35 ವರ್ಷದ ನಂತರ ಗರ್ಭಧರಿಸುವುದು ಸುರಕ್ಷಿತವೇ? ತಜ್ಞರು ನೀಡಿರುವ ಮಹತ್ವದ ಸಲಹೆ ನಿಮಗಾಗಿ

ಇತ್ತೀಚಿನ ದಿನಗಳಲ್ಲಿ ಉದ್ಯೋಗ, ಕುಟುಂಬ ಹಾಗೂ ಇತರ ಜವಾಬ್ದಾರಿಗಳ ಕಾರಣದಿಂದ ಮಹಿಳೆಯರಲ್ಲಿ ಅನೇಕರು, 35 ವರ್ಷಗಳ ನಂತರ ಗರ್ಭಧಾರಣೆಗೆ ಯೋಜನೆ ಮಾಡುತ್ತಿದ್ದಾರೆ. ಈ ವಯಸ್ಸಿನಲ್ಲಿಯೂ ಆರೋಗ್ಯಕರ ಗರ್ಭಧಾರಣೆ ಸಾಧ್ಯವಾದರೂ, ಕೆಲವು ಆರೋಗ್ಯದ ಅಪಾಯಗಳಿರುವುದರಿಂದ ವೈದ್ಯರ ಮೇಲ್ವಿಚಾರಣೆ ಅತ್ಯಗತ್ಯ. ಹಾಗಾದರೆ 35 ವರ್ಷದ ನಂತರ ಗರ್ಭಧಾರಣೆ (Pregnancy) ಮಾಡುವುದರಿಂದ ಯಾವ ರೀತಿಯ ಸಮಸ್ಯೆಗಳಾಗಬಹುದು ಮತ್ತು ಈ ಸಮಯದಲ್ಲಿ ಯಾವ ರೀತಿಯ ಅಪಾಯಗಳನ್ನು ತಾಯಿ ಮಗು ಎದುರಿಸಬೇಕಾಗುತ್ತದೆ ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ತಜ್ಞರ ಪ್ರಕಾರ, 35 ವರ್ಷಗಳ ನಂತರದ ಗರ್ಭಧಾರಣೆಯನ್ನು ಅಡ್ವಾನ್ಸ್ಡ್ ಮೇಟರ್ನಲ್ ಏಜ್ ಪ್ರೆಗ್ನೆನ್ಸಿ (Advanced Maternal Age Pregnancy) ಎಂದು ಕರೆಯಲಾಗುತ್ತದೆ. ಈ ಹಂತದಲ್ಲಿ ಮಹಿಳೆಯರು ಆರೋಗ್ಯವಂತ ಮಗುವಿಗೆ ಜನ್ಮ ನೀಡಬಹುದು. ಆದರೆ ಗರ್ಭಧಾರಣೆಯ ಸಂಪೂರ್ಣ ಅವಧಿಯಲ್ಲಿ ತಾಯಿ ಮತ್ತು ಮಗುವಿನ ಆರೋಗ್ಯವನ್ನು ಹೆಚ್ಚು ಗಮನಿಸುವ ಅಗತ್ಯವಿರುತ್ತದೆ. ವಯಸ್ಸು ಹೆಚ್ಚಾದಂತೆ ಗರ್ಭಧಾರಣೆಯ ಸಾಧ್ಯತೆ ಸ್ವಲ್ಪ ಕಡಿಮೆಯಾಗಬಹುದು. ಜೊತೆಗೆ ಗರ್ಭಾವಸ್ಥೆಯಲ್ಲಿ ಅಧಿಕ ರಕ್ತದೊತ್ತಡ, ಗರ್ಭಾವಸ್ಥೆಯ ಮಧುಮೇಹ, ಗರ್ಭಪಾತ, ಅವಧಿಗೂ ಮುನ್ನ ಹೆರಿಗೆ ಹಾಗೂ ಕೆಲವು ಜನ್ಯ ಸಮಸ್ಯೆಗಳ ಅಪಾಯ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ. ಆದರೆ ಸೂಕ್ತ ಆರೈಕೆ ಮತ್ತು ನಿಯಮಿತ ವೈದ್ಯಕೀಯ ತಪಾಸಣೆಯಿಂದ ಈ ಅಪಾಯಗಳನ್ನು ಬಹುತೇಕ ನಿಯಂತ್ರಿಸಬಹುದು.

ಇದನ್ನೂ ಓದಿ: ಮೆನೋಪಾಸ್ ಎಂದರೇನು? ಈ ಹಂತದ ನಂತರ ಮಹಿಳೆಯರು ಆರೋಗ್ಯದ ಬಗ್ಗೆ ಹೇಗೆ ಕಾಳಜಿ ವಹಿಸಬೇಕು?

ಫೋಲಿಕ್ ಆಸಿಡ್ ಯಾಕೆ ಅಗತ್ಯ?

ಗರ್ಭಧಾರಣೆಗೆ ಮುನ್ನ ತಪಾಸಣೆ (Pre-Pregnancy Check-up) ಮಾಡಿಸಿಕೊಳ್ಳುವುದು ಅತ್ಯಂತ ಮುಖ್ಯ. ಈ ವೇಳೆ ದೇಹದ ಒಟ್ಟಾರೆ ಆರೋಗ್ಯ, ಥೈರಾಯ್ಡ್, ಮಧುಮೇಹ, ರಕ್ತದೊತ್ತಡ, ಅಗತ್ಯ ಲಸಿಕೆಗಳು ಹಾಗೂ ಬಳಸುತ್ತಿರುವ ಔಷಧಿಗಳ ಬಗ್ಗೆ ವೈದ್ಯರು ಪರಿಶೀಲಿಸುತ್ತಾರೆ. ಇದರ ಜೊತೆಗೆ ವೈದ್ಯರ ಸಲಹೆಯಂತೆ ಫೋಲಿಕ್ ಆಸಿಡ್ ಸೇವನೆಯನ್ನು ಗರ್ಭಧಾರಣೆಗೆ ಪ್ರಯತ್ನಿಸುವ ಮುನ್ನವೇ ಆರಂಭಿಸುವುದು ಉತ್ತಮ. ಇದು ಮಗುವಿನ ಹುಟ್ಟುತ್ತಲೇ ಬರುವ ನರಮಂಡಲದ ದೋಷಗಳ ಅಪಾಯವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಆರೋಗ್ಯಕರ ಆಹಾರ ಸೇವನೆ, ಪ್ರತಿದಿನ ಲಘು ವ್ಯಾಯಾಮ, ಸರಿಯಾದ ತೂಕ ಕಾಪಾಡಿಕೊಳ್ಳುವುದು, ಸಾಕಷ್ಟು ನಿದ್ರೆ ಹಾಗೂ ಧೂಮಪಾನ-ಮದ್ಯಪಾನದಿಂದ ದೂರವಿರುವುದು ಸುರಕ್ಷಿತ ಗರ್ಭಧಾರಣೆಗೆ ನೆರವಾಗುತ್ತದೆ. 35 ವರ್ಷಗಳ ನಂತರ ಗರ್ಭಧಾರಣೆ ಅಸಾಧ್ಯವಲ್ಲ. ಆದರೆ ಉತ್ತಮ ಯೋಜನೆ, ನಿಯಮಿತ ವೈದ್ಯಕೀಯ ತಪಾಸಣೆ ಮತ್ತು ಆರೋಗ್ಯಕರ ಜೀವನಶೈಲಿಯನ್ನು ಅನುಸರಿಸಿದರೆ ತಾಯಿ ಹಾಗೂ ಮಗು ಇಬ್ಬರ ಆರೋಗ್ಯವನ್ನು ಸುರಕ್ಷಿತವಾಗಿ ಕಾಪಾಡಿಕೊಳ್ಳಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ