ಭಾರತದ ವಿದ್ಯಾರ್ಥಿಗಳು ಉನ್ನತ ಶಿಕ್ಷಣಕ್ಕೆ ಉಕ್ರೇನ್ ಆಯ್ಕೆ ಮಾಡುತ್ತಿರುವುದೇಕೆ? ಹೇಗಿದೆ ಅಲ್ಲಿನ ಶಿಕ್ಷಣ ವ್ಯವಸ್ಥೆ?
ಭಾರತದಲ್ಲಿ ವಿದ್ಯಾರ್ಥಿಗಳ ಬಗ್ಗೆ ಕಾಳಜಿ ಹೆಚ್ಚುತ್ತಿರುವ ಹೊತ್ತಲ್ಲೇ ವಿದ್ಯಾರ್ಥಿಗಳು ಯಾಕೆ ಉಕ್ರೇನ್ಗೆ ಹೋಗುತ್ತಾರೆ ಎಂಬ ಪ್ರಶ್ನೆ ಸಾಮಾನ್ಯ ಜನರಲ್ಲಿ ಹುಟ್ಟುವುದು ಸಹಜ
Updated on: Feb 25, 2022 | 5:32 PM
ರಷ್ಯಾದ (Russia) ಪೂರ್ಣ ಪ್ರಮಾಣದ ಆಕ್ರಮಣದ ನಂತರ ಯುದ್ಧಭೂಮಿಯಾಗಿರುವ ಉಕ್ರೇನ್‌ನಿಂದ (Ukraine) ಸುರಕ್ಷಿತ ವಾಪಸಾತಿಗೆ ಅನುಕೂಲವಾಗುವಂತೆ ನೂರಾರು ಭಾರತೀಯ ವಿದ್ಯಾರ್ಥಿಗಳು ಸರ್ಕಾರಕ್ಕೆ ಮನವಿ ಮಾಡಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಹಲವಾರು ವಿಡಿಯೊಗಳು ಹರಿದಾಡುತ್ತಿದ್ದು ಇದರಲ್ಲಿ ಸಿಕ್ಕಿಬಿದ್ದ ವಿದ್ಯಾರ್ಥಿಗಳು ಹಿಂದಿರುಗಲು ವ್ಯವಸ್ಥೆ ಮಾಡುವಂತೆ ಭಾರತೀಯ ಅಧಿಕಾರಿಗಳನ್ನು ಒತ್ತಾಯಿಸಿದ್ದಾರೆ. ಅಂತಹ ಒಂದು ವಿಡಿಯೊದಲ್ಲಿ, ವಿದ್ಯಾರ್ಥಿಗಳು ತಮ್ಮ ಪ್ಯಾಕ್ ಮಾಡಿದ ಬ್ಯಾಗ್‌ಗಳೊಂದಿಗೆ ಭಾರತೀಯ ರಾಯಭಾರ ಕಚೇರಿಯ ಹೊರಗೆ ನಿಂತಿದ್ದು, ಅಧಿಕಾರಿಗಳ ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದಾರೆ. ರಷ್ಯಾದ ಗಡಿಯಿಂದ ಸುಮಾರು 50 ಮೈಲುಗಳಷ್ಟು ದೂರದಲ್ಲಿರುವ ಸುಮಾ ನಗರದಲ್ಲಿ, ರಷ್ಯಾದ ಪಡೆಗಳು ಈಶಾನ್ಯ ನಗರದ ಮೇಲೆ ಹಿಡಿತ ಸಾಧಿಸಿದ ನಂತರ ಸುಮಾರು 400 ಭಾರತೀಯ ವಿದ್ಯಾರ್ಥಿಗಳು ನೆಲಮಾಳಿಗೆಯಲ್ಲಿ ಆಶ್ರಯ ಪಡೆದಿದ್ದಾರೆ. ಭಾರತದಲ್ಲಿ ವಿದ್ಯಾರ್ಥಿಗಳ ಬಗ್ಗೆ ಕಾಳಜಿ ಹೆಚ್ಚುತ್ತಿರುವ ಹೊತ್ತಲ್ಲೇ ವಿದ್ಯಾರ್ಥಿಗಳು ಯಾಕೆ ಉಕ್ರೇನ್ ಗೆ ಹೋಗುತ್ತಾರೆ ಎಂಬ ಪ್ರಶ್ನೆ ಸಾಮಾನ್ಯ ಜನರಲ್ಲಿ ಹುಟ್ಟುವುದು ಸಹಜ. ಅಮೆರಿಕ, ಪಶ್ಚಿಮ ಯುರೋಪ್, ಆಸ್ಟ್ರೇಲಿಯಾ ಮತ್ತು ಚೀನಾವು ದಶಕಗಳಿಂದ ಯುವ ಭಾರತೀಯರಿಗೆ ಉನ್ನತ ಶಿಕ್ಷಣದ ಸ್ಥಳಗಳಿಗೆ ಆದ್ಯತೆ ನೀಡುತ್ತಿದ್ದರೆ, ಉಕ್ರೇನ್‌ನಲ್ಲಿನ ಯುದ್ಧವು ಸೋವಿಯತ್‌ ಯೂನಿಯನ್ ನ ಭಾಗವಾಗಿದ್ದ ಪೂರ್ವ ಯುರೋಪಿಯನ್ ರಾಷ್ಟ್ರದಲ್ಲಿ ಭಾರತೀಯ ವಿದ್ಯಾರ್ಥಿಗಳು ಅಧ್ಯಯನ ಮಾಡಲು ಆದ್ಯತೆ ನೀಡುತ್ತಿರುವುದನ್ನು ಬೆಳಕಿಗೆ ತಂದಿದೆ.
ಉಕ್ರೇನ್‌ನಲ್ಲಿರುವ ಹೆಚ್ಚಿನ ಭಾರತೀಯ ವಿದ್ಯಾರ್ಥಿಗಳು ವೈದ್ಯಕೀಯ ಕೋರ್ಸ್‌ಗಳಿಗೆ ದಾಖಲಾಗಿದ್ದಾರೆ ಮತ್ತು ಚಿಕ್ಕ ಗುಂಪು ಎಂಜಿನಿಯರಿಂಗ್ ಕೋರ್ಸ್‌ಗಳನ್ನು ಆಯ್ಕೆ ಮಾಡಿಕೊಂಡಿದೆ. ರಾಜಧಾನಿ ಕೈವ್‌ನಿಂದ ಸುಮಾರು 480 ಕಿಮೀ ದೂರದಲ್ಲಿರುವ ಖಾರ್ಕಿವ್ ರಾಷ್ಟ್ರೀಯ ವೈದ್ಯಕೀಯ ವಿಶ್ವವಿದ್ಯಾಲಯವು ದೇಶದಲ್ಲಿ ಹೆಚ್ಚು ಬೇಡಿಕೆಯಿರುವ ವೈದ್ಯಕೀಯ ಶಾಲೆಯಾಗಿದೆ.
ಉಕ್ರೇನ್‌ನಲ್ಲಿರುವ ವೈದ್ಯಕೀಯ ಕಾಲೇಜುಗಳು ವಿಶ್ವ ಆರೋಗ್ಯ ಸಂಸ್ಥೆಯಿಂದ ಮಾನ್ಯತೆ ಪಡೆದಿವೆ ಮತ್ತು ಅವರ ಪದವಿಗಳು ಭಾರತೀಯ ವೈದ್ಯಕೀಯ ಮಂಡಳಿಯಿಂದ ಮಾನ್ಯತೆ ಪಡೆದಿರುವುದರಿಂದ ಭಾರತದಲ್ಲಿ ಮಾನ್ಯವಾಗಿರುತ್ತವೆ.
ಎಂಬಿಬಿಎಸ್ ಸೀಟು ಪಡೆದ ನಂತರ, ಕರ್ನಾಟಕದ ರಾಯಚೂರು ಜಿಲ್ಲೆಯ ದೇವಸಗೂರು ಗ್ರಾಮದ ಚೆನ್ನವೀರೇಶ್ ಅವರು ಅಕ್ಟೋಬರ್ 4, 2021 ರಂದು ಉಕ್ರೇನ್ಗೆ ತೆರಳಿದರು. ಹಳ್ಳಿಯ ರೈತರಾದ ಅವರ ತಂದೆ, ತಮ್ಮ ಮಗನನ್ನು ಡಾಕ್ಟರ್ ಆಗಿ ಬರುವ ಭರವಸೆಯಿಂದ ಕಳುಹಿಸಿದ ದಿನಾಂಕವನ್ನು ಚೆನ್ನಾಗಿ ನೆನಪಿಸಿಕೊಂಡಿದ್ದಾರೆ. “ಅವನು ಪಿಯುಸಿಯಲ್ಲಿ ಚೆನ್ನಾಗಿ ಅಂಕ ಗಳಿಸಿದ್ದ. ಕಾಲೇಜಿನಿಂದ ಅವನ ಸೀನಿಯರ್ ಗಳು ಉಕ್ರೇನ್ಗೆ ಹೋಗಿದ್ದರು. ಚೆನ್ನವೀರೇಶ ನನ್ನ ಕಿರಿಯ ಮಗ. ಅವನು ಇದನ್ನು ಮಾಡಲು ಬಯಸಿದ್ದರು ಎಂದು ಹೇಳಿದಾಗ, ನಾವು ಒಪ್ಪಿಕೊಂಡೆವು,” ಎಂದು ಚೆನ್ನವೀರೇಶ್ ತಂದೆ ಸಾಂಬಶಿವ ಹೇಳುತ್ತಾರೆ. ಯುದ್ಧ ಪೀಡಿತ ಉಕ್ರೇನ್ನಲ್ಲಿ ಸಿಲುಕಿರುವ ನೂರಾರು ಭಾರತೀಯ ವಿದ್ಯಾರ್ಥಿಗಳಲ್ಲಿ ಚೆನ್ನವೀರೇಶ್ ಈಗ ಸೇರಿದ್ದಾರೆ.
ಉಕ್ರೇನ್ನಲ್ಲಿ ಎಂಬಿಬಿಎಸ್ ಕೋರ್ಸ್ ಅವಧಿ 6 ವರ್ಷ, ಭಾರತದಲ್ಲಿರುವಂತೆಯೇ ಐದು ವರ್ಷ ಕಾಲೇಜಿನಲ್ಲಿ ಓದು ಮುಗಿಸಿ ಮತ್ತು ಒಂದು ವರ್ಷ ಹೌಸ್ ಸರ್ಜನ್ ಆಗಿ ಕೆಲಸ ಮಾಡಬೇಕು . ರಷ್ಯಾದ ಆಕ್ರಮಣದ ನಂತರದ ಪರಿಸ್ಥಿತಿಯ ಬಗ್ಗೆ ಮಾತನಾಡಿದ ಚೆನ್ನವೀರೇಶ್, “ನಿನ್ನೆಯಿಂದಲೇ ಉದ್ವಿಗ್ನತೆ ಉಂಟಾಗಿದೆ. ಏನಾಗುತ್ತದೆ ಎಂದು ನೋಡೋಣ ಎಂದು ಹೇಳಿರುವುದಾಗಿ ನ್ಯೂಸ್ 18 ವರದಿ ಮಾಡಿದೆ.
ಪೂರನ್ ಚಂದ್ರಶೇಖರ್ ಪ್ರಸ್ತುತ ಉಕ್ರೇನ್ನಲ್ಲಿ ಓದುತ್ತಿರುವ ಕರ್ನಾಟಕ ಮೂಲದ ಮತ್ತೊಬ್ಬರು. ಇವರ ಹೆತ್ತವರಾದ ಚಂದ್ರಶೇಖರ್ ಮತ್ತು ರಾಜೇಶ್ವರಿ ಅವರು 12 ವರ್ಷದ ಸಹೋದರ ಲೋಚನ್ ಅವರೊಂದಿಗೆ ಬೆಂಗಳೂರಿನ ಸುಂಕದಕಟ್ಟೆ ಬಳಿಯ ತುಂಗಾ ನಗರದಲ್ಲಿ ವಾಸಿಸುತ್ತಿದ್ದಾರೆ. ಪೂರನ್ ಪಿಯುಸಿಯಲ್ಲಿ ಶೇ.95 ಅಂಕ ಗಳಿಸಿದ್ದು, ವಿಜಯನಗರ ಎಎಸ್‌ಸಿ ಕಾಲೇಜಿನ ವಿದ್ಯಾರ್ಥಿಯಾಗಿದ್ದ. ಈತ ನೀಟ್ ನಲ್ಲಿ ನಲ್ಲಿ ಅರ್ಹತೆ ಪಡೆದಿದ್ದ. ಆದರೆ ಕೊವಿಡ್ -19 ಪರಿಸ್ಥಿತಿಯಿಂದಾಗಿ, ಅವರು ಒಂದು ವರ್ಷ ಕಳೆದುಕೊಳ್ಳುವ ಭಯದಲ್ಲಿದ್ದರು. ಆಗ ಅವನ ಪೋಷಕರು ಅವನನ್ನು ಉಕ್ರೇನ್ಗೆ ಕಳುಹಿಸಲು ನಿರ್ಧರಿಸಿದರು.
ಪೂರನ್‌ಗೆ ಚಿಕ್ಕಂದಿನಿಂದಲೂ ಸೇನೆ ಸೇರಬೇಕೆಂಬ ಆಸೆ ಇತ್ತು. ಆದರೆ ಅವರು ದೈಹಿಕವಾಗಿ ಗಟ್ಟಿಮುಟ್ಟಾಗಿಲ್ಲ. ಆದ್ದರಿಂದ, ಅವನು ಇನ್ನೊಂದು ಮಾರ್ಗವನ್ನು ಆರಿಸಿಕೊಂಡನು. ಅವರು ವೈದ್ಯಕೀಯವನ್ನು ಅಧ್ಯಯನ ಮಾಡಲು ನಿರ್ಧರಿಸಿದರು, ಅವರ ಸ್ಪೆಷಲೈಸ್ ಮಾಡಿದ ನಂತರ ಸೈನ್ಯಕ್ಕೆ ಸೇರುತ್ತಾರೆ. ಅವನು ತನ್ನ ಗುರಿಯ ಬಗ್ಗೆ ತುಂಬಾ ಸ್ಪಷ್ಟವಾಗಿದ್ದನು. ನನ್ನ ಪತಿ ಎಂಎನ್ ಸಿ ಯಲ್ಲಿ ಉನ್ನತ ಹುದ್ದೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ ಮತ್ತು ಪೂರನ್‌ನ ಉನ್ನತ ವ್ಯಾಸಂಗಕ್ಕೆ ಯಾವ ದೇಶವು ಉತ್ತಮವಾಗಿದೆ ಎಂಬುದರ ಕುರಿತು ಆರು ತಿಂಗಳ ಕಾಲ ವ್ಯಾಪಕ ಸಂಶೋಧನೆ ನಡೆಸಿದ್ದರು ಎಂದು ಪೂರನ್ ಅವರ ತಾಯಿ ರಾಜೇಶ್ವರಿ ಹೇಳುತ್ತಾರೆ.
ಹಲವಾರು ಸಮಾಲೋಚನೆಗಳು ಮತ್ತು ಲೆಕ್ಕಾಚಾರಗಳ ನಂತರ, ನಾವು ಉಕ್ರೇನ್ ಅನ್ನು ಆಯ್ಕೆ ಮಾಡಿದೆವು. ಇಲ್ಲಿ ವೆಚ್ಚ ಕಮ್ಮಿ ಮತ್ತು ಶಿಕ್ಷಣದ ಗುಣಮಟ್ಟವೂ ತುಂಬಾ ಉತ್ತಮವಾಗಿದೆ. ನಿನ್ನೆ ಮೊನ್ನೆಯವರೆಗೂ ನಾವೆಲ್ಲ ತುಂಬಾ ಖುಷಿಯಾಗಿದ್ದೆವು. ನನ್ನ ಮಗ ಮತ್ತು ಅವನ ಸ್ನೇಹಿತರು ಖಾರ್ಕಿವ್‌ನಲ್ಲಿ ತಮ್ಮ ಜೀವನವನ್ನು ಆನಂದಿಸುತ್ತಿದ್ದರು, ”ಎಂದು ಅವರು ಹೇಳಿದ್ದಾರೆ.
ಹಲವಾರು ಪೋಷಕರು ತಮ್ಮ ಮಕ್ಕಳನ್ನು ವೈದ್ಯಕೀಯ ಅಧ್ಯಯನಕ್ಕಾಗಿ ಉಕ್ರೇನ್ಗೆ ಕಳುಹಿಸಲು ಕಾರಣ ಅಲ್ಲಿನ ಶಿಕ್ಷಣ ವೆಚ್ಚ ಎಂದು ಹೇಳಿದ್ದಾರೆ , ವಸತಿ ಕಾರ್ಡ್, ವೀಸಾ, ಏಜೆನ್ಸಿ ಶುಲ್ಕ ಮತ್ತು ಪ್ರಯಾಣ ವೆಚ್ಚಗಳು ಕಾಲೇಜು ಮತ್ತು ವಸತಿ ವೆಚ್ಚಗಳನ್ನು ಸೇರಿಸುವುದರಿಂದ ಮೊದಲ ವರ್ಷದಲ್ಲಿ ಇದು ಸರಿಸುಮಾರು 13 ರಿಂದ 14 ಲಕ್ಷ ರೂ ಆಗಿರುತ್ತದೆ. ಎರಡನೇ ವರ್ಷದಿಂದ ಬೋಧನಾ ಶುಲ್ಕ ಮತ್ತು ವಸತಿ ಮುಖ್ಯ ವೆಚ್ಚವಾಗಿರುವುದರಿಂದ ವೆಚ್ಚವು ವರ್ಷಕ್ಕೆ 5 ರಿಂದ 6 ಲಕ್ಷ ರೂ.ಗೆ ಇಳಿಯುತ್ತದೆ. ವೈದ್ಯಕೀಯ ವಿದ್ಯಾರ್ಥಿಗಳು ಸಾಮಾನ್ಯವಾಗಿ 10 ವರ್ಷಗಳ ವೀಸಾವನ್ನು ಆರಿಸಿಕೊಳ್ಳುತ್ತಾರೆ ಏಕೆಂದರೆ ಅವರು ಅಲ್ಲಿ ತಮ್ಮ ಸ್ನಾತಕೋತ್ತರರನ್ನು ಮುಂದುವರಿಸಲು ಯೋಜಿಸುತ್ತಾರೆ.
ಉಕ್ರೇನ್ನಲ್ಲಿ ಶಿಕ್ಷಣದ ನಂತರ, ವಿದ್ಯಾರ್ಥಿಗಳು NEXT (ನ್ಯಾಷನಲ್ ಎಕ್ಸಿಟ್ ಟೆಸ್ಟ್) ಎಂಬ ಬ್ರಿಡ್ಜ್ ಕೋರ್ಸ್-ಪರೀಕ್ಷೆಯನ್ನು ತೆಗೆದುಕೊಳ್ಳಬೇಕಾಗುತ್ತದೆ ಮತ್ತು ಅದರ ನಂತರ ಭಾರತದಲ್ಲಿ ತಮ್ಮ ಅಭ್ಯಾಸವನ್ನು ಪ್ರಾರಂಭಿಸಬಹುದು.
ಗುರುವಾರ ಹೊಸ ಸಲಹೆಯೊಂದರಲ್ಲಿ, ಕೈವ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ಈಗ ಉಕ್ರೇನ್ನಲ್ಲಿ ಸಮರ ಕಾನೂನಿನಡಿಯಲ್ಲಿ ಜನರ ಚಲನೆ ಕಷ್ಟಕರವಾಗಿದೆ ಮತ್ತು ಏರ್ ಸೈರನ್‌ಗಳು ಮತ್ತು ಬಾಂಬ್ ಎಚ್ಚರಿಕೆಗಳನ್ನು ಕೇಳುವವರು ಹತ್ತಿರದ ಬಾಂಬ್ ಶೆಲ್ಟರ್‌ಗಳನ್ನು ಕಂಡುಹಿಡಿಯಬೇಕು ಎಂದು ಹೇಳಿದೆ.
ಕೈವ್‌ನಲ್ಲಿ ಉಳಿಯಲು ಸ್ಥಳವಿಲ್ಲದೆ ಸಿಲುಕಿರುವ ಭಾರತೀಯ ವಿದ್ಯಾರ್ಥಿಗಳಿಗೆ ನೆಲೆಸಲು ರಾಯಭಾರ ಕಚೇರಿ ಸಂಸ್ಥೆಗಳೊಂದಿಗೆ ಸಂಪರ್ಕದಲ್ಲಿದೆ ಎಂದು ಅದು ಹೇಳಿದೆ. “ಕೆಲವು ಸ್ಥಳಗಳು ಏರ್ ಸೈರನ್/ಬಾಂಬ್ ಎಚ್ಚರಿಕೆಗಳನ್ನು ಕೇಳುತ್ತಿವೆ ಎಂದು ನಮಗೆ ತಿಳಿದಿದೆ. ನೀವು ಅಂತಹ ಪರಿಸ್ಥಿತಿಯನ್ನು ಎದುರಿಸಿದರೆ, ಗೂಗಲ್ ಮ್ಯಾಪ್ ಹತ್ತಿರದ ಬಾಂಬ್ ಶೆಲ್ಟರ್‌ಗಳ ಪಟ್ಟಿಯನ್ನು ಹೊಂದಿದ್ದು, ಅವುಗಳಲ್ಲಿ ಹಲವು ಭೂಗತ ಮೆಟ್ರೋಗಳಲ್ಲಿವೆ” ಎಂದು ಅದು ಹೇಳಿದೆ.
ಕೈವ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯೊಂದಿಗೆ ಸಂಪರ್ಕದಲ್ಲಿರಲು ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು ಈ ಕೆಳಗಿನ 24×7 ಸಹಾಯವಾಣಿಗಳನ್ನು ನೀಡಿದೆ
+38 0997300428
+38 0997300483
+38 0933980327
+38 0635917881
+38 0935046170
