ಚಿನ್ನದ ನಾಲಿಗೆಯ ವಿಶಿಷ್ಟ ರೂಪ, ಕಣ್ಣಿಗೆ ಬಟ್ಟೆ ಕಟ್ಟಿ ಪೂಜೆ: ಕಾಳಿಘಾಟ್ ದೇವಾಲಯದ ವಿಸ್ಮಯಕಾರಿ ಲೋಕ!

ಪಶ್ಚಿಮ ಬಂಗಾಳದ ರಾಜಧಾನಿ ಕೋಲ್ಕತ್ತಾದಲ್ಲಿರುವ ಕಾಳಿಘಾಟ್ ಕಾಳಿ ದೇವಾಲಯವು ಭಾರತದ ಅತ್ಯಂತ ಪ್ರಾಚೀನ ಹಾಗೂ ಪವಿತ್ರ ಧಾರ್ಮಿಕ ಕೇಂದ್ರಗಳಲ್ಲಿ ಒಂದಾಗಿದೆ. ದೇವಿಯ ಚಿನ್ನದ ನಾಲಿಗೆ, ಸತಿ ದೇವಿಯ ಅವಶೇಷಗಳಿಗೆ ಸಂಬಂಧಿಸಿದ ರಹಸ್ಯ ಸಂಪ್ರದಾಯಗಳು ಹಾಗೂ ವಿಸ್ಮಯಕಾರಿ ದಂತಕಥೆಗಳಿಗೆ ಈ ದೇವಾಲಯವು ವಿಶ್ವದಾದ್ಯಂತ ಹೆಸರುವಾಸಿಯಾಗಿದೆ.

ಪ್ರಮುಖ ಶಕ್ತಿ ಪೀಠಗಳಲ್ಲಿ ಒಂದಾದ ಕಾಳಿಘಾಟ್:

ಹಿಂದೂ ಧರ್ಮದ ನಂಬಿಕೆಯ ಪ್ರಕಾರ, ಕಾಳಿಘಾಟ್ ದೇವಾಲಯವು ದೇಶದ 51 ಶಕ್ತಿ ಪೀಠಗಳಲ್ಲಿ ಅತ್ಯಂತ ಪ್ರಮುಖವಾದುದು. ಪೌರಾಣಿಕ ಕಥೆಗಳ ಪ್ರಕಾರ, ಸತಿ ದೇವಿಯ ದೇಹದ ಭಾಗಗಳು ಭೂಮಿಯ ಮೇಲೆ ಬಿದ್ದ ಸ್ಥಳಗಳು ಶಕ್ತಿ ಪೀಠಗಳೆಂದು ಕರೆಸಿಕೊಂಡವು. ಭಕ್ತರ ನಂಬಿಕೆಯಂತೆ, ಸತಿ ದೇವಿಯ ಬಲಪಾದದ ಕಾಲ್ಬೆರಳುಗಳು ಇಲ್ಲಿರುವ ಕಾಳಿಘಾಟ್ ಪ್ರದೇಶದಲ್ಲಿ ಬಿದ್ದವು. ಹೂಗ್ಲಿ ನದಿಯ ಉಗಮಸ್ಥಾನವಾದ ‘ಆದಿ ಗಂಗಾ’ ನದಿಯ ದಡದಲ್ಲಿ ನೆಲೆಗೊಂಡಿರುವ ಈ ದಿವ್ಯ ಕ್ಷೇತ್ರವು ಪ್ರತಿದಿನ ಸಾವಿರಾರು ಭಕ್ತರನ್ನು ತನ್ನತ್ತ ಸೆಳೆಯುತ್ತದೆ.

ಚಿನ್ನದ ನಾಲಿಗೆಯ ವಿಶಿಷ್ಟ ಕಾಳಿ ವಿಗ್ರಹ:

ಇತರ ದೇವಾಲಯಗಳಲ್ಲಿರುವ ಕಾಳಿ ದೇವಿಯ ರೂಪಗಳಿಗಿಂತ ಕಾಳಿಘಾಟ್‌ನಲ್ಲಿರುವ ವಿಗ್ರಹವು ತೀರ ಭಿನ್ನವಾಗಿದೆ. ಇಲ್ಲಿ ದೇವಿ ಮೂರು ಕಣ್ಣುಗಳು ಹಾಗೂ ಚಿನ್ನದಿಂದ ಅಲಂಕರಿಸಲ್ಪಟ್ಟ ಉದ್ದನೆಯ ನಾಲಿಗೆಯನ್ನು ಹೊಂದಿದ್ದಾಳೆ. ಕೈಯಲ್ಲಿ ಕತ್ತಿ ಹಾಗೂ ಮಾನವನ ತಲೆಬುರುಡೆಯನ್ನು ಹಿಡಿದಿರುವ ಈ ರೂಪವು ಅತ್ಯಂತ ವಿಶೇಷವಾಗಿದೆ. ಸ್ಥಳೀಯ ಕಥೆಗಳ ಪ್ರಕಾರ, ಸಂತ ಬ್ರಹ್ಮಾನಂದ ಗಿರಿ ಮತ್ತು ಆತ್ಮಾರಾಮ್ ಗಿರಿ ಅವರು ಈ ವಿಗ್ರಹದ ಸ್ಥಾಪನೆ ಹಾಗೂ ವಿನ್ಯಾಸದೊಂದಿಗೆ ನಂಟು ಹೊಂದಿದ್ದಾರೆ.

ರಹಸ್ಯಮಯ ಸಂಪ್ರದಾಯ: ಕಾಲ್ಬೆರಳಿನ ಅವಶೇಷಗಳು ಮತ್ತು ಕಣ್ಣಿಗೆ ಬಟ್ಟೆ:

ಈ ದೇವಾಲಯದಲ್ಲಿನ ಅತ್ಯಂತ ಆಸಕ್ತಿದಾಯಕ ಹಾಗೂ ನಿಗೂಢ ಆಚರಣೆಯೆಂದರೆ ಸತಿ ದೇವಿಯ ಕಾಲ್ಬೆರಳುಗಳ ಅವಶೇಷಗಳಿಗೆ ಸಂಬಂಧಿಸಿದ್ದು. ಪೌರಾಣಿಕ ನಂಬಿಕೆಯಂತೆ, ದೇವಿಯ ಆ ಪವಿತ್ರ ಅವಶೇಷಗಳನ್ನು ಮುಖ್ಯ ವಿಗ್ರಹದ ಕೆಳಭಾಗದಲ್ಲಿ ಒಂದು ಪೆಟ್ಟಿಗೆಯಲ್ಲಿ ಭದ್ರಪಡಿಸಿಡಲಾಗಿದೆ ಮತ್ತು ಸಾಮಾನ್ಯ ಭಕ್ತರಿಗೆ ಇವುಗಳ ದರ್ಶನವಿರುವುದಿಲ್ಲ. ವರ್ಷಕ್ಕೊಮ್ಮೆ ನಡೆಯುವ ವಿಶೇಷ ಸ್ನಾನ ಮಹೋತ್ಸವದ ಸಂದರ್ಭದಲ್ಲಿ ಮಾತ್ರ ಈ ಪೆಟ್ಟಿಗೆಯನ್ನು ತೆರೆಯಲಾಗುತ್ತದೆ. ಈ ಸಮಯದಲ್ಲಿ ಆಯ್ದ ಪುರೋಹಿತರ ಕಣ್ಣುಗಳಿಗೆ ಬಟ್ಟೆ ಕಟ್ಟಲಾಗುತ್ತದೆ. ಯಾರೂ ಕೂಡ ಆ ಅವಶೇಷಗಳನ್ನು ನೇರವಾಗಿ ನೋಡಬಾರದು ಎಂಬ ಕಟ್ಟುನಿಟ್ಟಿನ ನಂಬಿಕೆ ಇದರ ಹಿಂದಿದೆ. ಪವಿತ್ರ ನೀರಿನಿಂದ ಅಭಿಷೇಕ ಮಾಡಿದ ಬಳಿಕ ಆ ಅವಶೇಷಗಳನ್ನು ಹೊಸ ಬಟ್ಟೆಯಲ್ಲಿ ಸುತ್ತಿ ಪುನಃ ಭದ್ರಪಡಿಸಲಾಗುತ್ತದೆ.

ಇದನ್ನೂ ಓದಿ: ದುರ್ಗಾ ದೇವಿಯ ಕೈಯಲ್ಲಿರುವ ಆಯುಧಗಳ ರಹಸ್ಯವೇನು? ತ್ರಿಶೂಲದಿಂದ ಚಕ್ರದವರೆಗೆ ಎಲ್ಲದರ ಮಹತ್ವ ಇಲ್ಲಿದೆ!

ದೇವಾಲಯದ ಐತಿಹಾಸಿಕ ಹಿನ್ನೆಲೆ ಮತ್ತು ದಂತಕಥೆ:

ಸತಿ ದೇವಿಯ ವಿಯೋಗದ ನಂತರ ಶಿವನು ಅವಳ ದೇಹವನ್ನು ಹೊತ್ತು ತಾಂಡವವಾಡಿದಾಗ, ಜಗತ್ತನ್ನು ರಕ್ಷಿಸಲು ವಿಷ್ಣುವು ತನ್ನ ಸುದರ್ಶನ ಚಕ್ರದಿಂದ ಆಕೆಯ ದೇಹವನ್ನು ತುಂಡರಿಸಿದನೆಂದೂ, ಆಗ ಬಲಪಾದದ ಬೆರಳುಗಳು ಇಲ್ಲಿ ಬಿದ್ದವೆಂದೂ ನಂಬಲಾಗಿದೆ. ಐತಿಹಾಸಿಕ ದಾಖಲೆಗಳ ಪ್ರಕಾರ, ಪ್ರಸ್ತುತವಿರುವ ಭವ್ಯವಾದ ಕಾಳಿಘಾಟ್ ದೇವಾಲಯವನ್ನು 1809 ರಲ್ಲಿ ಸಬರ್ಣ ರಾಯ್ ಚೌಧರಿ ಕುಟುಂಬವು ನಿರ್ಮಿಸಿತು. ಇಲ್ಲಿ ಹಿಂದೆ ಒಂದು ಸಣ್ಣದಾದ ದೇವಾಲಯವಿತ್ತು ಎಂದು ಹೇಳಲಾಗುತ್ತದೆ. ದೇವಾಲಯದ ಆಗ್ನೇಯ ದಿಕ್ಕಿನಲ್ಲಿರುವ ‘ಕುಂದುಪುಕುರ್’ ಎಂಬ ಪವಿತ್ರ ಕೊಳವು ಭಕ್ತರಿಗೆ ಅತ್ಯಂತ ಪವಿತ್ರವಾಗಿದ್ದು, ಇದರ ನೀರು ಅದೃಷ್ಟವನ್ನು ತರುತ್ತದೆ ಎಂಬ ನಂಬಿಕೆಯಿದೆ.

ದರ್ಶನ ಸಮಯದ ವಿವರಗಳು:

• ಬೆಳಿಗ್ಗೆ: ಬೆಳಿಗ್ಗೆ 5:00 ರಿಂದ ಮಧ್ಯಾಹ್ನ 2:00 ರವರೆಗೆ
• ಸಂಜೆ: ಸಂಜೆ 5:00 ರಿಂದ ರಾತ್ರಿ 10:30 ರವರೆಗೆ
• ಮೊದಲ ಆರತಿ: ಸಾಮಾನ್ಯವಾಗಿ ಬೆಳಿಗ್ಗೆ 4:00 ಗಂಟೆಗೆ ನಡೆಯುತ್ತದೆ.

(ಗಮನಿಸಿ: ವಿಶೇಷ ಹಬ್ಬಗಳು ಹಾಗೂ ಪೂಜಾ ದಿನಗಳಲ್ಲಿ ದರ್ಶನ ಸಮಯದಲ್ಲಿ ಬದಲಾವಣೆ ಇರಬಹುದು. ಹಾಗಾಗಿ ಭೇಟಿ ನೀಡುವ ಮುನ್ನ ಸ್ಥಳೀಯ ಮಾಹಿತಿ ಪಡೆದುಕೊಳ್ಳುವುದು ಸೂಕ್ತ.)

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ