೆ ಕಾಡುತ್ತಿದೆ. ‘ನನ್ನ ದೋಸ್ತ ಹನುಮಂತ ಗೆಲ್ಲಬೇಕು. ಅವನೇ ಗೆಲ್ಲುತ್ತಾನೆ’ ಎಂದು ಧನರಾಜ್ ಅವರು ಹೇಳಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
