ರೋಗಿಗಳ ಬಳಿ ಕೋಟ್ಯಂತರ ರೂ. ಸುಲಿಗೆ: 254 ಔಷಧ ಕಂಪನಿಗಳ ಅಕ್ರಮ ಬಯಲು ಮಾಡಿದ ಕರ್ನಾಟಕ ಎಫ್​ಡಿಎ!

ಬೆಂಗಳೂರು, ಸೆಪ್ಟೆಂಬರ್ 27: ಬಡ ಹಾಗೂ ಕಷ್ಟದಲ್ಲಿರುವ ರೋಗಿಗಳನ್ನು ಗುರಿಯಾಗಿಸಿಕೊಂಡು ಔಷಧಗಳು, ವೈದ್ಯಕೀಯ ಉಪಕರಣಗಳು ಮತ್ತು ಕನ್ಸ್ಯೂಮಬಲ್ಸ್‌ಗಳ ಮೇಲೆ ಶೇ 60 ರಿಂದ 90 ಪಟ್ಟು ಹೆಚ್ಚು ದರ ನಿಗದಿಪಡಿಸಿ ಭಾರಿ ಸುಲಿಗೆ ಮಾಡುತ್ತಿದ್ದ 254 ಔಷಧ ತಯಾರಿಕಾ ಕಂಪನಿಗಳ ಅಕ್ರಮ ಜಾಲವನ್ನು ಕರ್ನಾಟಕ ಆಹಾರ ಮತ್ತು ಔಷಧ ಆಡಳಿತ (ಎಫ್​ಡಿಎ) ಇಲಾಖೆ ಬಯಲಿಗೆಳೆದಿದೆ. ಕಡಿಮೆ ವೆಚ್ಚದಲ್ಲಿ ಔಷಧಗಳನ್ನು ಸಿದ್ಧಪಡಿಸಿ ಅಥವಾ ಆಸ್ಪತ್ರೆಗಳಿಗೆ ಪೂರೈಕೆ ಮಾಡಿ, ರೋಗಿಗಳಿಗೆ ಮಾತ್ರ ಅತ್ಯಂತ ದುಬಾರಿ ಬೆಲೆಯಲ್ಲಿ ಮಾರಲಾಗುತ್ತಿತ್ತು. ಈ ಸುಲಿಗೆ ಕೋರ ಕಂಪನಿಗಳ ಸಂಪೂರ್ಣ ಪಟ್ಟಿಯನ್ನು ಸಿದ್ಧಪಡಿಸಿರುವ ಕರ್ನಾಟಕ ಎಫ್​ಡಿಎ ಆಯುಕ್ತ ಕೆ ಶ್ರೀನಿವಾಸ್ , ತಕ್ಷಣವೇ ಇದಕ್ಕೆ ಕಡಿವಾಣ ಹಾಕುವಂತೆ ಕೇಂದ್ರದ ರಾಷ್ಟ್ರೀಯ ಔಷಧೀಯ ಬೆಲೆ ಪ್ರಾಧಿಕಾರಕ್ಕೆ ಪತ್ರ ಬರೆದಿದ್ದಾರೆ.

ಆಘಾತಕಾರಿ ದರ, ವ್ಯತ್ಯಾಸದ ಲೆಕ್ಕಾಚಾರ

ಔಷಧ ತಯಾರಿಕಾ ಹಾಗೂ ಪೂರೈಕೆ ವೆಚ್ಚಕ್ಕೂ, ಆಸ್ಪತ್ರೆಗಳು ವಿಧಿಸುವ ಎಮ್ಆರ್​ಪಿ ಬೆಲೆಗೂ ಅಸಹಜ ಅಂತರವಿರುವುದು ಪರಿಶೀಲನೆ ವೇಳೆ ಬೆಳಕಿಗೆ ಬಂದಿದೆ.

• ಸಾಮಾನ್ಯ ಔಷಧ 1: 86 ರೂ.ಗೆ ಖರೀದಿಸಿದ ಔಷಧಿಗೆ ನಿಗದಿಯಾಗಿದ್ದ ಎಮ್ಆರ್​ಪಿ 4,528 ರೂ. (52 ಪಟ್ಟು ಹೆಚ್ಚು)
• ಸಾಮಾನ್ಯ ಔಷಧ 2: 160 ರೂ. ಔಷಧಿಗೆ ನಿಗದಿಯಾಗಿದ್ದ ಎಮ್ಆರ್​ಪಿ 7,110 ರೂ. (44 ಪಟ್ಟು ಹೆಚ್ಚು)
• ಸೈಟ್ಯಾಕ್ಸ್ 100MG (ಕ್ಯಾನ್ಸರ್ ಔಷಧ): ಲ್ಯಾಂಡಿಂಗ್ ವೆಚ್ಚ 342 ರೂ. ಇದ್ದರೆ, ಎಮ್ಆರ್​ಪಿ 3,836 ರೂ. ನಿಗದಿ (1021 ಪಟ್ಟು ಲಾಭ)
• ನ್ಯೂಕೈನ್ 300MCG: ಲ್ಯಾಂಡಿಂಗ್ ವೆಚ್ಚ 112 ರೂ. ಇದ್ದರೆ,ಎಮ್ಆರ್​ಪಿ 1,239 ರೂ. ನಿಗದಿ (1006 ಪಟ್ಟು ಲಾಭ)
• ಬಿವಾಟಾಸ್ 400MG ಇಂಜೆಕ್ಷನ್: ಲ್ಯಾಂಡಿಂಗ್ ವೆಚ್ಚ 5,850 ರೂ. ಇದ್ದರೆ, ಎಮ್ಆರ್​ಪಿ 62,690 ರೂ. ನಿಗದಿ (971 ಪಟ್ಟು ಲಾಭ)
• ಕಾನ್ಸೆಟ್ (Cosate 3 MIU Inj): ಲ್ಯಾಂಡಿಂಗ್ ವೆಚ್ಚ 340 ರೂ.ಇದ್ದರೆ,ಎಮ್ಆರ್​ಪಿ 3,699 ರೂ. ನಿಗದಿ (987 ಪಟ್ಟು ಲಾಭ)

ಎಫ್​ಡಿಎ ಆಯುಕ್ತ ಕೆ. ಶ್ರೀನಿವಾಸ್ ಬರೆದ ಪತ್ರದಲ್ಲೇನಿದೆ?

ರಾಜ್ಯದಲ್ಲಿ ಅತಿಯಾದ ಲಾಭ ಗಳಿಸುತ್ತಿರುವ 254 ಔಷಧ ಕಂಪನಿಗಳ ದರ ಏರಿಕೆಯ ಸಮಗ್ರ ಪಟ್ಟಿಯನ್ನು ಎನ್​ಪಿಪಿಎಗೆ ಸಲ್ಲಿಸಲಾಗಿದೆ. ಡ್ರಗ್ಸ್ ಪ್ರೈಸೆಸ್ ಕಂಟ್ರೋಲ್ ಆರ್ಡರ್ (DPCO), 2013ರ ನಿಯಮಗಳ ಅಡಿಯಲ್ಲಿ ತುರ್ತಾಗಿ ಈ ದರಗಳನ್ನು ನಿಯಂತ್ರಣಕ್ಕೆ ತರಬೇಕು. ಆಸ್ಪತ್ರೆಗಳಲ್ಲಿ ವಿಧಿಸುವ ಅತಿಯಾದ ಟ್ರೇಡ್ ಮಾರ್ಜಿನ್ (ಲಾಭದ ಶೇಕಡಾವಾರು) ಪ್ರಮಾಣಕ್ಕೆ ತಕ್ಷಣವೇ ಗರಿಷ್ಠ ಮಿತಿ ನಿಗದಿಪಡಿಸಬೇಕು. ಔಷಧಗಳು, ಮೆಡಿಕಲ್ ಡಿವೈಸ್‌ಗಳು ಹಾಗೂ ಕನ್ಸ್ಯೂಮಬಲ್ಸ್‌ಗಳ ಉತ್ಪಾದನಾ/ಲ್ಯಾಂಡಿಂಗ್ ವೆಚ್ಚಕ್ಕೆ ಸೂಕ್ತ ಪ್ರಮಾಣದ ಬೆಲೆ ನಿಗದಿಪಡಿಸಿ ಬಡ ರೋಗಿಗಳ ಸುಲಿಗೆ ತಪ್ಪಿಸಬೇಕು ಎಂದು ಒತ್ತಾಯಿಸಲಾಗಿದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ