‘ಬೇಗ ಶೂಟಿಂಗ್ ಮುಗಿಸಿ’; ನಿರ್ದೇಶಕನ ಫೋನ್ ಎತ್ತದ್ದಕ್ಕೆ ಸಂದರ್ಶನದಲ್ಲಿ ಕೋರಿಕೊಂಡ ನಿವೀನ್ ಪೌಳಿ

ಮಲಯಾಳಂ ನಟ ನಿವಿನ್ ಪೌಳಿ ತಮ್ಮ ಮುಂಬರುವ ತಮಿಳು ಸಿನಿಮಾ ‘ಬೆಂಜ್’ ತಂಡದ ವಿರುದ್ಧ ಸಾರ್ವಜನಿಕವಾಗಿ ಅಸಮಾಧಾನ ಹೊರಹಾಕಿದ್ದಾರೆ. ಈ ಚಿತ್ರದ ಶೂಟಿಂಗ್ ಪದೇ ಪದೇ ವಿಳಂಬವಾಗುತ್ತಿದೆ. ಇದರಿಂದಾಗಿ ಅವರು ಕಳೆದ ಒಂದು ವರ್ಷದಿಂದ ಒಂದೇ ರೀತಿಯ ಲುಕ್ ಕಾಯ್ದುಕೊಳ್ಳುವಂತಾಗಿದೆ. ಬೇರೆ ಸಿನಿಮಾಗಳಿಗೆ ಲುಕ್ ಬದಲಾಯಿಸಲು ಸಾಧ್ಯವಾಗದೆ ನಟ ತೀವ್ರ ಸಂಕಷ್ಟ ಎದುರಿಸುತ್ತಿದ್ದಾರೆ.

ರೇಖಾ ಮೆನನ್ ಅವರಿಗೆ ನೀಡಿದ ಸಂದರ್ಶನದಲ್ಲಿ ನಿವಿನ್ ಈ ವಿಷಯ ತಿಳಿಸಿದ್ದಾರೆ. ಒಪ್ಪಂದದ ಪ್ರಕಾರ ಅವರು ತಮ್ಮ ಪಾತ್ರದ ಲುಕ್ ಬದಲಾಯಿಸುವಂತಿಲ್ಲ. ಕಳೆದ ವರ್ಷದಿಂದ ಈ ಸಿನಿಮಾದ ಶೂಟಿಂಗ್ ಆರಂಭವಾಗಿದೆ. ಆದರೆ ದಿನಾಂಕಗಳು ಮುಂದೂಡಲ್ಪಡುತ್ತಲೇ ಇವೆ. ಇದು ತಮ್ಮ ಇತರ ಸಿನಿಮಾಗಳ ಕೆಲಸಕ್ಕೆ ತೊಡಕಾಗಿದೆ ಎಂದು ಅವರು ಹೇಳಿದ್ದಾರೆ.

‘ಬೆಂಜ್’ ಸಿನಿಮಾದಲ್ಲಿ ನಿವಿನ್ ‘ಟ್ವಿನ್ ಫಿಶ್ ವಾಲ್ಟರ್’ ಎಂಬ ಖಳನಾಯಕನ ಪಾತ್ರ ಮಾಡುತ್ತಿದ್ದಾರೆ. ಇದು ತಮಿಳಿನಲ್ಲಿ ಅವರ ಮೊದಲ ವಿಲನ್ ಪಾತ್ರವಾಗಿದೆ. 2025 ರ ನವೆಂಬರ್‌ನಲ್ಲಿ ಅವರು ಮೊದಲ ಹಂತದ ಶೂಟಿಂಗ್ ಮುಗಿಸಿದ್ದರು. ಇನ್ನು 35 ದಿನಗಳ ಶೂಟಿಂಗ್ ಬಾಕಿ ಇದೆ. ಎಂಟು ತಿಂಗಳಾದರೂ ತಂಡದಿಂದ ಯಾವುದೇ ಸ್ಪಂದನೆ ಸಿಕ್ಕಿಲ್ಲ.

ತಮ್ಮ ಬೇಸರವನ್ನು ತೋಡಿಕೊಂಡ ನಟ ಚಿತ್ರತಂಡಕ್ಕೆ ನೇರ ಮನವಿ ಮಾಡಿದ್ದಾರೆ. ‘ಚಿತ್ರತಂಡಕ್ಕೆ ಕರೆ ಮಾಡಿ ನನಗೂ ಸಾಕಾಗಿದೆ. ಏನೂ ಮುಂದುವರಿಯುತ್ತಿಲ್ಲ. ಈ ಸಂದರ್ಶನ ನೋಡಿದ ಮೇಲಾದರೂ ಅವರು ಸೂಕ್ತ ನಿರ್ಧಾರ ತೆಗೆದುಕೊಳ್ಳಲಿ. ಶೀಘ್ರವೇ ಶೂಟಿಂಗ್ ಮುಗಿಸಿಕೊಡಲಿ’ ಎಂದು ನಿವಿನ್ ವಿನಂತಿಸಿದ್ದಾರೆ.

ಇದನ್ನೂ ಓದಿ: ಮಲಯಾಳಂ ಸಿನಿಮಾನಲ್ಲಿ ನಟಿಸಲಿರುವ ರುಕ್ಮಿಣಿ, ನಾಯಕ ಯಾರು?

ಬಾಕಿಯಾರಾಜ್ ಕಣ್ಣನ್ ನಿರ್ದೇಶನದ ‘ಬೆಂಜ್’ ಸಿನಿಮಾ ಲೋಕೇಶ್ ಕನಗರಾಜ್ ಸಿನಿಮಾಟಿಕ್ ಯೂನಿವರ್ಸ್ (LCU) ಭಾಗವಾಗಿದೆ. ರಾಘವ ಲಾರೆನ್ಸ್ ಇದರಲ್ಲಿ ನಾಯಕನಾಗಿ ನಟಿಸುತ್ತಿದ್ದಾರೆ. ಆದರೆ ಲೋಕೇಶ್ ಕನಗರಾಜ್ ಬೇರೆ ಪ್ರಾಜೆಕ್ಟ್‌ಗಳಲ್ಲಿ ಬ್ಯುಸಿಯಾಗಿದ್ದಾರೆ. ಹೀಗಾಗಿ ಸಿನಿಮಾದ ಕೆಲಸಗಳು ತಡವಾಗುತ್ತಿವೆ ಎಂದು ಹೇಳಲಾಗುತ್ತಿದೆ.

ನಿವೀನ್ ಅವರ ‘ಬೆತ್ಲೆಹ್ಯಾಮ್ ಕುಟುಂಬ ಯುನಿಟ್’ ಸಿನಿಮಾ ಇತ್ತೀಚೆಗೆ ರಿಲೀಸ್ ಆಗಿದೆ. ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಯಶಸ್ಸು ಕಂಡಿದೆ. ಇದು ರೊಮ್ಯಾಂಟಿಕ್ ಸಿನಿಮಾ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.