ಸ್ಕಿನ್ ಗ್ಲೋ ಆಗಿ ಕಾಣಲು ಮೊದಲು ನಿದ್ರೆ ಸರಿಯಾಗಿ ಮಾಡಿ! ಚರ್ಮದ ಆರೋಗ್ಯಕ್ಕೆ ಎಷ್ಟು ಗಂಟೆ ನಿದ್ರೆ ಮಾಡ್ಬೇಕು ಗೊತ್ತಾ?

ಮುಖದಲ್ಲಿ ಗ್ಲೋ ಬರಬೇಕು, ಕಪ್ಪು ಕಲೆಗಳು ಕಡಿಮೆಯಾಗಬೇಕು, ಚರ್ಮ ಆರೋಗ್ಯಕರವಾಗಿ ಕಾಣಬೇಕು ಎಂದು ಹಲವರು ದುಬಾರಿ ಸ್ಕಿನ್ ಕೇರ್ ಉತ್ಪನ್ನಗಳನ್ನು ಬಳಸುತ್ತಾರೆ. ಆದರೆ ಚರ್ಮದ ಆರೋಗ್ಯಕ್ಕೆ ಹೊರಗಿನಿಂದ ಮಾಡುವ ಆರೈಕೆಯಷ್ಟೇ ಅಲ್ಲ, ಒಳಗಿನಿಂದ ಸಿಗುವ ವಿಶ್ರಾಂತಿಯೂ ಮುಖ್ಯ. ಪ್ರತಿದಿನ ಸಾಕಷ್ಟು ನಿದ್ರೆ ಮಾಡುವುದು ಚರ್ಮದ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡಬಹುದು. ನಿದ್ರೆಯ ಕೊರತೆ ಕೇವಲ ದಣಿವು, ಕಿರಿಕಿರಿ ಅಥವಾ ಗಮನ ಕೇಂದ್ರೀಕರಿಸಲು ಕಷ್ಟವಾಗುವುದಕ್ಕೆ ಮಾತ್ರ ಕಾರಣವಾಗುವುದಿಲ್ಲ. ದೀರ್ಘಕಾಲ ಸರಿಯಾಗಿ ನಿದ್ರೆ ಮಾಡದಿದ್ದರೆ ಅದರ ಪರಿಣಾಮ ಚರ್ಮದ ಮೇಲೂ ಕಾಣಿಸಿಕೊಳ್ಳಬಹುದು. ಕಣ್ಣುಗಳ ಕೆಳಗೆ ಕಪ್ಪಾಗುವುದು, ಮುಖದಲ್ಲಿ ಆಯಾಸದ ಛಾಯೆ, ಚರ್ಮದ ಹೊಳಪು ಕಡಿಮೆಯಾಗುವುದು ಮತ್ತು ಕೆಲವರಲ್ಲಿ ಚರ್ಮದ ಸಮಸ್ಯೆಗಳು ಹೆಚ್ಚಾಗುವುದು ಕಂಡುಬರಬಹುದು.

ನಿದ್ರೆ ಮತ್ತು ಸ್ಕಿನ್ ಹೆಲ್ತ್ ನಡುವೆ ಇರುವ ಸಂಬಂಧ?

ನಾವು ನಿದ್ರಿಸುತ್ತಿರುವಾಗ ದೇಹ ವಿಶ್ರಾಂತಿ ಪಡೆಯುವುದರ ಜೊತೆಗೆ ಹಲವು ದುರಸ್ತಿ ಪ್ರಕ್ರಿಯೆಗಳು ನಡೆಯುತ್ತವೆ. ಚರ್ಮವೂ ಈ ಪ್ರಕ್ರಿಯೆಯ ಭಾಗವಾಗಿದೆ. ಸಾಕಷ್ಟು ನಿದ್ರೆ ದೊರೆತಾಗ ಚರ್ಮದ ರಕ್ತಪರಿಚಲನೆ ಸೇರಿದಂತೆ ದೇಹದ ಸಾಮಾನ್ಯ ಚೇತರಿಕೆ ಪ್ರಕ್ರಿಯೆಗಳಿಗೆ ಬೆಂಬಲ ಸಿಗುತ್ತದೆ. ಇದರಿಂದ ಚರ್ಮದ ಕೋಶಗಳಿಗೆ ಆಮ್ಲಜನಕ ಮತ್ತು ಅಗತ್ಯ ಪೋಷಕಾಂಶಗಳು ತಲುಪಲು ಸಹಾಯವಾಗಬಹುದು. ಇದಲ್ಲದೆ, ದೇಹದ ಕೋಲಾಜೆನ್ ಉತ್ಪಾದನೆ ಮತ್ತು ಚರ್ಮದ ರಿಪೇರಿ ಪ್ರಕ್ರಿಯೆಗಳಿಗೆ ಉತ್ತೇಜನ ನೀಡಬಹುದು.

ನಿದ್ರೆ ಚೆನ್ನಾಗಿ ಮಾಡಿದರೆ ಸ್ಕಿನ್‌ಗೆ ಸಿಗುವ ಪ್ರಯೋಜನಗಳೇನು?

ಮುಖ ಹೆಚ್ಚು ಫ್ರೆಶ್ ಆಗಿ ಕಾಣಬಹುದು: ಸರಿಯಾಗಿ ನಿದ್ರೆ ಮಾಡಿದ ನಂತರ ಮುಖದ ಆಯಾಸ ಕಡಿಮೆಯಾಗಿ ಚರ್ಮ ಹೆಚ್ಚು ಫ್ರೆಶ್ ಮತ್ತು ಆರೋಗ್ಯಕರವಾಗಿ ಕಾಣಿಸಿಕೊಳ್ಳಬಹುದು.

ಕಣ್ಣುಗಳ ಕೆಳಗಿನ ಕಪ್ಪು ಕಲೆ ಕಡಿಮೆಯಾಗಲು ಸಹಾಯ ಮಾಡುತ್ತೆ: ನಿದ್ರೆಯ ಕೊರತೆಯಿಂದ ಕೆಲವರಲ್ಲಿ ಕಣ್ಣುಗಳ ಕೆಳಗೆ ಕಪ್ಪಾಗುವುದು ಮತ್ತು ಊತ ಹೆಚ್ಚು ಸ್ಪಷ್ಟವಾಗಿ ಕಾಣಿಸಬಹುದು. ಚೆನ್ನಾಗಿ ನಿದ್ರೆ ಮಾಡುವುದರಿಂದ ಈ ಸಮಸ್ಯೆಯನ್ನು ನಿಯಂತ್ರಿಸಲು ಸಹಾಯ ಮಾಡಬಹುದು.

ಚರ್ಮದ ರಿಪೇರಿ ಪ್ರಕ್ರಿಯೆಗೆ ಸಹಕಾರಿ: ದಿನವಿಡೀ ಸೂರ್ಯನ ಬೆಳಕು, ಮಾಲಿನ್ಯ ಮತ್ತು ಇತರ ಪರಿಸರ ಅಂಶಗಳಿಗೆ ಚರ್ಮ ಒಡ್ಡಿಕೊಳ್ಳುತ್ತದೆ. ನಿದ್ರೆಯ ಸಮಯದಲ್ಲಿ ದೇಹದ ಚೇತರಿಕೆ ಪ್ರಕ್ರಿಯೆಗಳು ನಡೆಯುವುದರಿಂದ ಚರ್ಮ ತನ್ನನ್ನು ತಾನು ಸರಿಪಡಿಸಿಕೊಳ್ಳಲು ಸಹಾಯವಾಗುತ್ತದೆ.

ಸ್ಟ್ರೆಸ್ ಕಡಿಮೆಯಾಗಲು ಸಹಾಯ: ಒತ್ತಡವು ಚರ್ಮದ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು. ಒಳ್ಳೆಯ ನಿದ್ರೆ ಒತ್ತಡವನ್ನು ನಿಯಂತ್ರಿಸಲು ಸಹಾಯ ಮಾಡುವುದರಿಂದ ಪರೋಕ್ಷವಾಗಿ ಚರ್ಮದ ಆರೋಗ್ಯಕ್ಕೂ ಪ್ರಯೋಜನವಾಗಬಹುದು.

ಇದನ್ನೂ ಓದಿ: ಅಡುಗೆಮನೆಯಲ್ಲೇ ಇದೆ ಸಣ್ಣ ನೋವಿಗೆ ಪರಿಹಾರ ನೀಡುವ ಪದಾರ್ಥಗಳು! ಹೇಗೆ ಬಳಸಬೇಕು ತಿಳಿದುಕೊಳ್ಳಿ

ನಿದ್ರೆ ಕಡಿಮೆ ಮಾಡಿದರೆ ಚರ್ಮಕ್ಕೆ ಏನಾಗಬಹುದು?

ನಿರಂತರವಾಗಿ ನಿದ್ರೆ ಕಡಿಮೆಯಾದರೆ ಮುಖದಲ್ಲಿ ಆಯಾಸ ಸ್ಪಷ್ಟವಾಗಿ ಕಾಣಿಸಿಕೊಳ್ಳಬಹುದು. ಕಣ್ಣುಗಳ ಕೆಳಗೆ ಕಪ್ಪು ಕಲೆ ಮತ್ತು ಊತ ಹೆಚ್ಚಾಗಬಹುದು. ಚರ್ಮದ ಕಾಂತಿ ಕಡಿಮೆಯಾಗಿ ಬಣ್ಣ ಮಂಕಾಗಿ ಕಾಣಿಸಿಕೊಳ್ಳುವ ಸಾಧ್ಯತೆಯೂ ಇದೆ. ದೀರ್ಘಕಾಲ ನಿದ್ರೆಯ ಕೊರತೆ ಇದ್ದರೆ ದೇಹದ ಸಾಮಾನ್ಯ ಚೇತರಿಕೆ ಪ್ರಕ್ರಿಯೆಗಳ ಮೇಲೂ ಪರಿಣಾಮ ಬೀಳಬಹುದು. ಕೆಲವರಲ್ಲಿ ಚರ್ಮದ ವಯಸ್ಸಾಗುವಿಕೆಯ ಲಕ್ಷಣಗಳು ಹೆಚ್ಚು ಗೋಚರಿಸಬಹುದು. ಆದರೆ ಕೇವಲ ನಿದ್ರೆಯ ಕೊರತೆಯೇ ಚರ್ಮದ ಪ್ರತಿಯೊಂದು ಸಮಸ್ಯೆಗೆ ಕಾರಣ ಎಂದು ಹೇಳಲು ಸಾಧ್ಯವಿಲ್ಲ. ಹಾರ್ಮೋನುಗಳು, ಆಹಾರ ಪದ್ಧತಿ, ನೀರಿನ ಸೇವನೆ, ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದು, ಸ್ಕಿನ್ ಕೇರ್ ಮತ್ತು ಇತರ ಆರೋಗ್ಯ ಸಮಸ್ಯೆಗಳೂ ಚರ್ಮದ ಮೇಲೆ ಪರಿಣಾಮ ಬೀರುತ್ತವೆ.

ಸ್ಕಿನ್ ಹೆಲ್ತ್‌ಗಾಗಿ ಎಷ್ಟು ಗಂಟೆ ನಿದ್ರೆ ಬೇಕು?

ಸಾಮಾನ್ಯವಾಗಿ ಆರೋಗ್ಯಕರ ವಯಸ್ಕರಿಗೆ ಪ್ರತಿದಿನ ಸುಮಾರು 7–9 ಗಂಟೆಗಳ ನಿದ್ರೆ ಅಗತ್ಯವಿರುತ್ತದೆ. ಒಂದು ಅಥವಾ ಎರಡು ದಿನ ನಿದ್ರೆ ಕಡಿಮೆಯಾಗುವುದರಿಂದ ದೊಡ್ಡ ಸಮಸ್ಯೆ ಉಂಟಾಗದಿರಬಹುದು. ಆದರೆ ನಿರಂತರವಾಗಿ ನಿದ್ರೆ ಪೂರ್ಣಗೊಳ್ಳದಿದ್ದರೆ ಒಟ್ಟಾರೆ ಆರೋಗ್ಯದ ಜೊತೆಗೆ ಚರ್ಮದ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ