ಪುನೀತ್ ನಿಧನಕ್ಕೂ ಮೊದಲು ಏನಾಯ್ತು? ವಿವರಿಸಿದ ಡಾ. ರಮಣ್ ರಾವ್

ಕನ್ನಡದ ನಟ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಗಲಿ ಐದು ವರ್ಷಗಳು ಸಂದಿವೆ. ಅವರ ಅಕಾಲಿಕ ನಿಧನದ ನೋವು ಇಂದಿಗೂ ಕನ್ನಡಿಗರ ಮನಸ್ಸಿನಲ್ಲಿ ಹಸಿರಾಗಿದೆ. ಜಿಮ್‌ನಲ್ಲಿ ವರ್ಕೌಟ್ ಮಾಡುವ ವೇಳೆ ಅವರಿಗೆ ಹೃದಯಾಘಾತ ಸಂಭವಿಸಿತ್ತು ಎಂದು ಅಂದು ಹೇಳಲಾಯಿತು. ಅಂದು ಅಪ್ಪು ಕೊನೆಯ ಕ್ಷಣಗಳಲ್ಲಿ ಏನೆಲ್ಲ ಆಯಿತು ಎಂಬುದನ್ನು ಅವರ ವೈದ್ಯರು ರ್ಯಾಪಿಡ್ ರಶ್ಮಿ  ಸಂದರ್ಶನದಲ್ಲಿ ಬಿಚ್ಚಿಟ್ಟಿದ್ದಾರೆ.

ಡಾ. ರಮಣ ರಾವ್ ಅವರು ಅಪ್ಪು ಜೊತೆಗಿನ ನಂಟನ್ನು ನೆನಪಿಸಿಕೊಂಡಿದ್ದಾರೆ. ಅಪ್ಪು ನನಗೆ ಮಗನ ಸಮಾನರಾಗಿದ್ದರು ಎಂದು ಅವರು ಭಾವುಕರಾಗಿದ್ದಾರೆ. ಅಂದು ಜಿಮ್‌ನಲ್ಲಿ ಅಪ್ಪು ಎಂದಿಗಿಂತ ಭಿನ್ನವಾಗಿ ಕಿಕ್ ಬಾಕ್ಸಿಂಗ್ ಮಾಡಿದ್ದರು. ಸುಮಾರು ಒಂದೂವರೆ ಗಂಟೆಗಳ ಕಾಲ ಅವರು ಈ ಕಸರತ್ತು ನಡೆಸಿದ್ದರು. ನಂತರ ತೀವ್ರ ಆಯಾಸಗೊಂಡು ಅವರು ಕ್ಲಿನಿಕ್‌ಗೆ ಆಗಮಿಸಿದ್ದರು.

‘ಕ್ಲಿನಿಕ್‌ಗೆ ಬಂದಾಗ ಅಪ್ಪು ಮೈಯೆಲ್ಲಾ ಬೆವರ್ರು ತುಂಬಿತ್ತು. ಅವರ ಸ್ಥಿತಿ ನೋಡಿ ವೈದ್ಯರಿಗೆ ಅನುಮಾನ ಮೂಡಿತ್ತು. ತಕ್ಷಣವೇ ಅವರ ಇಸಿಜಿ ಮಾಡಿಸಲಾಯಿತು. ಇಸಿಜಿಯಲ್ಲಿ ಹೃದಯದ ಮೇಲಿನ ಭಾರ ಸ್ಪಷ್ಟವಾಗಿ ಗೋಚರಿಸಿತು. ಇದು ಸಾಮಾನ್ಯ ಹೃದಯಾಘಾತವಲ್ಲ ಬದಲಿಗೆ ತೀವ್ರ ಒತ್ತಡವಾಗಿತ್ತು’ ಎಂದಿದ್ದಾರೆ ರಮಣ.

‘ಕೂಡಲೇ ಎಚ್ಚೆತ್ತ ವೈದ್ಯರು ಅಪ್ಪು ಅವರಿಗೆ ಪ್ರಥಮ ಚಿಕಿತ್ಸೆ ನೀಡಿದರು. ಅವರನ್ನು ತಕ್ಷಣವೇ ಆಸ್ಪತ್ರೆಗೆ ಕರೆದೊಯ್ಯಲು ವ್ಯವಸ್ಥೆ ಮಾಡಲಾಯಿತು. ಅಪ್ಪು ತಮ್ಮದೇ ಕಾರಿನಲ್ಲಿ ಆಸ್ಪತ್ರೆಗೆ ತೆರಳಿದ್ದರು. ದಾರಿಯಲ್ಲಿ ಅವರು ಮಾತನಾಡುತ್ತಾ ತಮ್ಮ ಪತ್ನಿ ಅಶ್ವಿನಿ ತೊಡೆಯ ಮೇಲೆ ತಲೆ ಇಟ್ಟು ವಿಶ್ರಾಂತಿ ಪಡೆದಿದ್ದರು’ ಎಂದು ವಿವರಿಸಿದ್ದಾರೆ ರಮಣ.

ಇದನ್ನೂ ಓದಿ: ಹೊಸಪೇಟೆಯಲ್ಲಿ ಅಗ್ನಿಸಾಕ್ಷಿ 100ರ ಸಂಚಿಕೆ ಸಂಭ್ರಮ; ಪುನೀತ್ ಪ್ರತಿಮೆಗೆ ವಿಶೇಷ ನಮನ

‘ಆದರೆ ಆಸ್ಪತ್ರೆ ತಲುಪಲು ಕೇವಲ ಒಂದು ನಿಮಿಷವಿರುವಾಗ ಅವರ ಹೃದಯ ಬಡಿತ ನಿಂತಿತ್ತು. ಆಸ್ಪತ್ರೆಗೆ ತಲುಪಿದಾಗ ಅಪ್ಪು ಅವರಲ್ಲಿ ಯಾವುದೇ ಸ್ಪಂದನೆ ಇರಲಿಲ್ಲ. ವೈದ್ಯರು ಸಾಕಷ್ಟು ಪ್ರಯತ್ನಪಟ್ಟರೂ ಅವರನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ’ ಎಂದಿದ್ದಾರೆ ಅವರು. ಈ ಕಹಿ ಸತ್ಯವನ್ನು ನೆನೆದು ವೈದ್ಯರು ಇಂದಿಗೂ ಬೇಸರ ಮಾಡಿಕೊಳ್ಳುತ್ತಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 11:01 am, Thu, 15 October 26