ಸಾಲದಾತರು ಕೇಳಿದ್ದು 22,006 ಕೋಟಿ ರೂ; ಸಿಗುವುದು 6.5 ಕೋಟಿ ರೂ; ಸುಭಾಷ್ಚಂದ್ರರ ರೀಪೇಮೆಂಟ್ ಪ್ಲಾನ್ಗೆ ಎನ್ಸಿಎಲ್ಟಿ ಅನುಮೋದನೆ
NCLT approves Subhash Chandra's Rs 6.5 crore debt repayment plan: ಸುಭಾಷ್ ಚಂದ್ರ ಅವರು ತಮ್ಮ ವೈಯಕ್ತಿಕ ದಿವಾಳಿ ಪ್ರಕ್ರಿಯೆಯಲ್ಲಿ ಸಾಲದಾತರಿಗೆ 6.5 ಕೋಟಿ ರೂ ಕೊಡುವುದಾಗಿ ಮುಂದಿಟ್ಟಿರುವ ಪ್ಲಾನ್ಗೆ ಎನ್ಸಿಎಲ್ಟಿ ಅನುಮೋದನೆ ನೀಡಿದೆ. ಆದರೆ, 22,006 ಕೋಟಿ ರೂ ವಸೂಲಿಯ ನಿರೀಕ್ಷೆಯಲ್ಲಿದ್ದ ಎಲ್ಐಸಿ ಹೌಸಿಂಗ್ ಫೈನಾನ್ಸ್ ಸೇರಿದಂತೆ ವಿವಿಧ ಸಾಲದಾತರಿಗೆ ನಿರಾಸೆಯಾಗಿದೆ. ಸುಭಾಷ್ ಚಂದ್ರ ಅವರ ಈಗಿರುವ ಆಸ್ತಿಯ ಒಟ್ಟು ಮೌಲ್ಯವು 6.5 ಕೋಟಿ ರೂ ಕೂಡ ಆಗುವುದಿಲ್ಲ ಎನ್ನುವುದು ನ್ಯಾಯಮಂಡಳಿ ಅನಿಸಿಕೆ.
Updated on: Aug 27, 2026 | 4:30 PM
ನವದೆಹಲಿ, ಆಗಸ್ಟ್ 27: ಝೀ ಗ್ರೂಪ್ ಸಂಸ್ಥಾಪಕ ಸುಭಾಷ್ ಚಂದ್ರ ಅವರ ವೈಯಕ್ತಿಕ ದಿವಾಳಿತನ ಪ್ರಕ್ರಿಯೆಗೆ (Personal Insolvency Resolution Process) ಸಂಬಂಧಿಸಿದಂತೆ ಮರುಪಾವತಿ ಯೋಜನೆಯನ್ನು (Repayment Plan) ನ್ಯಾಷನಲ್ ಕಂಪನಿ ಲಾ ಟ್ರಿಬ್ಯೂನಲ್ (NCLT)ಅನುಮೋದಿಸಿದೆ. ಕುತೂಹಲ ಎಂದರೆ, ಸಾಲದಾತರು ಸುಭಾಷ್ ಚಂದ್ರರಿಂದ ಒಟ್ಟು ₹22,006.57 ಕೋಟಿ ಬರಬೇಕು ಎಂದು ಕ್ಲೇಮ್ (Claims) ಮಾಡಿದ್ದರೂ, ಕೇವಲ ₹6.5 ಕೋಟಿ ಪಾವತಿಸಲು NCLT ಅನುಮೋದನೆ ನೀಡಿದೆ.
ಈ ಯೋಜನೆಯಿಂದಾಗಿ ಬ್ಯಾಂಕ್ಗಳು ಮತ್ತು ಹಣಕಾಸು ಸಂಸ್ಥೆಗಳಿಗೆ (Creditors) ಶೇ. 99.97 ರಷ್ಟು ನಷ್ಟ ಉಂಟಾಗಲಿದ್ದು, ಒಟ್ಟು ಬಾಕಿ ಹಣದಲ್ಲಿ ಕೇವಲ 0.03% ನಷ್ಟು ಮಾತ್ರ ಮರುಪಾವತಿಯಾಗಲಿದೆ. ಸಾಲದಾತರರು ಕೇಳುತ್ತಿದ್ದ ಹಣಕ್ಕೆ 99.97% ಕತ್ತರಿ (Haircut) ಬಿದ್ದಂತಾಗಿದೆ.
ಇದನ್ನೂ ಓದಿ: ಮೆಟಾದ ಈ ಪ್ರಯೋಗ ಯಶಸ್ವಿಯಾಗಿದ್ದರೆ ಅಲ್ಲೋಲಕಲ್ಲೋಲವಾಗುತ್ತಿತ್ತಾ ಜಗತ್ತು?; ಏನಿದು ಪ್ರಾಜೆಕ್ಟ್ ಓಟಿ?
ಈ ಮೊದಲು ಇಬ್ಬರು ಸದಸ್ಯರ ಪೀಠದಲ್ಲಿ ಭಿನ್ನಾಭಿಪ್ರಾಯ ಮೂಡಿದ್ದರಿಂದ, ಮೂರನೇ ಸದಸ್ಯರಾದ ನೀಲೇಶ್ ಶರ್ಮಾ (NCLT Member – Judicial) ಅವರಿಗೆ ಪ್ರಕರಣವನ್ನು ವಹಿಸಲಾಗಿತ್ತು. ಅವರು ಈ ಯೋಜನೆಯನ್ನು ಎತ್ತಿಹಿಡಿದಿದ್ದಾರೆ.
ಸುಭಾಷ್ ಚಂದ್ರ ಅವರು ಮುಂದಿಟ್ಟಿದ್ದ ಈ ರೀಪೇಮೆಂಟ್ ಪ್ಲಾನ್ಗೆ ಎಲ್ಐಸಿ ಹೌಸಿಂಗ್ ಫೈನಾನ್ಸ್ ಸೇರಿದಂತೆ ವಿವಿಧ ಸಾಲದಾತರು ವಿರೋಧ ವ್ಯಕ್ತಪಡಿಸಿದ್ದರು. ಆದರೆ, ವೋಟಿಂಗ್ ವಿಚಾರಕ್ಕೆ ಬಂದಾಗ, ಸಾಲದಾತರರ ವೋಟಿಂಗ್ ರೈಟ್ಸ್ ಶೇ. 20 ಮಾತ್ರವೇ ಇತ್ತು. ಹೀಗಾಗಿ, ಝೀ ಸಂಸ್ಥಾಪಕರ ರೀಪೆಂಟ್ ಪ್ಲಾನ್ಗೆ ಫೋರಂನ ಅನುಮೋದನೆ ಸಿಕ್ಕಿತ್ತು.
ಸುಭಾಷ್ ಚಂದ್ರರಿಂದ ಕೇಳಲಾಗಿದ್ದ ₹22,006 ಕೋಟಿ ಪೈಕಿ ಎಲ್ಐಸಿ ಹೌಸಿಂಗ್ ಫೈನಾನ್ಸ್ ಸಂಸ್ಥೆಯೊಂದೇ ₹1,322.39 ಕೋಟಿಗೆ ಕ್ಲೇಮ್ ಹಾಕಿತ್ತು. ಇದಕ್ಕೆ ಪ್ರತಿಯಾಗಿ ಎಲ್ಐಸಿಗೆ ಸಿಗಲಿರುವುದು ₹38,09,294 ಮಾತ್ರ.
ಇದನ್ನೂ ಓದಿ: ಇರಾನ್ನ ಕರೆನ್ಸಿ ಮಹಾಕುಸಿತ; ಒಂದು ಡಾಲರ್ಗೆ 20 ಲಕ್ಷ ರಿಯಾಲ್; ಇರಾನ್ ಆರ್ಥಿಕತೆ ತತ್ತರ
NCLT ಸ್ಪಷ್ಟನೆ: ಸಾಲದಾತರ ವಾಣಿಜ್ಯ ನಿರ್ಧಾರದಲ್ಲಿ (Commercial Wisdom) ಮಧ್ಯಪ್ರವೇಶಿಸುವುದು ಟ್ರಿಬ್ಯೂನಲ್ನ ಕೆಲಸವಲ್ಲ ಹಾಗೂ ಸುಭಾಷ್ ಚಂದ್ರ ಅವರ ವೈಯಕ್ತಿಕ ಆಸ್ತಿಯ ಮೌಲ್ಯವು ಪಾವತಿಸಲು ಒಪ್ಪಿಕೊಂಡಿರುವ ಮೊತ್ತಕ್ಕಿಂತ ಕಡಿಮೆಯಿದೆ ಎಂದು ಟ್ರಿಬ್ಯೂನಲ್ ಗಮನಿಸಿದೆ. ಅಂದರೆ ಸುಭಾಷ್ ಚಂದ್ರರ ಬಳಿ ಇರುವ ಆಸ್ತಿಯನ್ನು ಮಾರಿದರೂ ಅದರಿಂದ ಬರುವ ಹಣ 6 ಕೋಟಿ ರೂ ದಾಟದು. ಈ ಪ್ಲಾನ್ ಅನ್ನು ತಿರಸ್ಕರಿಸಿದರೆ ಆ ಹಣವನ್ನೂ ಅವರಿಂದ ವಸೂಲಿ ಮಾಡಲಾಗದು ಎಂಬುದು ನ್ಯಾಯಮಂಡಳಿಯ ಅನಿಸಿಕೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
