ಎಲ್​ಟಿಸಿಜಿ, ಎಸ್​ಟಿಟಿ ತೆರಿಗೆ ಕುರಿತು ಸಾರ್ವಜನಿಕರ ಅಭಿಪ್ರಾಯ ಆಲಿಸಲು ಸರ್ಕಾರ ಸಿದ್ಧ: ನಿರ್ಮಲಾ ಸೀತಾರಾಮನ್

ನವದೆಹಲಿ, ಅಕ್ಟೋಬರ್ 13: ದೀರ್ಘಾವಧಿ ಬಂಡವಾಳ ಲಾಭ ತೆರಿಗೆ (LTCG) ಮತ್ತು ಸೆಕ್ಯೂರಿಟೀಸ್ ಟ್ರಾನ್ಸಾಕ್ಷನ್ ತೆರಿಗೆ (STT) ಕುರಿತು ಅಭಿಪ್ರಾಯಗಳು ಮತ್ತು ಸಲಹೆಗಳನ್ನು ಕೇಳಲು ಸರ್ಕಾರ ಸದಾ ಮುಕ್ತವಾಗಿರುತ್ತದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ (Nirmala Sitharaman) ಹೇಳಿದ್ದಾರೆ. ದೆಹಲಿಯಲ್ಲಿ ಇಂದು ಆರಂಭಗೊಂಡ ‘ಬ್ಲೂಮ್‌ಬರ್ಗ್ ನ್ಯೂ ಎಕಾನಮಿ ಫೋರಮ್ 2026’ ಕಾರ್ಯಕ್ರಮದಲ್ಲಿ ಮಾತನಾಡಿದ ಕೇಂದ್ರ ನಿರ್ಮಲಾ ಸೀತಾರಾಮನ್, ಷೇರು ಮಾರುಕಟ್ಟೆಯಲ್ಲಿ ಇರುವ ತೆರಿಗೆ ವ್ಯವಸ್ಥೆ ಬಗ್ಗೆ ಹೂಡಿಕೆದಾರರ ಆತಂಕಕ್ಕೆ ಸಮಾಧಾನ ಹೇಳಲು ಯತ್ನಿಸಿದ್ದಾರೆ.

ಮುಂಬರುವ ಕೇಂದ್ರ ಬಜೆಟ್‌ ಸಿದ್ಧತೆಗಳು ಆರಂಭವಾಗಿರುವ ಹಿನ್ನೆಲೆಯಲ್ಲಿ, ಎಲ್‌ಟಿಸಿಜಿ ತೆರಿಗೆಯನ್ನು ತೆಗೆದುಹಾಕುವ ಅಥವಾ ಪರಿಷ್ಕರಿಸುವ ಕುರಿತು ದೇಶ ಹಾಗೂ ವಿದೇಶಿ ಹೂಡಿಕೆದಾರರಿಂದ ಬರುತ್ತಿರುವ ಸಲಹೆಗಳನ್ನು ಮತ್ತು ಚರ್ಚೆಗಳನ್ನು ತಾವು ಗಮನಿಸುತ್ತಿರುವುದಾಗಿ ಸಚಿವರು ತಿಳಿಸಿದ್ದಾರೆ. ವಿಭಿನ್ನ ಆಸ್ತಿ ವರ್ಗಗಳ ಮೇಲಿನ ತೆರಿಗೆಯನ್ನು ಏಕರೂಪವಾಗಿ ಪರಿಗಣಿಸಬೇಕೆ ಎಂಬ ಚರ್ಚೆಗಳು ಆರೋಗ್ಯಕರವಾಗಿದ್ದು, ಈ ಕುರಿತು ಬಜೆಟ್‌ಗೂ ಮುನ್ನ ಎಲ್ಲರ ಅಭಿಪ್ರಾಯಗಳನ್ನು ಆಲಿಸುವುದಾಗಿ ಅವರು ಸ್ಪಷ್ಟಪಡಿಸಿದ್ದಾರೆ. ಆದಾಗ್ಯೂ, ಬಜೆಟ್ ಸಮೀಪವಿರುವ ಕಾರಣ ಈ ಹಂತದಲ್ಲಿ ಯಾವುದೇ ಅಂತಿಮ ನಿರ್ಧಾರ ಅಥವಾ ಭರವಸೆ ನೀಡುವುದು ಅಕಾಲಿಕವಾಗುತ್ತದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ತಂತ್ರಜ್ಞಾನ ಹೆಚ್ಚು ಮಂದಿಗೆ ನೆರವಾಗಬೇಕು; ಶಕ್ತಿಯಿಂದ ಸಬಲೀಕರಣವಾಗಬೇಕು: ಬ್ಲೋಮ್​ಬರ್ಗ್ ಫೋರಂನಲ್ಲಿ ನರೇಂದ್ರ ಮೋದಿ

ರೂಪಾಯಿ ಮೌಲ್ಯದ ಏರಿಳಿತ ಮತ್ತು ಆರ್‌ಬಿಐ (RBI) ಪಾತ್ರ

ಕಳೆದ ಕೆಲವು ತಿಂಗಳುಗಳಿಂದ ಜಾಗತಿಕ ಸವಾಲುಗಳಿಂದಾಗಿ ರೂಪಾಯಿ ಮೌಲ್ಯದಲ್ಲಿ ಉಂಟಾಗಿರುವ ಕುಸಿತ ಹಾಗೂ ಏರಿಳಿತದ ಬಗ್ಗೆ ಮಾತನಾಡಿರುವ ಸಚಿವರು, ಆರ್‌ಬಿಐ ಯಾವುದೇ ನಿರ್ದಿಷ್ಟ ವಿನಿಮಯ ದರವನ್ನು ಕಾಯ್ದುಕೊಳ್ಳಲು ಪ್ರಯತ್ನಿಸುತ್ತಿಲ್ಲ, ಬದಲಿಗೆ ರೂಪಾಯಿಯ ಅತಿಯಾದ ಮತ್ತು ಅನಗತ್ಯ ಏರಿಳಿತವನ್ನು (Excessive Volatility) ತಡೆಯಲು ನಿರಂತರವಾಗಿ ಪರಿಣಾಮಕಾರಿ ಕ್ರಮಗಳನ್ನು ಕೈಗೊಳ್ಳುತ್ತಿದೆ ಎಂದು ತಿಳಿಸಿದ್ದಾರೆ. ಭಾರತದ ಸ್ಥೂಲ ಆರ್ಥಿಕ ಮೂಲಾಂಶಗಳು (Macro-economic fundamentals) ಹಾಗೂ ವಿದೇಶಿ ವಿನಿಮಯ ಮೀಸಲು (Forex Reserves) ಬಲವಾಗಿವೆ ಎಂದು ಅವರು ಭರವಸೆ ನೀಡಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ