ಭಾರತದಲ್ಲಿ ಜಿಯೋ ಮ್ಯಾಜಿಕ್ ಸೃಷ್ಟಿಸಿದ್ದ ಮುಕೇಶ್ ಅಂಬಾನಿ ಈಗ ಅದೇ ಬಿಸಿನೆಸ್ ಮಾಡಲ್​ನೊಂದಿಗೆ ಆಫ್ರಿಕಾಗೆ ಎಂಟ್ರಿ

ನವದೆಹಲಿ, ಮೇ 27: ಎಂಟು ಒಂಬತ್ತು ವರ್ಷಗಳ ಹಿಂದೆ ಜಿಯೋ ತರುವ ಮೂಲಕ ಟೆಲಿಕಾಂ ವಲಯದಲ್ಲಿ ಸಂಚಲನವನ್ನೇ ಸೃಷ್ಟಿಸಿದ್ದ ಮುಕೇಶ್ ಅಂಬಾನಿ (Mukesh Ambani) ಈಗ ಆಫ್ರಿಕನ್ ನಾಡಿನಲ್ಲೂ ಕಾಲೂರಿದ್ದಾರೆ. ವರದಿಗಳ ಪ್ರಕಾರ ಆಫ್ರಿಕಾದಲ್ಲಿ ಮೊಬೈಲ್ ಬ್ರಾಡ್​ಬ್ಯಾಂಡ್ ಸರ್ವಿಸ್ ಬಿಸಿನೆಸ್​ಗೆ ಅಂಬಾನಿ ಕೈ ಹಾಕುತ್ತಿದ್ದಾರೆ. ರಿಲಾಯನ್ಸ್ ಇಂಡಸ್ಟ್ರೀಸ್​ಗೆ ಸೇರಿದ ರಾಡಿಸಿಸ್ ಕಾರ್ಪ್ ಸಂಸ್ಥೆ ಘಾನಾ ದೇಶದ ಹೊಸ ಸ್ಟಾರ್ಟಪ್ ಆದ ನೆಕ್ಸ್ಟ್ ಜೆನ್ ಇನ್​ಫ್ರಾಕೋ (NGIC- Next Gen Infra Co) ಎಂಬ ಕಂಪನಿ ಜೊತೆ ಸಹಭಾಗಿತ್ವ ಮಾಡಿಕೊಳ್ಳುತ್ತಿದ್ದು, ಎರಡು ಸಂಸ್ಥೆಗಳು ಜಂಟಿಯಾಗಿ ಘಾನದಲ್ಲಿ 5ಜಿ ಬ್ರಾಡ್​ಬ್ಯಾಂಡ್ ಸೇವೆ ಒದಗಿಸಲಿವೆ ಎಂಬುದು ಗೊತ್ತಾಗಲಿದೆ.

ಎನ್​ಜಿಐಸಿ ಸಂಸ್ಥೆ 15 ವರ್ಷಗಳಿಗೆ 5ಜಿ ಬ್ರಾಡ್​ಬ್ಯಾಂಡ್ ಸರ್ವಿಸ್ ಒದಗಿಸಲು ಲೈಸೆನ್ಸ್ ಹೊಂದಿದೆ. ಈ ವರ್ಷಾಂತ್ಯದೊಳಗೆ ಅದು ಕಾರ್ಯಾಚರಣೆ ಆರಂಭಿಸಬಹುದು ಎನ್ನಲಾಗಿದೆ. ಮೈಕ್ರೋಸಾಫ್ಟ್, ಟೆಕ್ ಮಹೀಂದ್ರ, ನೋಕಿಯಾ ಓಯ್ಜ್ ಸಂಸ್ಥೆಗಳೂ ಕೂಡ ಎನ್​ಜಿಐಸಿಗೆ ನೆರವು ನೀಡಿವೆ. ಮೂರು ವರ್ಷಗಳಿಗೆ 145 ಮಿಲಿಯನ್ ಡಾಲರ್​ನಷ್ಟು ಬಂಡವಾಳ ವೆಚ್ಚ ಮಾಡಲಿದೆ. ಎನ್​ಜಿಐಸಿ ಮೂಲಕ ಅಂಬಾನಿ ಅವರು ಘಾನದಲ್ಲಿ 5ಜಿ ಕ್ರಾಂತಿ ಮಾಡಬಲ್ಲುರಾ ಎಂಬುದು ಕುತೂಹಲದ ವಿಚಾರ.

ಕುತೂಹಲ ಎಂದರೆ ಭಾರತದ ಟೆಲಿಕಾಂ ಆಪರೇಟರ್ ಆಗಿರುವ ಭಾರ್ತಿ ಏರ್ಟೆಲ್ ಸಂಸ್ಥೆ ಘಾನಾ ಸೇರಿದಂತೆ 14 ಆಫ್ರಿಕನ್ ದೇಶಗಳಲ್ಲಿ ಟೆಲಿಕಾಂ ಜಾಲ ಹೊಂದಿದೆ. ಘಾನಾದಲ್ಲಿ ಮೂರು ಪ್ರಮುಖ ಟೆಲಿಕಾಂ ಆಪರೇಟರ್​ಗಳಿವೆ. ಎಂಟಿಎನ್, ವೊಡಾಫೋನ್ ಮತ್ತು ಏರ್​ಟೆಲ್. ಇದರಲ್ಲಿ ಏರ್​ಟೆಲ್ ಟಿಗೋ ಸಂಸ್ಥೆಯಲ್ಲಿ ಅಲ್ಲಿನ ಸರ್ಕಾರದ ಪಾಲು ಹೆಚ್ಚಿದೆ. ಎನ್​ಜಿಐಸಿಯಲ್ಲೂ ಸರ್ಕಾರದ ಪಾಲು ಶೇ. 10ರಷ್ಟಿದೆ. ಆದರೆ, ಅರ್ಧಕ್ಕಿಂತ ಹೆಚ್ಚು ಪಾಲು ಅಸೆಂಡ್ ಡಿಜಿಟಲ್ ಸಲ್ಯೂಶನ್ಸ್ ಮತ್ತು ಕೆ ನೆಟ್ ಎಂಬ ಖಾಸಗಿ ಕಂಪನಿಗಳದ್ದಾಗಿದೆ.

ಇದನ್ನೂ ಓದಿ: ದೇಶದ ಜಿಡಿಪಿಗೆ ಅರ್ಧದಷ್ಟು ಕೊಡುಗೆ ಕೊಡುತ್ತವೆ ಈ 13 ನಗರಗಳು; ಬೆಂಗಳೂರಿಗೆ ಎಷ್ಟನೇ ಸ್ಥಾನ?

ಚೀನಾ ಪ್ರಭಾವ ತಡೆಯಲು ಯತ್ನ

ತಂತ್ರಜ್ಞಾನದಲ್ಲಿ ಸಾಕಷ್ಟು ಪ್ರಗತಿ ಸಾಧಿಸಿರುವ ಚೀನಾ ಇಡೀ ಆಫ್ರಿಕಾ ಖಂಡದಲ್ಲಿ ತನ್ನ ಪ್ರಭಾವ ಮತ್ತು ಬಿಸಿನೆಸ್ ಹಿಡಿತ ಸಾಧಿಸಲು ಯತ್ನಿಸುತ್ತಿದೆ. ಇದನ್ನು ನಿಯಂತ್ರಿಸಲು ಭಾರತದಿಂದಲೂ ಪ್ರಯತ್ನಗಳಾಗುತ್ತಿವೆ. ಈ ಪ್ರಯತ್ನಗಳ ಒಂದು ಫಲವೇ ಎನ್​ಜಿಐಸಿ ಮತ್ತು ರಿಲಾಯನ್ಸ್ ಸಹಭಾಗಿತ್ವ ಎನ್ನನಲಾಗುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ