ಈ ಐಪಿಎಲ್​ನಲ್ಲಿ ಌನ್ರಿಖ್ ನೊರ್ಕಿಯರಿಂದ ಬೆಂಕಿಯುಗುಳುವ ಎಸೆತಗಳು!

ವಿಶ್ವದ ಪ್ರಮುಖ ಕ್ರೀಡಾ ಈವೆಂಟ್​ಗಳಲ್ಲಿ ಒಂದಾಗಿರುವ ಇಂಡಿಯನ್ ಪ್ರಿಮೀಯರ್ ಲೀಗ್​ನಲ್ಲಿ ಮೊಟ್ಟಮೊದಲ ಸೀಸನ್ ಆಟುತ್ತಿರುವ ದಕ್ಷಿಣ ಆಫ್ರಿಕಾದ ವೇಗದ ಬೌಲರ್ ಌನ್ರಿಖ್ ನೊರ್ಕಿಯ, ದಿನವಿಡೀ ಉರಿಬಿಸಿಲಿನಲ್ಲಿ ಬೆಂದು ಹೋಗುವ ಯುನೈಡೆಟ್ ಅರಬ್ ಎಮಿರೇಟ್ಸ್​ನ ಪಿಚ್​ಗಳಲ್ಲಿ ರಾತ್ರಿ ಹೊತ್ತಿನಲ್ಲೂ ಕಿಚ್ಚು ಹಚ್ಚುತ್ತಿದ್ದಾರೆ. ಅವರ ಬೆಂಕಿಯುಗುಳುವ ಎಸೆತಗಳು ಬ್ಯಾಟ್ಸ್​ಮನ್​ಗಳಲ್ಲಿ ಗಾಬರಿ ಹುಟ್ಟಿಸುತ್ತಿವೆ.

ಹೌದು, ಅದು ಅಕ್ಷರಶಃ ಸತ್ಯ. ಐಪಿಎಲ್ ಇತಿಹಾಸದಲ್ಲೇ ಅತಿವೇಗದ ಎಸೆತವನ್ನು ಬುಧುವಾರದಂದು ರಾಜಸ್ತಾನ ರಾಯಲ್ಸ್ ವಿರುದ್ಧ ಆಡಿದ ಪಂದ್ಯದಲ್ಲಿ ಬೌಲ್ ಮಾಡಿದ ನೊರ್ಕಿಯ, ತಮ್ಮ ದೇಶದವರೇ ಆದ ಡೇಲ್ ಸ್ಟೀನ್​ ಅವರ ದಾಖಲೆಯನ್ನು ಉತ್ತಮಪಡಿಸಿದ್ದಾರೆ.

ಬುಧವಾರದಂದು ನೊರ್ಕಿಯ ಒಂದು ಎಸೆತವನ್ನು 156.22 ಕಿ.ಮೀ/ಗಂಟೆ ವೇಗದಲ್ಲಿ ಬೌಲ್ ಮಾಡಿದರು. ಅಂದು ಅವರ ಮೂರು ಎಸೆತಗಳು ಸ್ಟೀನ್​ ಬೌಲ್ ಮಾಡಿದ 154.40 ಕಿ.ಮೀ/ಗಂಟೆ ಕ್ಕಿಂತ ಜಾಸ್ತಿ ವೇಗದಲ್ಲಿದ್ದವು.

ನೊರ್ಕಿಯ, 156.22 ಕಿ.ಮೀ/ಗಂಟೆ ವೇಗದಲ್ಲಿ ಚೆಂಡೆಸದ ನಂತರ, 155.21 ಮತ್ತು 154.74 ಕಿ.ಮೀ/ಗಂಟೆ ವೇಗದ ಎಸೆತಗಳನ್ನು ಸಹ ಬೌಲ್ ಮಾಡಿದರು.

ಸ್ಟೀನ್ ನಂತರದ ಸ್ಥಾನದಲ್ಲಿ ಮತ್ತೊಬ್ಬ ದಕ್ಷಿಣ ಆಫ್ರಿಕಾದ ಬೌಲರ್ ಕಗಿಸೊ ರಬಾಡ (154.23 ಕಿ.ಮೀ/ಗಂಟೆ) ಇದ್ದಾರೆ. ಐಪಿಎಲ್​ನಲ್ಲಿ ದಾಖಲಾಗಿರುವ 10 ಅತಿವೇಗದ ಎಸೆತಗಳಲ್ಲಿ 5 ನೊರ್ಕಿಯ ಹೆಸರಿಗಿವೆ. ಅವರು ಮತ್ತೆರಡು ಬಾರಿ, 154. 21 ಮತ್ತು 153.72 ಕಿ.ಮೀ/ಗಂಟೆ ವೇಗದ ಎಸೆತಗಳನ್ನು ಬೌಲ್ ಮಾಡಿದ್ದಾರೆ. ರಬಾಡ ಇನ್ನೊಂದು ಸಂದರ್ಭದಲ್ಲಿ 153.91 ಕಿ.ಮೀ/ಗಂಟೆ ವೇಗದಲ್ಲಿ ಬೌಲ್ ಮಾಡಿದ್ದಾರೆ. ಈ ಪಟ್ಟಿಯಲ್ಲಿರುವ ಇತರ ಇಬ್ಬರು ಬೌಲರ್​ಗಳೆಂದರೆ, ಇಂಗ್ಲೆಂಡ್​ನ ಜೊಫ್ರಾ ಆರ್ಚರ್ (153.62 ಕಿ.ಮೀ/ಗಂಟೆ) ಮತ್ತು ಆಸ್ಟ್ರೇಲಿಯಾದ ಪ್ಯಾಟ್ ಕಮ್ಮಿನ್ಸ್ (153.56ಕಿ.ಮೀ/ಗಂಟೆ).

Published On - 6:01 pm, Thu, 15 October 20