ಕೊಹ್ಲಿ, ರೋಹಿತ್ ನಡುವೆ ಗಿಲ್ ಹಣೆಯ ಮೇಲಿನ ಸಾಧನದ್ದೇ ಸದ್ದು! ಏನಿದರ ವಿಶೇಷತೆ?

ನ್ಯೂಜಿಲೆಂಡ್ ವಿರುದ್ಧ ಆಕ್ಲೆಂಡ್‌ನಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಟೀಂ ಇಂಡಿಯಾ ನಾಯಕ ಶುಭ್​ಮನ್ ಗಿಲ್ ಧರಿಸಿದ್ದ ‘ಟೆಂಪಲ್’ ಸಾಧನ ಇದೀಗ ಕ್ರಿಕೆಟ್ ವಲಯದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ. ನ್ಯೂಜಿಲೆಂಡ್ ಪ್ರವಾಸದ ಆರಂಭದಿಂದಲೂ ಗಿಲ್ ಈ ಸಾಧನವನ್ನು ಬಳಸುತ್ತಿದ್ದಾರೆ. ಅಭ್ಯಾಸದ ಅವಧಿಯಲ್ಲೂ ಅವರು ಇದನ್ನು ಧರಿಸಿರುವುದು ಕಂಡುಬಂದಿತ್ತು. ಆದರೆ ಬುಧವಾರ ಈಡನ್ ಪಾರ್ಕ್‌ನಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ತಂಡಗಳು ಮುಖಾಮುಖಿಯಾದಾಗ ಈ ಸಾಧನ ಎಲ್ಲರ ಗಮನ ಸೆಳೆಯಿತು. ಹಣೆ ಮತ್ತು ಬಲಗಣ್ಣಿನ ಹುಬ್ಬಿನ ಪಕ್ಕದ ಭಾಗಕ್ಕೆ ಅಂಟಿಸಿಕೊಳ್ಳುವ ಈ ಪುಟ್ಟ ಸಾಧನವು ಮೆದುಳಿನಲ್ಲಿ ರಕ್ತದ ಹರಿವನ್ನು ಮೇಲ್ವಿಚಾರಣೆ ಮಾಡುವ ಕೆಲಸ ಮಾಡಲಿದೆ.

ಈ ಸಾಧನ ಬಳಸುತ್ತಿರುವ ಮೊದಲ ಭಾರತೀಯ ಕ್ರೀಡಾಪಟು ಗಿಲ್ ಅಲ್ಲ. ಭಾರತದ ಖ್ಯಾತ ಬ್ಯಾಡ್ಮಿಂಟನ್ ತಾರೆ ಪಿ.ವಿ. ಸಿಂಧು ಕೂಡ ಕಳೆದ ಆಗಸ್ಟ್‌ನಲ್ಲಿ ನವದೆಹಲಿಯಲ್ಲಿ ನಡೆದ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್ ವೇಳೆ ಇದೇ ಸಾಧನವನ್ನು ಧರಿಸಿದ್ದರು. ಹೀಗಾಗಿ ಮತ್ತೊಂದು ಪ್ರಮುಖ ಕ್ರೀಡಾಕೂಟದಲ್ಲೂ ಟೆಂಪಲ್ ಸಾಧನ ಕಾಣಿಸಿಕೊಂಡಂತಾಗಿದೆ. ಆದರೆ ಅಂತರರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳ ವೇಳೆ ಇಂತಹ ಸಾಧನಗಳನ್ನು ಧರಿಸಲು ಅವಕಾಶವಿದೆಯೇ ಎಂಬ ಪ್ರಶ್ನೆಯೂ ಇದೀಗ ಉದ್ಭವಿಸಿದೆ. ಹಾಗಾದರೆ ಟೆಂಪಲ್ ಸಾಧನ ಎಂದರೇನು? ಇದು ಯಾವ ರೀತಿಯ ಮಾಹಿತಿಯನ್ನು ಸಂಗ್ರಹಿಸುತ್ತದೆ? ಎಂಬುದನ್ನು ನೋಡುವುದಾದರೆ..

ಏನಿದು ಟೆಂಪಲ್ ಸಾಧನ?

ಜೊಮಾಟೊ ಸಹ-ಸಂಸ್ಥಾಪಕ ದೀಪಿಂದರ್ ಗೋಯಲ್ ಅವರ ನೇತೃತ್ವದ ತಂಡ ಅಭಿವೃದ್ಧಿಪಡಿಸಿರುವ ಸಾಧನವೇ ಟೆಂಪಲ್. ಇದನ್ನು ಹಣೆ ಮತ್ತು ಕಣ್ಣು ಹುಬ್ಬುಗಳ ಪಕ್ಕದಲ್ಲಿ ಅಂಟಿಸಿಕೊಳ್ಳಲಾಗುತ್ತದೆ. ಮೆದುಳಿಗೆ ಹರಿಯುವ ರಕ್ತದ ಪ್ರಮಾಣ ಸೇರಿದಂತೆ ಮೆದುಳಿನ ಕಾರ್ಯನಿರ್ವಹಣೆಗೆ ಸಂಬಂಧಿಸಿದ ಕೆಲವು ದೈಹಿಕ ಸಂಕೇತಗಳನ್ನು ಮೇಲ್ವಿಚಾರಣೆ ಮಾಡುವುದು ಇದರ ಉದ್ದೇಶವಾಗಿದೆ. ಈ ಸಾಧನವು ಆಪ್ಟಿಕಲ್ ಸೆನ್ಸರ್‌ಗಳು ಹಾಗೂ ಬ್ರೈನ್‌ಫ್ಲೋ ಎಂಬ ತಂತ್ರಜ್ಞಾನವನ್ನು ಬಳಸುತ್ತದೆ. ಸರಳವಾಗಿ ಹೇಳುವುದಾದರೆ, ಹಣೆಯ ಪಕ್ಕದ ಭಾಗದಿಂದ ಸಂಗ್ರಹಿಸುವ ಸಂಕೇತಗಳ ಮೂಲಕ ಮೆದುಳಿನೊಳಗಿನ ರಕ್ತದ ಹರಿವಿನಲ್ಲಿ ಆಗುವ ಬದಲಾವಣೆಗಳನ್ನು ಗುರುತಿಸಲು ಈ ತಂತ್ರಜ್ಞಾನ ಪ್ರಯತ್ನಿಸುತ್ತದೆ.

SPECIAL TREATMENT FOR VIRAT KOHLI & SHUBMAN GILL?

Shubman Gill plays with a temple device, while Virat Kohli gets a special dashcam camera. https://t.co/NF29t1CF6z

— ‘’ (@chill_guys22) November 4, 2026

ಟೆಂಪಲ್ ಸಾಧನ ಹೇಗೆ ಕಾರ್ಯನಿರ್ವಹಿಸುತ್ತದೆ?

ರಕ್ತದ ಹರಿವಿನ ಜೊತೆಗೆ ದೇಹದಲ್ಲಿನ ಆಮ್ಲಜನಕದ ಮಟ್ಟ ಮತ್ತು ಮಾನಸಿಕ ಒತ್ತಡಕ್ಕೆ ಸಂಬಂಧಿಸಿದ ಸಂಕೇತಗಳನ್ನು ಕೂಡ ಈ ಸಾಧನ ಗಮನಿಸುತ್ತದೆ. ಅಂದರೆ, ಮಾನಸಿಕ ಶ್ರಮ ಹೆಚ್ಚಾದಾಗ ಮೆದುಳು ಮತ್ತು ದೇಹ ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬುದನ್ನು ಅಂದಾಜಿಸುವ ಪ್ರಯತ್ನ ಮಾಡುತ್ತದೆ. ಒತ್ತಡದ ಸನ್ನಿವೇಶದಲ್ಲಿ ಬ್ಯಾಟಿಂಗ್ ಮಾಡುವಾಗ ಅಥವಾ ನಾಯಕನಾಗಿ ತಂಡವನ್ನು ಮುನ್ನಡೆಸುವಾಗ ಕ್ರೀಡಾಪಟುಗಳ ಮಾನಸಿಕ ಹಾಗೂ ದೈಹಿಕ ಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ಇಂತಹ ಮಾಹಿತಿ ನೆರವಾಗಬಹುದು.

ಐಸಿಸಿ ಟೆಸ್ಟ್ ರ್‍ಯಾಂಕಿಂಗ್‌: ಜಾರಿದ ಶುಭ್​ಮನ್ ಗಿಲ್, ಜಸ್ಪ್ರೀತ್ ಬುಮ್ರಾ

ಇದಲ್ಲದೆ, ಟೆಂಪಲ್ ಸಾಧನವು ‘ಎಂಟ್ರೋಪಿ ಸ್ಕೋರ್’ (Entropy Score) ಎಂಬ ಅಂಕವನ್ನೂ ನೀಡುತ್ತದೆ. ಇದು ದೇಹದ ಮೇಲಿನ ಒತ್ತಡದ ಮಟ್ಟವನ್ನು ಸೂಚಿಸುವ ಉದ್ದೇಶ ಹೊಂದಿದೆ. ವ್ಯಾಯಾಮ, ನಿದ್ರೆ ಮತ್ತು ಮಾನಸಿಕ ಒತ್ತಡದಂತಹ ಹಲವು ಅಂಶಗಳಿಂದ ಈ ಮಟ್ಟದಲ್ಲಿ ಬದಲಾವಣೆಯಾಗಬಹುದು. ಹೀಗಾಗಿ ಈ ಅಂಕವನ್ನು ಯಾವುದೇ ಒಂದು ನಿರ್ದಿಷ್ಟ ಆರೋಗ್ಯ ಸಮಸ್ಯೆಯ ಸೂಚನೆ ಎಂದು ಪರಿಗಣಿಸಬಾರದು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ