BBK: 5 ಲಕ್ಷ ರೂಪಾಯಿ ಆಫರ್ ನೀಡಿದ ಬಿಗ್ ಬಾಸ್; ಇದನ್ನು ಗೆಲ್ಲಲು ಸ್ಪರ್ಧಿಗಳು ಏನು ಮಾಡಬೇಕು?
Bigg Boss Kannada OTT: ‘ಮನಸ್ಸಿಟ್ಟು ಆಟ ಆಡಿ. ನಿಮ್ಮನ್ನು ನೀವು ಸಾಬೀತು ಪಡಿಸಿಕೊಳ್ಳಲು ಇರುವುದು 13 ದಿನ ಮಾತ್ರ’ ಎಂದು ಬಿಗ್ ಬಾಸ್ ಹೇಳಿದ್ದಾರೆ.
Updated on:Sep 05, 2022 | 10:00 PM
ಕಿಚ್ಚ ಸುದೀಪ್ (Kichcha Sudeep) ನಡೆಸಿಕೊಡುತ್ತಿರುವ ‘ಬಿಗ್ ಬಾಸ್ ಕನ್ನಡ ಒಟಿಟಿ’ (Bigg Boss Kannada OTT) ಕಾರ್ಯಕ್ರಮದಲ್ಲಿ ಹಲವು ಟ್ವಿಸ್ಟ್ಗಳು ಎದುರಾಗುತ್ತಿವೆ. ನೇರವಾಗಿ ಒಟಿಟಿಯಲ್ಲಿ ಬಿಗ್ ಬಾಸ್ (Bigg Boss Kannada) ಪ್ರಸಾರ ಆಗುತ್ತಿರುವುದು ಕನ್ನಡದ ಪ್ರೇಕ್ಷಕರಿಗೆ ಹೊಸ ಅನುಭವ ನೀಡುತ್ತಿದೆ. ಈ ಶೋನಲ್ಲಿ ಹಲವು ಬಗೆಯ ವ್ಯಕ್ತಿತ್ವ ಇರುವ ಸ್ಪರ್ಧಿಗಳ ಭಾಗವಹಿಸಿದ್ದಾರೆ. 16 ಸ್ಪರ್ಧಿಗಳಿಂದ ಆರಂಭ ಆದ ‘ಬಿಗ್ ಬಾಸ್ ಕನ್ನಡ ಒಟಿಟಿ’ ಶೋನಲ್ಲಿ ಈಗ 9 ಜನ ಉಳಿದುಕೊಂಡಿದ್ದಾರೆ. ಐದನೇ ವಾರದಲ್ಲಿ ಆಟದ ಮಜಾ ಹೆಚ್ಚಿದೆ. ಈ ಸಂದರ್ಭದಲ್ಲಿ ಎಲ್ಲ ಸ್ಪರ್ಧಿಗಳಿಗೂ ಬಿಗ್ ಬಾಸ್ ಒಂದು ಬಂಪರ್ ಆಫರ್ ನೀಡಿದ್ದಾರೆ. ಮನೆಯ ಸದಸ್ಯರು ಬರೋಬ್ಬರಿ 5 ಲಕ್ಷ ರೂಪಾಯಿ ಗೆಲ್ಲಬಹುದು. ಈ ಆಫರ್ ಘೋಷಣೆ ಆಗುತ್ತಿದ್ದಂತೆಯೇ ಎಲ್ಲ ಸ್ಪರ್ಧಿಗಳಿಗೂ ಹುಮ್ಮಸ್ಸು ಹೆಚ್ಚಾಗಿದೆ.
ನಂದಿನಿ, ಜಶ್ವಂತ್, ಸೋನು ಶ್ರೀನಿವಾಸ್ ಗೌಡ, ರಾಕೇಶ್ ಅಡಿಗ, ಆರ್ಯವರ್ಧನ್ ಗುರೂಜಿ, ರೂಪೇಶ್ ಶೆಟ್ಟಿ, ಸಾನ್ಯಾ ಐಯ್ಯರ್, ಜಯಶ್ರೀ ಆರಾಧ್ಯ ಅವರು ಸದ್ಯ ಬಿಗ್ ಬಾಸ್ ಮನೆಯಲ್ಲಿ ಉಳಿದುಕೊಂಡಿದ್ದಾರೆ. 5 ಲಕ್ಷ ರೂಪಾಯಿ ಹಣ ಗೆಲ್ಲಲು ಎಲ್ಲರೂ ಪ್ರಯತ್ನ ಆರಂಭಿಸಿದ್ದಾರೆ. ಅದಕ್ಕಾಗಿ ಬಿಗ್ ಬಾಸ್ ವಿವಿಧ ಟಾಸ್ಕ್ಗಳನ್ನು ನೀಡುತ್ತಿದ್ದಾರೆ.
ಬಿಗ್ ಬಾಸ್ ಮಾಡಿದ ಘೋಷಣೆ ಏನು?
‘ಬಿಗ್ ಬಾಸ್ ಒಟಿಟಿ ಪ್ರಯಾಣ ಮುಗಿಯೋಕೆ ಬಾಕಿ ಇರೋದು ಇನ್ನು ಎರಡೇ ಹೆಜ್ಜೆ. ಈ ಹಂತವನ್ನು ತಲುಪಲು ನೀವೆಲ್ಲರೂ ವೈಯಕ್ತಿಕವಾಗಿ, ತಂಡಗಳಾಗಿ ವಿವಿಧ ಟಾಸ್ಕ್ಗಳನ್ನು ಆಡಿದ್ದೀರಿ. ಕೆಲವು ಟಾಸ್ಕ್ಗಳಲ್ಲಿ ಗೆದ್ದಿದ್ದೀರಿ, ಇನ್ನು ಕೆಲವು ಟಾಸ್ಕ್ಗಳಲ್ಲಿ ಕಲಿತಿದ್ದೀರಿ. ಈ ವಾರದ ಟಾಸ್ಕ್ನಲ್ಲಿ ಮನೆಯ ಸದಸ್ಯರಿಗೆ 5 ಲಕ್ಷ ರೂಪಾಯಿವರೆಗೆ ಹಣ ಸಂಗ್ರಹಿಸುವ ಅವಕಾಶವನ್ನು ಬಿಗ್ ಬಾಸ್ ನೀಡುತ್ತಿದ್ದಾರೆ’ ಎಂಬ ಘೋಷಣೆ ಮಾಡಲಾಗಿದೆ.
‘ಈ 5 ಲಕ್ಷ ರೂಪಾಯಿ ಗಳಿಸಲು ವಿವಿಧ ಟಾಸ್ಕ್ಗಳು ಇರುತ್ತವೆ. ಪ್ರತಿ ಟಾಸ್ಕ್ನ ಮೌಲ್ಯ ಮತ್ತು ಆಡುವ ಸದಸ್ಯರ ಸಂಖ್ಯೆಯನ್ನು ತಿಳಿಸಲಾಗುತ್ತಿದೆ. ಮನೆಯ ಸದಸ್ಯರು ಸಂಗ್ರಹಿಸಿದ ಹಣವನ್ನು ಫಿನಾಲೆ ವೇದಿಕೆಯಲ್ಲಿ ಜನಮೆಚ್ಚಿದ ಒಬ್ಬ ಸದಸ್ಯನಿಗೆ ನೀಡಲಾಗುತ್ತದೆ. ಪ್ರತಿ ಟಾಸ್ಕ್ ಅನ್ನು ಮನಸ್ಸಿಟ್ಟು ಆಡಿ. ನಿಮ್ಮನ್ನು ನೀವು ಸಾಬೀತುಪಡಿಸಿಕೊಳ್ಳಲು ಇರುವುದು 13 ದಿನ ಮಾತ್ರ’ ಎಂದು ಬಿಗ್ ಬಾಸ್ ಹೇಳಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 10:00 pm, Mon, 5 September 22
