Apple Pay: ಭಾರತಕ್ಕೆ ಬರಲಿದೆ ಆಪಲ್ ಪೇ; ಯುಪಿಐ ಇಲ್ಲದೆ ಇದು ಹೇಗೆ ಕೆಲಸ ಮಾಡಲಿದೆ?

ಐಫೋನ್ (iPhone) ಬಳಕೆದಾರರಿಗೆ ಬಹಳ ವರ್ಷಗಳಿಂದ ಕಾಯುತ್ತಿದ್ದ ಪಾವತಿ ಸೇವೆಯೊಂದು ಇದೀಗ ಭಾರತಕ್ಕೆ ಬರಲು ಸಿದ್ಧವಾಗುತ್ತಿದೆ. ಆಪಲ್ ತನ್ನ ಆಪಲ್ ಪೇ ಸೇವೆಯನ್ನು ಭಾರತದಲ್ಲಿ ಅಕ್ಟೋಬರ್ 2026ರ ವೇಳೆಗೆ ಪರಿಚಯಿಸಲು ಸಿದ್ಧತೆ ನಡೆಸುತ್ತಿದೆ ಎಂದು ವರದಿಗಳು ತಿಳಿಸಿವೆ. ಆರಂಭಿಕ ಹಂತದಲ್ಲಿ ಆಕ್ಸಿಸ್ ಬ್ಯಾಂಕ್‌ನ ಕ್ರೆಡಿಟ್ ಕಾರ್ಡ್‌ಗಳೊಂದಿಗೆ ಈ ಸೇವೆ ಲಭ್ಯವಾಗುವ ಸಾಧ್ಯತೆ ಇದೆ. ಬಳಿಕ ಇತರ ಬ್ಯಾಂಕ್‌ಗಳ ಕಾರ್ಡ್‌ಗಳಿಗೂ ಬೆಂಬಲ ನೀಡುವ ಉದ್ದೇಶವನ್ನು ಆಪಲ್ ಹೊಂದಿದೆ ಎಂದು ವರದಿಯಾಗಿದೆ.

ಆರಂಭದಲ್ಲಿ ಆಕ್ಸಿಸ್ ಬ್ಯಾಂಕ್ ಕಾರ್ಡ್‌ಗಳಿಗೆ ಬೆಂಬಲ

ಭಾರತದಲ್ಲಿ ಆಪಲ್ ಪೇ ಆರಂಭವಾದರೆ, ಮೊದಲ ಹಂತದಲ್ಲಿ ಆಕ್ಸಿಸ್ ಬ್ಯಾಂಕ್ ಪ್ರಮುಖ ಪಾಲುದಾರವಾಗುವ ಸಾಧ್ಯತೆ ಇದೆ. ಆಪಲ್ ಈಗಾಗಲೇ ಎಚ್‌ಡಿಎಫ್‌ಸಿ ಬ್ಯಾಂಕ್ ಮತ್ತು ಐಸಿಐಸಿಐ ಬ್ಯಾಂಕ್ ಸೇರಿದಂತೆ ಇತರ ಪ್ರಮುಖ ಬ್ಯಾಂಕ್‌ಗಳ ಜತೆ ಮಾತುಕತೆ ನಡೆಸುತ್ತಿದೆ. ಆದರೆ ಈ ಬ್ಯಾಂಕ್‌ಗಳೊಂದಿಗೆ ವಾಣಿಜ್ಯ ಒಪ್ಪಂದಗಳು ಇನ್ನೂ ಅಂತಿಮವಾಗಿಲ್ಲ ಎಂದು ಮೂಲಗಳು ತಿಳಿಸಿವೆ.

ಯುಪಿಐ ಮೂಲಕ ಪಾವತಿ ಮಾಡಬಹುದೇ?

ಇಲ್ಲಿ ಭಾರತೀಯ ಬಳಕೆದಾರರಿಗೆ ಪ್ರಮುಖ ಪ್ರಶ್ನೆಯೊಂದು ಎದುರಾಗುತ್ತದೆ. ಆರಂಭಿಕ ಹಂತದಲ್ಲಿ ಆಪಲ್ ಪೇಗೆ UPI ಬೆಂಬಲ ಇರುವುದಿಲ್ಲ ಎಂದು ಕೆಲವು ವರದಿಗಳು ತಿಳಿಸಿವೆ. ಬದಲಿಗೆ ಕ್ರೆಡಿಟ್ ಕಾರ್ಡ್‌ಗಳನ್ನು ಆಪಲ್ ಪೇಗೆ ಸೇರಿಸಿ, ಅಂಗಡಿಗಳಲ್ಲಿರುವ ಸಂಪರ್ಕರಹಿತ ಪಾವತಿ ಯಂತ್ರಗಳಲ್ಲಿ ಐಫೋನ್ ಅಥವಾ ಆಪಲ್ ವಾಚ್ ಮೂಲಕ ಪಾವತಿ ಮಾಡುವ ವ್ಯವಸ್ಥೆ ಇರಬಹುದು. ಆದಾಗ್ಯೂ, ಮತ್ತೊಂದು ವರದಿಯಲ್ಲಿ ಮುಂದಿನ ಹಂತದಲ್ಲಿ ಯುಪಿಐ ಬೆಂಬಲವೂ ಬರಬಹುದು ಎಂದು ತಿಳಿಸಲಾಗಿದೆ. ಹೀಗಾಗಿ ಭಾರತದಲ್ಲಿ ಆಪಲ್ ಪೇ ಆರಂಭವಾಗುವಾಗ ಲಭ್ಯವಿರುವ ನಿಖರ ಸೌಲಭ್ಯಗಳನ್ನು ಆಪಲ್ ಅಧಿಕೃತವಾಗಿ ಘೋಷಿಸಿದ ಬಳಿಕವೇ ಸ್ಪಷ್ಟವಾಗಲಿದೆ.

ಆಪಲ್ ಪೇ ಹೇಗೆ ಕೆಲಸ ಮಾಡುತ್ತದೆ?

ಆಪಲ್ ಪೇನಲ್ಲಿ ಬಳಕೆದಾರರು ತಮ್ಮ ಅರ್ಹ ಕ್ರೆಡಿಟ್ ಅಥವಾ ಡೆಬಿಟ್ ಕಾರ್ಡ್ ಅನ್ನು ಐಫೋನ್​ನ ವಾಲೆಟ್ ಅಪ್ಲಿಕೇಶನ್‌ಗೆ ಸೇರಿಸಬಹುದು. ಅಂಗಡಿಯಲ್ಲಿ ಪಾವತಿ ಮಾಡುವಾಗ ಐಫೋನ್ ಅಥವಾ ಆಪಲ್ ವಾಚ್ ಅನ್ನು ಸಂಪರ್ಕರಹಿತ ಪಾವತಿ ಯಂತ್ರದ ಬಳಿ ಹಿಡಿದು ಫೇಸ್ ಐಡಿ, ಟಚ್ ಐಡಿ ಅಥವಾ ಪಾಸ್‌ಕೋಡ್ ಮೂಲಕ ದೃಢೀಕರಿಸಿ ಪಾವತಿ ಮಾಡಬಹುದು. ಆಪಲ್ ಪ್ರಕಾರ, ಪಾವತಿ ಸಂದರ್ಭದಲ್ಲಿ ನೈಜ ಕಾರ್ಡ್ ಸಂಖ್ಯೆಯನ್ನು ವ್ಯಾಪಾರಿಗೆ ನೀಡಲಾಗುವುದಿಲ್ಲ; ಅದರ ಬದಲಿಗೆ ಸಾಧನಕ್ಕೆ ಸಂಬಂಧಿಸಿದ ವಿಶೇಷ ಸಂಖ್ಯೆಯನ್ನು ಬಳಸಲಾಗುತ್ತದೆ.

Tech Tips: ಒಮ್ಮೆ ಫುಲ್ ಚಾರ್ಜ್ ಮಾಡಿದರೆ ಲ್ಯಾಪ್‌ಟಾಪ್ ಬ್ಯಾಟರಿ ಎಷ್ಟು ಗಂಟೆ ಬರಬೇಕು?

ಭಾರತದಲ್ಲಿ ಆಪಲ್ ಪೇಗೆ ಏಕೆ ಮಹತ್ವ?

ಭಾರತವು ವಿಶ್ವದ ಅತ್ಯಂತ ದೊಡ್ಡ ಡಿಜಿಟಲ್ ಪಾವತಿ ಮಾರುಕಟ್ಟೆಗಳಲ್ಲಿ ಒಂದಾಗಿದೆ. ಆದರೆ ಇಷ್ಟು ದೊಡ್ಡ ಮಾರುಕಟ್ಟೆಯಲ್ಲೂ ಆಪಲ್ ಪೇ ಇದುವರೆಗೆ ಅಧಿಕೃತವಾಗಿ ಲಭ್ಯವಿರಲಿಲ್ಲ. ಇದೀಗ ಭಾರತದಲ್ಲಿ ಐಫೋನ್ ಬಳಕೆದಾರರ ಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪಾವತಿ ಸೇವೆಯನ್ನು ಪರಿಚಯಿಸುವುದು ಆಪಲ್‌ನ ಸೇವಾ ವಲಯವನ್ನು ಮತ್ತಷ್ಟು ವಿಸ್ತರಿಸುವ ಪ್ರಯತ್ನವಾಗಬಹುದು.

ಆದರೆ ಆರಂಭದಲ್ಲಿ ಯುಪಿಐಗೆ ಬೆಂಬಲ ಇಲ್ಲದಿದ್ದರೆ, ಭಾರತದಲ್ಲಿ ಈಗಾಗಲೇ ವ್ಯಾಪಕವಾಗಿ ಬಳಕೆಯಲ್ಲಿರುವ ಯುಪಿಐ ಆಧಾರಿತ ಪಾವತಿ ಸೇವೆಗಳಿಗಿಂತ ಆಪಲ್ ಪೇನ ಬಳಕೆ ಹೇಗೆ ರೂಪುಗೊಳ್ಳಲಿದೆ ಎಂಬುದು ಗಮನಿಸಬೇಕಾದ ಅಂಶವಾಗಿದೆ. ಇತರ ಬ್ಯಾಂಕ್‌ಗಳ ಬೆಂಬಲ ಮತ್ತು ಭವಿಷ್ಯದಲ್ಲಿ UPI ಸೇರ್ಪಡೆಯಾಗುತ್ತದೆಯೇ ಎಂಬುದರ ಮೇಲೆ ಭಾರತದ ಆಪಲ್ ಪೇ ಅನುಭವವೂ ಅವಲಂಬಿತವಾಗಿರಲಿದೆ.

ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ