ಜಾವಾ ಸಮುದ್ರದಲ್ಲಿ 240 ಪ್ರಯಾಣಿಕರಿದ್ದ ಹಡಗು ನಾಪತ್ತೆ: ಕೆಟ್ಟ ಹವಾಮಾನಕ್ಕೆ ಸಿಲುಕಿ ಸಂಪರ್ಕ ಕಡಿತ, ಆತಂಕ

ಜಕಾರ್ತಾ, ಸೆಪ್ಟೆಂಬರ್ 13: ಇಂಡೋನೇಷ್ಯಾದ ಜಾವಾ ಸಮುದ್ರದಲ್ಲಿ ಸುಮಾರು 240 ಪ್ರಯಾಣಿಕರನ್ನು ಹೊತ್ತೊಯ್ಯುತ್ತಿದ್ದ ಬೃಹತ್ ಪ್ರಯಾಣಿಕ ಹಡಗು ಮಾರ್ಗಮಧ್ಯೆ ಸಂಪರ್ಕ ಕಳೆದುಕೊಂಡಿದೆ. ಪೂರ್ವ ಜಾವಾದಿಂದ ಬೊರ್ನಿಯೊ ದ್ವೀಪದತ್ತ ಸಾಗುತ್ತಿದ್ದ ಈ ಹಡಗು ಕೆಟ್ಟ ಹವಾಮಾನಕ್ಕೆ ಸಿಲುಕಿ ಸಂವಹನ ವ್ಯವಸ್ಥೆ ಕಡಿದುಕೊಂಡಿದ್ದು, ಅದರಲ್ಲಿರುವ ಪ್ರಯಾಣಿಕರ ಪರಿಸ್ಥಿತಿಯ ಬಗ್ಗೆ ಭಾರಿ ಆತಂಕ ಮೂಡಿಸಿದೆ. ಇಂಡೋನೇಷ್ಯಾ ರಕ್ಷಣಾ ಪಡೆಗಳು ಸಮುದ್ರದಲ್ಲಿ ಹಡಗನ್ನು ಪತ್ತೆಹಚ್ಚಲು ಯುದ್ಧೋಪಾದಿಯಲ್ಲಿ ಶೋಧ ಕಾರ್ಯಾಚರಣೆ ಆರಂಭಿಸಿವೆ.

ಸಂಪರ್ಕ ಕಳೆದುಕೊಂಡ ಹಡಗು: ನಾಪತ್ತೆಯಾದ ಹಡಗನ್ನು ‘ವಿರ್ಗೋ ಟ್ರಾನ್ಸ್‌ಪೋರ್ಟ್ 8’ ಎಂದು ಗುರುತಿಸಲಾಗಿದೆ. ಇದು ಇಂಡೋನೇಷ್ಯಾದ ಎರಡನೇ ದೊಡ್ಡ ನಗರವಾದ ಸುರಬಯಾದಿಂದ ಹೊರಟು ದಕ್ಷಿಣ ಕಾಲಿಮಂಟನ್‌ನ ಬಂಜರ್‌ಮಾಸಿನ್ ಕಡೆಗೆ ತೆರಳುತ್ತಿತ್ತು. ಸಮುದ್ರದಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ ಹಠಾತ್ ಎದುರಾದ ಪ್ರತಿಕೂಲ ಹವಾಮಾನ ಹಾಗೂ ಭಾರಿ ಅಲೆಗಳ ಕಾರಣದಿಂದಾಗಿ ಹಡಗಿನ ಸಂಪರ್ಕ ಕಡಿತಗೊಂಡಿದೆ ಎಂದು ರಕ್ಷಣಾ ಕಚೇರಿ ಅಧಿಕಾರಿ ಐ ಪುಟು ಸುದಾಯನ ತಿಳಿಸಿದ್ದಾರೆ.

ಬಂಜರ್‌ಮಾಸಿನ್ ಬಂದರಿನಿಂದ ಸುಮಾರು 148 ಕಿಲೋಮೀಟರ್ ದೂರದಲ್ಲಿ ಜಾವಾ ಸಮುದ್ರದ ಮಧ್ಯಭಾಗದಲ್ಲಿ ಹಡಗಿನ ಕೊನೆಯ ಜಿಪಿಎಸ್ ಲೋಕೇಶನ್ ದಾಖಲಾಗಿದೆ. ಹಡಗಿನ ನಿರ್ವಾಹಕ ಸಂಸ್ಥೆ ಪಿಟಿ ವಿರ್ಗೋ ನೀಡಿದ ತುರ್ತು ಮಾಹಿತಿಯ ಮೇರೆಗೆ ಬಸಿರಿಹ್ ರಕ್ಷಣಾ ನೆಲೆಯಿಂದ ವಿಶೇಷ ಹುಡುಕಾಟ ಹಡಗುಗಳು ಮತ್ತು ಮುಳುಗು ತಜ್ಞರನ್ನು ನಿಯೋಜಿಸಲಾಗಿದೆ.

ಸದ್ಯಕ್ಕೆ ಸಾವು-ನೋವು ವರದಿಯಾಗಿಲ್ಲ: ಹಡಗಿನ ಸಂಪರ್ಕ ಸಂಪೂರ್ಣ ಕಡಿತಗೊಂಡಿದ್ದರೂ, ಮುಳುಗಡೆಯಾಗಿರುವ ಬಗ್ಗೆ ಅಥವಾ ಯಾವುದೇ ಸಾವುನೋವುಗಳ ಕುರಿತು ಅಧಿಕೃತ ವರದಿಗಳು ಬಂದಿಲ್ಲ.

ಮತ್ತಷ್ಟು ಓದಿ: ಫಿಲಿಪೈನ್ಸ್ ದೋಣಿ ಬೆಂಕಿ ದುರಂತ; ಮೃತರ ಸಂಖ್ಯೆ 35ಕ್ಕೆ ಏರಿಕೆ; 54 ಪ್ರಯಾಣಿಕರು ಇನ್ನೂ ನಾಪತ್ತೆ

ದ್ವೀಪ ರಾಷ್ಟ್ರದ ಸಾರಿಗೆ ಸವಾಲು: ಇಂಡೋನೇಷ್ಯಾವು 17,000ಕ್ಕೂ ಹೆಚ್ಚು ದ್ವೀಪಗಳನ್ನು ಒಳಗೊಂಡಿರುವ ವಿಶ್ವದ ಅತಿದೊಡ್ಡ ದ್ವೀಪಸಮೂಹ ರಾಷ್ಟ್ರವಾಗಿದೆ. ಇಲ್ಲಿನ ಜನರಿಗೆ ಒಂದು ದ್ವೀಪದಿಂದ ಮತ್ತೊಂದು ದ್ವೀಪಕ್ಕೆ ಸಂಚರಿಸಲು ದೋಣಿ ಮತ್ತು ಹಡಗುಗಳೇ ಪ್ರಮುಖ ಹಾಗೂ ಅಗ್ಗದ ಸಾರಿಗೆ ಮಾಧ್ಯಮ.

ಸಮುದ್ರ ದುರಂತಗಳ ಇತಿಹಾಸ: ಈ ಭಾಗದಲ್ಲಿ ಸಮುದ್ರ ಪ್ರಯಾಣದ ವೇಳೆ ನಿಯಮಗಳ ಉಲ್ಲಂಘನೆ, ಹಡಗಿನ ಸಾಮರ್ಥ್ಯಕ್ಕಿಂತ ಹೆಚ್ಚಿನ ಪ್ರಯಾಣಿಕರನ್ನು ತುಂಬುವುದು ಹಾಗೂ ಅನಿರೀಕ್ಷಿತ ಉಷ್ಣವಲಯದ ಬಿರುಗಾಳಿಗಳಿಂದಾಗಿ ಆಗಾಗ ಇಂತಹ ಹಡಗು ದುರಂತಗಳು ಸಂಭವಿಸುತ್ತಿರುತ್ತವೆ.

ಕಾರ್ಯಾಚರಣೆಗೆ ಅಡ್ಡಿ: ಜಾವಾ ಸಮುದ್ರದಲ್ಲಿ ಮುಂದುವರಿದಿರುವ ಪ್ರತಿಕೂಲ ಹವಾಮಾನ ಮತ್ತು ಕತ್ತಲು ಶೋಧ ಕಾರ್ಯಾಚರಣೆಗೆ ಸವಾಲಾಗಿ ಪರಿಣಮಿಸಿದ್ದು, ನೌಕಾಪಡೆ ಹಾಗೂ ಕರಾವಳಿ ಕಾವಲು ಪಡೆಯ ನೆರವನ್ನೂ ಪಡೆಯಲಾಗುತ್ತಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ