ಭಾನುವಾರವೂ ಮಂಕಾದ ‘ಪ್ಯಾರಡೈಸ್’; ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿದ ಚಿತ್ರ

ಟಾಲಿವುಡ್ ನಟ ನಾನಿ ಅಭಿನಯದ ಬಹುನಿರೀಕ್ಷಿತ ‘ಪ್ಯಾರಡೈಸ್‘ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಗಳಿಕೆ ಮಾಡಲು ಹೆಣಗಾಡುತ್ತಿದೆ. ವಾರಾಂತ್ಯದ ರಜಾದಿನವಾದ ಭಾನುವಾರ ಚಿತ್ರದ ಕಲೆಕ್ಷನ್‌ನಲ್ಲಿ ಭಾರಿ ಜಿಗಿತ ಕಾಣಲಿದೆ ಎಂದು ಚಿತ್ರತಂಡ ಹಾಗೂ ವಿತರಕರು ಬಹಳ ಕಾತರದಿಂದ ನಿರೀಕ್ಷಿಸಿದ್ದರು. ಆದರೆ ಬಿಡುಗಡೆಯಾದ ನಾಲ್ಕನೇ ದಿನವಾದ ಭಾನುವಾರವೂ ಚಿತ್ರದ ಕಲೆಕ್ಷನ್‌ನಲ್ಲಿ ಯಾವುದೇ ರೀತಿಯ ಭಾರಿ ಚೇತರಿಕೆ ಕಂಡುಬಂದಿಲ್ಲ. ಸಿನಿಮಾದ ಮುಂದಿನ ಹಾದಿ ಮತ್ತಷ್ಟು ಕಠಿಣವಾಗಿದೆ.

ಭಾನುವಾರದ ಗಳಿಕೆಯ ವಿವರಗಳನ್ನು ಗಮನಿಸುವುದಾದರೆ, ದೇಶಾದ್ಯಂತ ಒಟ್ಟು 6,764 ಶೋಗಳಿಂದ ಶೇಕಡಾ 35.7 ರಷ್ಟು ಥಿಯೇಟರ್ ಅಕ್ಯುಪೆನ್ಸಿಯೊಂದಿಗೆ ಸಿನಿಮಾ 15.70 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡಿದೆ. ಇನ್ನು ವಿದೇಶಿ ಮಾರುಕಟ್ಟೆಯಲ್ಲೂ ಭಾನುವಾರ ಕೇವಲ 2.00 ಕೋಟಿ ರೂಪಾಯಿ ಗಳಿಸುವಲ್ಲಿ ಯಶಸ್ವಿಯಾಗಿದೆ. ಈ ಮೂಲಕ ಚಿತ್ರದ ಒಟ್ಟು ವಿಶ್ವವ್ಯಾಪಿ ಗ್ರಾಸ್ ಕಲೆಕ್ಷನ್ 138.25 ಕೋಟಿ ರೂಪಾಯಿಗೆ ತಲುಪಿದೆ. ಭಾರತದಲ್ಲಿ ಇದುವರೆಗೆ ಒಟ್ಟು 109.00 ಕೋಟಿ ರೂಪಾಯಿ ಗ್ರಾಸ್ ಹಾಗೂ 92.10 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ದಾಖಲಾಗಿದೆ.

ಆರಂಭದ ದಿನಗಳಲ್ಲಿ ಶುಭಾರಂಭ ಕಂಡಿದ್ದ ಈ ಚಿತ್ರದ ಗಳಿಕೆಯ ಗ್ರಾಫ್ ದಿನದಿಂದ ದಿನಕ್ಕೆ ಕುಸಿಯುತ್ತಿರುವುದು ಎದ್ದು ಕಾಣುತ್ತಿದೆ. ಬುಧವಾರದ ಪ್ರಿಮಿಯರ್ ಶೋಗಳಿಂದ 11.60 ಕೋಟಿ ರೂಪಾಯಿ ಹಾಗೂ ಮೊದಲ ದಿನವಾದ ಗುರುವಾರ 34.65 ಕೋಟಿ ರೂಪಾಯಿ ಭರ್ಜರಿ ಓಪನಿಂಗ್ ಪಡೆದುಕೊಂಡಿತ್ತು. ಆದರೆ ಎರಡನೇ ದಿನವಾದ ಶುಕ್ರವಾರ 14.90 ಕೋಟಿ ರೂಪಾಯಿಗೆ ಕುಸಿದರೆ, ಮೂರನೇ ದಿನವಾದ ಶನಿವಾರ 15.25 ಕೋಟಿ ರೂಪಾಯಿ ಮಾತ್ರ ಗಳಿಸಲು ಸಾಧ್ಯವಾಯಿತು.

ಸಾಮಾನ್ಯವಾಗಿ ಯಾವುದೇ ದೊಡ್ಡ ಸಿನಿಮಾಗೆ ಭಾನುವಾರದ ರಜಾದಿನವು ಕಲೆಕ್ಷನ್ ಹೆಚ್ಚಿಸಿಕೊಳ್ಳಲು ಸುವರ್ಣ ಅವಕಾಶವಾಗಿರುತ್ತದೆ. ಆದರೆ ‘ಪ್ಯಾರಡೈಸ್’ ವಿಚಾರದಲ್ಲಿ ಭಾನುವಾರದ ರಜೆಯೂ ದೊಡ್ಡ ಮಟ್ಟದಲ್ಲಿ ಸಹಾಯಕ್ಕೆ ಬರಲಿಲ್ಲ. ವೀಕೆಂಡ್‌ನಲ್ಲೇ ಕೇವಲ ಶೇಕಡಾ 35.7 ರಷ್ಟು ಮಾತ್ರ ಥಿಯೇಟರ್‌ಗಳು ಭರ್ತಿಯಾಗಿರುವುದು ಚಿತ್ರದ ಬಾಕ್ಸ್ ಆಫೀಸ್ ಭವಿಷ್ಯದ ಮೇಲಿದ್ದ ನಿರೀಕ್ಷೆಯನ್ನು ತಲೆಕೆಳಗಾಗುವಂತೆ ಮಾಡಿದೆ.

ಇದನ್ನೂ ಓದಿ: ಎರಡನೇ ದಿನಕ್ಕೆ ನೆಲಕಚ್ಚಿದ ಪ್ಯಾರಡೈಸ್ ಕಲೆಕ್ಷನ್; ಶೇ. 57ರಷ್ಟು ಕುಸಿತ

ಚಿತ್ರಕ್ಕೆ ಪ್ರೇಕ್ಷಕರಿಂದ ಮಿಶ್ರಪ್ರತಿಕ್ರಿಯೆ ವ್ಯಕ್ತವಾಗಿರುವುದರಿಂದ, ವಾರಾಂತ್ಯದಲ್ಲೇ ಮಂಕು ಕವಿದ ವಾತಾವರಣ ನಿರ್ಮಾಣವಾಗಿದೆ. ರಜಾದಿನಗಳಲ್ಲೇ ಸಾಧಾರಣ ಪ್ರದರ್ಶನ ಕಂಡಿರುವ ಈ ಸಿನಿಮಾ, ಕೆಲಸದ ದಿನವಾದ ಸೋಮವಾರದ ಬಾಕ್ಸ್ ಆಫೀಸ್ ಪರೀಕ್ಷೆಯಲ್ಲಿ ಮತ್ತಷ್ಟು ಭಾರಿ ಕುಸಿತ ಕಾಣುವ ಸಾಧ್ಯತೆ ದಟ್ಟವಾಗಿದೆ. ಹೀಗಾಗಿ ಸೋಮವಾರದ ಲಿಟ್ಮಸ್ ಟೆಸ್ಟ್‌ನಲ್ಲಿ ‘ಪ್ಯಾರಡೈಸ್’ ಬಹುತೇಕ ಫೇಲ್ ಆಗುವ ಲಕ್ಷಣಗಳು ಎದ್ದು ಕಾಣುತ್ತಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.