ನಿದ್ರೆ ಇಲ್ಲದೆ ಮನುಷ್ಯ ಎಷ್ಟು ದಿನ ಬದುಕಬಲ್ಲ? ಹೆಚ್ಚು ಹೊತ್ತು ನಿದ್ರೆ ಮಾಡದಿದ್ದರೆ ಏನಾಗುತ್ತದೆ?

ಆಹಾರ ಮತ್ತು ನೀರಿಲ್ಲದೆ ಮನುಷ್ಯ ಕೆಲವು ದಿನಗಳವರೆಗೆ ಬದುಕಬಹುದು. ಆದರೆ ನಿದ್ರೆ (Sleeping) ಇಲ್ಲದೆ ದೀರ್ಘಕಾಲ ಇರುವುದು ದೇಹ ಮತ್ತು ಮೆದುಳಿನ ಮೇಲೆ ಗಂಭೀರ ಪರಿಣಾಮ ಬೀರಬಹುದು. ನಿದ್ರೆ ಎಂದರೆ ಕೇವಲ ದಣಿವು ನಿವಾರಿಸಿಕೊಳ್ಳಲು ಸಿಗುವ ವಿಶ್ರಾಂತಿ ಮಾತ್ರವಲ್ಲ. ಮೆದುಳು ಸರಿಯಾಗಿ ಕಾರ್ಯನಿರ್ವಹಿಸಲು, ನೆನಪುಗಳನ್ನು ವ್ಯವಸ್ಥಿತಗೊಳಿಸಲು ಹಾಗೂ ದೇಹದ ಚೇತರಿಕೆ ಮತ್ತು ಪುನರುಜ್ಜೀವನಕ್ಕೆ ನಿದ್ರೆ ಬಹಳ ಮುಖ್ಯ.

ಹಾಗಾದರೆ ಒಬ್ಬ ಮನುಷ್ಯ ಗರಿಷ್ಠ ಎಷ್ಟು ದಿನ ನಿದ್ರೆ ಮಾಡದೆ ಇರಬಲ್ಲ? ಇದಕ್ಕೆ ನಿಖರವಾದ ಮಿತಿಯನ್ನು ಹೇಳುವುದು ಕಷ್ಟ. ನಿದ್ರೆ ಇಲ್ಲದೆ ಇರುವ ಅವಧಿ ಹೆಚ್ಚಾದಂತೆ ದೇಹ ಮತ್ತು ಮೆದುಳಿನ ಕಾರ್ಯಕ್ಷಮತೆ ತೀವ್ರವಾಗಿ ಕುಸಿಯಬಹುದು. ನಿದ್ರಾಹೀನತೆಯ ಪರಿಣಾಮಗಳನ್ನು ತೋರಿಸುವ ಪ್ರಸಿದ್ಧ ಘಟನೆಯೊಂದರಲ್ಲಿ ಅಮೆರಿಕದ ರಾಂಡಿ ಗಾರ್ಡ್ನರ್ ಎಂಬ 17 ವರ್ಷದ ಯುವಕ 1964ರಲ್ಲಿ ಸತತ 11 ದಿನಗಳ ಕಾಲ ಎಚ್ಚರವಾಗಿದ್ದ.

ಶಾಲೆಯ ವಿಜ್ಞಾನ ಯೋಜನೆಯ ಭಾಗವಾಗಿ ಗಾರ್ಡ್ನರ್ ಈ ಪ್ರಯೋಗ ನಡೆಸಿದ್ದರು. ಸತತವಾಗಿ ನಿದ್ರೆ ಮಾಡದೆ ಇದ್ದ ಪರಿಣಾಮ ಅವರ ಏಕಾಗ್ರತೆ ಮತ್ತು ಆಲೋಚನಾ ಸಾಮರ್ಥ್ಯದಲ್ಲಿ ಬದಲಾವಣೆಗಳು ಕಂಡುಬಂದವು. ಮಾತನಾಡುವಾಗ ಪದಗಳನ್ನು ನೆನಪಿಸಿಕೊಳ್ಳಲು ಕಷ್ಟವಾಗುವುದು ಹಾಗೂ ನೆನಪಿನ ಶಕ್ತಿ ಕುಂದುವುದು ಸೇರಿದಂತೆ ಹಲವು ಸಮಸ್ಯೆಗಳು ಕಾಣಿಸಿಕೊಂಡಿದ್ದವು. ಬಳಿಕ ಅವರು ಸಾಕಷ್ಟು ವಿಶ್ರಾಂತಿ ಪಡೆದ ನಂತರ ಸಾಮಾನ್ಯ ಸ್ಥಿತಿಗೆ ಮರಳಿದರು.

ನಿದ್ರೆ ಇಲ್ಲದೆ ಇರುವ ಸಮಯ ಹೆಚ್ಚಾದಂತೆ ದೇಹದ ಮೇಲೆ ಪರಿಣಾಮವೂ ಹೆಚ್ಚಾಗಬಹುದು. ಸುಮಾರು 24 ಗಂಟೆಗಳ ಕಾಲ ನಿದ್ರೆ ಇಲ್ಲದಿದ್ದರೆ ತೀವ್ರ ದಣಿವು, ಕಿರಿಕಿರಿ ಮತ್ತು ಬೇಗನೆ ಕೋಪಗೊಳ್ಳುವಂತಹ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು. 48 ಗಂಟೆಗಳ ನಿದ್ರಾಹೀನತೆಯ ಬಳಿಕ ನೆನಪಿನ ಶಕ್ತಿ ಮತ್ತು ಗಮನ ಕೇಂದ್ರೀಕರಿಸುವ ಸಾಮರ್ಥ್ಯ ಮತ್ತಷ್ಟು ಕುಂಠಿತವಾಗಬಹುದು.

Tart Cherry: ಉತ್ತಮ ನಿದ್ದೆಗೆ ಟಾರ್ಟ್ ಚೆರಿ ಜ್ಯೂಸ್ ಸಹಾಯಕ: ಯಾವಾಗ ಕುಡಿಯಬೇಕು?

ಸುಮಾರು 72 ಗಂಟೆಗಳವರೆಗೆ ನಿದ್ರೆ ಇಲ್ಲದೆ ಇದ್ದರೆ ದೇಹ ಮತ್ತು ಮನಸ್ಸಿನ ಮೇಲೆ ಇನ್ನಷ್ಟು ತೀವ್ರ ಪರಿಣಾಮಗಳು ಉಂಟಾಗಬಹುದು. ಕೈಗಳು ನಡುಗುವುದು, ಆತಂಕ ಹೆಚ್ಚಾಗುವುದು ಹಾಗೂ ದೃಷ್ಟಿಯಲ್ಲಿ ವ್ಯತ್ಯಾಸ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ. ಹಲವು ದಿನಗಳ ಕಾಲ ನಿದ್ರೆ ಇಲ್ಲದೆ ಇದ್ದರೆ ಭ್ರಮೆಗಳು ಉಂಟಾಗಬಹುದು. ಅಂದರೆ ವಾಸ್ತವದಲ್ಲಿ ನಡೆಯುತ್ತಿರುವ ಘಟನೆ ಮತ್ತು ಕನಸಿನ ನಡುವಿನ ವ್ಯತ್ಯಾಸವನ್ನು ಗುರುತಿಸುವುದು ಕಷ್ಟವಾಗಬಹುದು.

ನಿದ್ರೆಯ ಕೊರತೆ ದೀರ್ಘಕಾಲ ಮುಂದುವರಿದರೆ ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ. ನಿರಂತರವಾಗಿ ಕಡಿಮೆ ನಿದ್ರೆ ಮಾಡುವುದನ್ನು ಹೃದಯ ಸಂಬಂಧಿತ ಸಮಸ್ಯೆಗಳು, ಒತ್ತಡ ಮತ್ತು ರೋಗನಿರೋಧಕ ಶಕ್ತಿ ದುರ್ಬಲವಾಗುವಂತಹ ಆರೋಗ್ಯ ಸಮಸ್ಯೆಗಳೊಂದಿಗೆ ಸಂಬಂಧಿಸಲಾಗಿದೆ ಎಂದು ವರದಿ ತಿಳಿಸಿದೆ.

ಇದೇ ವೇಳೆ ಫೇಟಲ್ ಫ್ಯಾಮಿಲಿಯಲ್ ಇನ್‌ಸೋಮ್ನಿಯಾ ಎಂಬ ಅತ್ಯಂತ ಅಪರೂಪದ ಅನುವಂಶಿಕ ಕಾಯಿಲೆಯೂ ಕಾಣಿಸಿಕೊಳ್ಳಬಹುದು. ಈ ಕಾಯಿಲೆಯಲ್ಲಿ ವ್ಯಕ್ತಿಗೆ ನಿದ್ರೆ ಕ್ರಮೇಣ ಕಳೆದುಹೋಗುತ್ತದೆ. ಇದು ಮೆದುಳು ಮತ್ತು ದೇಹದ ಪ್ರಮುಖ ಕಾರ್ಯಗಳ ಮೇಲೆ ಗಂಭೀರ ಪರಿಣಾಮ ಬೀರಿ ಅಂತಿಮವಾಗಿ ಜೀವಕ್ಕೆ ಅಪಾಯ ಉಂಟುಮಾಡಬಹುದು.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ