Tech Utility: ಹಳೆಯ ಫೋನ್‌ಗಳಲ್ಲಿ ಬ್ಯಾಟರಿ ಉಬ್ಬುವುದೇಕೆ? ಇದು ಎಷ್ಟು ಅಪಾಯಕಾರಿ?

ಹಲವರ ಬಳಿ ಒಂದಕ್ಕಿಂತ ಹೆಚ್ಚು ಮೊಬೈಲ್ ಫೋನ್‌ಗಳಿರುತ್ತವೆ (Mobile Phone). ಕೆಲವರು ಒಂದು ಫೋನ್ ಅನ್ನು ಹೆಚ್ಚು ಬಳಸಿದರೆ, ಉಳಿದ ಫೋನ್‌ಗಳನ್ನು ಹಾಗೆಯೇ ಇಟ್ಟುಬಿಡುತ್ತಾರೆ. ಹೀಗೆ ದೀರ್ಘಕಾಲ ಬಳಸದ ಫೋನ್ ಅನ್ನು ಹಲವು ದಿನಗಳ ಬಳಿಕ ತೆಗೆದು ಬಳಸಲು ಮುಂದಾದಾಗ ಅದರ ಹಿಂಭಾಗ ಉಬ್ಬಿಕೊಂಡಿರುವುದು ಕಂಡುಬರುತ್ತದೆ. ಇದಕ್ಕೆ ಫೋನ್‌ನ ಬ್ಯಾಟರಿ ಉಬ್ಬುವುದು (Battery Swelling) ಎನ್ನುತ್ತಾರೆ. ಇತ್ತೀಚಿನ ದಿನಗಳಲ್ಲಿ ಇಂತಹ ಸಮಸ್ಯೆ ಹೆಚ್ಚಾಗಿ ಕಂಡುಬರುತ್ತಿದೆ.

ಸಾಮಾನ್ಯವಾಗಿ ಜನರು ಈ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸುವುದಿಲ್ಲ. ಫೋನ್ ಹಳೆಯದಾಗಿರುವುದರಿಂದ ಹೀಗಾಗಿರಬಹುದು ಎಂದು ಸುಮ್ಮನಾಗುತ್ತಾರೆ. ಇನ್ನು ಕೆಲವರು ಉಬ್ಬಿದ ಫೋನ್ ಅನ್ನು ರಬ್ಬರ್ ಬ್ಯಾಂಡ್ ಹಾಕಿ ಹಾಗೆಯೇ ಬಳಸುತ್ತಾರೆ. ಆದರೆ ಫೋನ್‌ನೊಳಗೆ ಉಬ್ಬಿರುವ ಬ್ಯಾಟರಿ ಸಣ್ಣ ಟೈಮ್ ಬಾಂಬ್‌ನಂತೆ ಅಪಾಯಕಾರಿಯಾಗಬಹುದು ಎಂಬುದು ನಿಮಗೆ ತಿಳಿದಿದೆಯೇ? ಹಾಗಾದರೆ ಹಳೆಯ ಫೋನ್‌ಗಳ ಬ್ಯಾಟರಿ ಉಬ್ಬುವುದೇಕೆ?.

ಫೋನ್‌ನ ಬ್ಯಾಟರಿ ಉಬ್ಬುವುದೇಕೆ?

ಇಂದಿನ ಬಹುತೇಕ ಸ್ಮಾರ್ಟ್‌ಫೋನ್‌ಗಳಲ್ಲಿ ಲಿಥಿಯಂ-ಐಯಾನ್ ಅಥವಾ ಲಿಥಿಯಂ-ಪಾಲಿಮರ್ ಬ್ಯಾಟರಿಗಳನ್ನು ಬಳಸಲಾಗುತ್ತದೆ. ಈ ಬ್ಯಾಟರಿಗಳು ತೆಳುವಾದ ವಿನ್ಯಾಸ ಹೊಂದಿದ್ದು, ವೇಗವಾಗಿ ಚಾರ್ಜ್ ಆಗುತ್ತವೆ. ಆದರೆ ಇವುಗಳಿಗೂ ನಿರ್ದಿಷ್ಟ ಜೀವಿತಾವಧಿ ಇರುತ್ತದೆ.

ಬ್ಯಾಟರಿಯೊಳಗೆ ನಡೆಯುವ ರಾಸಾಯನಿಕ ಕ್ರಿಯೆಗಳ ಮೂಲಕ ವಿದ್ಯುತ್ ಉತ್ಪಾದನೆಯಾಗುತ್ತದೆ ಮತ್ತು ಸಂಗ್ರಹವಾಗುತ್ತದೆ. ಫೋನ್ ಹಳೆಯದಾಗುತ್ತಿದ್ದಂತೆ ಬ್ಯಾಟರಿಯೊಳಗಿನ ಎಲೆಕ್ಟ್ರೋಲೈಟ್ ಎಂಬ ರಾಸಾಯನಿಕ ವಸ್ತು ನಿಧಾನವಾಗಿ ಕ್ಷೀಣಿಸಲು ಆರಂಭಿಸುತ್ತದೆ. ಈ ರಾಸಾಯನಿಕ ಬದಲಾವಣೆಗಳಿಂದಾಗಿ ಬ್ಯಾಟರಿಯೊಳಗೆ ಇಂಗಾಲದ ಡೈಆಕ್ಸೈಡ್ ಸೇರಿದಂತೆ ವಿವಿಧ ಅನಿಲಗಳು ಉತ್ಪತ್ತಿಯಾಗಬಹುದು.

ಫೋನ್‌ನ ಬ್ಯಾಟರಿಯು ಎಲ್ಲ ಕಡೆಯಿಂದಲೂ ಮುಚ್ಚಿದ ರಚನೆ ಹೊಂದಿರುವುದರಿಂದ ಈ ಅನಿಲಗಳು ಹೊರಬರಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಬ್ಯಾಟರಿಯೊಳಗೆ ಒತ್ತಡ ಹೆಚ್ಚಾಗಿ ಅದು ಉಬ್ಬಲು ಆರಂಭಿಸುತ್ತದೆ.

ಇದರ ಜೊತೆಗೆ, ಫೋನ್ ಅನ್ನು ಗಂಟೆಗಟ್ಟಲೆ ಚಾರ್ಜಿಂಗ್‌ನಲ್ಲೇ ಬಿಡುವುದು, ಕಳಪೆ ಗುಣಮಟ್ಟದ ಚಾರ್ಜರ್ ಬಳಸುವುದು, ಫೋನ್ ಪದೇಪದೇ ಕೆಳಗೆ ಬೀಳುವುದು ಮತ್ತು ಹೆಚ್ಚಿನ ಉಷ್ಣಾಂಶವಿರುವ ಪ್ರದೇಶಗಳಲ್ಲಿ ಇಡುವುದು ಕೂಡ ಬ್ಯಾಟರಿ ಉಬ್ಬುವ ಸಮಸ್ಯೆಯನ್ನು ಹೆಚ್ಚಿಸಬಹುದು.

ಉಬ್ಬಿದ ಬ್ಯಾಟರಿ ಎಷ್ಟು ಅಪಾಯಕಾರಿ?

ನಿಮ್ಮ ಫೋನ್‌ನ ಬ್ಯಾಟರಿ ಉಬ್ಬಿದ್ದರೆ ಅದನ್ನು ಯಾವುದೇ ಕಾರಣಕ್ಕೂ ನಿರ್ಲಕ್ಷಿಸಬಾರದು. ಇದು ನಿಮ್ಮ ಸುರಕ್ಷತೆಗೆ ಸಂಬಂಧಿಸಿದ ಗಂಭೀರ ಸಮಸ್ಯೆಯಾಗಿದೆ. ಬ್ಯಾಟರಿಯೊಳಗೆ ಉತ್ಪತ್ತಿಯಾಗುವ ಅನಿಲಗಳು ದಹನಶೀಲವಾಗಿರಬಹುದು. ಬ್ಯಾಟರಿ ಉಬ್ಬಿದಾಗ ಅದರ ಒತ್ತಡವು ಫೋನ್‌ನ ಡಿಸ್‌ಪ್ಲೇ ಮತ್ತು ಮದರ್‌ಬೋರ್ಡ್ ಮೇಲೂ ಪರಿಣಾಮ ಬೀರಬಹುದು. ಇಂತಹ ಸ್ಥಿತಿಯಲ್ಲಿ ಫೋನ್ ಆಕಸ್ಮಿಕವಾಗಿ ಕೆಳಗೆ ಬಿದ್ದರೆ ಅಥವಾ ಅದರ ಮೇಲೆ ಒತ್ತಡ ಬಿದ್ದರೆ ಬ್ಯಾಟರಿಯ ಹೊರಪದರ ಹಾನಿಗೊಳಗಾಗಬಹುದು. ಇದರಿಂದ ಬ್ಯಾಟರಿಯೊಳಗಿನ ರಾಸಾಯನಿಕ ವಸ್ತುಗಳು ಹೊರಬಂದು ಬೆಂಕಿ ಹೊತ್ತಿಕೊಳ್ಳುವ ಅಪಾಯವಿದೆ.

ಸುರಕ್ಷತೆಗಾಗಿ ಏನು ಮಾಡಬೇಕು?

ನಿಮ್ಮ ಫೋನ್‌ನ ಹಿಂಭಾಗದ ಕವರ್ ಮೇಲಕ್ಕೆ ಎದ್ದಿರುವುದು ಅಥವಾ ಫೋನ್ ಮಧ್ಯಭಾಗದಲ್ಲಿ ಉಬ್ಬಿರುವುದು ಕಂಡುಬಂದರೆ ತಕ್ಷಣ ಎಚ್ಚರಿಕೆ ವಹಿಸಬೇಕು. ಮೊದಲು ಫೋನ್ ಅನ್ನು ಬಳಸುವುದನ್ನು ನಿಲ್ಲಿಸಿ, ಸುರಕ್ಷಿತವಾಗಿ ಸಾಧ್ಯವಾದರೆ ಸ್ವಿಚ್ ಆಫ್ ಮಾಡಿ. ಇಂತಹ ಫೋನ್ ಅನ್ನು ಮತ್ತೆ ಚಾರ್ಜಿಂಗ್‌ಗೆ ಹಾಕಬಾರದು. ಚಾರ್ಜಿಂಗ್‌ನಿಂದ ಬ್ಯಾಟರಿಯೊಳಗಿನ ಉಷ್ಣಾಂಶ ಹೆಚ್ಚಾಗಿ ಅಪಾಯ ಉಂಟಾಗಬಹುದು.

ಇಂತಹ ಸಂದರ್ಭದಲ್ಲಿ ಅತ್ಯಂತ ಸುರಕ್ಷಿತ ಮಾರ್ಗವೆಂದರೆ ಅಧಿಕೃತ ಸೇವಾ ಕೇಂದ್ರವನ್ನು ಸಂಪರ್ಕಿಸುವುದು. ಅಲ್ಲಿನ ತಂತ್ರಜ್ಞರಿಂದ ಬ್ಯಾಟರಿಯನ್ನು ಪರಿಶೀಲಿಸಿ, ಅಗತ್ಯವಿದ್ದರೆ ಬದಲಾಯಿಸಿಕೊಳ್ಳಬೇಕು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ