Sania Mirza: ಕಣ್ಣೀರಿನೊಂದಿಗೆ ಗ್ರ್ಯಾಂಡ್ ಸ್ಲಾಮ್ಗೆ ವಿದಾಯ ಹೇಳಿದ ಸಾನಿಯಾ ಮಿರ್ಜಾ
Sania Mirza- Rohan Bopanna: ಸಾನಿಯಾ ಮಿರ್ಜಾ ಮತ್ತು ರೋಹನ್ ಬೋಪಣ್ಣ ಜೋಡಿ 2017 ರಲ್ಲಿ ಫ್ರೆಂಚ್ ಓಪನ್ನ ಮಿಶ್ರ ಡಬಲ್ಸ್ ಪ್ರಶಸ್ತಿಯನ್ನು ಗೆದ್ದಿದ್ದರು. ಇನ್ನು 2009 ರಲ್ಲಿ ಮಹೇಶ್ ಭೂಪತಿಯೊಂದಿಗೆ ಸಾನಿಯಾ ಈ ಪ್ರಶಸ್ತಿಯನ್ನು ಜಯಿಸಿದ್ದರು.
Updated on: Jan 27, 2023 | 3:04 PM
Australian Open 2023: ಭಾರತದ ಟೆನಿಸ್ ತಾರೆಗಳಾದ ಸಾನಿಯಾ ಮಿರ್ಜಾ (Sania Mirza) ಮತ್ತು ರೋಹನ್ ಬೋಪಣ್ಣ (Rohan Bopanna) ಜೋಡಿ ಆಸ್ಟ್ರೇಲಿಯನ್ ಓಪನ್ 2023 ರ ಮಿಶ್ರ ಡಬಲ್ಸ್ ಫೈನಲ್ನಲ್ಲಿ ಪರಾಜಯಗೊಂಡಿದ್ದಾರೆ. ಭಾರೀ ಕುತೂಹಲಕ್ಕೆ ಕಾರಣವಾಗಿದ್ದ ಅಂತಿಮ ಹಣಾಹಣಿಯಲ್ಲಿ ಲೂಯಿಸಾ ಸ್ಟೆಫಾನಿ- ರಾಫೆಲ್ ಮ್ಯಾಟೋಸ್ ಜೋಡಿ ವಿರುದ್ಧ ಸಾನಿಯಾ-ಬೋಪಣ್ಣ 6-7, 2-6 ನೇರ ಸೆಟ್ಗಳಿಂದ ಸೋಲನುಭವಿಸಿದರು. ಈ ಸೋಲಿನೊಂದಿಗೆ ಸಾನಿಯಾ ಮಿರ್ಜಾ ಕಣ್ಣೀರಿನೊಂದಿಗೆ ಗ್ರ್ಯಾಂಡ್ ಸ್ಲಾಮ್ಗೆ ವಿದಾಯ ಹೇಳಿದ್ದಾರೆ.
ಈ ಟೂರ್ನಿ ಆರಂಭಕ್ಕೂ ಮುನ್ನವೇ ಅವರು ನಿವೃತ್ತಿ ಘೋಷಿಸಿದ್ದರು. ಅದರಂತೆ ಕೊನೆಯ ಗ್ರ್ಯಾಂಡ್ ಸ್ಲಾಮ್ ಟೂರ್ನಿಯಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದ ಸಾನಿಯಾ ಮಿಶ್ರ ಡಬಲ್ಸ್ನಲ್ಲಿ ಫೈನಲ್ ಪ್ರವೇಶಿಸಿದ್ದರು. ಹೀಗಾಗಿಯೇ ಆಸ್ಟ್ರೇಲಿಯನ್ ಗ್ರ್ಯಾಂಡ್ ಸ್ಲಾಮ್ ಗೆಲುವಿನೊಂದಿಗೆ ವೃತ್ತಿ ಬದುಕಿನ ಮಹತ್ವದ ಟೂರ್ನಿಗೆ ವಿದಾಯ ಹೇಳುವ ನಿರೀಕ್ಷೆಯಲ್ಲಿದ್ದರು.
ಆದರೆ ಲೂಯಿಸಾ ಸ್ಟೆಫಾನಿ- ರಾಫೆಲ್ ಮ್ಯಾಟೋಸ್ ಜೊತೆಯಾಟದ ಮುಂದೆ ರೋಹನ್ ಬೋಪಣ್ಣ-ಸಾನಿಯಾ ಜೋಡಿ ಎಲ್ಲಾ ಹಂತದಲ್ಲೂ ಮಂಕಾಗಿದ್ದರು. ಪರಿಣಾಮ ನೇರ ಸೆಟ್ಗಳಿಂದ ಸೋಲುಣಿಸಿ ಲೂಯಿಸಾ ಸ್ಟೆಫಾನಿ- ರಾಫೆಲ್ ಮ್ಯಾಟೋಸ್ ಜೋಡಿ ಪ್ರಶಸ್ತಿಗೆ ಮುತ್ತಿಕ್ಕಿತು.
ಇದಕ್ಕೂ ಮುನ್ನ ಸಾನಿಯಾ ಮಿರ್ಜಾ ಮತ್ತು ರೋಹನ್ ಬೋಪಣ್ಣ ಜೋಡಿ 2017 ರಲ್ಲಿ ಫ್ರೆಂಚ್ ಓಪನ್ನ ಮಿಶ್ರ ಡಬಲ್ಸ್ ಪ್ರಶಸ್ತಿಯನ್ನು ಗೆದ್ದಿದ್ದರು. ಇನ್ನು 2009 ರಲ್ಲಿ ಮಹೇಶ್ ಭೂಪತಿಯೊಂದಿಗೆ ಸಾನಿಯಾ ಈ ಪ್ರಶಸ್ತಿಯನ್ನು ಜಯಿಸಿದ್ದರು. ಹಾಗೆಯೇ ಇದುವರೆಗೆ 7 ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಯನ್ನು ಗೆದ್ದಿರುವ ಸಾನಿಯಾ ಮಿರ್ಜಾ ಕೊನೆಯ ಮಹತ್ವದ ಟೂರ್ನಿಯ ಫೈನಲ್ನಲ್ಲಿ ಪ್ರಶಸ್ತಿ ಗೆಲ್ಲುವಲ್ಲಿ ಎಡವಿದರು.
ಸದ್ಯ ಗ್ರ್ಯಾಂಡ್ ಸ್ಲಾಮ್ಗೆ ಕಣ್ಣೀರಿನ ವಿದಾಯ ಹೇಳಿರುವ ಸಾನಿಯಾ ಮತ್ತೊಂದು ಟೂರ್ನಿಯಲ್ಲಿ ಟೆನಿಸ್ ಅಂಗಳದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅಂದರೆ ಫೆಬ್ರವರಿ 19 ರಂದು ಪ್ರಾರಂಭವಾಗುವ WTA 1000 ದುಬೈ ಟೆನಿಸ್ ಚಾಂಪಿಯನ್ಶಿಪ್ನ ನಂತರ ಅವರು ವೃತ್ತಿ ಬದುಕಿ ವಿದಾಯ ಹೇಳಲಿದ್ದಾರೆ.
ಲೂಯಿಸಾ ಸ್ಟೆಫಾನಿ- ರಾಫೆಲ್ ಮ್ಯಾಟೋಸ್ (ವಿನ್ನರ್ಸ್) _ ಸಾನಿಯಾ ಮಿರ್ಜಾ-ರೋಹನ್ ಬೋಪಣ್ಣ (ರನ್ನರ್ಸ್)
ಭಾವುಕರಾದ ಸಾನಿಯಾ ಮಿರ್ಜಾ:
ಆಸ್ಟ್ರೇಲಿಯಾ ಓಪನ್ ಗ್ರ್ಯಾಂಡ್ ಸ್ಲಾಮ್ನಲ್ಲಿ ವಿದಾಯ ಭಾಷಣ ಮಾಡಿದ ಸಾನಿಯಾ ಮಿರ್ಜಾ ಮಾತಿನ ನಡುವೆ ಭಾವುಕರಾಗಿ ಕಣ್ಣೀರು ಹಾಕಿದರು. ನಾನು ವೃತ್ತಿಪರ ಟೆನಿಸ್ ಜೀವನ ಆರಂಭಿಸಿದ್ದು ಮೆಲ್ಬೋರ್ನ್ ಅಂಗಳದಲ್ಲಿ. 2005 ರಲ್ಲಿ 18 ವರ್ಷದವಳಿದ್ದಾಗ ಸೆರೆನಾ ವಿಲಿಯಮ್ಸ್ ವಿರುದ್ಧ ಆಡಿದ ಅತ್ಯಂತ ವಿಶೇಷ ಸ್ಮರಣೀಯ. ನಾನು ಆ ಪಂದ್ಯವನ್ನು ಕಳೆದುಕೊಂಡಿದ್ದರೂ ಸಹ, ಅತ್ಯುತ್ತಮ ಪ್ರದರ್ಶನ ನೀಡಿದ್ದೆ. ಇದರ ನಡುವೆ ಹಲವು ಬಾರಿ ಇಲ್ಲಿ ಅನೇಕ ಫೈನಲ್ಗಳನ್ನು ಆಡಿದ್ದೇನೆ. ಇವೆಲ್ಲವೂ ನನ್ನ ಜೀವನದ ಅತ್ಯುತ್ತಮ ಘಳಿಗೆಯಾಗಿದೆ. ಹೀಗಾಗಿಯೇ ನನ್ನ ಗ್ರ್ಯಾಂಡ್ ಸ್ಲಾಮ್ ಕೆರಿಯರ್ ಅನ್ನು ಅಂತ್ಯಗೊಳಿಸಲು ಆಸ್ಟ್ರೇಲಿಯಾ ಓಪನ್ಗಿಂತ ಉತ್ತಮ ವೇದಿಕೆ ಮತ್ತೊಂದಿಲ್ಲ ಎಂದೆನಿಸಿತು. ನನ್ನನ್ನು ಬೆಂಬಲಿಸಿದ ಎಲ್ಲರಿಗೂ ಧನ್ಯವಾದಗಳು ಎಂದು ಸಾನಿಯಾ ತಿಳಿಸಿದರು.
