ಅಟ್ಲಿ ಸಿನಿಮಾಕ್ಕೆ ಅಲ್ಲು ಅರ್ಜುನ್ ಕಠಿಣ ತಯಾರಿ, ಫಿಸಿಕಲ್ ಜೊತೆ ಮೆಂಟಲ್ ತರಬೇತಿ

ಅಲ್ಲು ಅರ್ಜುನ್ (Allu Arjun) ನಟನೆಯ ‘ಪುಷ್ಪ 2’ (Pushpa 2) ಸಿನಿಮಾ ಸಾವಿರ ಕೋಟಿಗೂ ಹೆಚ್ಚಿನ ಕಲೆಕ್ಷನ್ ಮಾಡಿದ್ದು, ಹಲವು ದಾಖಲೆಗಳನ್ನು ಮುರಿದು ಹೊಸ ದಾಖಲೆಗಳನ್ನು ಬರೆದಿದೆ. ‘ಪುಷ್ಪ 2’ನ ಭರ್ಜರಿ ಗೆಲುವಿನ ಬಳಿಕ ಅಂತಹುದೇ ದೊಡ್ಡ ಸ್ಕೇಲ್​ನ ಸಿನಿಮಾಗಳನ್ನು ಅಲ್ಲು ಅರ್ಜುನ್ ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ. ‘ಪುಷ್ಪ 2’ ಸಿನಿಮಾ ಬಳಿಕ ತ್ರಿವಿಕ್ರಮ್ ನಿರ್ದೇಶನದ ಸಿನಿಮಾದಲ್ಲಿ ಅಲ್ಲು ಅರ್ಜುನ್ ನಟಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಆ ಸಿನಿಮಾ ‘ಸಾಮಾನ್ಯ’ ಬಜೆಟ್​ನ ಸಿನಿಮಾ ಆಗಿರುವ ಕಾರಣ ಇದೀಗ ಅಲ್ಲು ಅರ್ಜುನ್ ಭಾರಿ ಬಜೆಟ್​ನ ಫ್ಯಾಂಟಸಿ ಕತೆಯುಳ್ಳ ಅಟ್ಲಿ ಸಿನಿಮಾದ ಚಿತ್ರೀಕರಣ ಪ್ರಾರಂಭಿಸಲಿದ್ದಾರೆ.

ಅಟ್ಲಿ, ಹಾಲಿವುಡ್​ನ ಮಾರ್ವೆಲ್​ ಸ್ಟುಡಿಯೋಸ್ ಮಾದರಿಯ ಕತೆಯನ್ನು ಮಾಡಿದ್ದು, ‘ಗಾರ್ಡಿಯನ್ಸ್ ಆಫ್ ದಿ ಗ್ಯಾಲೆಕ್ಸಿ’ ರೀತಿ ಯಾವುದೋ ಬೇರೆ ಲೋಕದಲ್ಲಿ ನಡೆಯುವಂತೆ ಕತೆ ಹೆಣೆದುಕೊಂಡಿದ್ದಾರೆ. ಸಿನಿಮಾನಲ್ಲಿ ಚಿತ್ರ ವಿಚಿತ್ರ ಜೀವಿಗಳು, ಜನರು, ಅತ್ಯಾಧುನಿಕ ಆಯುಧಗಳು, ವಾಹನಗಳು ಇರಲಿವೆ. ಈ ಸಿನಿಮಾದಲ್ಲಿ ಅಲ್ಲು ಅರ್ಜುನ್ ಸೂಪರ್ ಹೀರೋ ಪಾತ್ರದಲ್ಲಿ ನಟಿಸಲಿದ್ದಾರೆ.

ಈ ಸಿನಿಮಾಕ್ಕಾಗಿ ಅಲ್ಲು ಅರ್ಜುನ್ ಈಗಾಗಲೆ ತಯಾರಿ ಆರಂಭಿಸಿದ್ದಾರೆ. ಸಿನಿಮಾಕ್ಕಾಗಿ ಫಿಸಿಕಲ್ ಮಾತ್ರವೇ ಅಲ್ಲದೆ ಮೆಂಟಲ್ ತಯಾರಿಯನ್ನು ಸಹ ಅಲ್ಲು ಅರ್ಜುನ್ ಮಾಡಲಿದ್ದಾರೆ. ಇತ್ತೀಚೆಗಷ್ಟೆ ಹಾಲಿವುಡ್ ಫಿಟ್​ಸೆನ್ ಕೋಚ್ ಲಾಯ್ಡ್ ಸ್ಟಿವನ್ಸ್ ಜೊತೆಗೆ ಅಲ್ಲು ಅರ್ಜುನ್ ಫೋಟೊ ವೈರಲ್ ಆಗಿದ್ದು, ಮುಂದಿನ ಸಿನಿಮಾಕ್ಕಾಗಿ ಅಲ್ಲು ಅರ್ಜುನ್ ಅವರನನ್ನು ಲಾಯ್ಡ್ ಸ್ಟಿವನ್ಸ್ ತರಬೇತುಗೊಳಿಸಲಿದ್ದಾರೆ.

ಇದನ್ನೂ ಓದಿ:‘ನಮಗೆ ಈಗ ವೇದಿಕೆ ಸಿಕ್ಕಿದೆ’; ವೇವ್ಸ್ ಬಗ್ಗೆ ಅಲ್ಲು ಅರ್ಜುನ್ ಮಾತು

ಈ ಸಿನಿಮಾದ ಚಿತ್ರೀಕರಣ ಅತ್ಯಂತ ಕಠಿಣವಾಗಿರಲಿದ್ದು, ಬಹಳ ಸುದೀರ್ಘವಾಗಿಯೂ ಚಿತ್ರೀಕರಣ ನಡೆಯಲಿದೆ. ಇದೇ ಕಾರಣಕ್ಕೆ ದೈಹಿಕ ತರಬೇತಿಯ ಜೊತೆಗೆ ಮಾನಸಿಕ ತರಬೇತಿಯನ್ನು ಸಹ ಅಲ್ಲು ಅರ್ಜುನ್ ಪಡೆಯುತ್ತಿದ್ದಾರೆ. ಸಿನಿಮಾದಲ್ಲಿ ಅಲ್ಲು ಅರ್ಜುನ್ ನಿರ್ವಹಿಸುವ ಪಾತ್ರದ ಆಟಿಟ್ಯೂಡ್​ಗೆ ಸರಿಹೊಂದುವಂತೆ ಮಾನಸಿಕ ತರಬೇತಿಯನ್ನು ಅಲ್ಲು ಅರ್ಜುನ್​ಗೆ ನೀಡಲಾಗುತ್ತಿದೆಯಂತೆ.

ಇತ್ತೀಚೆಗಷ್ಟೆ ಅಲ್ಲು ಅರ್ಜುನ್ ಮತ್ತು ಅಟ್ಲಿ ಅವರುಗಳು ಹಾಲಿವುಡ್​ಗೆ ಹೋಗಿ ಅಲ್ಲಿನ ದೊಡ್ಡ ದೊಡ್ಡ ವಿಎಫ್​ಎಕ್ಸ್ ಸಂಸ್ಥೆಗಳು, ಪ್ರಾಸ್ತೆಟಿಕ್ ಸಂಸ್ಥೆಗಳೊಟ್ಟಿಗೆ ಮಾತುಕತೆ ಆಡಿದ್ದು, ತಮ್ಮ ಸಿನಿಮಾಕ್ಕೆ ಬೇಕಾದ ಪ್ರಾಸ್ತೆಟಿಕ್​ಗಳನ್ನು, ವಿಎಫ್​ಎಕ್ಸ್ ಮಾಡೆಲ್​ಗಳನ್ನು, ಥೀಮ್​ಗಳನ್ನು ರೆಡಿ ಮಾಡಿಸಿಕೊಂಡಿದ್ದಾರೆ. ಇದರ ಜೊತೆಗೆ ಅಲ್ಲು ಅರ್ಜುನ್ ಅವರ ಫೇಶಿಯಲ್ ಎಕ್ಸ್​ಪ್ರೆಶನ್ ಕ್ಯಾಪ್ಚರ್ ಅನ್ನು ಸಹ ಮಾಡಲಾಗಿದೆ. ಈ ಸಿನಿಮಾಕ್ಕೆ ಸನ್ ನೆಟ್​ವರ್ಕ್ಸ್​ನ ಕಲಾನಿಧಿಮಾರನ್ ಬಂಡವಾಳ ಹೂಡಿದ್ದಾರೆ. ಸಿನಿಮಾದಲ್ಲಿ ಪ್ರಿಯಾಂಕಾ ಚೋಪ್ರಾ ನಾಯಕಿ ಎನ್ನಲಾಗುತ್ತಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ